ຜູ້ຂາຍລົດໃຫຍ່ມືສອງ ວ່າ ໂຈະຊົ່ວຄາວ ນຳເຂົ້າລົດໃຫຍ່ ຈະບໍ່ກະທົບ

ຜູ້ປະກອບການ ຮ້ານຊື້-ຂາຍລົດມືສອງ ໃນແຂວງໄຊຍະບູລີ ກ່າວວ່າ ແຈ້ງການ ທີ່ກະຊວງອຸດສາຫະກຳ ແລະ ການຄ້າ ອອກມາດຕະການ ຫຼຸດຜ່ອນການນຳເຂົ້າ ໂດຍການໂຈະຊົ່ວຄາວ ການນຳເຂົ້າ ຍານພາຫະນະທາງບົກ ປະເພດຕ່າງໆ ທີ່ມີມູນຄ່າສູງ ແຕ່ 50,000 ໂດລ້າຣ໌ສະຫະລັດ ຂຶ້ນໄປນັ້ນ, ຈະບໍ່ສົ່ງຜົນກະທົບ ຕໍ່ຕົວແທນຈຳໜ່າຍ ແລະ ຮ້ານຂາຍລົດມືສອງ ເພາະລາຄາຊື້-ຂາຍ ບໍ່ໄດ້ມີມູນຄ່າສູງ ເກີນ 50,000 ໂດລ້າຣ໌ສະຫະລັດ ຕາມລັດຖະບານກຳນົດ. ດັ່ງຜູ້ປະກອບການທ່ານນີ້ ກ່າວຕໍ່ວິທຍຸເອເຊັຽເສຣີ ໃນວັນທີ 7 ເດືອນ 8 ນີ້ວ່າ:

“ບໍ່ໃຫ້ນຳເຂົ້າ ແບບໃນລາຄາທີ່ມັນສູງ, ວ່າຊັ້ນສາ. ເປັນລົດສະປອດ, ລົດຫຼູ ໜ້າຈະບໍ່ໃຫ້ເອົາເຂົ້າແລ້ວ. ແຕ່ວ່າ ເຮົາບໍ່ແມ່ນລົດຫຼູ ເຮົາມີແຕ່ລົດ ແບບນຳໃຊ້ວຽກກະສິກຳ, ວຽກຄອບຄົວຈັ່ງຊີ້ຊື່ໆ.”

ທ່ານກ່າວຕື່ມວ່າ ກຸ່ມຄົນທີ່ຈະໄດ້ຮັບຜົນກະທົບ ກະຄືກຸ່ມຄົນຮັ່ງມີ ແລະ ໂຕແທນຈຳໜ່າຍ ລົດໃຫຍ່ຫຼູຫຼາ ທີ່ມີລາຄາສູງ ທີ່ມັກຈະຊື້-ຂາຍ ລົດຫຼູຫຼາ, ລົດສະປອດ ແລະ ລົດຕູ້ຄອບຄົວ ແບບຫຼູຫຼາ, ເຊິ່ງກຸ່ມເຫຼົ່ານັ້ນ ຈະນຳລົດໃຫຍ່ເຂົ້າມາ ຈາກຕ່າງປະເທດ ຢູ່ແລ້ວ ກ່ອນຈະມີການແລກປ່ຽນ ແລະ ຊື້-ຂາຍກັນ ຢູ່ພາຍໃນປະເທດ.

ຂະນະທີ່ ຜູ້ປະກອບການ ຮ້ານຊື້-ຂາຍລົດ ໃນແຂວງຈຳປາສັກ ກ່າວວ່າ ການໂຈະຊົ່ວຄາວ ການນຳເຂົ້າ ຍານພາຫະນະທາງບົກ ປະເພດລົດເບົາ ເຊັ່ນ ລົດເກັງ, ລົດຈິບ, ລົດຕູ້ ແລະ ລົດກະບະ ທີ່ມີມູນຄ່າສູງ ແຕ່ 50,000 ໂດລ້າຣ໌ສະຫະລັດ ຂຶ້ນໄປນັ້ນ, ໂດຍສ່ວນຕົວແລ້ວ ທ່ານເຫັນວ່າ ໃນບາງເຂດ ຫາກບໍ່ເຂັ້ມງວດ ແລະ ມີຄວາມເດັດຂາດແທ້ໆ ກະອາດຈະບໍ່ສາມາດ ຈັດຕັ້ງປະຕິບັດໄດ້ ຕາມແຈ້ງການດັ່ງກ່າວ. ດັ່ງທ່ານກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ແຕ່ວ່າຊິຫ້າມ 100 ກະຫ້າມບໍ່ໄດ້ດອກ ເພາະວ່າ ບໍລິສັດທີ່ເຂົານຳເຂົ້າມາ ມັນຊິບໍ່ຂາດ ເຂົາກະເອົາເຂົ້າມາເລື້ອຍໆ. ບາດນີ້, ມັນບໍ່ແມ່ນສັ່ງຫ້າມໝົດທົ່ວປະເທດດອກ. ແຕ່ວ່າ ເຂດທີ່ເອົາເຂົ້າມາໄດ້ ກະຊິເອົາມາໄດ້ ເຄລຍກັບບ່ອນນຳເຂົ້າ ກັບດ່ານໄດ້ຫັ້ນ. ມັນມີບັນຫາ ບ່ອນທີ່ນຳເຂົ້າມາ ຊາຍແດນ ມັນມີບັນຫາເລື້ອງພາສີ ເລື້ອງອາກອນ ເຄລຍກັນບໍ່ຕົກແຕກຫັ້ນ, ເພິ່ນຊິບໍ່ໃຫ້ເອົາເຂົ້າມາ. ມັນຂຶ້ນບ່ອນນຳເຂົ້າມາຫັ້ນ.”

