ປັດຈຸບັນ ທົ່ວປະເທດລາວ ຍັງເຫລືອຄອບຄົວທຸກຍາກ 20.88%

ປັດຈຸບັນ ທົ່ວປະເທດລາວ ມີຄອບຄົວທັງໝົດ 1,399,904 ຄອບຄົວ ແຕ່ໄດ້ລົງຮິບໂຮມຂໍ້ມູນທັງໝົດ 1,234,314 ຄອບຄົວ ຫລື ຄິດເປັນ 88.17% ຂອງຄອບຄົວທັງໝົດ ໃນນີ້ ຍັງມີຄອບຄົວທຸກຍາກ ຫລື ຄອບຄົວບໍ່ພົ້ນທຸກ ຈໍານວນ 257,670 ຄອບຄົວ ຄິດເປັນ 20.88% ຂອງຄອບຄົວ ທີ່ໄດ້ຮິບໂຮມຂໍ້ມູນໂຕຈິງ ອີງຕາມຂໍ້ຕົກລົງ ວ່າດ້ວຍ ການຮັບຮອງ ແລະ ປະກາດໃຊ້ ຜົນການກວດກາປະເມີນ ສະພາບພົ້ນທຸກ ແລະ ພັດທະນາ ສະບັບເລກທີ 87/ນຍ ທີ່ນາຍົກລັດຖະມົນຕີ ດຣ. ສອນໄຊ ສີພັນດອນ ໄດ້ເຊັນ ໃນວັນທີ 10 ເດືອນ 7 ປີ 2024.

ສະເພາະຢູ່ເມືອງນອງ ແຂວງ ສວັນນະເຂດ ມີປະຊາກອນ ປະມານ 5,000 ຄົນ ແລະ ປັດຈຸບັນ ມີ 68 ບ້ານ ທີ່ມີພຽງ 1 ບ້ານເທົ່ານັ້ນ ທີ່ປະກາດເປັນບ້ານພົ້ນທຸກ. ສ່ວນຄອບຄົວພົ້ນທຸກນັ້ນ ມີພຽງ 1,000 ປາຍຄອບຄົວເທົ່ານັ້ນ ເຊິ່ງຖືວ່າ ຍັງມີຄອບຄົວທຸກຍາກຫລາຍຢູ່ ເຮັດໃຫ້ເມືອງນອງ ຖືເປັນເມືອງ ທີ່ຍັງທຸກຍາກທີ່ສຸດ ໃນບັນດາເມືອງ ໃນແຂວງ ສວັນນະເຂດ. ດັ່ງ ເຈົ້າໝ້າທີ່ ຫ້ອງການກະສິກໍາ ແລະ ປ່າໄມ້ ຢູ່ເມືອງນອງ ແຂວງສວັນນະເຂດ ທ່ານໜຶ່ງ ກ່າວຕໍ່ ວິທຍຸ ເອເຊັຽເສຣີ ໃນມື້ວັນທີ 25 ກໍລະກົດ 2024 ທີ່ຜ່ານມານີ້ວ່າ:
“ສິ່ງທ້າທາຍ ໃນການແກ້ໄຂຄວາມທຸກຍາກ ມັນກໍມີຫລາຍຢ່າງ ມັນອີງໃສ່ຈຸດພິເສດທີ່ຕັ້ງຫັ້ນແຫລະ ເວົ້າເລື້ອງການລົງທຶນ ສາມາດຜລິດໄດ້ ແຕ່ເວົ້າເລື້ອງຮູບແບບ ການສົ່ງເສີມ ດ້ານການຕະຫລາດ ແບບບໍ່ຖາວອນ ເຮັດໃຫ້ປະຊາຊົນທີ່ຜະລິດຫັ້ນ ຍັງບໍ່ເອີ້ນວ່າ ເປັນລາຍຮັບ ທີ່ໝັ້ນຄົງຖາວອນ ເພາະວ່າຕະຫລາດ ໃນການສົ່ງເສີມ ມັນຍັງບໍ່ຖາວອນ.”
