ຕຣຽມສຳຣວດ ໂຄງການທາງຣົຖໄຟ ນະຄອນຫຼວງ-ທ່າແຂກ

ອຸ່ນແກ້ວ
2022.06.30
Share on WhatsApp
Share on WhatsApp
ຕຣຽມສຳຣວດ ໂຄງການທາງຣົຖໄຟ ນະຄອນຫຼວງ-ທ່າແຂກ ກະຊວງແຜນການ ແລະ ການລົງທຶນ, ເດືອນມິຖຸນາ 2022.
ນັກຂ່າວ ພົລເມືອງ

ກະ​ຊວງ​ແຜນ​ການ ແລະ ການ​ລົງ​ທຶນ ໄດ້​ເຊັນ​ບົດ​ບັນ​ທຶກ​ຄວາມ​ເຂົ້າໃຈ ຫຼື MOU ອະ​ນຸ​ຍາດ​ໃຫ້ ບໍ​ຣິ​ສັດ ປິ​ໂຕ​ລ້ຽມ ເທ​ຣດ​ດິ້ງ​ລາວ ມະ​ຫາ​ຊົນ ໃນ​ວັນ​ທີ 29 ມິ​ຖຸ​ນາ 2022 ເພື່ອ ສຶກ​ສາ, ສຳ​ຣວດ ແລະ ອອກ​ແບບ ຄວາມ​ເປັນ​ໄປ​ໄດ້​ ຂອງ​ໂຄງ​ການກໍ່​ສ້າງ ​ເສັ້ນ​ທາງ​ຣົ​ຖ​ໄຟ ຈາກ​ນະ​ຄອນ​ຫລວງວຽງ​ຈັນ ລົງ​ໄປ​ຫາ ເມືອງ​ທ່​າ​ແຂກ ແຂວງ​ຄຳ​ມ່ວນ ຄວາມ​ຍາວ 312 ກິ​ໂລ​ແມັດ.

ເຈົ້າ​ໜ້າ​ທີ່ ​ກະ​ຊວງ​ແຜນ​ການ ແລະ ການ​ລົງ​ທຶນ ທ່ານ​ນຶ່ງ ຕໍ່​ເອ​ເຊັຽ​ເສ​ຣີ ໃນ​ວັນ​ທີ 30 ມິ​ຖຸ​ນາ ວ່າ:

ເຈົ້າເພິ່ນກະເອົາບໍຣິສັດປິໂຕລ້ຽມ ເທຣດດິ້ງ ເຂົ້ມາສຳຣວດ ເຂົ້າມາເຮັດບົດໃຫ້ໂຕໂຄງການນີ້ ບໍຣິສັດ ຂອງຢູ່ໃນເຄືອຂ່າຍຂອງ ພົງສະຫວັນ ກຣຸບ ນ່າ ທະນາຄານພົງສະຫວັນ ນະເຈົ້າ, [ໄລຍະເວລາການສຳຣວດ] ເຈຣະຈາ ແມ່ນ 18 [ເດືອນ] ແຕ່ວ່າ ທາງບໍຣິສັດ ຫັ້ນ ໄປເຈຣະຈາກັບ ກະຊວງແຜນການ ເພິ່ມເປັນ 24 [ເດືອນ] ແຕ່ວ່າ ທາງບໍຣິສັດ ຫັ້ນ ໄປເຈຣະຈາ ກັບ ກະຊວງແຜນການ ເພິ່ນເປັນ 24 ເດືອນ ເບາະ.”

