ລາວຈະໃຫ້ຈີນ ເຂົ້າມາລົງທຶນ ດ້ານການກະເສດ ປອດສານພິດ ສົ່ງອອກໄປຈີນ

ກົມປູກຝັງ ກະຊວງກະສິກັມ ແລະ ປ່າໄມ້ ໄດ້ເຊັນບົດບັນທຶກຄວາມເຂົ້າໃຈກັບບໍຣິສັດ ໄໜສຽງພັດທະນາ ກະສິກັມ ແຂວງໄຮລົງຈ່ຽງ ຈຳກັດ ຈາກປະເທດຈີນເພື່ອລົງທຶນ ດ້ານການກະເສດສະອາດ ທັນສມັຍ ຢູ່ເມືອງໄຊທານີ ນະຄອນຫລວງວຽງຈັນ ແລະ ຕາມ ແລວທາງຣົຖໄຟລາວ-ຈີນ ໂດຍຜົລຜລິດທັງຫມົດຂອງບໍຣິສັດຈະສົ່ງອອກໄປປະເທດຈີນ.

ດັ່ງເຈົ້າຫນ້າທີ່ກະຊວງກະສິກັມ ແລະ ປ່າໄມ້ ທ່ານນຶ່ງກ່າວຕໍ່ວິທຍຸເອເຊັຽເສຣີໃນວັນທີ 21 ມີນານີ້ວ່າ:

“ໂຄງການນີ້ເປົ້າຫມາຽ ຂອງເພິ່ນອັນນທີນຶ່ງ ແມ່ນເພິ່ນຈະສ້າງ ຢູ່ໃນນະຄອນຫລວງ ເປັນຈຸດໃຈກາງເນາະຕໍ່ຈາກນັ້ນ ເພິ່ນຈະຂຍາຍໄປແຕ່ລະແຂວງ ໂດຍສະເພາະຕາມແລວທາງຣົຖໄຟນີ້ ທີ່ມີທ່າແຮງທີ່ມີພື້ນທີ່ຫັ້ນແຫລະເພິ່ນກາເຫນັ້ນໃສ່ພືດທີ່ວ່າສາມາດສາມາດ ສົ່ງອອກໄປ ສປ ຈີນ ເນາະໂຕຢ່າງ.”

ທ່ານກ່າວຕື່ມວ່າ ເບື້ອງຕົ້ນບໍຣິສັດແຫ່ງນີ້ ຈະເຂົ້າມາລົງທຶນຢູ່ 4 ຈຸດ ຄືຢູ່ສູນມາຕຖານ ກະສິກັມສະອາດພາຍໃນກົມປູກຝັງ ບ້ານໄຜ່ລອ້ມ, ບ້ານດົງບັງ ແລະ ບ້ານແກ້ງໄຄ້ ເມືອງໄຊທານີກ່ອນຈະຂຍາຍການລົງທຶນໄປຕາມແລວທາງຣົຖໄຟ ລາວ-ຈີນ ຊຶ່ງແຂວງເປົ້າຫມາຽ ທີ່ບໍຣິສັດຈີນຈະເຂົ້າໄປລົງທຶນ ນັ້ນກໍຈຂະເລືອກຕາມທ່າແຮງ ແລະພື້ນທີ່ເປັນສ່ວນສຳຄັນ ແຕ່ປັດຈຸບັນຍັງບໍ່ທັນໄດ້ກຳນົດວ່າ ຈະເປັນແຂວງໃດ.

