ແນວລາວສ້າງຊາດ ສເນີແກ້ໄຂ ຂໍ້ຂັດແຍ່ງທີ່ດິນ

ຍາງນາງ ຄຳຈັນ ພົມແສງສວັນ ຮອງປະທານສູນກາງ ແນວລາວສ້າງຊາດ ໄດ້ສເນີຕໍ່ກອງ ປະຊຸມສມັຍສາມສາມັນເທື່ອທີ 2 ຂອງສະພາແຫ່ງຊາດຊຸດທີ 9 ເມື່ອວັນທີ 8 ພືສຈິກາ ຜ່ານມາໃຫ້ມີການຕິດຕາມກວດກາບັນຫາຂໍ້ຂັດແຍ່ງທີ່ດິນ ຢູ່ບ້າານ ຊຽງດາ ເມືອງໄຊເສດຖາ ນະຄອນຫຼວງວຽງຈັນ ລະຫວ່າງຊາວບ້ານ 126 ຄອບຄົວທີ່ມີດິນຢູ່ບ້ານດັ່ງກ່າວກັບ ບໍຣິ ສັດ ນໍ້າທາ ກໍ່ສ້າງຂົວ-ທາງຈຳກັດແບບຮີບດ່ວນຍ້ອນເປັນບັນຫາທີ່ແກ່ຍາວມາຫຼາຍປີແລ້ວ. ດັ່ງຍານາງ ຄຳຈັນ ກ່າວໃນຕອນນຶ່ງວ່າ:

“ສເນີໃຫ້ສະພາແຫ່ງຊາດລົງຕິດຕາມກວດກາບັນຫາຂໍ້ຂັດແຍ່ງທີ່ດິນ ຣະຫວ່າງ ບໍຣິສັດ ນໍ້າທາກໍ່ສ້າງຂົວ-ທາງ ກັບປະຊາຊົນຢູ່ບ້ານຊຽງດາເມືອງໄຊເສດຖາ ນະຄອນຫຼວງວຽງຈັນຈຳນວນ 126 ຄອບຄົວແກ່ຍາວມາຫຼາຍປີແລ້ວຖ້າບໍ່ໄດ້ຮັບການແກ້ ໄຂຢ່າງສົມເຫດສົມຜົລອາດຈະເປັນບັນຫາກ້ວາງອອກໄປຕື່ມ.”

ທາງດ້ານຊາວບ້ານຜູ້ໄດ້ຮັບຜົລກະທົບ ຢູ່ບ້ານຊຽງດາ ທີ່ຂໍສງວນຊື່ແລະສຽງກ່າວຕໍ່ວິທຍຸ ເອເຊຽເສຣີໃນວັນທີ 9 ພືສຈິກາວ່າ ລາວເອງກໍຮູ້ສຶກອຸ່ນໃຈ ທີ່ບັນຫາຂໍ້ຂັດແຍ່ງເຣື່ອງ ທີ່ດິນຢູ່ບ້ານຊຽງດາ ໄດ້ຖືກກ່າວເຖິງຢູ່ກອງ ປະຊຸມສະພາແຫ່ງຊາດ ຍ້ອນຊາວບ້ານຫຼາຍຄົນຕ້ອງການຄວາມຍຸຕິທັມ ຊຶ່ກໍເປັນເຣື່ອງດີ ທີ່ທາງສູນກາງແນວລາວສ້າງຊາດ ໄດ້ເລັງເຫັນຄວາມເດືອດຮ້ອນຂອງປະຊາຊົນເປັນຫຼັກ ແລະກໍຫວັງວ່າພາຍຫຼັງຈາກ ກອງປະຊຸມສມັຍສາມັນ ເທື່ອທີ 2 ຂອງສະພາແຫ່ງຊາດຊຸດທີ 9 ໄດ້ສຳເຣັດລົງເຈົ້າໜ້າທີ່ ທີ່ກ່ຽວຂ້ອງ ກໍຈະເລັ່ງລົງພື້ນທີ່ແກ້ໄຂບັນຫານີ້.

ຍານາງໄດ້ກ່າວຕື່ມວ່າ ປັດຈຸບັນພະນັກງານຂອງ ບໍຣິສັດ ນໍ້າທາ ກໍ່ສ້າງຂົວ-ທາງ ຈຳກັດ ກໍຍັງບຸກເບີກທີ່ດິນຂອງຊາບ້ານ ທີ່ຢູ່ແຄມທາງຕາມປົກກະຕິ ພ້ອມທັງໄດ້ເຮັດຮົ້ວກັ້ນ ບໍ່ໃຫ້ຊາວບ້ານສາມາດເຂົ້າໄປນໍາໃຊ້ທີ່ດິນ ໄດ້ອີກຊຶ່ງຊາວບ້ານຫຼາຍຄົນ ເຫັນວ່າດິນຂອງຊາວບ້ານ ແມ່ນດິນທີ່ຢູ່ນອກຂອບເຂດ ທີ່ບໍຣິສັດໄດ້ສັມປະທານ ດັ່ງນັ້ນຫຼາຍຄົນຈຶ່ງບໍ່ພໍໃຈ ແລະ ຢາກໃຫ້ມີການແກ້ໄຂແບບຮີບດ່ວນ.

