ການປ່ຽນເງິນ ນອກລະບົບ ປາບປາມຍາກ

ການປາບປາມແລະຄວບຄຸມ ການແລກປ່ຽນເງິນຕຣານອກລະບົບ ຍັງເປັນໄປໄດ້ຍາກໃນປະເທດລາວ ເຖິງແມ່ນວ່າປັດຈຸບັນ ມີຮ້ານ ແລກປ່ຽນເງິນຕຣາໃນລາວ ທີ່ໄດ້ຮັບອະນຸຍາດໃຫ້ເຄື່ອນໄຫວ ແລະເປັນໂຕແທນ ຂອງທະນາຄານທຸຣະກິຈຕ່າງໆ ມີເຖິງ 400 ປາຍ ຮ້ານກໍຕາມ ແຕ່ການຄວບຄຸມ ອັດຕຣາແລກປ່ຽນເງິນຕຣາ ຍັງເຮັດໄດ້ຍາກ ຍ້ອນການແລກປ່ຽນເງິນຕຣາ ບໍ່ສະເພາະແຕ່ ຢູ່ໃນຮ້ານ ແລກປ່ຽນເງິນຕຣາເທົ່ານັ້ນ ແຕ່ຍັງເກີດຂຶ້ນຢູ່ຕາມຮ້ານທົ່ວໄປ ໂດຍຜູ້ເປັນເຈົ້າຂອງຮ້ານ ກຳນົດອັດຕຣາແລກປ່ຽນດ້ວຍຕົນເອງ. ດັ່ງ ເຈົ້າຂອງຮ້ານແລກປ່ຽນເງິນຕຣາ ແຫ່ງນຶ່ງກ່າວວ່າ:

"ກຳນົດແຕ່ດົນແລ້ວແຫຼະ ແຕ່ວ່າ ເພິ່ນຄຸມບໍ່ຢາກໄດ້ປານໃດ ທາງນອກ ມັນຈະສູງກວ່າຢູ່ທະນາຄານ ເພິ່ນຈະໃຫ້ສໍ່າກັນໝົດ ແຕ່ວ່າ ເພິ່ນຊິຄຸມໄດ້ບໍ່ ທາງການເພິ່ນໃຫ້ກຳນົດອັດຕຣາແລກປ່ຽນ.”

ໃນຂນະທີ່ ເຈົ້າໜ້າທີ່ເຈົ້າຂອງຮ້ານແລກປ່ຽນເງິນຕຣາ ອີກແຫ່ງນຶ່ງກ່າວວ່າ ລາວເອງກໍຍັງບໍ່ໝັ້ນໃຈ ວ່າທນາຄານແຫ່ງປະເທດລາວ ຈະສາມາດແກ້ບັນຫາ ການກຳນົດອັດຕຣາແລກປ່ຽນ ແບບເກີນຂອບເຂດໄດ້ ເນື່ອງຈາກປັດຈຸບັນ ຍັງພົບເຫັນຮ້ານຄ້າຫຼາຍແຫ່ງ ມັກກຳນົດອັດຕຣາແລກປ່ຽນດ້ວຍໂຕເອງຢູ່ເລື້ອຍໆ ເຖິງແມ່ນວ່າ ຮ້ານແລກປ່ຽນເງິນຕຣາ ທີ່ຖືກຕ້ອງຫຼາຍຮ້ານ ຈະກຳນົດອັດຕຣາ ແລກປ່ຽນ ຕາມທະນາຄານແຫ່ງປະເທດລາວກໍຕາມ:

"ການຊື້-ຂາຍເງິນຕຣາ ຝ່າຍທະນາຄານອີ່ຫຍັງ ເບິ່ງໂຕຈິງໄປນຳກັນ ວ່າເພິ່ນຊິເຮັດໄດ້ຫຼາຍຊໍ່າໃດ ເຮົາກາໄດ້ເຮັດໄປຕາມເພິ່ນ ໄປກ່ອນຫັ້ນນ່າ ຄັນວ່າເພິ່ນຄຸມໄດ້ ມັນກາມີຜົນດີຕໍ່ທຸກຝ່າຍຫັ້ນນ່າ.”

