IMF ຄາດເສຖກິຈລາວ ກັບມາເຕີບໂຕ ໃນປີໜ້າ

ກອງທຶນການເງິນສາກົນ ຫຼື IMF ໄດ້ສຳເຣັດການເຄື່ອນໄຫວ ວຽກງານຜ່ານລະບົບທາງໄກກັບ ສປປ ລາວ ໃນການຕິດຕາມເສຖກິຈ ມະຫາພາກຂອງລາວ ປະຈຳປີ 2021 ຕາມມາຕຣາ 4 ຂອງຣະບຽບ IMF ຣະຫວ່າງວັນທີ 6-12 ທັນວາ ປີ 2021 ນີ້ ຊື່ງຣະບຸວ່າ ສພາບເສຖກິຈຂອງລາວມີການຂຍາຍໂຕ ຊ້າປະມານ 2.1% ໃນປີ 2021 ຍ້ອນພະເຊີນກັບ ການຣະບາດຂອງໂຄວິດ-19 ເຫມືອນກັບຫຼາຍປະເທດໃນໂລກແລະຄາດວ່າ ເສຖກິຈລາວຈະກັບມາເຕີບໂຕ 3% ໃນປີ 2022.

ຂນະທີ່ນັກເສຖສາດ ຈາກທະນາຄານໂລກ ຫຼື ADB ປະຈຳລາວ ກ່າວຕໍ່ເອເຊັຽເສຣີໃນວັນທີ 29 ທັນວ່ານີ້ວ່າ ໃນປີ 2021 ມີພຽງແຕ່ຂແນງໄຟຟ້າ ແລະກະສີກັມ ທີ່ສາມາດເຄືອນໄຫວໄດ້ເກືອບເຕັມສ່ວນ ສ່ວນຂແນງອື່ນໆ ມີຄວາມຍຸ້ງຍາກ ເປັນບັນຫາສຳຄັນທີ່ພາໃຫ້ເສຖກິຈລາວ ຂຍາຍໂຕຊ້າໃນປີ 2021. ດັ່ງທ່ານເວົ້າວ່າ.

“ເບີ່ງພາບຮູບຈະເຫັນວ່າອັນນີ້ ເປັນຂໍ້ຍຸງຍາກ ຖືວ່າຄວາມສ່ຽງມັນຍັງສຸງເນາະ ມີບາງອັນມັນດີຂຶ້ນຢູ່ ແຕ່ຍັງຫຼາຍປັດໃຈທີ່ວ່າ ມັນບໍ່ສອດຄ່ອງກັນ ພັກດັນແທ້ໆ ກະມີແຕ່ໄຟ້ຟາ ກັບກະສິກັມ ປັດຈຸບັນນີ້ນ່າ ຟື້ນໂຕຄືນມາແທ້ປີ 2022 ຫລັງຈາກລາວເປີດຣົດໄຟໃໝ່ ທາງດ່ວນໃໝ່ແລ້ວມັນຈະພັກດັນເສຖກິຈເພີ່ມຂຶ້ນ.”

ທ່ານກ່າວຕື່ມວ່າ ເຖີງແມ່ນວ່າ IMF ຈະຄາດຄະເນວ່າ ເສຖກິຈລາວຈະກັບມາຂຍາຍໂຕ 3% ໃນປີ 2022 ແຕ່ທາງການລາວຕ້ອງໄດ້ເອົາໃຈໃສ່ ມາຕການຄວບຄຸມ ໂຄວິດ-19ໃຫ້ມີປະສິດທິພາຍ, ນຳໃຊ້ປະໂຍດເສັ້່ນທາງຣົດໄຟລາວ-ຈີນ ທາງດ່ວນ ແລະມາຕການຄວບຄຸມເງິນເຟີ້ ແລະເງິນກີບອອ່ນຄ່າໃຫ້ໄດ້.

ນອກຈາກນີ້ ທາງການລາວຕ້ອງໄດ້ສົ່ງເສີມອາຊີບ ການຜລິີດແລະສົ່ງອອກຕາມໂຄຕາ ແຕ່ຍັງມີຄວາມສ່ຽງສຸງຢູ່ຍ້ອນພັຍທັມມະຊາດອາດຈເກີດຂຶ້ນໄດ້ທຸກເມື່ອ ເປັນຕົ້ນພັຍແຫ້ງແລ້ງ ຈະເຮັດໃຫ້ປາຣິມານນ້ຳໃນການປູກຝັງບໍ່ພຽງພໍແລະຈະເປັນອຸປສັກຕໍ່ການຜລິດໄຟຟ້າ ຊື່ງເປັນສ່ວນສຳຄັນ ໃນການພັກດັນເສຖກິຈລາວໃຫ້ບັນລຸເປົ້າໝາຍໄດ້.

