ລາວມີແຜນ ສ້າງດ່ານສາກົລ ທາງຣົດໄຟລາວ-ຈີນ

ທາງການລາວມີແຜນການ ສ້າງດ່ານສາກົລທາງຣົດໄຟລາວ-ຈີນໃໝ່ ຢູ່ດ່ານສາກົລບໍ່ເຕັນ ແຂວງຫຼວງນໍ້າທາໃຫ້ໄດ້ມາຕຖານ ຖືກຕ້ອງຕາມຣະບຽບຫຼັກການ ແລະສອດຄ່ອງຕາມດຳຣັຖ ຂອງຣັຖບານ ວ່າດ້ວຍດ່ານຊາຍແດນ ລະຫວ່າງປະເທດຊຶ່ງ ກະຊວງການຕ່າງປະເທດ ແລະພາກສ່ວນທີ່ກ່ຽວຂ້ອງຫາກໍໄດ້ສຳຣວດ ແລະຮີບໂຮມຂໍ້ມູນ ບໍຣິເວນບ່ອນທີ່ຈະສ້າງ ເປັນດ່ານສາກົລດັ່ງກ່າວ ໂດຍຈະມີຜົລກະທົບຕໍ່ທີ່ດິນ ຂອງພາກສ່ວນທຸຣະກິຈ ຈຳນວນນຶ່ງ ໃນພື້ນທີ່ດັ່ງກ່າວ ແລະກຳລັງເຈລະຈາ ເຣື່ອງການຊົດເຊີຽຢູ່. ດັ່ງເຈົ້າໜ້າທີ່ີທີ່ກ່ຽວຂ້ອງ ທ່ານນຶ່ງໃນ ແຂວງຫຼວງນໍ້າທາ ກ່າວຕໍ່ ວິທຍຸເອເຊັຽເສຣີ ໃນວັນທີ 22 ພຶສຈິກາວ່າ:

“ບໍ່ທັນໄດ້ອັນນັ້ນນ່າ ເພາະຍັງລໍຖ້າທາງ ແຂວງເພິ່ນ ກະຊວງກໍຫາລົງມາສຳຣວດສື່ໆ ແຕ່ວ່າກໍຍັງເວົ້າເຣື່ອງການຄິດໄລ່ ເຣື່ອງເຮືອນ ເຣື່ອງເຄຫາທີ່ວ່າ ຈະມອບໃຫ້ ຣັຖເວົ້າກັນ ເຣື່ອງຄ່າຊົດເຊີຽຫຍັງຕ່າງໆ ຍັງບໍ່ແລ້ວເທື່ອ.”

ທ່ານໄດ້ກ່າວຕື່ມວ່າ ໃນເບື້ອງຕົ້ນບ່ອນີ້ ຈະໃຊ້ສ້າງເປັນດ່ານສາກລ ທາງຣົດໄຟລາວ-ຈີນນັ້ນຈະຢູ່ບໍຣິເວນໃກ້ກັບສາງເກັບເຄື່ອງຂອງບໍຣິສັດ ໄອຊີດີ ແລະ ແອວເອສ ຊຶ່ງຈະກວມເອົທີ່ດິນ ຂອງພາກສ່ວນທຸຣະກິຈຈຳນວນນຶ່ງ ໂດຍເຊື່ອວ່າ ຈະຕົກລົງເຣື່ອງຄ່າຊົດເຊີຍໄດ້ໃນອີກບໍ່ດົນນີ້. ສ່ວນການລົງມືກໍ່ສ້າງດ່ານສາກົລທາງຣົດໄຟ ລາວ-ຈີນຄາດວ່າຈະເຣີ້ມພາຍໃນປີໜ້າ ແຕ່ຍັງບໍ່ທັນມີລາຍລະອຽດ ຂອງແຜນການອອກມາເທື່ອວ່າຈະໃຊ້ເວລາ ໃນການກໍ່ສ້າງຈັກປີ, ໃຊ້ເນື້ອທີ່ເທົ່າໃດ ແລະ ຮູບແບບແນວໃດ ທາງດ້ານຜູ້ປະກອບການທຸຣະກິຈຫຼາຍຄົນ ຢູ່ບໍຣິເວນດ່ານສາກົລ ບໍ່ເຕັນກໍຍັງບໍ່ຮູ້ເທື່ອວ່າຈະມີຜູ້ປະກອບການ ຈັກລາຍທີ່ຈະເສຽທີ່ດິໃຫ້ແກ່ ການກໍ່ສ້າງດ່ານສາກົລທາງຣົດໄຟ ລາວ-ຈີນັ່ງກ່າວແຕ່ເຊື່ອວ່າ ຜູ້ທີ່ຈະໄດ້ຮັບຜົລກະທົບສ່ວນໃຫຍ່ແມ່ນພາກສ່ວນ ທຸຣະກິຈທີ່ມີດິນຢູ່ໃກ້ກັບສາງເກັບເຄື່ອງ ຂອງບໍຣິສັດ ໄອຊີດີ ແລະ ແອວເອສ ດັ່ງຜູ້ປະກອບການທ່ານນຶ່ງກ່າວວ່າ:

