ຕຳຣວດຕັ້ງດ່ານກວດ ຂູດຮີດ

ອຸ່ນແກ້ວ ສຸກສະຫວັນ
2018-06-08
Share
F-police ຕໍາຣວດນະຄອນຫຼວງວຽງຈັນ ຢຸດຣົຖ ເພື່ອກວດເອກກະສານ ພາບນີ້ໄດ້ສົ່ງມາທາງເຟສບຸກ ຂອງ RFA
Citizen Journalist

ເຈົ້າໜ້າທີ່ຕຳຣວດຈະຣາຈອນ ກໍາລັງຖືກສັງຄົມວິພາກວິຈານ ເລື້ອງການຕັ້ງດ່ານກວດຣົດ ແລ້ວຖາມເອົາເງິນ ຈາກຜູ້ຂັບຂີ່. ຣາຍລະອຽດ ເຊີນທ່ານມາຟັງ ບົດສຳພາດ ຊາວນະຄອນຫລວງວຽງຈັນ ທ່ານນຶ່ງ ຜູ້ທີ່ເຄີຍຖືກເຈົ້າໜ້າທີ່ ຖາມເອົາເງິນ.

ການເອົາເງິນນຳຜູ້ຂັບຂີ່ ຕາມຫລັກການແລ້ວ ແມ່ນບໍ່ມີດັ່ງ ທ່ານ ກ່າວຕອນນນຶ່ງວ່າ:

"ເວົ້າເລື້ອງການເອົາເງິນ ຂອງພໍ່ແມ່ປະຊາຊົນ ໃນຫລັກການຂອງພວກເຮົາບໍ່ມີ ບໍ່ມີ ແຕ່ຜ່ານມາຫາງສຽງແມ່ນມີ ທີ່ມີຫາງສຽງພໍ່ແມ່ ປະຊາຊົນຜ່ານສະພາ ຜ່ານສື່ມວນຊົນ. ພວກເຮົາກະໄດ້ເຮັດໜ້າທີ່ ກວດກາຕລອດ ຄວາມເປັນຈິງ ພວກເຮົາກວດ ກະບໍ່ຄ່ອຍພົບ ແລະ ພາບພົດລວມ ກະຊິມີຄົນຈຳນວນນຶ່ງ ເນາະ ອາດຈະແມ່ນຕຳຣວດແທ້ຫລື ບໍ່ແມ່ນ ຫລື ຫາກຊິວ່າ ແມ່ນກະຊິແມ່ນ ຈຳນວນໜ້ອຍ ແຕ່ໂດຍລວມ ຫາກເວົ້າເຖິງກົດໝາຍ ການເອົາ ແລະການໃຫ້ກະແມ່ນ ການລະເມີດກົດໝາຍ ໃນນາມຕຳຣວດ ຄັນຊິເວົ້າວ່າ ຕິຕຳຣວດ ຜູ້ທີ່ເຮັດໜ້າທີ່ແນວນັ້ນ ເຮັດກະບໍ່ຖືກ ຖ້າໄປເອົາເງິນເອົາຄຳ ທີ່ບໍ່ຖືກຕ້ອງ ມາດຕະການ ຂອງການກວດກາ."

ອີງຕາມຫລັກການຈະຣາຈອນ ໂດຍທົ່ວໄປ, ເຈົ້າໜ້າທີ່ຕຳຣວດຈະຣາຈອນ ຖ້າພົບເຫັນຜູ້ຂັບຂີ່ ລະເມີດກົດຈະຣາຈອນ ກໍຈະມີການ ກັກໃບຂັບຂີ່ໄວ້ ແລ້ວຂຽນໃບສັ່ງໃຫ້ ຫລັງຈາກນັ້ນ ຜູ້ຂັບຂີ່ຈະຕ້ອງໄດ້ໄປເສັຍເງິນ ຄ່າປັບໃໝ ໃຫ້ເຈົ້າໜ້າທີ່ຕຳຣວດ.

ໃນການຈ່າຍເງິນແຕ່ລະຄັ້ງ ເຈົ້າໜ້າທີ່ຈະອອກໃບບິນຮັບເງິນ ໃຫ້ຜູ້ຂັບຂີ່ ເພື່ອເກັບໄວ້ເປັນຫລັກຖານ.

