ເຂື່ອນໄຊຍະບູລີ ທົດລອງ ປ່ອຍນໍ້າ

ສຸພັດຕາ
2019-01-18
ອີແມວລ໌
ຄໍາເຫັນ
Share
ພິມ
ທາງດ້ານຫລັງຂອງ ເຂື່ອນໄຊຍະບູຣີ
ທາງດ້ານຫລັງຂອງ ເຂື່ອນໄຊຍະບູຣີ
ຮູບຖ່າຍອຸປຖັມໂດຍ: ນັກຂ່າວພົລເມືອງ

ການປ່ອຍນໍ້າຂອງເຂື່ອນໄຊຍະບູລີ ແຂວງໄຊຍະບູລີ ແຕ່ຕົ້ນເດືອນມົກກະຣານີ້ ເພື່ອກຽມຈະທົດລອງຜລິດກະແສໄຟຟ້າ ໃນຕົ້ນເດືອນ ກຸມພາ ບໍ່ໄດ້ເຮັດໃຫ້ຣະດັບນໍ້າຂອງ ຂຶ້ນ-ລົງ ຜິດປົກກະຕິ ແລະບໍ່ໄດ້ສົ່ງຜົນກະທົບ ຕໍ່ປະຊາຊົນ ທີ່ອາສັຍຢູ່ທ້າຍ ເຂື່ອນ ແຕ່ຢ່າງໃດ, ດັ່ງເຈົ້າໜ້າທີ່ ຜແນກພລັງງານແລະບໍ່ແຮ່ ແຂວງໄຊຍະບູລີ ກ່າວຕໍ່ວິທຍຸເອເຊັຽເສຣີ ໃນວັນທີ 17 ມົກກະຣາ ນີ້ວ່າ:

“ປ່ອຍບໍ່ປ່ອຍກະຖືວ່າ ປົກຕິຫັ້ນແຫຼ້ວເນາະ ກໍຖືວ່າລະດັບນໍ້າບໍ່ມີການປ່ຽນແປງຫຍັງ ປົກຕິຄືທັມຊາດ ຊຶ່ງທ້າຍເດືອນນີ້ ກໍຄາດຄະເນວ່າ ປະມານທ້າຍເດືອນນີ້ແຫຼະ.”

ໃນຂນະທີ່ ຊາວບ້ານທີ່ອາສັຍຢູ່ທ້າຍເຂື່ອນໄຊຍະບູລີ ທ່ານນຶ່ງກ່າວວ່າ ການປ່ອຍນໍ້າລົງທ້າຍເຂື່ອນ ໂດຍທີ່ບໍ່ແຈ້ງໃຫ້ຊາວບ້ານຮູ້ ວັນ-ເວລາ ທີ່ຈະແຈ້ງ ໃນການປ່ອຍນໍ້າ ຊຶ່ງຈະເຮັດໃຫ້ຣະດັບນໍ້າຂຶ້ນ-ລົງ ຜິດປົກກະຕິນັ້ນແມ່ນກະທົບຕໍ່ ການດຳລົງຊີວິດ ຂອງຊາວໄຮ່ຊາວສວນ ທີ່ຢູ່ ທ້າຍເຂື່ອນ, ດັ່ງທີ່ທ່ານກ່າວວ່າ:

“ເອີ່ ຕາມໄທບ້ານ ຂະເຈົ້າໄປທາງນ້ໍາແທ້ ຄັນມັນຫຼາຍແທ້ຂະເຈົ້າ ກະປ່ອຍເປັນໄລຍະ ປ່ອຍນໍ້າທ້າຍເຂື່ອນ ບາງເທື່ອເພິ່ນປ່ອຍຕອນເຊົ້າ ແລ້ວມັນກໍແຫ້ງ ຊາວສວນແທ້ ກໍອາດຈະມີຜົນກະທົບ ບາງເທື່ອເອົາງົວໄປສວນ ແລງມານໍ້າຫຼາຍ.”

ໃນມື້ວັນທີ 15 ມົກກະຣາ ນີ້ ໜັງສືພິມ ຜູ້ຈັດການອອນລາຍ ຂອງໄທ ຣາຍງານວ່າ ນໍ້າຂອງສູງຂຶ້ນ ຜິດປົກກະຕິ ທີ່ ຣະດັບ 5.70 ແມັດ ຈາກຣະດັບ 3 ແມັດ ຢູ່ແຂວງໜອງຄາຍ ອາດກະທົບໃສ່ ປະຊາຊົນ ບ້ານພ້າວເໜືອ ທີ່ລ້ຽງປາກະຊັງ ໃນແມ່ນໍ້າຂອງ ຊຶ່ງເຮັດໃຫ້ປາຕາຍ. ສ່ວນສາເຫດ ທີ່ເຮັດໃຫ້ຣະດັບນໍ້າຂອງ ຢູ່ແຂວງໜອງຄາຍ ຍັງຂຶ້ນຜິດປົກກະຕິນັ້ນ ເຈົ້າໜ້າທີ່ກົມຊັພຍາກອນນໍ້າ ກະຊວງຊັພຍາກອນ ທັມມະຊາດ ແລະ ສິ່ງແວດລ້ອມ ຂອງໄທ ກ່າວຕໍ່ວິທຍຸເອເຊັຍເສຣີ ໃນມື້ດຽວກັນນັ້ນວ່າ:

“ລະດັບນໍ້າທີ່ເຂົາຣາຍງານ ເຂົາກໍຣາຍງານວ່າເປັນ ລະດັບນໍ້າປົກກະຕິ ທີ່ໄຫລຢູ່ປັດຈຸບັນ ຕອນນີ້ນໍ້າທີ່ຂຶ້ນມາ 1 ແມັດ ຫຼື 2 ແມັດ 3 ແມັດ ກໍຢູ່ໃນຊ່ວງປົກກະຕິ ຊ່ວງທີ່ນໍ້າຈະວິກິດ ມັນຕ້ອງຂຶ້ນອີກຫຼາຍເລີຍ ອີກເປັນ 10 ແມັດ ໃກ້ຕາຝັ່ງ ເຖິງຂັ້ນຕອນ ທີ່ຈະເຕືອນພັຍ.”

ບ້ານທີ່ໄດ້ຮັບກະທົບ ຈາກເຂື່ອນໄຊຍະບູລີ ມີທັງໝົດ 15 ບ້ານ ເປັນຕົ້ນ ບ້ານນາຕໍໃຫຍ່, ບ້ານທ່າເດື່ອ, ບ້ານຕາລານ ແລະບ້ານປາກໄຜ່ ສ່ວນບ້ານ ທີ່ຍັງເຫຼືອແມ່ນບໍ່ໄດ້ເປີດເຜີຍຊື່ ອີງຕາມຂໍ້ມູນຈາກທາງການລາວ.

ປັດຈຸບັນ ໂຄງການເຂື່ອນໄຊຍະບູລີ ກໍ່ສ້າງສໍາເຣັດເກືອບ 100% ແລ້ວ ຂນະນີ້ຢູ່ໃນຂັ້ນຕອນການຕັນນໍ້າ ໃນຣະດັບຄວາມສູງ 2,50 ຊັງຕີແມັດ ຕາມມາຕຖານຂອງເຂື່ອນ ເພື່ອກຽມຈະທົດລອງ ຜລິດກະແສໄຟຟ້າ ໃນເດືອນກຸມພາ ກ່ອນທີ່ຈະເຣີ້ມຜລິດ ກະແສໄຟຟ້າເຕັມ ກຳລັງ ໃນທ້າຍປີ 2019 ນີ້.

ເຕັມຫນ້າ