“ເຣື່ອງອັນນັ້ນບໍ່ໄດ້ສຶກສາ ບໍ່ເຄີຍຫຍຸ້ງກ່ຽວ ກາບໍ່ຮູ້ຈຸດນັ້ນຢູ່ໄກສາງ ໄອຊີດີເຂົາຢູ່ລຸ່ມພຸ້ນແລ້ວ ການ້ອງຢູ່ເທີງພີ້ເດ້ ມັນໄກກັນ.”

ໃນຂນະດຽວກັນ ຜູ້ປະກອບການທຸຣະກິຈ ອີກທ່ານນຶ່ງຢູ່ດ່ານສາກົລ ບໍ່ເຕັນທີ່ບໍ່ປະສົງອອກຊື່ແລະສຽງກ່າວວ່າ ຖ້າວ່າໂຄງການສ້າງດ່ານ ສາກົລທາງຣົດໄຟ ລາວ-ຈີນໄດ້ສຳຣວດແລ້ວພົບ ວ່າກວມເອົາທີ່ດິນຂອງຕົນນັ້ນ ຕົນເອງກໍບໍ່ມີຂໍ້ຂັດຂ້ອງອັນໃດ ແລະຍີນດີມອບດິນໃຫ້ແກ່ຣັຖ ແຕ່ຈະຕ້ອງໄດ້ຮັບການຊົດເຊີຍແບບສົມເຫດສົມຜົລ.

ສ່ວນນັກທຸຣະກິຈ ທ່ານນຶ່ງກ່າວວ່າ ການສ້າງດ່ານສາກົລທາງຣົດໄຟ ລາວ-ຈີນຢູ່ດ່ານສາກົລ ບໍ່ເຕັນບໍ່ເຕັນຫາກສຳເຣັດແລ້ວ ກໍຈະມີຜົລດີຫຼາຍດ້ານ ເນື່ອງຈາກຈະສາມາດກວດກາການ ເຂົ້າ-ອອກປະເທດຂອງບັນດາຜູ້ໂດຍສານ ຣົດໄຟລາວ-ຈີນໄດ້ຢ່າງ ສະດວກແລະເປັນຣະບົບາກົນຂື້ນຄື ກັນກັບປະເທດອື່ນໆ ທີ່ມີເສັ້ນທາງຣົດໄຟ ແລ່ນຂ້າມຊາຍແດນດັ່ງທ່ານໄດ້ກ່າວວ່າ:

“ໂອຜົລດີຫຼາຍເດ້ແຕ່ກີ້ ກາເປັນດ່ານສາກົລແລ້ວ ແຕ່ວ່າມັນເປັນດ່ານນ້ອຍບໍ່ທັນທັນສມັຍ ແຕ່ວ່າດຽວນີ້ໄປເຮັດດ່ານໃຫຍ່ ເຮັດດ່ານແບບສາກົລແທ້ໆ ຮັບຮອງ ເສັ້ນທາງຣົດໄຟເຂົ້າປະຕູດຽວ ແລ້ວອັນດີມີຫຼາຍຢ່າງມັນເຂົ້າປະຕູດຽວເດ້ການກວດຄົ້ນ ສີນຄ້າມັນມີຂແນງການຕ່າງໆ ຄົບຊຸດຫັ້ນແຫຼະ.”

ທ່ານກ່າວອີກວ່າ ຄັນສ້າງດ່ານສາກົລທາງຣົດໄຟ ລາວ-ຈີນ ສຳເຣັດແລະເປີດບໍຣິການ ແລ້ວກໍອາດຈະເຮັດໃຫ້ເກີດບັນຫາບາງຢ່າງ ເປັນຕົ້ນຄັນພະນັກງານ ຫຼືເຈົ້າໜ້າທີ່ປະຈຳດານສາກົລ ທາງຣົດໄຟລາວ-ຈີນບໍ່ມີປະສົບການເຮັດວຽກພຽງພໍ ຫຼືບໍ່ສາມາດເຮັດວຽກເຂົ້າກັບຣະບົບ ທີ່ທັນສມັຍໄດ້ກໍ່ອາດຈະເຮັດໃຫ້ເກີດຄວາມລ່າຊ້າ ໃນຂັ້ນຕອນການກວດຄົນ ເຂົ້າ-ອອກປະເທດ ຫຼືບັນຫາອື່ນໆ .

