ຫຼາຍໂຮງຮຽນ ໃນລາວ ຍັງຂາດເຂີນຄຣູສອນ

ໄຊຍາ
2018-10-09
ອີແມວລ໌
ຄໍາເຫັນ
Share
ພິມ
ນາຍຄຣູລາວ ໃນເຂດ ຊົນນະບົດ
ນາຍຄຣູລາວ ໃນເຂດ ຊົນນະບົດ
Wikimedia

ປັດຈຸບັນ ປະເທດລາວ ມີໂຮງຮຽນ 12 ພັນປາຍແຫ່ງ ຊັ້ນປະຖົມ ແລະ ມັທຍົມ ຂາດຄຣູສອນ ຫຼາຍກວ່າຊັ້ນອື່ນໆ ສ່ວນຫຼາຍຈະແມ່ນ ໂຮງຮຽນໃນເຂດ ຊົນນະບົດ ທີ່ມີຄຣູໜ້ອຍ ຫລື ບາງບ່ອນ ມີຄຣູສອນ ພຽງ 2 ຄົນ. ຜ່ານມາ ບັນຫາການຂາດເຂີນຄຣູສອນ ຢູ່ລາວ ກໍຍັງ ເປັນຫາໜັກໜ່ວງ.

ຍານາງ ແສງເດືອນ ຫຼ້າຈັນທະບຸນ, ຣັຖມົນຕຣີກະຊວງສຶກສາທິການ ແລະ ກິລາ, ໄດ້ຣາຍງານ ຕໍ່ກອງປະຊຸມ ສະພາແຫ່ງຊາດ ເມືື່ອເດືອນມິຖຸນາ ຜ່ານມາວ່າ: ໃນສົກຮຽນປີ 2018–2019 ທົ່ວປະເທດ ຕ້ອງການຄຣູສອນເຖິງ 20 ພັນຄົນ ໃນຂນະທີ່ ໂຕເລຂໂຄຕ້າ ຣັຖກອນຄຣູ ປີ 2018 ສາມາດບັນຈຸ ໄດ້ພຽງ 1,850 ຄົນ.

ດັ່ງຄຣູຊົນເຜົ່າ ທີ່ສອນ ຢູ່ໂຮງຮຽນປະຖົມສົມບູນ ບ້ານກິ່ວກະຈຳ ເມືອງໃໝ່ ແຂວງຜົ້ງສາລີ ໄດ້ຮຽກຮ້ອງ ຜ່ານສື່ສັງຄົມອອນລາຍ ວ່າ ປັດຈຸບັນ ໂຮງຮຽນຊົນນະບົດ ເຂດຫ່າງໄກຄວາມຈະເລີນ ຍັງພົບພໍ້ ກັບຄວາມຫຍຸ້ງຍາກ ລຳບາກ ຫຼາຍດ້ານ ບໍ່ວ່າ ຈະເປັນການຂາດຄຣູສອນ ອາຄານຮຽນ ນໍ້າບໍ່ໄຫຼ ໄຟບໍ່ສວ່າງ ພໍ່ແມ່ນັກຮຽນ ບໍ່ເຫັນຄວາມສຳຄັນ ຂອງການຮຽນ ເຊີ່ງມັນເປັນບັນຫາໜັກໃຈ ຂອງຄຣູ ດັ່ງທ່ານກ່າວ ບາງຕອນວ່າ:

"ຄວາມລຳບາກ ຂອງຄຣູ ຢູ່ເຂດຊົນະບົດ ມີຫຼາຍສາເຫດ 1. ເດັກບໍ່ຮູ້ພາສາລາວ, 2.ພໍ່ແມ່ນັກຮຽນສ່ວນຫຼາຍບໍ່ຮູ້ໜັງສື ແລະ (3) ຜູ້ປົກຄອງເດັກ ບໍ່ເຂົ້າໃຈ ກ່ຽວກັບວຽກງານການສຶກສາດີ ແລະ ອັນທີ 4 ນີ້ ນໍ້າບໍ່ໄຫຼໄຟບໍ່ສວ່າງ ກໍເປັນອັນລຳບາກ ຕໍ່ຄູສອນຊົນນະບົດ ເຊັ່ນດຽວກັນເນາະ.”

ອີກດ້ານນຶ່ງ ບັນຫາຄຣູອາສາ ທາງການເອງ ຍັງບໍ່ທັນໄດ້ມີ ຣະບຽບຫຼັກການ ໃນການແກ້ໄຂ ຢ່າງແຈ່ມ​ແຈ້ງ ເຊີ່ງຫຼາຍພາກສ່ວນ ກໍໄດ້ຮຽກຮ້ອງ ໃຫ້ຣັຖບານ ແກ້ໄຂບັນຫາຄຣູອາສາ ທີ່ບໍ່ໄດ້ຄ່າຕອບແທນ ຈາກພາກຣັຖ ບໍ່ໄດ້ຮັບສວັດດີການ ບໍ່ມີນະໂຍບາຍຫຍັງໝົດ ຈາກພາກຣັຖ ເຖິງແມ່ນວ່າ ຈະສອນມາເປັນເວລາ 5-6 ປີ ແຕ່ກໍຍັງບໍ່ມີໂອກາດ ໄດ້ບັນຈຸ ເຂົ້າເປັນຣັຖກອນ.

ໃນຂນະດຽວກັນ ການບັນຈຸຣັຖກອນ ໄລຍະຜ່ານມາ ສ່ວນຫຼາຍ ແມ່ນພາກບໍຣິຫານ ເຊີ່ງເປັນການແກ້ໄຂບໍ່ຖືກຈຸດ ຂອງກະຊວງສຶກສາທິການ. ປັດຈຸບັນ ທົ່ວປະເທດ ມີຄຣູອາສາຈຳນວນ 700 ຄົນ ສ່ວນຫຼາຍ ຈະສອນຢູ່ເຂດຊົນນະບົດ ຫ່າງໄກສອກຫຼີກ.

ເຕັມຫນ້າ