ເມືອງງາ ແລະ ເມືອງປາກແບງ ຖືເປັນສອງເມືອງ ທີ່ຍັງມີຄອບຄົວທຸກຍາກ ຫລາຍກວ່າເມືອງອື່ນໆ ໃນແຂວງອຸດົມໄຊ. ສະເພາະຢູ່ເມືອງງາ ກໍຍັງມີຄອບຄົວ ທີ່ທຸກຍາກຫລາຍຢູ່ ໂດຍສ່ວນຫລາຍ ຈະຢູ່ໃນເຂດຊົນນະບົດ ທີ່ຫ່າງໄກ ແລະ ເຮັດໄຮ່ເລື່ອນລອຍ ເປັນຫລັກ. ສິ່ງທ້າທາຍ ທີ່ເຮັດໃຫ້ ຍັງມີຄອບຄົວທີ່ທຸກຍາກ ໃນຫລາຍເຂດເມືອງ ກໍຍ້ອນວ່າ ປະຊາຊົນຍັງ ຂາດເຂີນອຸບປະກອນ ແລະ ເນື້ອທີ່ດິນ ໃນການທໍາມາຫາກິນ ເຮັດໃຫ້ລາຍຮັບ ຂອງຊາວບ້ານ ເຊິ່ງຖືເປັນໜຶ່ງ ໃນເກນທີ່ໃຊ້ປະເມີນ ຄອບຄົວທຸກຍາກ ຍັງຢູ່ຕ່ໍາກວ່າ 5 ລ້ານ 6 ແສນ ປາຍກີບ ຕໍ່ຄົນຕໍ່ປີ ເຊິ່ງການເປັນຄອບຄົວພົ້ນທຸກນັ້ນ ຕ້ອງຜ່ານເກນວັດແທກ 6 ຂໍ້ ພື້ນຖານ. ດັ່ງ ເຈົ້າໝ້າທີ່ກະສິກໍາ ແລະ ປ່າໄມ້ ຢູ່ເມືອງງາ ແຂວງອຸດົມໄຊ ທ່ານໜຶ່ງ ກ່າວວ່າ:
“ຄອບຄົວພົ້ນທຸກ ມັນຕ້ອງໄດ້ຜ່ານ 6 ມາດຕະຖານ ຄື ມາດຕະຖານ ການເປັນຢູ່ຂອງເຮືອນຄອບຄົວ ລາຍຮັບລາຍຈ່າຍ ຊີວິດການເປັນຢູ່ ຂຶ້ນຮອດເປັນເຮືອນ ຄົບປຸ໊ບກໍຖືວ່າພົ້ນທຸກເນາະ ທີ່ຢູ່ອາໄສ ມີດິນທໍາການຜະລິດຕ່າງໆ ຫັ້ນເນາະ ຜູ້ທີ່ທຸກຍາກ ກໍຖືວ່າຂາດເຂີນຫັ້ນແຫລະ.”

ຢູ່ເມືອງວາປີ ແຂວງ ສາລະວັນ ກໍຍັງມີຄອບຄົວທຸກຍາກ ຫລາຍກວ່າ 50% ແລະ ອາຊີບ ຂອງຊາວບ້ານ ສ່ວນຫລາຍ ແມ່ນປູພືດ ເປັນຕົ້ນ ມັນຕົ້ນ ແລະ ສາລີ ເຊິ່ງສ້າງລາຍຮັບໄດ້ ປະມານ 20 ຫາ 30 ລ້ານກີບ ຕໍ່ຄັ້ງເທົ່ານັ້ນ. ສ່ວນເຂົ້ານັ້ນ ສ່ວນຫລາຍ ປູກເພື່ອບໍລິໂພກ ພາຍໃນຄອບຄົວ ເຊິ່ງໃນແຕ່ລະປີ ຜົນຜະລິດ ກໍບໍ່ແນ່ນອນ ຍ້ອນສະພາບເນື້ອທີ່ດິນ ໃນເຂດດັ່ງກ່າວ ບໍ່ອໍານວຍ ແລະ ສະພາບອາກາດ ກໍບໍ່ແນ່ນອນ.
ຂະນະທີ່ບາງບ້ານ ເປັນຕົ້ນ ບ້ານນາມ່ວງ ແລະ ບ້ານແກ້ງນ້ອຍ ຢູ່ເມືອງວາປີ ໄຟຟ້າ ກໍຍັງເຂົ້າບໍ່ເຖິງ ແລະ ເຮືອນຢູ່ຂອງປະຊາຊົນ ກໍຍັງເປັນຕູບ ຫລື ເຮືອນແບບບູຮານ ເປັນຝາໄມ້ຢູ່. ດັ່ງ ຊາວບ້ານ ຢູ່ບ້ານນາໂພ ເມືອງວາປີ ແຂວງສາລະວັນ ທ່ານໜຶ່ງ ກ່າວໃນມື້ດຽວກັນວ່າ:
“ຄັນຊິສະເລັ່ຍໃນເມືອງກໍເກີນ 50% ຫັ້ນແຫລະ ຄອບຄົວພົ້ນທຸກຍາກໃນເມືອງ ເພາະວ່າມັນເປັນບ້ານທີ່ຢູ່ຕີນເຂົາ ເປັນບ້ານທີ່ຫ່າງໄກຈາກ ຖະໜົນຫົນທາງດໍາ ທາງຍາງຫັ້ນນ່າ ແມ່ນເປັນນາ ນາບໍ່ຫລາຍ ນາແບບວ່າບໍ່ເກີນໄຮ່ ສອງໄຮ່ ຈັ່ງຊີ້ຫັ້ນນ່າ ຕົກແລ້ງມາ ກໍຊິເປັນປູກເຂົ້າໂພດ ປູກມັນ ປູກຫຍັງຂາຍ ຄັນເວົ້າເລື້ອງຕົວເຮືອນ ທາງບ້ານແກ່ງນ້ອຍ ບ້ານນາມ່ວງ ກໍຍັງເປັນຕູບຢູ່ ເຈົ້າ.”