ທ່ານ ກ່າວ​ຕື່ມ​ວ່າ ຫຼັງ​ຈາກ​ທີ່​ເຊັນ ບົດ​ບັນ​ທຶກ​ຄວາມ​ຊົງ​ຈຳ ແລ້ວ​ ບໍ​ຣິ​ສັດ ປິ​ໂຕ​ລ້ຽມ ເທ​ຣດດິ້ງລາວ ມະ​ຫະ​ຊົນ ຈະ​ວ່າຈ້າງ ບໍ​ຣິ​ສັດ ປຶກ​ສາ​ທັງ​ຈາກ​ພາຍ​ໃນ ແລະ ຕ່າງ​ປະ​ເທດ ສົມ​ທົບ​ກັບ ພາກ​ສ່ວນ​ທີ່​ກ່ຽວ​ຂ້ອງ ຂອງ​ຣັ​ຖ​ບານ​ລາວ ໃນ​ການ​ດຳ​ເນີນ​ວຽກ​ງານ ເຊິ່ງ ຄາດ​ວ່າ ຈະ​ສຳ​ເລັດ ແລະ ມີ​ການ​ຮັບຮອງ ພາຍ​ໃນ​ 24 ເດືອນ.

ໂຄງ​ການກໍ່​ສ້າງ ເສັ້ນ​ທາງ​ຣົ​ຖ​ໄຟ ຈາກ​ນະ​ຄອນ​ຫລວງວຽງ​ຈັນ ຫາ​ເມືອງ ທ່າ​ແຂກ ແຂວງ​ຄຳ​ມ່ວນ ເປັນ​ສ່ວນ​ນຶ່ງ​ຂອງ​ໂຄງ​ການ ສາມ​ແອລ ຫຼື Laos Logistics Link (LLL)  ເຊິ່ງ​ປະ​ກອບ​ມີ​ຫຼາຍ​ໂຄງ​ການ ຄື ໂຄງ​ການ​ທ່າ​ເຮືອ​ຫວຸ້ງ​ອາງ, ໂຄງ​ການ​ທາງ​ຣົ​ຖ​ໄຟ​ລາວ-ວຽດ​ນາມ, ໂຄງ​ການ​ໂຮງ​ໄຟ​ຟ້າ​ ພ​ລັງ​ງານ​ຄວາມ​ຮ້ອນ ບົວລະ​ພາ ແລະ ໂຄງ​ການ​ທ່າ​ບົກ-ທ່າ​ນາ​ແລ້ງ ແລະ ເຂດ​ໂລ​ຈິ​ສ​ຕິກ ນະ​ຄອນ​ຫລວງວຽງ​ຈັນ.

ສຳ​ລັບ​ໂຄງ​ການ​ທັງ​ໝົດ ແມ່ນ​ຢູ່​ພາຍ​ໃ​ຕ້ ຍຸ​ທ​ສາ​ຕ ການ​ພັ​ທ​ນາ​ປະ​ເທດ ວ່າ​ດ້ວຍ ການ​ຫັນ​ປ່ຽນ ສ​ປ​ປ​ ລາວ ຈາກ​ການ​ປະ​ເທດ ບໍ່​ມີ​ຊາຍ​ແດນ​ຕິດ​ກັບ​ທະ​ເລ ຫຼື​ Land Locked ກາຍ​ມາ​ເປັນ​ປະ​ເທດ ​ເຊື່ອ​ຈອດ​ທາງ​ບົກ ຫຼື Land Linked.

ເຈົ້າ​ໜ້າ​ທີ່​ ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ທ່ານ​ນຶ່ງ ກ່າວ​ຕໍ່​ວິທຍຸເອ​ເຊັຽ​ເສ​ຣີ ໃນ​ວັນ​ທີ 30 ມິ​ຖຸ​ນາ ວ່າ:

ໂຕລາວ-ວຽດນາມ ນີ້ ແມ່ນເປັນກະດູກສັນຫຼັງ ແຕ່ເໜືອຮອດໃຕ້ ດຽວນີ້ ໂຄງການລາວ-ຈີນ ຫັ້ນເນາະ ເປັນແລວທາງຍຸສາຕ ໃດ ໂຕນີ້ ມັນມີມາແຕດົນແລ້ວ.”