ທ່ານ ສອນໄຊ ສີພັນດອນ ຮອງນາຍົກຣັຖມົນຕຣີແລະຣັຖມົນຕຣີກະຊວງແຜນການແລະການລົງທຶນໄດ້ກ່າວຕໍ່ກອງປະຊຸມສມັຍສາມັນເທື່ອທີ 2 ຂອງສພາແຫ່ງຊາດຊຸດທີ 9 ໃນວັນທີ 1 ພຶສຈິກາຜ່ານມາວ່າ ໝົດປີ 2021 ນີ້ ເສຖກິຈລາວຈະຂຍາຍໂຕ ໃນອັດຕຣາ 3% ຊື່ງບໍ່ບັນລຸຕາມແຜນທີ່ ສພາແຫ່ງຊາດຮັບຮອງໃວ້່ ໃນອັດຕຣາ 4% ສາເຫດມາຈາກພາກທຸຣະກິດຂນາດນ້ອຍແລະຂນາດກາງ ທີ່ເປັນໂຕຂັບເຄື່ອນເສຖກິຈ-ສັງຄົມ ຍັງບໍ່ສາມາດຟື້ນໂຕໄດ້ດີ.

“ການເຕີບໂຕທາງດ້່ານເສຖກິຈສົມກັບປັດຈັຍທ່າອ່ຽງແລະທ່າແຮງບົມຊ້ອນຕ່າງໆ ທ້າຍປີຈື່ງລວມຍອດຜລິດຕະພັນພາຍໃນ ໝົດປີ 2021 ຈະຂຍາຍໂຕຣະດັບ 3.0 ຂແນງການທີ່ຈະຊຸກຍູ້ໃຫ້ເສຖກິຈສືບຕໍ່ຂຍາຍໂຕ ແມ່ນ ຂແນງການກໍ່ສ້າງ ຂແນງການໄຟຟ້າ ຂແນງການບໍຣິການ ການເງິນ ປະກັນພັຍແລະຂແນງການຮັກສາສຸຂພາບ.”

ທ່ານກ່າວຕື່ມວ່າ ເພື່ອເຮັດໃຫ້ເສຖກິຈລາວກັບມາຟື້ນໂຕ ຂຍາຍໂຕອີກຄັ້ງ ທາງການລາວ ຈຳເປັນຕ້ອງໄດ້ເປີດປະເທດໃນປີ 2022 ເພືອຮັບນັກລົງທຶນແລະນັກທ່ອງທ່ຽວຕ່າງຊາດ ເຖີງແມ່ນວ່າສພາບການໂຄວິດ-19 ໃນລາວ ຍັງຮຸ່ນແຮງຢູ່ກໍຕາມ ຊື່ງເປັນແນວທາງດຽວທີ່ຈະສາມາດຟື້ນຟູສພາບເສຖກິຈລາວໄດ້.

ຂນະດຽວກັນ ຜູ້ຕ່າງໜ້າ ສມາຄົມສົ່ງເສີນ ຜູ້ປະກອບການຂນາດນ້ອຍແລະຂນາດກາງກໍເຫັນວ່າ ໃນປີ 2021 ນີ້ ຍັງມີຫຼາຍທຸຣະກີິດຍັງບໍ່ສາມາດຟື້ນໂຕໄດ້ຕາມປົກກະຕິ ເປັນຕົ້ນທຸຣະກິດສົ່ງອອກ, ທຸຣະກິດທ່ອງທ່ຽວແລະບໍຣິການເພາະຕ້ອງອາສັຍກຸ່ມນັກທ່ອງທ່ຽວເປັນຫລັກ ແຕ່ກໍມີຫຼາຍທຸຣະກິດເລີ້ມກັບມາເຄື່ອນໄຫວໄດ້ແລ້ວ ໃນຮູບແບບ DELIVERY ເປັນຫລັກ.

