ລາວຕຽມ ເປີດປະເທດ ເພື່ອກະຕຸ້ນ ເສຖກິຈ
2021.11.11
ສະພາບຢູ່ນະຄອນຫຼວງວຽງຈັນ ກ່ອນໂຄວິດ-19 ຣະບາດໜັກ
ນັກຂ່າວ ພົລເມືອງ
ທ່ານ ພັນຄຳ ວິພາວັນ ນາຍົກຣັຖມົນຕຣີລາວ ມອບໝາຍໃຫ້ກະຊວງຖແລງຂ່າວ ວັທນະທັມແລະທ່ອງທ່ຽວ ສົມທົບກັບກະຊວງອຸດສາຫະກັມ ແລະການຄ້າ ແລະພາກສ່ວນທີ່ກ່ຽວຂ້ອງ ຮ່ວມກັນຄົ້ນຄວ້າມປຶກສາຫາລື ເພື່ອຕຽມເປີດປະເທດ ໃນປີ 2022 ໂດຍເບື້ອງຕົ້ນ ສຳລັບນັກທ່ອງທ່ຽວທີ່ຈະເຂົ້າມາລາວນັ້ນ ຈະຕ້ອງແມ່ນຜູ້ທີ່ໄດັຮັບການ ສັກວັກຊິນປ້ອງກັນໂຄວິດ-19 ຄົບໂດສ ເຖິງຈະເຂົ້າມາລາວໄດ້, ດັ່ງເຈົ້າໜ້າທີ່ ຂແນງການທ່ອງທ່ຽວທ່ານນຶ່ງ ທີ່ຂໍສງວນຊື່ ແລະຕຳແໜ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ່ 11 ພຶສຈິກາ ນີ້ວ່າ:
“ເພິ່ນກໍເວົ້າວ່າປະມານຕົ້ນປີ 2022 ເພາະວ່າທາງຣົດໄຟລາວ-ຈີນ ເພິ່ນກະຊິເປີດ ເປົ້າໝາຍແມ່ນຜູ້ທີ່ສັກວັກຊິນຄົບແລ້ວນີ້ແຫຼະ ໂຕນີ້ເພິ່ນຍັງສຶກສາ ວ່າຈະເປີດແບບໃດ ຍັງບໍ່ຮູ້ລາຍຣະອຽດເທື່ອ ກໍມີແຕ່ວ່າຕຽມຄວາມພ້ອມຊື່ໆ ສຶກສາເຣື່ອງມາຕການ ເຣື່ອງຫຍັງຍັງບໍ່ທັນໄດ້ກຳນົດໄດ້ເທື່ອ.”
ອີງຕາມແຈ້ງການ ຂອງສຳນັກງານນາຍົກຣັຖມົນຕຣີ ເລຂທີ່ 1445/ນຍ ລົງວັນທີ່ 5 ພຶສຈິກາ 2021 ຣະບຸວ່າ ນາຍົກຣັຖມົນຕຣີ ເຫັນດີຕາມທີ່ກະຊວງຖແລງຂ່າວ ວັທນະທັມ ແລະທ່ອງທ່ຽວ ສເນີໃຫ້ເປີດປະເທດ ແຕ່ຕ້ອງໃຫ້ສົມທົບກັບກະຊວງຕ່າງໆ ທີ່ກ່ຽວຂ້ອງ ເພື່ອຄວບຄຸມປ້ອງກັນ ການແຜ່ຣະບາດ ຂອງເຊື້ອໂຄວິດ-19 ແລະພາກສ່ວນອື່ນໆ ຕ້ອງໄດ້ຄົ້ນຄວ້າ ປຶກສາຫາລືກັນ ໃຫ້ມີຄວາມພ້ອມເປັນເອກະພາບ ສ້າງເປັນແຜນຮ່ວມ ເພື່ອເປີດປະເທດ ບໍ່ສະເພາະແຕ່ກຸ່ມນັກທ່ອງທ່ຽວເທົ່ານັ້ນ ຍັງປະກອບໄປດ້ວຍຜູ້ກອບການຕ່າງໆ ກໍຕ້ອງສ້າງຄວາມພ້ອມເຊັ່ນກັນ.