ສ່ວນເຈົ້າຂອງຮ້ານແລກປ່ຽນເງິນຕຣາ ອີກແຫ່ງນຶ່ງກ່າວວ່າ ການທີ່ທະນາຄານແຫ່ງປະເທດລາວ ຈະກຳນົດໃຫ້ຮ້ານແຕ່ລະແຫ່ງ ມີອັດຕຣາ ແລກປ່ຽນ ເງິນຕຣາແບບເທົ່າກັນ ຈະເຮັດໃຫ້ ຮ້ານແລກປ່ຽນເງິນຕຣາຫຼາຍແຫ່ງ ໄດ້ຮັບຜົລກະທົບ ແລະກໍເປັນໄປໄດ້ວ່າ ອາຈມີຜູ້ສວຍໂອກາດ ກຳນົດອັດຕຣາແລກປ່ຽນດ້ວຍໂຕເອງຢູ່ຄືເກົ່າ:

"ທະນາຄານໃຫ້ປັບເຮັດຕາມທະນາຄານທຸຣະກິຈ ອັດຕຣາແລກປ່ຽນເງິນຕຣາກໍຈະຕໍ່າລົງ ແຕ່ກາບໍ່ຄ່ອຍດີກັບຮ້ານແລກປ່ຽນປານໃດ ມັນກາໜ້າຈະບໍ່ໄດ້ດີເທົ່າທີ່ຄວນ ມັນກາອາຈບໍ່ຄ່ອຍດີປານໃດ ຊ່ວງນີ້ແມ່ນໃຜກະຊື້ເງິນສູງໝົດ.”

ໃນມື້ວັນທີ 17 ກັນຍາ ທີ່ຜ່ານມານີ້ ທະນາຄານ ແຫ່ງປະເທດລາວ ໄດ້ອອກແຈ້ງການ ກ່ຽວກັບຮ້ານແລກປ່ຽນເງິນຕຣາ ທີ່ໄດ້ຮັບ ອະນຸຍາດ ໃນການເຄື່ອນໄຫວ ຈາກທະນາຄານແຫ່ງປະເທດລາວ ທີ່ໄດ້ເຊັນສັນຍາ ເປັນໂຕແທນຂອງທະນາຄານຕ່າງໆ ຈຳນວນ ທັງໝົດ 419 ຮ້ານໃນທົ່ວປະເທດ ແລະ ຈະມີການປາບປາມ ຮ້ານແລກປ່ຽນເງິນຕຣາອີກຫຼາຍຮ້ານ ທີ່ເປັນຮ້ານ ບໍ່ໄດ້ຮັບອະນຸຍາດ ໃຫ້ເຄື່ອນໄຫວແບບຖືກກົດໝາຍ ແລະ ມັກກຳນົດອັດຕຣາແລກປ່ຽນເງິນຕຣາ ແບບເກີນຂອບເຂດ ທີ່ີທະນາຄານແຫ່ງປະເທດລາວ ກຳນົດ. ດັ່ງເຈົ້າໜ້າທີ່ປະຈຳທະນາຄານ ແຫ່ງປະເທດລາວ ກ່າວຕໍ່ວິທຍຸເອເຊັຽເສຣີ ໃນວັນທີ 20 ກັນຍາ ວ່າ:

"ແມ່ນກາຍກຳນົດແລ້ວ ຊິໄດ້ລົງຕິດຕາມກວດກາ ກະຊິໄດ້ປິດ ໝາຍຄວາມວ່າ ຮ້ານທີ່ບໍ່ໄດ້ຮັບອະນຸຍາດ ສ້າງຜົລເສັຽກາຫຼາຍຢູ່ ເປັນຕົ້ນກະ ການກຳນົດອັດຕຣາ ທີ່ເກີນຂອບທະນາຄານກຳນົດ.”