ກ່ອນໜ້ານີ້ ຊາວບ້ານຊຽງດາ ອີກຄົນນຶ່ງກ່າວວ່າ ລາວເອງ ແລະຊາວບ້ານອີກຫຼາຍຄົນທີ່ ໄດ້ຮັບຜົລກະທົບ ຈາກບໍຣິສັດ ນໍ້າທາ ກໍ່ສ້າງຂົວ-ທາງ ຈຳກັດ ຍັງຕິດຕາມຄວາມຄືບໜ້າ ໃນການແກ້ໄຂບັນຫານີ້ຢູ່ເລື້ອຍໆ ຫຼັງຈາກທີ່ໄດ້ພາກັນຮ້ອງຮຽນ ໄປຍັງພາກສ່ວນຂັ້ນຣັຖບານ ເພື່ອຂໍການຄຸ້ມຄອງ ແລະແກ້ໄຂ ດັ່ງຍານາງໄດ້ກ່າວວ່າ:

“ປະຊາຊົນກໍນຳຕາມຕລອດ ເອກະສານໄປຮອດໃສ ກໍນຳຫ້ອງວ່າການຣັຖບານເບາະ ກວດກາຣັຖ ດຽວນີ້ເພິ່ນມອບໝາຍ ກວດກາຣັຖເປັນຄົນເຮັດ ໂດຍການຊີ້ນໍາຂອງກວດກາພັກ.”

ໃນຂະນະທີ່ຊາວບ້ານ ຢູ່ບ້ານຊຽງດາທ່ານນຶ່ງ ທີ່ບໍ່ໄດ້ຮັບຜົລກະທົບຈາກບໍຣິສັດ ດັ່ງກ່າວກໍຢືນຢັນວ່າ ມາຮອດປັດຈຸບັນ ບັນຫາຂໍ້ຂັດແຍ່ງ ເຣື່ອງທີ່ດິນບ້ານຊຽງດາ ຍັງບໍ່ສາມາດແກ້ໄຂໄດ້ເທື່ອເພາະຕ້ອງໃຫ້ພາກສ່ວນທີ່ກ່ຽວຂ້ອງ ມາເປັນໂຕກາງ ໃນການແກ້ໄຂ ດັ່ງທ່ານກ່າວວ່າ:

“ກໍຍັງບໍ່ຕົກແຕກເທື່ອຢູ່ໃກ້ໆ ນີ້ຖືກຫຼາຍຢູ່ໄດ ເຮືອນຂ້ອຍບໍ່ຖືກແຕ່ວ່າຢາກ ເບື້ອງນັ້ນຖືກແມ່ນເພິ່ນບຸກເບີກດິນຊາວບ້ານ ຢູ່ຄົນລະຟາກທາງກັບເບື້ອງເຮືອນຂ້ອຍ.”

ຊາວບ້ານຊຽງດາອີກຄົນນຶ່ງກ່າວວ່າ ທີ່ດິນຂອງຊາບ້ານທີ່ ບໍຣິສັດ ນໍ້າທາ ກໍ່ສ້າງຂົວ-ທາງ ຈຳກັດ ກວມເອົານັ້ນ ແມ່ນເປັນທີ່ດິນ ເບື້ອງອອກໄປທາງນາຄວາຍ ສ່ວນທີ່ດິນຂອງຕົນ ແລະຂອງຊາວບ້ານທີ່ຢູ່ເບື້ອງກົງກັນຂ້າມ ບໍ່ໄດ້ຖືກບໍຣິສັດດັ່ງກ່າວມາລົບກວນ.

“ຂອງນໍ້າທາທີ່ດິນເພີ່ນອາດຈະແມ່ນຢູ່ເບື້ອງນາຄວາຍໄກກັນຢູ່ເດີ້ເຈົ້າ ຢູ່ຄົນລະຟາກກັນເລີຍເຈົ້າ.”

