ບ້ານນາສົມກັງວົນ ທີ່ດິນ ລ້ຽງສັດ

ໄມຊູລີ
2019-01-29
ອີແມວລ໌
ຄໍາເຫັນ
Share
ພິມ
ທັມມະຊາດ ຄວາມງາມ ທົ່ງໄຫຫີນ ແຂວງຊຽງຂວາງ
ທັມມະຊາດ ຄວາມງາມ ທົ່ງໄຫຫີນ ແຂວງຊຽງຂວາງ
RFA

ຊາວບ້ານ ບ້ານນາສົມ ເມືອງຜາໄຊ ແຂວງຊຽງຂວາງ, ບໍ່ເຫັນດີໃຫ້ບໍຣິສັດ ພັທນາກະສິກັມ ລາວ-ຍີິ່ປຸ່ນ ສັມປະທານທີ່ດິນ ລ້ຽງງົວຊິ້ນ ແລະງົວນົມ, ຢູ່ຕີນພູເພື່ອສົ່ງອອກໄປຂາຍ ຕ່າງປະເທດເປັນຕົ້ນ: ຈີນ, ຍ້ອນກັງວົນວ່າ ອາດຈະສົ່ງຜົນກະທົບ ຕໍ່ປ່າສງວນ, ແຫຼ່ງຜລິດນໍ້າ ທີ່ຊາວບ້ານໃຊ້ບໍຣິໂພກ, ແລະເຮັດການກະເສດ. ຕໍ່ບັນຫານີ້ ຊາວບ້ານທ່ານນຶ່ງ ມີຄວາມເຫັນເຊັ່ນດຽວກັນ, ຫລັງຈາກທາງບໍຣິສັດ ໄດ້ມາ ພົວພັນກັບຊາວບ້ານ ເມື່ອວັນທີ 10 ມົກກະຣາ ຜ່ານມາ. ຕາມຄໍາເວົ້າຂອງຊາວບ້ານ ບ້ານນາສົມທ່ານນຶ່ງ, ກ່າວຕໍ່ວິທຍຸເອເຊັຍເສຣີ ໃນວັນທີ່ 28 ມົກກະຣາ ນີ້ວ່າ:

“ຖ້າສັດເຂົ້າ ມັນຈະເລາະໄປເປັນໝູ່ ເປັນຝູງ ໃຫຍ່ໃຫຍ່, ມັນຈະບໍ່ໄປບ່ອນລະໂຕສອງໂຕ, ມັນຈະໄປເປັນພື ເລາະໆໄປເຮັດປ່າ ບໍ່ສົມບູນ, ມີຫຍ້າບາງຊນິດງົວກໍກິນໄດ້ ຕົ້ນໄມ້ບາງຊນິດ ງົວກໍກິນໄດ້ ຕົ້ມແຄມບໍ ຫຼືຫຍ້າບໍ ມີຜົນກະທົບຄືແນວນັ້ນ."  

ອີກເຫດຜົນນຶ່ງ, ທີ່ຊາວບ້ານບໍ່ເຫັນພ້ອມ ນໍາການລ້ຽງງົວຢູ່ຕີນພູ ກໍແມ່ນວ່າ, ກັງວົນນໍາຂິ້ງົວທີ່ໄຫລລົງສູ່ຫ້ວຍນໍ້າ ທີ່ພວກເຂົາເຈົ້າໃຊ້ກິນ ໃຊ້ດື່ມ ແລະໃຊ້ເພື່ອການປູກຝັງ, ເຊິ່ງຈະມີຜົນກະທົບຕໍ່ສຸຂພາບແລະສັດລ້ຽງ ຂອງເຂົາເຈົ້າຄືກັນ ຂນະທີ່ຣະບົບຊົລປະທານ ບ້ານເຂົາເຈົ້າ ກໍບໍ່ມີ:

"ຖ້າວ່າປ່ອຍງົວ ໄປມັນຈະເປັນຮ່ອງນ້ອຍ ກໍທຽວໄປຫັ້ນນະ, ເປັນຮ່ອງນ້ອຍ ສິມາຝົນຕົກແລ້ວ ເຊາະເຈື່ອນ, ຮ່ອງນ້ອຍໆນັ້ນເນາະ ເຮັດໃຫ້ ຝຸ່ນລະອອງຫຼາຍຂຶ້ນເດະ, ຂິ້ງົວ, ຂິ້ຄວາຍມັນຈະໄຫຼເຂົ້າຫ້ວຍ ມີຜົນກະທົບຕໍ່ແຫຼ່ງນໍ້າ ທັມມະຊາດ ບ້ານອ້າຍໃຊ້ນໍາໜີນເດີ ແລະກໍນໍ້າໃຊ້ ມັນກໍເປັນຜົນກະທົບ ແນວນັ້ນ.”

