ຂ.ບໍຣິຄຳໄຊຈະຂາຍໄມ້ ຍຶດໄດ້

ສິດນີ
2017-05-01
Share
F-logs ໄມ້ທີ່ຕັດຈາກ ປະເທດລາວ ສົ່ງອອກໄປ ປະເທດໃກ້ຄຽງ
RFA

ຜແນກອຸດສາຫະກັມ ແລະການຄ້າ ແຂວງບໍຣິຄຳໄຊ ຕຽມເປີດ ປະມູນຂາຍໄມ້ ທີ່ຍຶດໄດ້ ໃນວັນທີ 19 ພືສພາ 2017 ນີ້  ຊຶ່ງປັດຈຸບັນ ໄດ້ເປີດໂອກາດ ໃຫ້ຜູ້ສົນໃຈ ທັງພາຍໃນ ແລະຕ່າງປະເທດ ເຂົ້າມາຈົດທະບຽນ ປະມູນ ຈົນຮອດວັນທີ 18 ພຶສພາ ກ່ອນມື້ຈະປະມູນ. ດັ່ງເຈົ້າຫນ້າທີ່ ຜແນກອຸດສາຫະກັມ ແລະການຄ້າ ທ່ານນຶ່ງ ຈາກ ແຂວງບໍຣິຄຳໄຊ ກ່າວຕໍ່ເອເຊັຽເສຣີ ໃນວັນທີ 28 ເມສາ ນີ້ວ່າ:

"ສິປະມູນໄມ້ນະ ມັນເປັນໄມ້ທີ່ ຣັດຍຶດຈາກ ປະຊາຊົນ ລັກຕັດ ຈາກພໍ່ຄ້າລົກຕັດ ເຮົາເອົາມາລວມໄວ້ ໃນສນາມສອງ ແລ້ວ ຄົນໄທ ຄົນຫຍັງ ກໍເຂົ້າຮ່ວມໄດ້ ບໍ່ເປັນຫຍັງ ແຕ່ວ່າ ຊື້ແລ້ວ ຈຶ່ງປຸງແຕ່ງ ພາຍໃນຈຶ່ງສົ່ງອອກໄດ້".

ທ່ານກ່າວຕື່ມວ່າ ຈຳນວນໄມ້ ທີ່ຈະເອົາມາປະມູນຄັ້ງນີ້ ທັງຫມົດມີ 108 ທ່ອນ ແລະ 69 ຕັບ ຫລືປະມານ 3 ແສນ ກວ່າແມັດກ້ອນ. ຜູ້ທີ່ຈະສາມາດ ເຂົ້າຮ່ວມປະມູນໄດ້ ຕ້ອງເປັນ ເຈົ້າຂອງໂຮງງານປຸງແຕ່ງໄມ້ ທີ່ມີໃບອະນຸຍາດເທົ່ານັ້ນ, ຊຶ່ງຫຼັງຈາກຊນະການປະມູນ ຫ້າມເອົາໄມ້ອອກນອກປະເທດ ຈົນກວ່າຈະປຸງແຕ່ງ ໃນລາວ ເສັຽກ່ອນ ບໍ່ດັ່ງນັ້ນ ຈະຖືວ່າຜິດຕໍ່ຫຼັກ ໃນການປະມູນ.

ກ່ຽວກັບເຣື້ອງນີ້ ວິທຍຸເອເຊັຽເສຣີ ໄດ້ສອບຖາມໄປຍັງ ເຈົ້າຂອງ ໂຮງງານປຸງແຕ່ງໄມ້ 3 ແຫ່ງທັງຫມົດ ໃຫ້ຄຳຕອບວ່າບໍ່ສົນໃຈ ເພາະ ຈະປິດໂຮງງານ ຂອງຕົນ ໃນໄວໆນີ້ ຍ້ອນບໍ່ມີໄມ້ ປ້ອນໂຮງງານ ແບບຖາວອນ.

ເມື່ອເດືອນທັນວາ ປີ 2016 ແຂວງບໍຣິຄຳໄຊ ໄດ້ເປີດປະມູນຂາຍໄມ້ ທີ່ຍຶດໄດ້ ໄປແລ້ວຄັ້ງນຶ່ງ ປະມານ 80 ປາຍແມັດກ້ອນ ໃນຂນະ ດຽວກັນ ຫລາຍແຂວງໃນລາວ ກໍໄດ້ ປະມູນໄມ້ ທີ່ຍຶດໄດ້ເຊັ່ນກັນ ເພື່ອເອົາຣາຍຮັບເຂົ້າ ງົບປະມານແຂວງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