ຣັຖກອນມີສ່ວນຮ່ວມ ຄ່າໄມ້ ເຖື່ອນ

ສິດນີ
2018-05-21
ອີແມວລ໌
ຄໍາເຫັນ
Share
ພິມ
ຣົດຂົນໄມ້ ຂອງບໍຣິສັດວຽດນາມ ແກ່ໄມ້ ປະດົງ ແລະ ໄມ້ດູລາຍ ຢູ່ເຂດ ບ້ານນາເຊືອກ ເມືອງພູວົງ ແຂວງອັດຕະປີ ມຸ້ງໜ້າໄປທາງ ຊາຍແດນວຽດນາມ. ພາບຖາຍ ເດືອນເມສາ ປີ 2011
ຣົດຂົນໄມ້ ຂອງບໍຣິສັດວຽດນາມ ແກ່ໄມ້ ປະດົງ ແລະ ໄມ້ດູລາຍ ຢູ່ເຂດ ບ້ານນາເຊືອກ ເມືອງພູວົງ ແຂວງອັດຕະປີ ມຸ້ງໜ້າໄປທາງ ຊາຍແດນວຽດນາມ. ພາບຖາຍ ເດືອນເມສາ ປີ 2011
RFA

ການຄ້າໄມ້ເຖື່ອນເປັນທຸຣະກິດຕ້ອງຫ້າມ ແລະເຈົ້າໜ້າທີ່ມີການຕິດຕາມກວດກາຢ່າງເຄັ່ງຄັດ ແຕ່ຍັງມີຄົນລັກລອບກັນຄ້າໄມ້ທ່ອນ ຫລາຍຢູ່ ກຸ່ມດັ່ງກ່າວ ຈະເຮັດກັນແບບເປັນຂະບວນ ແລະ ຫຼາກຫຼາຍ ແຕ່ກໍ່ບໍ່ລອດສາຍຕາ ຂອງ ເຈົ້າໜ້າທີ່ ຕາມຂໍ້ມູນ ທາງການໃນປີ 2017 ຫນ່ວຍສະເພາະກິດ ສາມາດກວດພົບເຫັນ ຜູ້ກະທຳຜິດເກືອບຮອດ 600 ຄົນ ໃນນັ້ນມີພະນັກງານຣັດ ຮ່ວມນຳຈຳນວນນຶ່ງ.

ໜັງສືພິມປະຊາຊົນ ແລະໜັງສືພິມວຽງຈັນໃໝ່ ລາຍງານໂດຍອ້າງຕາມຂໍ້ມູນ ຈາກຄນະກວດກາສູນກາງພັກ ຣະບຸວ່າ: ໃນປີ 2017 ຄນະ ກວດກາສູນກາງພັກ ສາມາດກວດເຫັນ ການລັກຄ້າໄມ້ທ່ອນ ທີ່ຕ້ອງຫ້າມເກືອບຮອດ 600 ກໍຣະນີ ນອກຈາກນັ້ນ ຍັງກວດພົບການເອົາ ທີ່ດິນຣັດ ແລກປ່ຽນ ໂດຍບໍ່ມີການປະເມີນຣາຄາ ເຮັດໃຫ້ຣັດເສັຽຫາຍເຖິງ 266 ຕື້ກີບ.

ພ້ອມກັນນັ້ນ ຍັງໄດ້ກວດກາ ເພື່ອປະຕິບັດຄຳສັ່ງ ເລກທີ 15 /ນຍ ກ່ຽວກັບການຫ້າມຄ້າໄມ້ທ່ອນ ປະກົດວ່າມີການອະນຸຍາດ ໂກຕ້າໄມ້ ໃນສົກປີ 2016-2017 ທັງໝົດ ປະມານ 166.583,31 ແມັດກ້ອນ ແລະຂຸດຄົ້ນໄມ້ໄດ້ທັງໝົດປະມານ 94.778,58 ແມັດກ້ອນ ໃນນັ້ນມີ ໄມ້ຕົກຄ້າງໃນສນາມ 146. 839,81 ແມັດກ້ອນ ຢູ່ໃນໂຮງງານ 271.639,46 ແມັດກ້ອນ ທາງການສາມາດຍຶດໄມ້ ທີ່ຜິດກົດຫມາຍໄດ້ ໂດຍຮວມທັງໝົດ ປະມານ 50 ແມັດກ້ອນ.