ນອກຈາກນີ້ແລ້ວ, ຊາວບ້ານຍັງຢ້ານວ່າ, ຫາກມີການນໍາງົວເຂົ້າມາລ້ຽງ, ໂດຍເຮັດຮົ້ວລ້ອມນັ້ນ, ຈະເປັນການຕັນເສັ້ນທາງ ທີ່ຊາວບ້ານ ໃຊ້ເປັນປະຈໍາ, ເພື່ອໄປເກັບຜັກ, ໝາກໄມ້, ເຂົ້າປ່າຫາຟືນ ຊຶ່ງຖ້າເຂົາເຈົ້າຜ່ານໄປ ທາງບໍຣິສັດ ກໍອາດຈະເອົາຜິດ ນໍາພວກເຂົາເຈົ້າໄດ້. ຊາວບ້ານຜູ້ນີ້ ກ່າວໃນຕອນທ້າຍ ໂດຍຢືນຢັນວ່າ, ຊາວບ້ານເຫັນພ້ອມນໍາກັນ ບໍ່ໃຫ້ບໍຣິສັດ ລາວ-ຍິ່ປຸ່ນ ເຂົ້າມາສັມປະທານທີ່ດິນ, ລ້ອມຮົ້ວ, ລ້ຽງງົວຢູ່ຕີນພູ ຢ່າງເດັດຂາດ ແລະແນະນໍາໃຫ້ ໄປຊອກບ່ອນອື່ນແທນ.

ເຖິງຢ່າງໃດກໍຕາມ, ກໍມີ 1 ບ້ານຄືບ້ານລາດແສນ ເມືອງຜາໄຊ, ເຫັນດີໃຫ້ບໍຣິສັດນີ້ ສັມປະທານທີ່ດິນລ້ຽງງົວ.

ໃນວັນທີ 20 ທັນວາ ປີກາຍ, ຣັຖບານລາວໄດ້ຕົກລົງອະນຸມັດ ໃຫ້ສັມປະທານທີ່ດິນ ແກ່ບໍຣິສັດພັທນາກະສິກັມ ລາວ-ຍິ່ປຸ່ນ 3,552 ເຮັກຕ່າ ຕື່ມໃສ່ 500 ຮ້ອຍເຮັກຕ່າ ທີ່ບໍຣິສັດ ໄດ້ສັມປະທານ ໄປແລ້ວແຕ່ປີ 2015, ເພາະວ່າ ປີນີ້ ບໍຣິສັດ ມີງົວເພີ້ມຂຶ້ນ 600 ຮ້ອຍໂຕ ສົມກັບ 500 ໂຕ ທີ່ ບໍຣິສັດ ນໍາເຂົ້າຈາກປະເທດ ອອສເຕຣເລັຍ ເມື່ອປີ 2015.

ຄໍາເຫັນ (1)
Share

ລາວ

ຈາກ ລາວ

ບໍລິສັດນີ້ກໍເຮັດມາໄດ້ສອງຫາສາມປີແລ້ວ ບໍ່ເຄີຍໄດ້ຍິນວ່າເຂົາເຈົ້າໄດ້ສ້າງຜົນກະທົບ ຕໍ່ຊາວບ້ານແລະສິ່ງແວດລ້ອມອີຫັຍງ ແລະບໍ່ໄດ້ສ້າງຜົນເສັຽຫາຍເລີຍ ຄືກັບຈີນແລະວຽດນາມ, ແລ້ວຊາວບ້ານສິໄປຂັດຂວາງ ແລະກິດກນເຮັດຫັຍງ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 31, 2019 04:35 AM

ເຕັມຫນ້າ