ຢູ່ເມືອງແປກ ແຂວງຊຽງຂວາງ ກໍຍັງມີຄອບຄົວ ທີ່ທຸກຍາກຢູ່ ປະມານ 40% ແລະ ສ່ວນຫລາຍ ອາໄສຢູ່ໃນເຂດນອກ ຫ່າງໄກຄືກັນ. ສ່ວນອາຊີບ ຂອງຊາວບ້ານ ໃນເຂດນອກ ກໍຄືການປູກຝັງທົ່ວໄປ ແລະ ລ້ຽງສັດ. ດັ່ງ ຊາວບ້ານ ຢູ່ເມືອງແປກ ແຂວງຊຽງຂວາງ ທ່ານໜຶ່ງ ກ່າວວ່າ:
“ກໍປະມານ 40% ນີ່ແຫລະ ບໍ່ ໃນເມືອງຫັ້ນ ບໍ່ມີຫລາຍແລ້ວ ມີແຕ່ເຂດນອກ ລ້ຽງສັດນີ້ແຫລະ ລ້ຽງສັດປູກຝັງທໍາມະດາ ເຮັດສວນຜັກ ເຮັດສວນຫລາຍແນວຫັ້ນນ່າ.”
ອີງຕາມປະກາດ ຮັບຮອງ ແລະ ກວດກາ ປະເມີນສະພາບພົ້ນທຸກ ແລະ ພັດທະນາ ສບັບລົງວັນທີ 10 ເດືອນ 7 ປີ 2024 ທີ່ຜ່ານມານີ້ ລະບຸວ່າ ທົ່ວປະເທດມີບ້ານທັງໝົດ 8,402 ບ້ານ ໃນນີ້ເປັນບ້ານພົ້ນທຸກ 5,438 ບ້ານ ບ້ານທີ່ຍັງທຸກຍາກ 2,964 ບ້ານ ແລະ ບ້ານພັດທະນາ 2,150 ບ້ານ ຂະນະທີ່ທົ່ວປະເທດ ມີທັງໝົດ  145 ເມືອງ 3 ນະຄອນ ເປັນເມືອງພົ້ນທຸກ 63 ເມືອງ ແລະ ເມືອງທີ່ຍັງທຸກຍາກ 85 ເມືອງ.

ໃນວາລະການດໍາເນີນກອງປະຊຸມ ສະໄໝສາມັນເທື່ຶຶອທີ 7 ຂອງສະພາແຫ່ງຊາດຊຸດທີ 9 ເມື່ອວັນທີ 12 ມິຖຸນາ 2024  ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ໄດ້ລາຍງານກ່ຽວກັບ ວຽກງານ ພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ ສປປ ລາວ ນັັບແຕ່ປີ 2021-2023 ວ່າ ໃນໄລຍະຜ່ານມາ ລັດຖະບານ ຈັດສັນງົບປະມານ ເຂົ້າໃສ່ການພັດທະນາຊົນນະບົດ ແລະແກ້ໄຂຄວາມທຸກຍາກ ໃນແຕ່ລະປີ ຢ່າງຕໍ່ເນື່ອງ. ໃນນີ້ງົບປະມານ ລົງທຶນຂອງລັດ ປີ 2021 ມີຈຳນວນ 122 ຕື້ກີບ, ປີ 2022 ມີຈໍານວນ 136 ຕື້ກີບ, ປິ 2023 ມີຈໍານວນ 178 ຕື້ກີບ, ການປ່ອຍສິນເຊື່ອ ທະນາຄານນະໂຍບາຍ ໃຫ້ 1,345 ບ້ານ.