ທາງການໄດ້ກວດພົບເຫັນການຂາຍໄມ້ທີ່ຜິດກົດຫມາຍ ປະມານ 50,991.60 ແມັດກ້ອນ ຮວມມູນຄ່າປະມານ 116.70 ຕື້ກີບ ໄດ້ຈັບກຸ່ມ ຜູ້ກະທຳຜິດ ຈຳນວນ 595 ຄົນ ໃນນັ້ນມີພະນັກງານຣັດ 50 ປາຍຄົນ ຜູ້ປະກອບການ 182 ຄົນ ແລະປະຊາຊົນ ທັມມະດາ 363 ຄົນ.

ຜົລຂອງການຕິດຕາມກວດກາໃນປີ 2017 ພົບວ່າ: ທົ່ວປະເທດມີໂຮງງານປຸງແຕ່ງໄມ້ທັງໝົດ 3,190 ແຫ່ງ ໃນນັ້ນມີໃບອະນຸຍາດ 1,366 ແຫ່ງ ຣັຖໄດ້ອອກຄຳສັ່ງໃຫ້ຍຸບ 1,869 ແຫ່ງ ແລະໄດ້ຍຸບແລ້ວ 1,740 ແຫ່ງ ຍັງສືບຕໍ່ກວດກາ ເພີ້ມອີກຈຳນວນ  1,448 ແຫ່ງ.

ດຳຣັດຂອງ ນາຍົກຣັຖມົນຕຣີ ເລກທີ 15 ວ່າດ້ວຍການ ເພີ້ມທະວີຄວາມເຂັ້ມງວດ ໃນການຄຸ້ມຄອງ ແລະກວດກາ ການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸຣະກິດໄມ້ ທີ່ໄດ້ອອກມາບັງຄັບໃຊ້ ນັບແຕ່ ເດືອນພຶສພາ 2016 ທີ່ຜ່ານມາ, ແຕ່ປັດຈຸບັນ ກໍຍັງມີການ ລັກລອບ ສົ່ງໄມ້ອອກ ໄປຕ່າງປະເທດ ຫລາຍຢູ່.

ເຈົ້າໜ້າທີ່ຈາກອົງການຈັດຕັ້ງ ທາງສັງຄົມ ຜູ້ທີ່ເຮັດວຽກພັທນາຊົມຊຸມ ທ່ານນຶ່ງເວົ້າວ່າ ໃນປັດຈຸບັນ ການລັກລອບ ສົ່ງໄມ້ອອກໄປ ຕ່າງປະເທດ ຍັງສືບຕໍ່ແບບງຽບໆຢູ່ ແຕ່ກໍບໍ່ໄດ້ ໝາຍຄວາມວ່າ ມັນຈະໝົດໄປ ຍ້ອນວ່າ ຜູ້ລັກລອບ ຄ້າໄມ້ຜິດກົດໝາຍ ຍັງເອົາໄມ້ ໄປເຊື່ອງໄວ້ ແລະລໍຖ້າຈັ່ງຫວະລັກລອບ ສົ່ງອອກຢູ່. ດັ່ງເຈົ້າຫນ້າທີ່ ຄນະກວດກາຈາກພັກຣັດ ທ່ານນຶ່ງກ່າວຕໍ່ເອເຊັຽເສຣີ ວ່າງຫລັງໆ ມານີ້ວ່າ:

"ມີການກວດກາ ຂອງຄນະກວດກາຂອງແຂວງ ມີການພົບເຫັນ ການຊຸກເຊື່ອງໄມ້ຫັ້ນນ່າ ໄປບໍ່ຮອດບໍ່ເຖິງ ໄປບໍ່ຮອດບໍ່ເຖິງແລ້ວ ກໍ່ໄປ ກວດກາ ໄປເຫັນຫັ້ນນ່າ ຄນະກວດກາ ຂອງໄທເຮົາ ກໍ່ບັນທຶກໄວ້ແລ້ວ."

ໃນຕົ້ນເດືອນກໍຣະກະດາ ຜ່ານມາ ເຈົ້າໜ້າທີ່ຕຳຣວດ ດ່ານບ້ານມອມ ເມືອງສິງ ແຂວງຫລວງນ້ຳທາ ໄດ້ຢຶດໄມ້ ເກືອບ 4 ພັນແມັດກ້ອນ ແລະ ຈັບຜູ້ຕ້ອງສົງໃສໄດ້ 6 ຄົນ ທີ່ ເປັນຄົນລາວ 4 ຄົນ ແລະ ຄົນຈີນ 2 ຄົນ ໃນຂນະທີ່ ກຳລັງ ລັກລອບຂົນໄມ້ ອອກໄປຈີນ.