ປັດຈຸບັນແຂວງອຸດົມໄຊ ຖືເປັນແຂວງນຶ່ງທີ່ມີກຸ່ມນັກລົງທຶນ ຈາກປະເທດຈີນເຂົ້າມາລົງທຶນ ດ້ານກະເສດເປັນຈຳນວນຫລາຍ ທັງໃນຮູບແບບໂຄງການ 2+3 ແລະ ໂຄງການເຊົ່າສັມປະທານ ທີ່ດິນເພື່ອລົງທຶນດ້ວຍຕົນເອງ 100% ທັງການຜລິດ ແລະ ສົ່ງອອກໄປຈີນ, ຂະນະທີ່ປະຊາຊົນລາວ ພາຍໃນແຂວງອຸດົມໄຊ ເກືອບຈະບໍ່ໄດ້ຮັບຜົລກະທົບຫຍັງ ຈາກໂຄງການລົງທຶນເຫລົ່ານັ້ນ. ການລົງທຶນໂຄງການປູກພືດ ຫລື ໂຄງການລົງທຶນຕ່າງໆ ທີ່ເປັນການລົງທຶນຂອງຈີນນັ້ນ ເປັນການລົງທຶນເພື່ອສ້າງຜົລປໂຍດ ໃຫ້ແກ່ນັກລົງທຶນຈີນ ພຽງຝ່າຍດຽວເທົ່ານັ້ນ.

ດັ່ງເຈົ້າຫນ້າທີ່ຜແນກກະສິກັມ ແລະ ປ່າໄມ້ ແຂວງອຸດົມໄຊ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຈີນນີ້ເວົ້າເຣື່ອງໂຄງການປູກພືດນີ້ ຂະເຈົ້າເຊົ່າແຕ່ເຣື່ອງດິນເບື້ອງ ປະຊາຊົນຜູ້ຢູ່ທຸກຍາກຜູ້ທີ່ວ່າຢູ່ຊົນນະບົດ ຈະບໍ່ໄດ້ຣາຍຮັບຈາກຂະເຈົ້າໃດສິນຄ້າ ທີ່ບໍ່ແມ່ນຄົນເຂົາຜລິດນີ້ຂະເຈົ້າ ຈະບໍ່ຊື້ໃຫ້ເຮົາໃດຂະເຈົ້າຈະເຮັດເປັນລະບົບ ເຄືອຂ່າຍຂອງເຂົາຫມົດ.”

ທ່ານກ່າວຕື່ມວ່າ ການລົງທຶນຄວນຈະສົ່ງເສີມ ໃຫ້ປະຊາຊົນລາວໃນພື້ນທີ່ ໄດ້ມີສ່ວນຮ່ວມກັບໂຄງການເຫລົ່ານັ້ນ ນຳດ້ວຍເພື່ອຊ່ອຍໃຫ້ປະຊາຊົນລາວ ມີອາຊີບແລະຣາຍຮັບຢ່າງຫມັ້ນຄົງ ແລະ ທີ່ສຳຄັນຍັງຊ່ອຍໃຫ້ປະຊາຊົນລາວ ໄດ້ຫລຸດພົ້ນອອກຈາກຄວາມທຸກຍາກ ຕາມແນວທາງຂອງຣັຖບານລາວ.

ຊາວລາວ ໃນນະຄອນຫລວງວຽງຈັນກ່າວວ່າ ບໍ່ເຊື່ອຫມັ້ນໂຄງການປູກພືດ ແລະ ຫມາກໄມ້ ຂອງນັກລົງທຶນຈີນຈະສ້າງຜົລປໂຍດ ໃຫ້ກັບປະຊາຊົນລາວເນື່ອງຈາກ ໄລຍະຫລາຍສິບປີມານີ້ ກໍມີບໍຣິສັດຈີນຈຳນວນຫລາຍທີ່ເຂົ້າມາລົງທຶນ ໃນຮູບແບບຕ່າງໆ ແຕ່ຍັງບໍ່ເຫັນເປັນຮູບປະທັມເທື່ອວ່າ ມີປະຊາຊຊົນຈະສາມາດຫລຸດພົ້ນ ອອກຈາກຄວາມທຸກຍາກໄດ້.

ຍົກໂຕຢ່າງ ປະຊາຊົນເມືອງວັງວຽງ ແຂວງວຽງຈັນມີການປູກຫມາກກ້ຽງ ເປັນອາຊີບຫລັກ ແລະ ຍັງຕ້ອງການຕລາດຮັບຊື້ ເປັນຈຳນວນຫລາຍກໍ ບໍ່ເຫັນນັກລົງທຶນຈີນໃຫ້ຄວາມສົນໃຈ ທີ່ຈະຮັບຊື້ຫມາກກ້ຽງຊາວກະສິກອນລາວເທື່ອ ແຕ່ພັດມີກຸ່ມນັກລົງທຶນຈີນ ເຂົ້າມາລົງທຶນປູກຫມາກກ້ຽງ ແລະສົ່ງອອກໄປປະເທດຈີນດ້ວຍໂຕເອງ.