ໃນຂນະທີ່ ຜູ້ປະກອບການທຸຣກິຈ ທ່ອງທ່ຽວລາວ-ຈີນທ່ານນຶ່ງທີ່ຂໍສງວນຊື່ແລະສຽງກ່າວວ່າ ຖ້າການເດີນທາງໄປມາ ລະຫວ່າງລາວ-ຈີນສາມາດເດີນທາງ ໂດຍໃຊ້ໜັງສືຜ່ານແດນ ແລະ ວິຊ້າຜ່ານດ່ານສາກົລ ຣົດໄຟລາວ-ຈີນ ໄດ້ໃນອະນາຄົດທາງບໍຣິສັດ ກໍອາດຈະເປີດການ ເດີນທາງທ່ອງທ່ຽວ ລາວ-ຈີນໂດຍໃຊ້ເສັ້ນທາງ ຣົດໄຟລາວ-ຈີນ ແທນທີ່ຈະອາສັຍການເດີນທາງ ໂດຍເຮືອບີນພຽງຢ່າງດຽວ.

ມາຮອດປັຈຈຸບັນ ເຫຼືອເວລາອີກປະມານ 10 ວັນເສັ້ນທາງຣົດໄຟລາວ-ຈີນກໍຈະເຣີ້ມເປີດໃຊ້ ຢ່າງເປັນທາງການ. ໃນຂນະທີ່ການຊົດເຊີຍແກ່ຊາວບ້ານ ທີ່ລໍຖ້າຄ່າຊົດເຊີຍຈາກໂຄງການນີ້ ມີຄວາມຄືບໜ້າພຽງເລັກນ້ອຍເປັນຕົ້ນຊາວບ້ານ ຢູ່ນະຄອນຫຼວງວຽງຈັນ ທີ່ຍັງບໍ່ໄດ້ຄ່າຊົດເຊີຍ ອາຈໄດ້ຄ່າຊົດເຊີຍອີກ 2 ສັປດາຕໍ່ໜ້າ. ດັ່ງຊາວບ້ານ ຢູ່ນະຄອນຫຼວງວຽງຈັນ ໄດ້ກ່າວວ່າ:

“ເພີ່ນກາສິຈ່າຍໃຫ້ ແຕ່ວ່າເພີ່ນວ່າເພີ່ນຊິຈ່າຍເປັນ ສະບັບວ່າຊັ້ນແລ້ວ ເພີ່ນຂໍຈ່າຍສອງເທື່ອ ເພີ່ນກາວ່າເຫຼືອອີກສອງອາທິິດ ມັນຊິແມ່ນຄວາມເພີ່ນເວົ້າບໍ່ນີ້ນ່າ ສອງແສນສິບພັນກີບ ຕໍ່ຕາແມັດເພີ່ນກາວ່າຕາງຊ່ອຍພັກ ຊ່ອຍຣັຖເຮົາເລີຍຊ່ອຍພັກຊ່ອຍຣັຖ.”

ຫຼ້າສຸດມີຣາຍງານວ່າ ລະບົບຂໍ້ມູນການບໍຣິການຂົນສົ່ງ ໂດຍສານຕາມທາງຣົດໄຟ ລາວ-ຈີນ ຮວມທັງອຸປະກອນຮັບໃຊ້ຜູ້ໂດຍສານ ໃນສະຖານີຣົດໄຟ 10 ແຫ່ງ ໄດ້ສຳເຣັດ ການທົດສອບຮຽບຮ້ອງ ເປັນຕົ້ນຕາຕະລາງເວລາ ຖ້ຽວຣົດໄຟ, ຂໍ້ມູນປີ້ຣົດໄຟ ທັງພາສາລາວ ພາສາຈີນ ແລະ ພາສາອັງກິດ ຮວມທັງອຸປະກອນ ຮັກສາຄວາມປອດພັຍອື່ນໆ.

ສ່ວນພີທີເປີດ ນຳໃຊ້ໂຄງການທາງຣົດໄຟ ລາວ-ຈີນ, ຣັຖບາລລາວໄດ້ກະກຽມໃສ່ໃນວັນທີ 2 ທັນວາ 2021 ແລະ ເຣີ່ມໃຫ້ການບໍຣິການທົ່ວໄປ ຢ່າງເປັນທາງການ ໃນວັນທີ 3 ທັນວາ 2021. ໄລຍະເຣີ່ມຕົ້ນ ຣົດໄຟຈະແລ່ນແຕ່ ນະຄອນຫຼວງວຽງຈັນ ຫາແຂວງຫຼວງນໍ້າທາ.