ກ່ອນໜ້ານີ້ ນັກຊ່ຽວຊານດ້ານກົດໝາຽ ທີ່ດິນທ່ານນຶ່ງໄດ້ອະທິບາຍ ເຖິງສາເຫດທີ່ເຮັດໃຫ້ເກີດຂໍ້ຂັດແຍ່ງ ລະຫວ່າງຊາວບ້ານຊຽງດາ ກັບບໍຣິສັດ ນໍ້ທາກໍ່ສ້າງ ຂົວ-ທາງ ຈຳກັດ ວ່່າ ເປັນຍ້ອນຄວາມບໍ່ເຂົ້າໃຈ ຂອງຊາວບ້ານບາງສ່ວນ ທີ່ບໍ່ຮູ້ວ່າບໍຣິສັດດັ່ງກ່າວ ສາມາດເອົາທີ່ດິນເກີນຂອບເຂດ ຈາກຊາວບ້ານທີ່ບໍ່ມີໃບຕາດິນ ດັ່ງທ່ານກ່າວວ່າ:

“ຣັຖບານໄດ້ມອບທີ່ດິນຫັ້ນຂ້າງລະ 200 ແມັດໃຫ້ນໍ້າທາບາດນີ້ມັນມີ ບັນຫາກໍຍ້ອນວ່າບາງຈຸດບໍຣິສັດອາດຈະເອົາເກີນ 200 ໄປຍ້ອນວ່າມີພຽງໃບນໍາໃຊ້ຫັ້ນນ່າ ສາມາດເອົາເກີນກາໄດ້.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຍັງພະນັກງານ ບໍຣິສັດ ນໍ້າທາ ກໍ່ສ້າງຂົວ-ທາງ ຈຳກັດ ໄດ້ນຳຣົດຈົກພ້ອມກັບ ພະນັກງານຣັຖຈຳນວນນຶ່ງ ໄປບຸກລຸກທີ່ດິນຊາວບ້ານ ຢູ່ບ້ານຊຽງດາ ແຕ່ຊາວບ້ານທີ່ເປັນເຈົ້າຂອງທີ່ດິນບໍ່ຍອມ ແລະໄດ້ເກີດການຜິດຖຽງ ກັບພະນັກງານ ບໍຣິສັດ ດັ່ງກ່າວຈົນທາງບໍຣິສັດຕ້ອງຖອຍກັບໄປ ຊຶ່ງຊາວບ້ານເຫັນວ່າ ດິນທີ່ທາງບໍຣິສັດ ບຸກລຸກນັ້ນບໍ່ແມ່ນດິນ ທີ່ຢູ່ໃນຂອບເຂດ 200 ແມັດ ໃນໂຄງການຂອງຣັຖບານ ແຕ່ ບໍຣິສັດ ຈະເອົາໄປຄອບຄອງເອງ ເພື່ອໃຊ້ປໂຍດໃນອະນາຄົດ. ສຳລັບທີ່ດິນໃນພື້ນທີ່ ບ້ານຊຽງດາ ຜ່ານມາເຄີຍເປັນດິນຂອງ ສະຫະກອນເມືອງໄຊເສດຖາ ຕັ້ງແຕ່ປີ 1979-1980 ຫຼັງຈາກນັ້ນສະຫະກອນຖືກຍຸບໄປ ແລ້ວຊາວບ້ານຈຶ່ງແບ່ງປັນກັນຄຸ້ມຄອງ ແຕ່ຍັງເປັນດິນທີ່ຂຶ້ນກັບຣັຖບານ ໂດຍເຈົ້າໜ້າທີ່ ບໍ່ໄດ້ອອກໃບຕາດິນຂອບທອງໃຫ້ ຊຶ່ງມີແຕ່ໃບນໍາໃຊ້ທີ່ດິນເທົ່ານັ້ນ ແລະມີການເສັຽພາສີ ທີ່ດິນແກ່ຣັຖທຸກປີ.

ຈາກນັ້ນຮອດປີ 2009 ບໍຣິສັດ ນໍ້າທາກໍ່ສ້າງ ຂົວ-ທາງ ຈຳກັດ ເຂົ້າມາສັມປະທານພື້ນທີ່ດັ່ງກ່າວ ແຕ່ຖືກຊາວບ້ານຄັດຄ້ານ ບໍ່ຍອມໃຫ້ເຂົ້າມາພັທນາ. ຕໍ່ມາໃນປີ 2012 ບໍຣິສັດຈີນ ກໍໄດ້ເຂົ້າມາກໍ່ສ້າງທາງ ຈາກເສັ້ນທາງ 450 ປີ ຫາບ້ານຊຽງດາ ຮວມໄລຍະທາງປະມານ 9 ກິໂລແມັດ ແລະຈະມີການພັທນາພື້ນທີ່ຮອບເສັ້ນທາງ ໃຫ້ກາຍເປັນເຂດພັທນາໃໝ່. ປັດຈຸບັນ ຢູ່ລະຫວ່າງການກໍ່ສ້າງ ເປັນຕົ້ນ ມຫາວິທຍາລັຍ ຊູໂຈວ໌, ມຫາວິທຍາລັຍສຸຂພາບວິທຍາສາດ, ບໍຣິສັດ ຫ້າງຮ້ານຕ່າງໆ ສູນການຄ້າຄົບວົງຈອນແລະໂຮງໝໍ.