ຂະນະທີ່ ແຂວງຫຼວງພຣະບາງ ກໍຍັງບໍ່ໄດ້ຕຽມຄວາມພ້ອມ ທີ່ຈະຮັບນັກທ່ອງທ່ຽວເທື່ອ ເພາະປັດຈຸບັນ ພາຍໃນແຂວງຍັງມີຜູ້ຕິດເຊື້ອ ໂຄວິດ-19 ຢູ່ຢ່າງຕໍ່ເນື່ອງ ໃນແຕ່ລະມື້ ແຕ່ຈະປະຊຸມປຶກສາຫາລືກັນ ຕື່ມ ເພື່ອວາງແຜນການ ໃນການເປີດປະເທດ ໃຫ້ນັກທ່ອງທ່ຽວເຂົ້າມາທ່ຽວ, ດັ່ງເຈົ້າໜ້າທີ່ ຜແນກຖແລງຂ່າວ ວັທນະທັມ ແລະທ່ອງທ່ຽວ ແຂວງຫຼວງພຣະບາງ ທ່ານນຶ່ງ ກ່າວວ່າ:
“ທາງຫຼວງພຣະບາງ ຍັງບໍ່ທັນໄດ້ມີແຜນຣະອຽດດອກ ແຕ່ໃນອາທິດຊິມານີ້ ກໍເອີ້ນພາກທະຣະກິຈ ພາກຣັຖປະຊຸມກັນຢູ່ ກະຊິໄດ້ບໍ່ໄດ້ຫຼືບໍ່ ເພາະວ່າຍັງເຄີຟິວຢູ່ເດ້ ພວກເຮົາກໍຍັງບໍ່ໄດ້ມີລາຍຣະອຽດ ວ່າຖ້ານັກທ່ອງທ່ຽວມາແລ້ວ ຕ້ອງກັກໂຕກ່ອນບໍ່ 14 ມື້ ຫຼືວ່າພາຍໃນ 20 ຫຼືວ່າ 72 ຊົ່ວໂມງ ຫຼືວ່າ 3 ມື້ ຕອນນີ້ພວກເຮົາຍັງບໍ່ມີລາຍຣະອຽດ.”
ສ່ວນແຂວງບໍ່ແກ້ວ ເຈົ້າໜ້າທີ່ກໍຕຽມປະຊຸມ ແລະຫາລືກັນ ຊຶ່ງເບື້ອງຕົ້ນ ເປັນພຽງແຈ້ງການໃຫ້ຕຽມພ້ອມເທົ່ານັ້ນ ວ່າຈະມີມາຕການແນວໃດ ແຕ່ສຸດທ້າຍຕ້ອງລໍຖ້າ ຟັງຄຳສັ່ງຈາກສູນກາງ, ດັ່ງເຈົ້າໜ້າທີ່ ຜແນກຖແລງຂ່າວ ວັທນະທັມ ແລະທ່ອງທ່ຽວ ແຂວງບໍ່ແກ້ວ ທ່ານນຶ່ງກ່າວວ່າ:
“ຍັງຢູ່ໃນຂັ້ນຕອນປະສານງານເນາະ ແຕ່ວ່າພວກເຮົາກະບໍ່ຊ່າງໃຫ້ຄຳຕອບ ວ່າພວກເຮົາຊິຕຽມເປີດ ຄວາມພ້ອມຈັ່ງໃດເນາະ ເພາະວ່າທາງກະຊວງເພິ່ນກໍມີແຜນ ວ່າອີງໃສ່ທາງກະຊວງ ຖ້າກໍຣະນີ ກະຊວງເພິ່ນວ່າເອີ່ ໃຫ້ບັນດາແຂວງ ທີ່ມີຄວາມພ້ອມໄດ້ ເຮົາກໍຈະໄດ້ມີແຜນຫັ້ນແຫຼະ ໃນການຮອງຮັບ ໃນການສ້າງແຜນໃນການກະຕຽມຄວາມພ້ອມ.”