ທາງດ້ານຊາວບ້ານທ່ານນຶ່ງກ່າວວ່າ ກໍເຫັນດີໃຫ້ທາງການ ມີການປາບປາມຮ້ານແລກປ່ຽນເງິນຕຣາ ທີ່ບໍ່ຖືກກົດໝາຍ ແລະ ມີການ ຄວບຄຸມອັດຕຣາແລກປ່ຽນເງິນຕຣາ ລະຫວ່າງເງິນຕ່າງປະເທດ ກັບເງິນກີບ ບໍ່ໃຫ້ສູງເກີນໄປ ເພື່ອເຮັດໃຫ້ເງິນກີບແຂງໂຕຂຶ້ນ:

"ມັນກາເຮັດໃຫ້ຄ່າເງິນຕຣາກາແຂງຂຶ້ນ ເພາະວ່າການແລກປ່ຽນ ມັນກາເປັນຫົວໜ່ວຍອັນດຽວກັນ ໃນໄລຍະຜ່ານນີ້ ຖືວ່າສ່ວນຫຼາຍ ຫັ້ນແຫຼະ ແລກບາງຄົນກາເອົາຖືກ ບາງຄົນກາເອົາແພງ ແຕ່ວ່າແນວໃດກາ ເຮົາກາປັບເຮັດໃຫ້ຄ່າເງິນກີບແຂງໂຕຂຶ້ນ.”

ໃນແຈ້ງການສບັບດັ່ງກ່າວ ຂອງທະນາຄານແຫ່ງປະເທດລາວ ຍັງໄດ້ຂໍຄວາມຮ່ວມມືໃຫ້ປະຊາຊົນ ຊ່ອຍເປັນຫູເປັນຕາ ຫາກພົບເຫັນ ຮ້ານແລກປ່ຽນເງິນຕຣາ ທີ່ບໍ່ແມ່ນໂຕແທນ ຂອງທະນາຄານທຸຣະກິຈ ແຕ່ລະແຫ່ງ ເຊິ່ງຍັງເຄື່ອນໄຫວຢູ່ນັ້ນ ໃຫ້ແຈ້ງຕໍ່ທະນາຄານ ແຫ່ງປະເທດລາວ ຫຼື ກົມຕຳຣວດເສຖກິຈ ເພື່ອນໍາໄປດຳເນີນຄະດີ.

ຢ່າງໃດກໍຕາມ ປັດຈຸບັນເງິນກີບຢູ່ລາວ ຍັງຢູ່ໃນສະພາບອ່ອນໂຕຢູ່ ຫາກນຳໄປແລກປ່ຽນກັບເງິນຕຣາຕ່າງປະເທດ ເປັນຕົ້ນ ອັດຕຣາ ເງິນກີບຢູ່ທີ່ 345 ກີບຕໍ່ 1 ບາດໄທຍ ແລະ ຢູ່ທີ່ 9,851 ກີບຕໍ່ 1 ໂດລາສະຫະຣັດ. ອີງຕາມຂໍ້ມູນອັດຕຣາແລກປ່ຽນປະຈຳວັນ ຂອງທະນາຄານຫຼາຍແຫ່ງ ໃນວັນທີ 20 ກັນຍາ 2021.

ສ່ວນຢູ່ຮ້ານແລກປ່ຽນເງິນຕຣາຫຼາຍແຫ່ງ ທີ່ບໍ່ໄດ້ເປັນໂຕແທນ ຂອງທະນາຄານ ມີອັດຕຣາເງິນກີບ ຢູ່ທີ່ 350 ກີບຕໍ່ 1 ບາດໄທຍ ແລະ 11,660 ກີບ ຕໍ່ 1 ໂດລາຣ໌ສະຫະຣັດ.