ນາຍົກເປີດໃຫ້ຈີນ ເຂົ້າມາລົງທຶນຢູ່ຫຼາຍແຂວງພາກເໜືອ ແຕ່ຊາວບ້ານກັງວົນຜົນກະທົບ

ເມື່ອບໍ່ດົນມານີ້ ທ່ານ ສອນໄຊ ສີພັນດອນ, ນາຍົກລັດຖະມົນຕີ ຮຽກຮ້ອງໃຫ້ ແຂວງຢູນານຂອງຈີນ ເຂົ້າມາລົງທຶນຢູ່ເຂດພາກເໜືອຂອງລາວ ໃນທຸກດ້ານ ແຕ່ຊາວບ້ານ ກໍມີຄວາມກັງວົນເລື່ອງຜົນກະທົບທີ່ຈະເກີດຂຶ້ນ.

ຜົນກະທົບທີ່ເກີດຂຶ້ນ ກໍຄື ບໍລິສັດ ຈີນເຂົ້າມາສໍາປະທານທີ່ດິນຂຸດຄົ້ນແຮ່ທາດ ກວມເອົາດິນກະສິກໍາຂອງຊາວບ້ານ, ສົ່ງຜົນກະທົບຕໍ່ຄວາມອຸດົມສົມບູນ ຂອງທໍາມະຊາດ, ສານເຄມີຮົວໄຫຼລົງໃສ່ຫ້ວຍນໍ້າທໍາມະຊາດ, ຊາວບ້ານບໍ່ສາມາດເຂົ້າໄປເກັບເຄື່ອງປ່າຂອງດົງ ໃນເຂດທີ່ມີການຂຸດຄົ້ນໄດ້,

ຊາວແຂວງຫົວພັນ ນາງນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 25 ກັນຍາ ວ່າ:

“ຕອນນີ້ ບໍລິສັດຈີນ ນີ້ເນາະບໍ່ໄດ້ເຂົ້າມານີ້ ເຮົາກໍເຄີຍແບບວ່າ ອຸດົມສົມບູນ ແບບກິນຫຍັງ ໄປໃສມາໃສກະແບບວ່າ ບໍ່ໄດ້ພົບຄວາມຫຍຸ້ງຍາກ ຫຼາຍຫັ້ນນ່າ ອັນນີ້ ເຮົາຈະໄປໄຮ່ໄປນາ ໄປເກັບຜັກຫັກໜໍ່ ຫາຢູ່ກາກິນກະຍາກ ເວລາຍາກກິນນໍ້າ ກໍຢ້ານກິນ ແບບເຂົາເຈົ້າໃສ່ສານ ໃສ່ຢາອັນໃດລົງໄປຫຼາຍຊິນ່າ.​”

ປະຊາຊົນ ເຫັນວ່າ ທີ່ຜ່ານມາ ຈີນເຂົ້າມາສໍາປະທານຫຼາຍ ກໍບໍ່ເຫັນວ່າ ຊາວບ້ານຈະໄດ້ຮັບຜົນປະໂຫຍດໃດ ຊາວບ້ານຈໍາເປັນຕ້ອງເສັຍດິນບາງບ່ອນ ເພາະ ເຂົາເຈົ້າບໍ່ສາມາດປະຕິເສດໄດ້.

ຊາວແຂວງຫລວງນໍ້າທາອີກນາງນຶ່ງ ໄດ້ກ່າວວ່າ:

“ບ່ອນໃດທີ່ມີສໍາປະທານ ປະຊາຊົນກໍທໍາມາຫາກິນຫຍຸ້ງຍາກຫັ້ນແຫຼະ ກໍບໍ່ໄດ້ຮັບປະໂຫຍດ ກໍບໍ່ໄດ້ມາຊ່ວຍເຫຼືອ ແນວນັ້ນ ແນວນີ້ ຕໍ່ໆໄປຫັ້ນແຫຼະໝົດ ບໍ່ມີບ່ອນເຮັດບ່ອນສ້າງ ໄປບ່ອນໃດ ກໍເປັນດິນຂອງພັກຂອງລັດ ເພິ່ນສໍາປະທານ ດິນດອນນີ້ ກໍເພິ່ນວ່າ ຊິເອົາ ເຮົາຊິຂັດເພິ່ນກໍບໍ່ໄດ້ ກໍເນາະເຮົາເປັນປະຊາຊົນ.”