ນອກຈາກນີ້ ທ່ານກ່າວໃນທຳນອງທີ່ວ່າ ການໃຫ້ເງິນມັນເປັນການສົມຍອມ ຂອງຜູ້ຂັບຂີ່, ດັ່ງທ່ານກ່າວຕື່ມອີກວ່າ:

"ແຕ່ວ່າ ຢູ່ໃນມຸມມອງນີ້ ກະຊິມີສ່ວນນຶ່ງ ການສົມຍອມລະຫວ່າງ ຜູ້ຂັບຂີ່ ບາງທີ ອ້າຍນ້ອງພວກເຮົາ ສຶກສາອົບຮົມ ເຂົ້າອົກເຂົ້າໃຈແລ້ວ ພັດຍ້ອງຍໍຈິດໃຈ ເອົາເງິນໃຫ້ກິນນ້ຳກິນໃນໄປ ທີ່ຈິງອ້າຍນ້ອງພວກເຮົາ ກະຊິປ່ອຍໄປຢູ່ແລ້ວ ຕັ້ງໃຈສຶກສາອົບຮົມ ຕັ້ງໃຈແນະນຳ ວ່າເຫັນເຂົາເວົ້າດີ ເຫັນເຂົາອັນນິ ມີທ່າທີ່ວ່າ ຕຳຣວດຊິປ່ອຍພັດ ກະມີສ່ວນນຶ່ງ ທີ່ເອົາໃຫ້ ແຕ່ວ່າໃຫ້ໄປແລ້ວ ພັດວ່າອ້າຍນ້ອງເອົາເງິນ ທີ່ຈິງບໍ່ແມ່ນອ້າຍນ້ອງເອົາເງິນ ລະແມ່ນຜູ້ທີ່ໃຊ້ລົດ ທີ່ລະເມີດຫັ້ນ ເອົາໃຫ້ ຄັນຊິເວົ້າບໍ່ແມ່ນເງິນ ຢູ່ນຳຕຳຣວດໄດ໋ ເງິນຢູ່ນຳຜູ້ຂັບຂີ່ ຫັ້ນນະ."

ຖ້າເວົ້າເຖິງການກວດກາ ແລະຕັ້ງດ່ານຢູ່ຖະໜົນຫລວງ, ເຈົ້າໜ້າທີ່ຕຳຣວດ ນະຄອນຫຼວງໃຫ້ຂໍ້ມູນວ່າ ຢູ່ໃນຕົວເມືອງຢ່າງໜ້ອຍຕ້ອງມີ ເຈົ້າໜ້າທີ່ຕຳຣວດ 4 ຄົນຂຶ້ນໄປ ແລະໃຫ້ມັນຖືກຕ້ອງແທ້ໆຕ້ອງມີ 6 ຄົນຂຶ້ນໄປ ແລະສະເພາະນອກເມືອງແມ່ນ 8 ຄົນ ຂຶ້ນໄປຫາ 12 ຄົນ ເອີ້ນວ່າ ກວດກາຕາມທາງຫລວງຂອງເມືອງ.

ບັນຫາເຈົ້າໜ້າທີ່ຕຳຣວດຈະຣາຈອນ ເອົາເງິນນໍາຜູ້ຂັບຂີ່ ແລະ ຜູ້ຂັບຂີ່ເອົາເງິນໃຫ້ເຈົ້າໜ້າທີ່ຕຳຣວດ ເກີດຂຶ້ນມາດົນແລ້ວ ແລະ ບໍ່ແມ່ນ ເລື້ອງໃໝ່. ສິ່ງທີ່ແຕກຕ່າງ ກໍຄື ປັດຈຸບັນ ປະຊາຊົນສາມາດ ເຂົ້າເຖິງຂໍ້ມູນຂ່າວສານ ໄດ້ງ່າຍຜ່ານສື່ສັງຄົມອອນລາຍ ຫລືເຟສບຸກ. ສຳລັບເລື້ອງນີ້ ຄົງຈະເປັນການຍາກ ທີ່ຈະຕັດສິນວ່າ ຝ່າຍໃດຝ່າຍນຶ່ງເຮັດ ຖືກ ຫລື ຜິດ, ແຕ່ ສຸດທ້າຍແລ້ວ ສັງຄົມຈະຕັດສິນເອງວ່າ ເປັນແນວໃດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