ດັ່ງຊາວລາວຜູ້ນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ກະເຫັນວ່າຜ່ານມາປະຊາຊົນ ກາຮູ້ຢູ່ແລ້ວເພາະວ່າໂຄງການຈີນນີ້ ເຮັດມາມັນເຂົາກາບໍ່ເຫັນດີ ອາຫານແບບຫມາກໄມ້ຫມາກຕອກ ເຂົາເອົາໄປປະເທດເຂົາຫມົດ ຖືວ່າເຂົ້າມາສ້າງມາສາ ເຂົາບໍ່ໄດ້ເອົາຂອງລາວເຂົາກາ ຂອງເຂົາມາກິນໃສ່ຕູ້ຄອນເທັນເນີ້ມາກິນ.”

ເຈົ້າຂອງສວນຜັກອໍແກນິກ ໃນແຂວງຫລວງພຣະບາງກ່າວວ່າ ໂຄງການລົງທຶນຫາກຣັຖບານລາວບໍ່ເອົາໃຈໃສ່ໃນການສົ່ງເສີມ ຊາວກະສິກອນຢ່າງເຕັມທີ່ກໍບໍ່ສາມາດ ຊ່ອຍຊາວກະສິກອນ ໃນລາວມີອາຊີບແລະຣາຍຮັບຫມັ້ນຄົງໄດ້. ຊາວກະສິກອນລາວ ໃນເຂດຊົນນະບົດຫ່າງໄກຍັງຕ້ອງການ ຄວາມຮູ້ດ້ານເທັກນິກ ວິຊາການເພື່ອສ້າງຄວາມເຂົ້າໃຈ ໃນເຣື່ອງເຮັດການກະ ເສດເມື່ອຊາວກະສິກອນ ມີຄວາມເຂົ້າໃຈດີກໍຈະຜລິດສິນຄ້າ ອອກມາໄດ້ຢ່າງມີຄຸນນະພາບ ແລະສາມາດແຂ່ງຂັນໃນຕລາດໄດ້, ແຕ່ປັດຈຸບັນຍອມຮັບວ່າມີຊາວກະສິກອນລາວ ຈຳນວນຫນ້ອຍດຽວເທົ່ານັ້ນ ທີ່ກຸ້ມໂຕເອງໄດ້ຈາກໂຄງການລົງທຶນ ຂອງຄົນຈີນ. ດັ່ງເຈົ້າຂອງສວນຜັກອໍແກນິກ ຜູ້ນີ້ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ກາຕ້ອງເບິ່ງວ່າມັນຊິເຮັດໄດ້ຊໍ່າໃດ ແຕ່ເບື້ອງທາງໃນເຮົານີ້ຕ້ອງໄດ້ປັບປຸງ ກັນຕື່ມເພື່ອໃຫ້ເຮັດວຽກຮ່ວມກັນໄດ້ດີຂຶ້ນຫັ້ນນ່າພາກ ຣັຖບານເຮົາກາຕ້ອງໄດ້ໃຫ້ຂໍ້ມູນ ໃຫ້ຄວາມເຂົ້າໃຈວ່າຕລາດ ເຂົາຕ້ອງການແນວໃດ ເຮົາຕ້ອງຜລິດແນວໃດ.”