ດັ່ງຜູ້ຕ່າງໜ້າ ສມາຄົມສົ່ງເສີມຜູ້ປະກອບການທຸຣະກິດຂນາດນ້ອຍແລະຂນາດກາງ ເຂດນະຄອນຫລວງວຽງຈັນ ທ່ານນື່ງກ່າວຕໍ່ເອເຊັຽເສຣີໃນວັນທີ 29 ທັນວ່ານີ້ວ່າ:

“ກະມີການເຄືອນໄຫວປົກກະຕິຫັ້ນແຫລະ ແຕ່ບາງທ່ານກະໜັກເລີຍໃດ ຫຼາຍໆອັນຫາວິທີແກ້ໄຂຫຼາຍໆທາງ ວ່າຊັນທໍ້ ບາງອັນມັນກໍບໍ່ໄດ້ອີ່ຫລິຊັ້ນນ່າ ແຮ່ງທຸຣະກິດທ່ອງທ່ຽວ ທຸຣະກິດຮ້ານອາຫານແຮ່ງຍາກ.”

ຝ່າຍ ສມາຄົມ ອຸດສາຫະກັມປຸງແຕ່ງໄມ້ສຳເຮັດຮູບແຫ່ງຊາດລາວ ທ່ານນື່ງເວົ້າວ່າໃນໄລຍະຜ່ານມາ ປະເທດລາວ ມີການສົ່ງອອກໄມ້ແປຮູບໄປຕ່າງປະເທດ ເປັນຈຳນວນຫລວງຫຼາຍ ແຕ່ມາສລໍໂຕ ໃນໄລຍະໂຄວິີດ-19 ຣະບາດ ເຮັດໃຫ້ສມາຄົມບໍ່ສາມາດສົ່ງອອກໄມ້ແປຮູບໄປຕ່າງປະເທດໄດ້ ຄາດວ່າ ໃນປີ 2022 ຈະກັບມາເຄື່ອນໄຫວທຸຣະກິດໄດ້ອີກ. ດັ່ງທ່ານເວົ້າວ່າ:

“ຊ່ວງນີ້ບໍໄດ້ບໍ່ໄດ້ສົ່ງເຈົ້າ (ສົ່ງໄປຕ່າງປະເທດ) ເພີ່ນປິດເນາະ ຊວ່ງມັນກ່ອນໂຄວິດເນາະ ໄທເຮົາກະມີເນາະ ແລ້ວ ກະເກົາຫລີ ຍີ່ປຸ່ນ ກະເຄີຍມີຢູ່.”

ສ່ວນຄົນລາວຜູ້ທີ່ມີອາຊີິບຄ້າຂາຍໂດຍທົ່ວໄປກໍເຫັນວ່າ ເສຖກິຈລາວ ຕົກຕ່ຳຫຼາຍ ແລະກໍບໍ່ເຫັນຫົນທາງ ທີ່ເສຖກິຈລາວຈະຟື້ນໂຕຄືນໃໝ່ໄດ້ ດັ່ງແມ່ຄ້າຄົນນື່ງຢູ່ແຂວງຈຳປາສັກເວົ່າວ່າ:

“ຫຼາຍຜູ້ທຸກໆຕື່ມ ຜູ້ມີກະມີຕື່ມ ດຽວນີ້ເງີນກີບແຮງອອ່ນໂຕ ຜູ້ເຂົາມີກະມີເອົາມີເອົາ ເສຖກິຈຈັ່ງຊີ້ມີແນວຫຍັງວ່າ ປະກອບສ່ວນໃສ່ກັນໝົດອີ່ຫຍັງກະດາຍ.”

ການພົບປະກັບຂອງກອງທຶນສາກົນກັບທາງການລາວໃນປີນີ້  ໄດ້ມີການປະເມີນສີ່ງທ້າທາຍ ທີ່ອາດເປັນຄວາມສ່ຽງແລະ ທ່າແຮງໃນການພັທນາ ກໍຄືຂໍ້ແນະນຳ ສຳລັບອົງການກ່ຽວຂ້ອງຂອງ ສປປລາວ ເພື່ອນຳໄປປັບປຸງໃນການດຳເນີນມາຕການທີ່ເໝາະສົມທາງດ້່ານການເງິນແລະແຜນງົປມານຂອງປະເທດລາວ ໃນປີ 2022 ແລະກມາຕການ ການຈັດຕັ້ງປະຕິບັດແຜນດັ່ງກ່າວ.

ກະຊວງການເງິນ ກໍໄດ້ສົ່ງພນັກງານເຂົ້າຮ່ວມຝຶກອົບໂຮມ ທີ່ຈັດໂດຍກອງທຶນການເງິນສາກົນກ່ຽວກັບການຄຸ້ມຄອງເສຖກິຈມະຫາພາກ,ຂໍ້ມູນສຖິຕິການເງິີນ,​ການວິຈັຍດ້ານໜີ້ສີນແລະການບໍຣິຫານຄັງເງິີນເທື່ອນີ້ນຳອີກ.