ກ່ຽວກັບເຣື່ອງດັ່ງກ່າວນີ້ ຊາວລາວ ແລະຜູ້ປະກອບການທຸຣະກິຈຕ່າງໆ ກໍມີທັງຮູ້ສຶກດີໃຈ ແລະກັງວົນໃຈ ທີ່ທາງການຈະເປີດປະເທດ ເພາະຈະໄດ້ທຳມາຫາກິນ ໄດ້ສະດວກຂຶ້ນ ແລະມີລາຍຮັບເຂົ້າມາພາຍໃນຄອບຄົວ, ດັ່ງຜູ້ປະກອບການ ໃນນະຄອນຫຼວງວຽງຈັນ ທ່ານນຶ່ງກ່າວວ່າ:
“ເຮົາກໍຣະແວງຄັນບໍ່ເປີດ ມັນກະຜົລຮ້າຍຜົລເສັຽ ກະເທົ່າກັນ ລາຍຮັບເຮົາມັນຫຼຸດລົງ ຄັນຖ້າເປີດລາຍຮັບເຮົາກໍເພີ່ມຂຶ້ນ.”
ພ້ອມດຽວກັນນີ້ ຊາວລາວ ໃນແຂວງສວັນນະເຂດ ທ່ານນຶ່ງ ກໍກ່າວວ່າ ກ່ຽວກັບເຣື່ອງດັ່ງກ່າວນີ້ ທ່ານເອງກໍຮູ້ສຶກກັງວົນໃຈ ແຕ່ຖ້າເປີດປະເທດແທ້ໆ ກໍຄວນຈະມີມາຕການຕ່າງໆ ໃຫ້ພ້ອມເປັນຕົ້ນສູນປິ່ນປົວ, ສູນກັກໂຕ ຕາມມາຕການປ້ອງກັນ ໂຄວິດ-19 ແລະສະຖານທີ່ທ່ອງທ່ຽວຕ່າງໆ ເພື່ອຮອງຮັບນັກທ່ອງທ່ຽວ:
“ກະກັງວົນຢູ່ຫັ້ນແຫຼະເນາະ ເຣື່ອງພຍາດນີ້ມັນກໍຍັງຣະບາດຢູ່ຫັ້ນນ່າ ມັນກໍຕ້ງມີຕຽມຄວາມພ້ອມເນາະ ເວົ້າເຣື່ອງສະຖານທີ່ບໍ ການໄປ-ມາ ການທ່ອງທ່ຽວ ປິ່ນປົວນີ້ ກະສຸດແຕ່ຂ້າງເທິງເນາະ ເປີດໄດ້ກໍເປີດ ກະຢູ່ໃນຂອບເຂດຫັ້ນແຫຼະ ພວກເຮົາມີແຕ່ຄວາມຣະມັດຣະວັງຊື່ໆ.”
ສຳລັບການຕິດເຊື້ອ ໂຄວິດ-19 ໃນວັນທີ່ 11 ພຶສຈິກາ 2021 ນີ້ ທາງການລາວ ກວດພົບຜູ້ຕິດເຊື້ອທັງໝົດ 945 ຄົນ, ໃນນີ້ ຕິດເຊື້ອໃນຊຸມຊົນ 942 ຄົນ ແລະຕິດເຊື້ອຈາກກໍຣະນີນຳເຂົ້າ 3 ຄົນ, ມາຮອດປັດຈຸບັນ ປະເທດລາວ ມີຜູ້ເສັຽຊີວິດສະສົມ ຈາກການຕິດເຊື້ອໂຄວິດ-19 ທັງໝົດ 93 ຄົນ, ຕິດເຊື້ອສະສົມ 50,977 ຄົນ.
ເລື່ອງທີ່ອ່ານຫຼາຍ
RFA