ເຈົ້າໜ້າທີ່ທາງການລາວ ກໍເຫັນວ່າ ການເຂົ້າມາລົງທຶນຂອງຈີນ ເປັນການສ້າງວຽກເຮັດງານທໍາໃຫ້ປະຊາຊົນທ້ອງຖິ່ນ.

ເຈົ້າໜ້າທີ່ແຜນການ ແລະ ການລົງທຶນ ທ່ານນຶ່ງ ໄດ້ກ່າວວ່າ:  

“ມີຜົນດີຫັ້ນແລ້ວ ພັດທະນາ ປະຊາຊົນ ກໍມີວຽກງານທໍາເນາະ ສ້າງລາຍຮັບເພາະວ່າ ເງືອນໄຂ່ ຕ້ອງນໍາໃຊ້ແຮງງານທ້ອງຖິ່ນ ກະທາງພາກລັດ ກໍມີການພັດທະນາພື້ນຖານໂຄງລ່າງອີ່ຫຍັງຕ່າງໆ.”

ເຈົ້າໜ້າທີ່ແຜນການ ແລະ ການລົງທຶນທ່ານນີ້ ຍັງກ່າວອ້າງວ່າ ການສໍາປະທານມີການກວດສອບ ແລະ ບໍ່ມີບັນຫາຫຍັງ.     

“ສ່ວນຫຼາຍຈີນມັນມາ ມາດ້ານບໍ່ແຮ່ ມັນຕ້ອງໄດ້ຜ່ານຄະນະກໍາມະການ ການກວດກາ ກວດສອບ ສິ່ງແວດລ້ອມອີ່ຫຍັງຕ່າງໆ ໃຫ້ຖ່ກຕ້ອງຄາມລະບຽບກົດໝາຍ ເຮົາກໍຊິບໍ່ມີບັນຫາ ໂຕໃດທີ່ຂັດກັບຄໍາສັ່ງນາຍົກ ເຮົາກໍບໍ່ໃຫ້ຈັດຕັ້ງປະຕິບັດເດ້.”

ຢູ່ແຂວງຫລວງນໍ້າທາ ນັກລົງທຶນຈີນ ເຂົ້າມາລົງທຶນດ້ານກະສິກໍາ ເປັນຕົ້ນປູກໝາກຖົ່ວ ໝາກໂມ ແລະ ພືດອື່ນໆ ແລະ ນໍາໃຊ້ແຮງງານລາວເຮັດວຽກ.

ເຈົ້າໜ້າທີ່ກ່ຽວຂ້ອງແຂວງຫລວງນໍ້າທາ ທ່ານນຶ່ງ ໄດ້ກ່າວວ່າ:  

“ກໍດີຫັ້ນແລ້ວ ເພາະວ່າ ປະຊາຊົນ ກະພໍໄດ້ຮັບ ລາຍຮັບ ນໍາການລົງທຶນຂອງເຂົາເນາະ ໄດ້ອອກແຮງງານ ໄດ້ເຮັດວຽກຊ່ວຍເຂົາ ຄືວ່າ ສ່ວນຫຼາຍມັນ ດ້ານກະສິກໍາ ລົງແຕ່ລະເມືອງມັນຫຼາຍເມືອງ ປູກຖົ່ວ ໝາກໂມ ຄົນຈີນກະຊ່ຽວຊານແລ້ວເຂົາກໍໃຊ້ແຮງງານ ຈ່າຍເປັນມື້ ເປັນຫຍັງ.”

ນອກຈາກນີ້, ຄະນະບໍລິຫານສະມາຄົມມິດຕະພາບ ລາວ-ຈີນ ແຂວງ ສາລະວັນ ກໍໄດ້ດຶງດູເອົານັກລົງທຶນຈີນ ເຂົ້າມາລົງທຶນພາຍໃນແຂວງໃຫ້ຫຼາຍຂຶ້ນ ເຊັ່ນກັນ ໂດຍຈະສົມທົບກັບພາກສ່ວນກ່ຽວຂ້ອງຄົ້ນຄ້ວາ ກ່ຽວກັບການພົວພັນຮ່ວມມື ລະຫວ່າງ ແຂວງສາລະວັນ ກັບ ບັນດາແຂວງຂອງ ສປ ຈີນ ເພື່ອດຶງດູດເອົານັກລົງທຶນຈີນ ມາພັດທະນາແຂວງ.