ໝາກກາເຟແດງຕົກຕ່ຳ ຊາວສວນ ລໍາບາກ

ສິດນີ
2019-02-20
ອີແມວລ໌
ຄໍາເຫັນ
Share
ພິມ
ສວນກາເຟ ບ້ານດາກວາງ ເມືອງດາກຈຶງ ແຂວງເຊກອງ
ສວນກາເຟ ບ້ານດາກວາງ ເມືອງດາກຈຶງ ແຂວງເຊກອງ
ຮູບພາບອຸປຖັມໂດຍ: ປະເທດລາວ Pathedlao

ຊາວສວນກາເຟໝາກແດງ ທີ່ເມືອງດາກຈຶງ ແຂວງເຊກອງ ຈຳນວນ 33 ບ້ານ, ໄດ້ຮັບຄວາມເດືອດຮ້ອນ ຍ້ອນຣາຄາກາເຟ ຕົກຕ່ຳຈາກ 2500 ກີບ ຕໍ່ກິໂລ ໃນຣະຍະຜ່ານມາ, ຕົກມາເປັນ 1400 ກີບ, ເຮັດໃຫ້ຂາດຣາຍໄດ້ ເພື່ອລ້ຽງຄອບຄົວ, ດັ່ງຊາວສວນກາເຟ ທີ່ ເມືອງ ດາກຈຶງ ກ່າວຕໍ່ເອເຊັຽເສຣີ ໃນວັນທີ 18 ກຸມພາ ນີ້ວ່າ:

"ຣາຄາຫຼຸດລົງ, ແຕ່ກ່ອນຫັ້ນ, ກິໂລ 2500 ໝາກແດງຫັ້ນ, ປັດຈຸບັນມີແຕ່ 1400 ຂາດທຶນບໍ່ກຸ້ມເພາະວ່າກາເຟ ນັບມື້ຣາຄາລົງ, ປະຊາຊົນ ບໍ່ໄດ້ເຮັດໄຮ່ເຮັດນາ ເດ້, ຄັນບໍ່ຂາຍກະບໍ່ມີເຂົ້າກິນ ຢາກໄດ້ຢູ່ປະມານ 2200 ຫາ 2300."

ກ່ຽວກັບບັນຫາກາເຟຕົກຕ່ຳ, ພາກສ່ວນກ່ຽວຂ້ອງກໍໄດ້ຈັດກອງປະຊຸມ ເພື່ອຫາທາງແກ້ໄຂເມື່ອຕົ້ນເດືອນມົກກະຣາຜ່ານມາ, ໂດຍສລຸບວ່າ ມອບໃຫ້ຫ້ອງການ ອຸດສາຫະກັມແລະການຄ້າ ຊອກຫາ ຕລາດສົ່ງອອກເພີ່ມ, ດັ່ງເຈົ້າຫນ້າທີ່ຜແນກກະສິກັມເວົ້າວ່າ:

"ຜູ້ຊື້ຫັ້ນ, ບໍ່ແມ່ນຄົນດຽວ, ຫລາຍຄົນຊື້, ແຕ່ວ່າເຂົາຊື້ແລ້ວເວລາໄປຂາຍຫັ້ນມັນບໍ່ອອກ, ມັນເປັນແນວນັ້ນ, ທາງເຮົາຮ່ວມກອງປະຊຸມໃນ ມື້ນັ້ນຫັ້ນ, ແຕ່ວ່າສເນີໂຄງການ ມີແຕ່ຊອກຫາຕລາດສົ່ງອອກ ເພີ້ມຫັ້ນນ່າ."

ເມືອງດາກຈຶງ, ມີເນື້ອທີ່ປູກຝັງກາເຟປະມານ 3 ພັນເຮັກຕາ, ໃນນັ້ນ 30% ແມ່ນປູກກາເຟໝາກແດງ ສ່ວນເຫຼືອ 70% ປູກກາເຟໝາກດຳ ໝາກຂາວ ແລະໝາກຂຽວ ສ່ວນປະຊາຊົນ ທີ່ປູກກາເຟ ໝາກແດງ ຈຳນວນ 300 ຄອບຄົວນັ້ນ, ບາງຄົນກໍປູກກາເຟໝາກດຳ ແລະກາເຟ ຊນິດອື່ນໆ.

ເຕັມຫນ້າ