ນອກຈາກນີ້ ໃນເດືອນ ມິຖຸນາ ຜ່ານມາ ເຈົ້າໜ້າທີ່ ດ່ານບໍ່ເຕັນ ໄດ້ຢຶດຣົດໄມ້ 8 ຄັນ, ແຕ່ບໍ່ມີການເປີດເຜີຍ ຈຳນວນໄມ້. ແລະໃນອີກ ກໍຣະນີ ນຶ່ງໃນເດືອນ ມິຖຸນາ ທີ່ຜ່ານມາ ເຈົ້າໜ້າທີ່ ອົງການກວດກາ ຣັຖບານ ກໍສາມາດຍຶດຣົດໄມ້ ທີ່ຜິດກົດໝາຍໄດ້ 27 ຄັນ ຢູ່ດ່ານ ພູເກືອ ເມືອງພູວົງ ແຂວງອັດຕະປື.

ເມື່ອປີກ່ອນ ເຈົ້າຫນ້າທີ່ຫນ່ວຍສະເພາະກິດ ທີ່ແຂວງອັດຕະປື ສາມາດຍຶດໄມ້ຂະຍູງ ທີ່ມີຄວາມຍາວ ປະມານ 7 ແມັດ 11 ທ່ອນ ທີ່ກວດພົບຢູ່ໃນຣົດຕູ້ ຂອງເຈົ້າຫນ້າທີ່ຕຳຣວດ ຄົນນຶ່ງ ຢູ່ແຂວງອັດຕະປື ທີ່ຈະຂົນຜ່ານດ່ານຊາຍແດນ ໄປວຽດນາມ. ຜູ້ຕ້ອງຫາຖືກ ກ່າວຫາວ່າ ພຍາຍາມຂົນໄມ້ທ່ອນ ທີ່ຜິດກົດຫມາຍ ອອກນອກປະເທດ.

ຕາມຂໍ້ມູນຈາກທາງການ ແຂວງອັດຕະປື, ໄມ້ຂະຍຸງຈຳນວນ ດັ່ງກ່າວ ຖືກເຈົ້າໜ້າທີ່ກວດພົບ ຢູ່ປ້ອມຍາມ ຕາມຖນົນ ໃນເຂດເມືອງ ໄຊສະຖານ. ໄມ້ມີມູນຄ່າຫຼາຍກວ່າ 166 ລ້ານກີບ ຫຼືປະມານ 20 ພັນໂດລາ ສະຫະຣັຖ. ເຈົ້າຫນ້າທີ່ ປ່າໄມ້ ແຂວງອັດຕະປື ເວົ້າວ່າ ການຄ້າໄມ້ ຜິດກົດໝາຍ ຍັງມີຫລາຍຢູ່ລາວ:

"ມັນຍັງມີຫລາຍເຂດໃນຫລາຍພື້ນທີ່ຢູ່ໃນລາວ ໃນແຂວງທີ່ເຄີຍສົ່ງໄມ້ອອກ ໃນມື້ກ່ອນ ຍັງລໍຖ້າຈັ່ງຫວະ ແບບນີ້ຢູ່ ຍ້ອນວ່າ ເຈົ້າຫນ້າທີ່ ຜູ້ທີ່ເຄີຍມີລາຍໄດ້ ຈາກພຶດຕິກັມ ດັ່ງກ່າວ ຈະບໍ່ເອົາຫົວຊາ ໃນຄຳສັ່ງຂອງທາງການ ຍ້ອນວ່າເຂົາເຄີຍໄດ້ກິນ ກັບອັນນີ້ ມາກ່ອນແລ້ວ ມື້ນຶ່ງເຂົາຂາດຣາຍໄດ້ ທີ່ເຄີຍໄດ້ ມັນເປັນການ ຕັດຕີນຕັດມືຂະເຈົ້າ."

ວ່າງປີທີ່ຜ່ານມາພົລເມືອງດີ ທ່ານນຶ່ງ ຢູ່ແຂວງສວັນນະເຂດ ເວົ້າວ່າປັດຈຸບັນປ່າໄມ້ ໃນແຂວງເກືອບຮອດ 90% ຖືກຕັດ ໄປຫມົດແລ້ວ ເປັນຕົ້ນໄມ້ໃນປ່າທັມມະຊາດ ແລະປ່າອື່ນໆ, ໃນເນື້ອທີ່ຫຼາຍສິບພັນ ກິໂລແມັດມົນທົນ ທີ່ເປັນປ່າທັມມະຊາດ ແລະປ່າສງວນຮ່ວມທັງ ປ່າປົກປ້ອງ.