ໃນ​ຄວາມ​ຄິດ​ເຫັນ​ຂອງ​ຄົນ​ລາວ ຈຳ​ນວນ​ນຶ່ງ ກໍ​ຄື ລາວ​ຍັງ​ບໍ່​ມີ​ສິນ​ຄ້າ​ຫຍັງ ​ສົ່ງ​ອອກໄປ​ທາງ​ຣົ​ຖ​ໄຟ. ຊາວ​ນະ​ຄອນ​ຫລວງວຽງ​ຈັນ ທ່ານ​ນຶ່ງ ໄດ້ກ່າວ​ຕໍ່ວິທຍຸ​ເອ​ເຊັຽ​ເສ​ຣີ ໃນ​ວັນ​ທີ 30 ມິ​ຖຸ​ນາ ວ່າ:

ຄັນເວົ້າເຣື່ອງສິດທຜົໂຍດ ທີ່ເຮົາຈະໄດ້ຮັບນີ້ ມັນໜ້ອຍຫຼາຍແລ້ວ ເພາະວ່າ ເຮົາເປັນທີ່ວ່າ ປະເທດດ້ອຍພັນາ ຍັງບໍ່ທັນມີການພັນາຫຍັງເນາະ ແລ້ວບາດນີ້ ຄັນຖ້າວ່າເຮັດ ເຣື່ອງສິນຄ້າ ທີ່ເຮົານຳເຂົ້າມາລະ ມັນຫຼາຍກວ່າ ສິນຄ້າຂອງເຮົາ ຈະນຳອອກ ເພາະການລິດ ຂອງເຮົາຍັງບໍ່ທັນມີຫຍັງວ່າອັນມັນໄດ້ລະມັນໄດ້ ແຕ່ວ່າ ເຣື່ອງ ການຄົມມະນາຄົມຫັ້ນແຫຼະ.

ທ່ານ ກ່າວ​ຕື່ມວ່າ ເສັ້ນທາງຣົໄຟ ລາວ-ວຽດນາມ ກໍບໍ່ຕ່າງຫຍັງ​​ຈາກໂຄງການທາງຣົໄຟ ລາວ-ຈີນ ທີ່ປະຊາຊົນ ບໍ່ໄດ້ຮັບຜົໂຍດຫຍັງຫຼາຍ ນອກຈາກການເດີນທາງເທົ່ານັ້ນ ສ່ວນການຂົນສົ່ງສິນຄ້າ ຜ່ານເສັ້ນທາງຣົໄຟລາວ-ວຽດນາມ ຍັງເຫັນວ່າ ເປັນສິ່ງທີ່ຫຍຸ້ງຍາກ ແລະ ທ້າທາຍສົມວນ ເພາະປະຊາຊົນລາວ ບໍ່ໄດ້ຮັບການສົ່ງເສີມ ໃຫ້ລິດສິນຄ້າທີ່ດີ, ມີຄຸນນະພາບ ແລະ ສາມາດສົ່ງອອກໄປຂາຍຕ່າງປະເທດໄດ້.  

ສ່ວນ​ຊາວ​ລາວ​ອີກ​ທ່ານ​ນຶ່ງ ກໍ​ເຫັນ​ວ່າ ມັນ​ເປັນ​ການ​ເຣີ່ມ​ຕົ້ນ​ທີ່​ດີ ສຳ​ລັບ​ຣັ​ຖ​ບາ​​ນລາວ ທີ່​ຈະ​ພັ​ທ​ນາ​ເສັ້ນ​ທາງ​ຣົ​ຖ​ໄຟ  ຈາກ​ນະ​ຄອນ​ຫລວງວຽງ​ຈັນ ພາກ​ກາງ​ຂອງ​ລາວ ອອກສູ່​ປະ​ເທດ​ວຽດ​ນາມ ເພາະ​ໃນ​ອະ​ນາ​ຄົດ ຈະ​ກາຍ​ເປັນ​ເສັ້ນ​ທາງ ທີ່​ສະ​ດວກ ສະ​ບາຍ ແລະ ກະ​ຕຸ້ນ​ເສ​ຖ​ກິ​ຈ​ໃນ​ລາວ ເປັນ​ຢ່າງ​ດີ.