ສ່ວນຊາວກະສິກອນ ຈຳນວນນຶ່ງເຫັນວ່າ ໂຄງການປູກພືດ ຫມາກໄມ້ ແລະ ໄມ້ເສຖກິຈ ຂອງນັກລົງທຶນຈີນນັ້ນ ໄດ້ຊ່ອຍໃຫ້ຊາວກະສິກອນ ໃນລາວມີອາຊີບແລະລາຍຮັບຢ່າງຫມັ້ນຄົງ ເຖິງວ່າຊາວກະສິກອນລາວ ຈະບໍ່ໄດ້ຮັບຜົລປໂຍດຢ່າງເຕັມເມັດ ເຕັມຫນ່ວຍ ແຕ່ກາບໍ່ໄດ້ເສັຽປຽບນັກລົງທຶນຈີນ ຈົນເກີນໄປ. ດັ່ງຊາວກະສິກອນ ໃນແຂວງຫລວງນໍ້າທາ ທີ່ເຂົ້າຮ່ວມໂຄງການປູກຢາງ ພາຣາກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ເອີບໍ່ໄດ້ເສັຽປຽບໃດເພາະວ່າ ໄທເຮົາມັນກາໄດ້ຮັບຜົລນັ້ນກາເວົ້າເຣື່ອງ ໂຕຜົລກຳໄລການຂາຍອອກຫັ້ນສອງມາລະ ເຂົາລະມີເງິນອຸດຫນູນໃຫ້ຫັ້ນນ່າ ເຮົາລະມີແຕ່ແຮງງານກັບດິນຫັ້ນແຫລະ ເຮັດກາຖືວ່າເຮົາລະຍັງໄດ້ປຽບຢູ່.”

ນອກຈາກບໍຣິສັດ ໄໜສຽງພັດທະນາກະສິກັມ ແຂວງໄຮລົງຈ່ຽງຈຳກັດ ຈະລົງທຶນດ້ານການກະເສດແລ້ວບໍຣິສັດຍັງມີແຜນທີ່ຈະພັທນາ ໂຄງການພລັງງານແສງຕາເວັນ ເພື່ອນຳໃຊ້ໃນໂຄງການລົງທຶນ ຂອງບໍຣິສັດນຳດ້ວຍໂດຍບໍຣິສັດ ຈະຊອກຫາພື້ນທີ່ທີ່ເຫມາະສົມ ໃຫ້ໄດ້ 4 ຈຸດ ຈຸດລະ 150 ເຮັກຕ້າຣ໌ ຊຶ່ງຄາດວ່າຈະນຳໃຊ້ເງິນລົງທຶນ ທັງໂຄງການລົງທຶນດ້ານສະເສຕສະອາດ ທັນສມັຍ ແລະ ໂຄງການພັທນາພລັງງານແສງຕາເວັນປະມານ 79 ລ້ານໂດລ້າຣ໌ສະຫະຣັຖ.

ປັດຈຸບັນປະເທດລາວ ມີການສົ່ງສິນຄ້າອອກໄປຕ່າງປະເທດ ຫລາຍທີ່ສຸດແມ່ນປະເທດຈີນ ຮອງລົງມາຄືວຽດນາມ ແລະ ໄທຍຕາມລຳດັບ. ສ່ວນສິນຄ້າທີ່ລາວສົ່ງອອກໄປຈີນຄື ທອງແດງ, ຢາງພາຣາ, ກ້ວຍ, ມັນຕົ້ນ ແລະ ສິນຄ້າດ້ານການກະເສດອື່ນໆ ທີ່ຣັຖບານລາວໄດ້ຮັບໂຄຕ້າ ຈາກຣັຖບານຈີນໂດຍຈະມີການສົ່ງເສີມສິນຄ້າ ຜ່ານເສັ້ນທາງຣົຖໄຟ ລາວ-ຈີນ ຊຶ່າງເປັນສ່ວນສຳຄັນ ຂອງໂຄງການ ຫນຶ່ງແລວທາງຫນຶ່ງເສັ້ນທາງ ຫລື BRI (Belt and Road Initiative)

ປັດຈຸບັນນັກລົງທຶນຈີນ ໄດ້ເຂົ້າມາລົງທຶນໃນລາວ ເປັນອັນດັບ 1 ໂດຍມີໂຄງການລົງທຶນ ໄປແລ້ວຈຳນວນ 933 ໂຄງການດ້ວນມູນຄ່າ ການລົງທຶນສະສົມ 16,4 ຕື້ໂດລ້າຣ໌ສະຫະຣັຖ ນັບແຕ່ປີ 1989 ຈົນຮອດກາງປີ 2022 ອີງຕາມກະຊວງ ແຜນການ ແລະການລົງທຶນ.