ທ່ານເລົ່າວ່າ ຜ່ານມາຖ້າທ່ານເດີນທາງ ຕາມເສັ້ນທາງຫຼວງ ເລຂ 9 ຊຶ່ງເປັນເສັ້ນທາງ ເຊື່ອມຕໍ່ຣະຫວ່າງ ແຂວງສວັນນະເຂດ ກັບ ດ່ານລາວບາວ ໄປວຽດນາມ ຈະເຫັນຣົດຂົນໄມ້ ຈາກສປປລາວ ລຽນແຖວຕິດກັນ ຫຼາຍສິບຄັນ ໃນແຕ່ລະຄັ້ງ ເພື່ອຂົນໄມ້ ໄປວຽດນາມ ແຕ່ຫລັງຈາກຄຳສັ່ງ ຂອງນາຍົກ ຫ້າມສົ່ງໄມ້ກຸ່ມດັ່ງກ່າວ ກໍປ່ຽນທີດທາງໃນການຂົນສົ່ງ.

ທ່ານໄດ້ລົມກັບປະຊາຊົນທ້ອງຖິ່ນ ເຂົາບອກວ່າເປັນເຣື້ອງປົກກະຕິ ຜ່ານມາວຽດນາມໄດ້ຂົນໄມ້ຈາກສປປລາວ ມາເປັນເວລາຫຼາຍປີແລ້ວ, ດ້ວຍການ ສົມຮູ້ຮ່ວມຄິດ ກັບເຈົ້າຫນ້າທີ່ທ້ອງຖິ່ນ ແລະຜູ້ມີອຳນາດ ໃນ ສປປລາວ ໂດຍບໍ່ຢ້ານກົວກົດຫມາຍ ແລະຂໍ້ຫ້າມຂອງທາງການ

ແຕ່ຢ່າງໃດ ຖ້າເປັນພົລເມືອງ ທັມມະດາ ຈະເຮັດບໍ່ໄດ້ ແນ່ນອນ.ຜູ້ທີ່ເຫັນ ເຫດການ ທ່ານນີ້ ເວົ້າວ່າຕໍ່ໄປວ່າ ຖນົນຫຼວງ ເລຂ 9 ຊຶ່ງເປັນ ການຊ່ອຍເຫລືອ ຂອງຍີ່ປຸ່ນ ທີ່ຜ່ານມາເປັນຖນົນ ທີ່ ໄດ້ມາຕຖານ ແຕ່ດຽວນີ້ ເປັນຂຸມ ເປັນບວກ ຫມົດແລ້ວ ຍ້ອນຣົດຂົນໄມ້ ທ່ອນ ຂນາດຫນັກຈາກລາວໄປວຽດນາມ ໃຊ້ແລ່ນຜ່ານຕຣອດ ໃນຣະຍະທີ່ຜ່ານມາ ຊື່ງໃນປັດຈຸບັນ ສາມາດແລ່ນໄດ້ພຽງແຕ່ 10 ກິໂລແມັດ ຕໍ່ຊົ່ວໂມງ ຫລື ຕ່ຳກວ່ານັ້ນ, ການຂົນໄມ້ດັ່ງກ່າວ ໄດ້ຢຸດລົງແດ່ ໃນປີ 2017 ຍ້ອນ ບໍ່ມີໄມ້ຂົນ ບໍ່ແມ່ນຢ້ານຂໍ້ຫ້າມ ຂອງຣັຖບານ.

ການຍຶດໄມ້ເຖື່ອນໃນລາວ ເກີດຂື້ນໃນຫລາຍແຂວງ ເຮັດໃຫ້ເກີດມີຄວາມສົງສັຍຫລາຍຂຶ້ນ ກ່ຽວກັບການປະຕິບັດຕໍ່ ດຳຣັດນາຍົກຣັຖມົນຕຣີ ທອງລຸນ ສີສຸລິດ ເລກທີ 15/ນຍ ໃນການຫ້າມຕັດ ແລະສົ່ງໄມ້ອອກຕ່າງປະເທດ ຈະບໍ່ມີການ ປະຕິບັດຢ່າງ ຈີງຈັງ ຈາກເຈົ້າຫນ້າທີ່ຣັດ ຕໍ່ດຳຣັດການຫ້າມດັ່ງກ່າວ ແຕ່ຢ່າງໃດ ຍັງມີຜູ້ລະເມີດ ຂໍ້ຫ້າມຫລາຍຢູ່.

ຄໍາເຫັນ (1)
Share

ປຊຊລ

ຈາກ ສວນຂ

ປາດດດດ!!! ຫາກະຊິຮູ້ນະ? ພວກເຮັດການຢູ່ກົມປ່າໄມ້ລວຍເອົາແທ້ເອົາວ່າ... ພວກພາສີຄືກັນ ສອງຜະແຫນກນີ້ກີນເງີນຂອງລັດຂອງປປຊ ຫລາຍກ່ວາຫມູ່... ເຊີນເປີດຫູເປີດຕາແນ່ຂະນ້ອຍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 22, 2018 05:10 AM

ເຕັມຫນ້າ