ຊ​າວ​ເມືອງ​ທ່າ​ແຂກ ແຂວງ​ຄຳ​ມ່ວນ ຄົນ​ນຶ່ງ ໄດ້​ກ່າວ​ຕໍ່ວິທຍຸຸຸຸຸຸຸຸຸຸຸຸຸຸຸຸຸຸຸຸຸ​ເອ​ເຊັຽ​ເສ​ຣີ ໃນ​ວັນ​ທີ 30 ມິ​ຖຸ​ນາ ວ່າ:

ເຮົາກະເຮັດໄປຫັ້ນແຫຼະ ພະຍາຍາມປັບປຸງໄປ ເທື່ອລະໜ້ອຍ ມັນກະເປັນຈຸດໜຶ່ງທີ່ວ່າ ເຮັດໃຫ້ ໄປມາຫາສູ່ກັນກະງ່າຍ ເສກິຈ ມັນກະງ່າຍໄປອີກ.”

ເຖິງ​ຢ່າງ​ໃດ​ກໍ​ຕາມ, ຖ້າ​ໂຄງ​ການ​ດັ່ງ​ກ່າວ ສ້າງ​ສຳ​ເຣັດ ຕາມ​ແຜນ​ກໍ​ຈະ​ຊ່ວຍ​ໃຫ້ ​ປະ​ເທດ​ລາວ ເດີນ​ທາງ​ອອກ​ສູ່​ທະ​ເລ​ໄດ້​ງ່າຍຂຶ້ນ ແລະ ຍັງ​ເປັນ​ການ​ເດີນ​ທາງ​ ທີ່​ໃກ້​ກວ່າ​ປະ​ເທດ​ໄທ​ຍ ນຳອີກ​ດ້ວຍ. ດ​ຣ ໂຍ​ທິນ ສະ​ແວງ​ດີ ອາ​ຈານ​ປະ​ຈຳ ຈາກ​ສະ​ຖາ​ບັນ​ວິ​ໄຈ​ປະ​ຊາ​ກອນ ແລະ ສັງ​ຄົມ ມະ​ຫາ​ວິ​ທະ​ຍາ​ໄລມະ​ຫິ​ດົນ ປະ​ເທດ​ໄທ​ຍ ໄດ້​ກ່າວ​ຕໍ່​ວິທຍຸເອ​ເຊັຽ​ເສ​ຣີ ໃນ​ວັນ​ທີ 30 ມິ​ຖຸ​ນາ ວ່າ:

 [ໄທ] ປ່ຽນແປງໃດໆ ທີ່ຈະເກີດຂຶ້ນຈະປ່ຽນແປງໃນທາງບວກ ຫຼາຍຂຶ້ນ ໂດຍເພາະ ຢ່າງຍິ່ງ ການເດີນທາງອອກທະເລ ຄືໝາຍຄວາມວ່າ ສິນຄ້າທາງທະເລ ຈະເຂົ້າລາວ ກໍຈະຫຼາຍຂຶ້ນ, ສິນຄ້າຈາກລາວ ທີ່ຈະອອກທະເລ ກໍອາຫຼາຍຂຶ້ນ.”

ທ່ານ ກ່າວ​ຕື່ມວ່າ ເສັ້ນທາງຣົໄຟ ລາວ-ວຽດນາມ ຖືເປັນເສັ້ນທາງທີ່ມີຄວາມສຳຄັນ ຕໍ່ປະເທດລາວຢ່າງຍິ່ງ  ເພາະຊ່ວຍຊຸກຍູ້ສະພາບເສກິຈ ແລະ ສັງຄົມຂອງ 2 ປະເທດ ຄື ລາວ ແລະ ວຽດນາມ ໃຫ້ຍາຍໂຕຂຶ້ນ ເຊິ່ງໄລຍະຜ່ານມາ ຣັບານລາວ ກໍພະຍາຍາມຜັກດັນ ໃຫ້ໂຄງການເສັ້ນທາງຣົໄຟລາວ-ວຽດນາມ ເກີດນຶ້ນ ໄວທີ່ສຸດ ແຕ່ ກໍຕ້ອງປະເຊີນບັນຫາ ຫຼາຍຢ່າງ ຈຶ່ງເຮັດໃຫ້ເກີດຄວາມຊັກຊ້າ.