ກະຊວງອຸດສາຫະກຳ ແລະ ການຄ້າ ໄດ້ອອກມາດຕະການ ຫຼຸດຜ່ອນການນຳເຂົ້າລົດໃຫຍ່ ຕາມແຈ້ງການດັ່ງກ່າວ ແມ່ນໃຫ້ເລີ້ມຈັດຕັ້ງປະຕິບັດ ນັບແຕ່ວັນທີ 20 ສິງຫາ ໄປຈົນເຖິງວັນທີ 30 ທັນວາ 2024 ນີ້ ຫຼືຈົນກວ່າ ຈະມີແຈ້ງການປ່ຽນແປງ, ເຊິ່ງມາດຕະການດັ່ງກ່າວ ຍັງໄດ້ກຳນົດວ່າ ການນຳເຂົ້າຍານພາຫະນະ ຈະຕ້ອງເປັນບໍລິສັດແມ່ ຫຼືບໍລິສັດຕົວແທນຈຳໜ່າຍ ເທົ່ານັ້ນ. ດັ່ງເຈົ້າໜ້າທີ່ ຜູ້ຮູ້ຈັກວຽກງານການຄ້າ ນາງໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ບໍ່ວ່າຈະເປັນລົດນ້ຳມັນ ຫຼືລົດໄຟຟ້າ, ແຕ່ຖ້າມູນຄ່າທີ່ຕ່ຳກວ່ານີ້ ອະນຸມັດໃຫ້ນຳເຂົ້າໄດ້ຢູ່, ແຕ່ບໍລິສັດ ທີ່ຈະນຳເຂົ້າ ຕ້ອງເປັນບໍລິສັດ ທີ່ມີໃບມອບສິດ ການເປັນຕົວແທນຈຳໜ່າຍ ຈາກບໍລິສັດແມ່ ແລະ ຕ້ອງນຳເຂົ້າໃນຍີ່ຫໍ້ ທີ່ຕົວເອງ ໄດ້ຮັບເທົ່ານັ້ນ.”

ອີງຕາມມາດຕະການດັ່ງກ່າວນີ້, ກະຊວງອຸດສາຫະກຳ ແລະ ການຄ້າ ບໍ່ອະນຸຍາດໃຫ້ ບໍລິສັດນຳເຂົ້າ ພາຫະນະທາງບົກ ທີ່ບໍ່ໄດ້ຮັບການແຕ່ງຕັ້ງ ຫຼືມອບສິດ ຈາກບໍລິສັດແມ່ ຈົນກວ່າຈະມີການກວດກາ ແລະ ຢັ້ງຢືນມາດຕະຖານ-ເຕັກນິກ ແລະ ຄຸນນະພາບ ການນຳເຂົ້າ ຍານພາຫະນະທາງບົກ ປະເພດລົດເບົາ ທີ່ມີມູນຄ່າ ແຕ່ 50,000 ໂດລ້າຣ໌ສະຫະລັດ ຂຶ້ນໄປ ຕ້ອງມີຫຼັກຖານ ການໂອນເງິນມັດຈຳ ຜ່ານລະບົບທະນາຄານທຸລະກິດ ພາຍໃນລາວ ກ່ອນວັນທີ 6 ສິງຫາ 2024 ນີ້.

ການນຳເຂົ້າ ຍານພາຫະນະ ປະເພດລົດເບົາ ທີ່ມີມູນຄ່າ ແຕ່ 50,000 ໂດລ້າຣ໌ສະຫະລັດ ຂຶ້ນໄປ ເພື່ອນຳເອົາມາໃຊ້ ໃນວຽກງານ ທີ່ມີຄວາມຈຳເປັນ ຫຼືກ່ຽວຂ້ອງ ກັບພັນທະສາກົນ ແມ່ນສາມາດນຳເຂົ້າໄດ້, ໂດຍຈະຕ້ອງໄດ້ຮັບ ການພິຈາຣະນາ ແລະ ຕົກລົງ ຂອງລັດຖະບານ.

