ວຽງຈັນອອກແບບແຜນແກ້ໄຂ ແຮງງານ ຕ່າງດ້າວ


2013-11-06
Share
F-vt ຄຸ້ມຕລາດຈີນເກົ່າ ໃນນະຄອນຫລວງວຽງຈັນ ທີ່ເຕັມໄປດ້ວຍຊາວຈີນ ທີ່ເຂົ້າມາແບບຖືກຕ້ອງ ແລະບໍ່ຖືກຕ້ອງ ຕາມກົດໝາຍ
RFA

 

ບັນຫາແຮງງານຕ່າງດ້າວ ທີ່ບໍ່ຈົດທະບຽນແບບ ຖືກຕ້ອງຕາມກົດຫມາຍ ໃນນະຄອນຫລວງວຽງຈັນ ໃນປັດຈຸບັນ ຄາດວ່າມີກວ່າ 4 ພັນຄົນ ເຈົ້າຫນ້າທີ່ແຮງງານແລະສວັດດີການສັງຄົມກ່າວວ່າ ສາເຫດທີ່ບໍ່ສາມາດ ຈົດທະບຽນແຮງງານຕ່າງດ້າວ ໄດ້ທັງຫມົດນັ້ນເປັນຍ້ອນວ່າ ການ ເກັບກໍາຂໍ້ມູນຣະຫວ່າງຫນ່ວຍງານຕ່າງໆຂອງຣັຖບານ ບໍ່ເປັນເອກກະພາບ ທາງການຈື່ງມີແຜນການຈະໃຊ້ນະໂຍບາຍປະຕູດຽວເປັນວຽງຈັນ model ໃນການແກ້ໄຂບັນຫາແຮງງານ ໃນອະນາຄົດ ດ້ວຍການຕັ້ງຫ້ອງງານສະເພາະກິຈ ຂຶ້ນມາເກັບກໍາຂໍ້ມູນ ແຕ່ຜູ້ດຽວ:

"ຕ້ອງໄດ້ຜ່ານປະຕູດຽວ ຕົວຢ່າງວ່າ ອະນຸຍາດເຂົາເຂົ້າເຮົາຕ້ອງໄດ້ເອົາຈຸດໃດຈຸດນຶ່ງ ຂແນງການທີ່ກ່ຽວຂ້ອງກະຊວງທີ່ກ່ຽວຂ້ອງ ຕ້ອງຫັນ ຂແນງການທີ່ກ່ຽວຂ້ອງຢູ່ນໍາແຂວງປະຕິບັດ ເພາະດຽວນີ້ມັນບໍ່ມີ ທີ່ວ່າ ຈະເປັນບົດຮຽນ ໃຫ້ແຂວງອື່ນໆ ນະຄອນຫລວງ ວຽງຈັນ ເປັນຈຸດ ທົດລອງ ເພາະເຮົາຢູ່ສູນກາງ ເພາະວ່າກະຊວງພາຍໃນ ເປັນຜູ້ຊີ້ແນະ ກົມກວດກາເປັນຜູ້ຊີ້ນຳ".

ທ່ານອະທິບາຍຕໍ່ໄປວ່າ ໃນປັດຈຸບັນມີຫລາຍຫນ່ວຍງານ ຫລືຜແນກອອກໃບ ເຮັດວຽກໃຫ້ແຮງງານຕ່າງດ້າວ ເຂົ້າມາເຮັດວຽກໃນລາວ ດັ່ງ ຜແນກແຜນການແລະການລົງທຶນ ຜແນກອຸດສາຫະກັມແລະການຄ້າ ຜແນກແຮງງານແລະສວັດດີການສັງຄົມ ແຕ່ລະຜແນກບໍ່ມີການແລກ ປ່ຽນຂໍ້ມູນຣະຫວ່າງກັນ ເຮັດໃຫ້ມີຄວາມສັບສົນ ໃນການເກັບກໍາຂໍ້ມູນແບບຖືກຕ້ອງ ຈື່ງເປັນຊ່ອງໂວ່ ເຮັດໃຫ້ມີ ແຮງງານຕ່າງດ້າວ ເຂົ້າມາ ເຮັດວຽກແບບຜິດກົດຫມາຍໃນລາວຫລາຍຂຶ້ນ.

ທ່ານກ່າວຕຶ່ມວ່າ ໃນຕ່າງແຂວງກໍປະສົບກັບບັນຫາດັ່ງກ່າວເຊັ່ນດຽວກັນ ໂດຍສະເພາະແຂວງທີ່ມີຊາຍແດນຕິດກັບວຽດນາມແລະຈີນ ເພາະ ມີແຮງງານວຽດນາມແລະຈີນ ລັກເຂົ້າມາເຮັດວຽກ ແບບຜິດກົດຫມາຍ ໃນລາວຢ່າງຫລວງຫລາຍ ບາງຄົນກໍມາໃນນາມນັກທ່ອງທ່ຽວແລ້ວ ຢູ່ເລີຍ ບາງຄົນກໍມາແບບນັກທຸຣະກິດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