ສຳ​ລັບ​ໂຄງ​ການ ພັ​ທ​ນາ​ເສັ້​ນ​ທາງ​ຣົ​ຖ​ໄຟ ​ລາວ-ວຽດ​ນາມ ມີ​ຄວາ​ມ​ຍາວ​ 400 ປາຍ ກິ​ໂລ​ແມັດ ມີ​ມູນ​ຄ່າ​ການ​ລົງ​ທຶນ​ປະ​ມານ 5 ຕື້ ໂດ​ລ້າຣ໌ ໂດຍແຍກ​ອອກ​ເປັນ 2 ໄລ​ຍະ.

ໄລ​ຍະ​ທີ 1 ໂຄງ​ການກໍ່​ສ້າງ ​ເສັ້ນ​ທາງ​ຣົ​ຖ​ໄຟ ຈາກ​ເມືອ​ງ​ທ່າ​ແຂກ ແຂວງ​ຄຳ​ມ່ວນ ໄປ​ຫາທ່າ​ເຮືອ ຫວຸ້ງ​ອາງ ປະ​ເທດ​ວຽດ​ນາມ ຄວາມ​ຍາວ 139 ກິ​ໂລ​ແມັດ ມີບໍ​ຣິ​ສັດ ເອກ​ຊົນ ຈາກ​ປະ​ເທດ​ເຢ​ຣະ​ມັນ ເປັນ​ຜູ້​ສຶກ​ສາ, ສຳ​ຣວດ ແລະ ອອກ​ແບບ​ຄວາມ​ເປັນ​ໄປ​ໄດ້.

ໄລ​ຍະ​ທີ 2 ໂຄງ​ການກໍ່​ສ້າງເສັ້ນ​ທາງ​ຣົ​ຖ​ໄຟ ຈາກ​ນະ​ຄອນ​ຫລວງວຽງ​ຈັນ ໄປ​ຫາ​ເມືອງ​ທ່າ​ແຂກ​ ແຂວງ​ຄຳ​ມ່ວນ ມີ​ຄວາມ​ຍາວ 312 ກິ​ໂລ​ແມັດ ໂດຍ​ບໍໍ​ຣິ​ສັດ ປີ​ໂຕ​ລ້ຽມ ເທ​ຣດດິ້ງ​ລາວ ມະ​ຫາ​ຊົນ ເປັນ​ຜູ້​ສຶກ​ສາ, ສຳ​ຣວດ ແລະ ອອກ​ແບບ​ຄວາມ​ເປັນ​ໄປ​ໄດ້.

ເຖິ່ງ​ຢ່າງ​ໃດ​ກໍ​ຕາມ, ໂຄງ​ການກໍ່​ສ້າງ​ເສັ້ນ​ທາງ​ຣົ​ຖ​ໄຟ ຈາກ​ນະ​ຄອນ​ຫລວງວຽງ​ຈັນ ໄປ​ຫາ​ເມືອງ ທ່າ​ແຂກ ແຂວງ​ຄຳ​ມ່ວນ ທີ່​ຫາກໍ່​ເຊັນ​ບົດ​ບັນ​ທຶກ​ຄວາມ​ເຂົ້າໃຈ ຍັງ​ບໍ່​ທັນ​ມີ​​ການປະ​ເມີນ​ຜົ​ລ​ ກະ​ທົບ​ຕໍ່​ສິ່ງ​ແວດ​ລ້ອມ ແລະ ສັງ​ຄົມ​.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