ແຈ້ງການດັ່ງກ່າວນີ້, ຖືເປັນໜຶ່ງ ໃນມາດຕະການ ຫຼຸດຜ່ອນການຳເຂົ້າ ເພື່ອປະກອບສ່ວນ ໃນການແກ້ໄຂ ບັນຫາ ການຂາດແຄນ ເງິນຕາຕ່າງປະເທດ, ຫຼຸດຜ່ອນການຂາດດຸນການຄ້າ ແລະ ປະກອບສ່ວນ ແກ້ໄຂບັນຫາເງິນເຟີ້ ເນື່ອງຈາກໃນໄລຍະທີ່ຜ່ານມາ ການຊື້-ຂາຍລົດໃຫຍ່ ເກືອບທຸກປະເພດ ແມ່ນຊື້-ຂາຍ ເປັນເງິນຕາຕ່າງປະເທດ. ດັ່ງເຈົ້າໜ້າທີ່ ຜູ້ຮູ້ຈັກວຽກງານການຄ້າ ອີກທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຈຸດປະສົງ ຂອງຄຳສັ່ງຕົວນີ້ ກະຄື ບໍ່ຢາກໃຫ້ເງິນຕາຮົ່ວໄຫຼ ອອກໄປຫຼາຍຫັ້ນແຫຼະ ເພິ່ນກະເລີຍເຮັດແຈ້ງການຕົວນີ້ອອກມາ. ແຕ່ວ່າເລື້ອງຍານພາຫະນະ ເລື້ອງລົດນີ້, ຄັນຊິເວົ້າ ກະເປັນອັນດັບ 1 ເລີຍແຫຼະ ທີ່ວ່າເຮົາໃຊ້ເງິນຕາຊື້, ຫັ້ນນ່າ. ແລ້ວມັນເຮັດໃຫ້ ເງິນອອກນອກປະເທດຫຼາຍເນາະ.”

ຕາງໜ້າບໍລິສັດ ຮອນດ້າ ລາວ, ເຊິ່ງເປັນຕົວແທນຈຳໜ່າຍ ລົດຍີ່ຫໍ້ ຮອນດ້າ ໃນນະຄອນຫຼວງວຽງຈັນ ກ່າວວ່າ ແຈ້ງການດັ່ງກ່າວ ຈະບໍ່ສົ່ງຜົນກະທົບ ຕໍ່ບໍລິສັດແມ່ ຫຼືບໍລິສັດຕົວແທນຈຳໜ່າຍ ແຕ່ຢ່າງໃດ ແລະ ຍັງສາມາດນຳເຂົ້າໄດ້ ຕາມປົກກະຕິ ເນື່ອງຈາກ ບໍລິສັດຕົວແທນຈຳໜ່າຍ ໃນລາວ ໄດ້ມີການຈົດທະບຽນ ວິສາຫະກິດ ແລະ ຈ່າຍພາສີ-ອາກອນ ການນຳເຂົ້າ ຢ່າງຖືກຕ້ອງ ຕາມລະບຽບກົດໝາຍ. ດັ່ງທ່ານກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ໜ້າຈະເປັນພວກບໍລິສັດ ທີ່ເຂົາເຈົ້າຕັ້ງຂຶ້ນມາເອງ, ແຕ່ວ່າ ພວກແມ່ ພວກສູນໃຫຍ່ ພວກແທ້ໆ ເຂົາເຈົ້າກະໜ້າຈະໃຫ້ນຳເຂົ້າຢູ່. ພວກໂຕໂຢ່ຕ້າ, ຮອນດ້າ ອີ່ຫຍັງ ມີການນຳເຂົ້າປົກກະຕິ.”

ປັດຈຸບັນ, ທະນາຄານແຫ່ງສປປລາວ ແລະ ຄະນະສະເພາະກິດ ທີ່ໄດ້ຮັບການແຕ່ງຕັ້ງຂຶ້ນ ໂດຍທ່ານນາຍົກຣັຖມົນຕຣີລາວ ກະໄດ້ມີຄວາມພະຍາຍາມແກ້ໄຂ ຢ່າງຮີບດ່ວນທີ່ສຸດ ໃນການຄົ້ນຄວ້າ ແລະ ຊອກຫາແນວທາງແກ້ໄຂ ສະພາບເສດຖະກິດ-ການເງິນ ທີ່ຕົກຕ່ຳ ແລະ ນຳເງິນໄປຊຳລະໜີ້ສິນ ກັບຕ່າງປະເທດ ເພື່ອຮັບປະກັນ ບໍ່ໃຫ້ປະເທດລາວ ຜິດນັດຊຳລະໜີ້ສິນ ແລະ ຫຼຸດຄວາມສ່ຽງ ເຮັດໃຫ້ປະເທດ ຕົກຢູ່ໃນສະພາບວິກິດ.