ຄົນລາວສ່ວນໃຫຍ່ ທີ່ເຮັດວຽກຄອນເຊັນເຕີ ຢູ່ສາມຫຼ່ຽມຄຳ ໜີກັບຄືນບ້ານ

ຄົນງານລາວ ທີ່ເຮັດວຽກ ຢູ່ເຂດເສດຖະກິດພິເສດສາມຫລ່ຽມຄໍາ ແຫ່ກັນກັບບ້ານ ຍ້ອນຕົກງານ ພາຍຫລັງກະຊວງປ້ອງກັນຄວາມສະຫງົບ ແລະພາກສ່ວນທີ່ກ່ຽວຂ້ອງ ເຂົ້າກວດລ້າງ ກຸ່ມແກ້ງສໍ້ໂກງ ທາງໂທລະຄົມ ຫຼື ຄອນເຊນເຕີ (Call Center) ຂ້າມຊາດ ທີ່ຍັງສືບຕໍ່ເຄື່ອນໄຫວ ຕົວະຕົ້ມສໍ້ໂກງ ທາງໂທ ລະສັບ ຢູ່ເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜີ້ງ ແຂວງບໍ່ແກ້ວ.

ກ່ອນໜ້ານີ້ ຄືວັນທີ 9 ສິງຫາ 2024 ເຈົ້າແຂວງ ແຂວງບໍ່ແກ້ວ, ກະຊວງປ້ອງກັນຄວາມສະຫງົບ, ກະຊວງເທັກໂນໂລຢີ ແລະການສື່ສານ, ກະຊວງແຜນ ການ ແລະການລົງທືນ ແລະທ່ານ ຈ້າວເຫວີຍ ປະທານສະພາບໍລິຫານ ເຂດເສດຖະກິດພິເສດສາມຫຼ່ຽມຄຳ ໄດ້ເຂົ້າຮ່ວມກອງປະຊຸມ ກ່ຽວກັບການກວດລ້າງກຸ່ມຄອລເຊນເຕີ ຊຶ່ງຈະເລີ້ມຈັດຕັ້ງປະຕິບັດ ຕັ້ງແຕ່ວັນທີ 9 ເຖິງ 25 ສິງຫາ ນີ້ ໃຫ້ບັນດາຫົວໜ່ວຍແກ້ງຄອນເຊນເຕີ ທີ່ຍັງສືບຕໍ່ເຄື່ອນໄຫວນັ້ນ ຢຸດເຊົາການເຄື່ອນໄຫວ ຢ່າງເດັດຂາດ ພ້ອມທັງຮື້ຖອນ ອຸປະກອນເທັກນິກຮັບໃຊ້ ໃຫ້ແກ່ການເຄື່ອນໄຫວ ສໍ້ໂກງທາງໂທລະຄົມນັ້ນ.

ກ່ຽວກັບເລື້ອງດັ່ງກ່າວ ພະນັກງານ ທີ່ເຄີຍເຮັດວຽກຕອບແຊັດ ຢູ່ໃນເຂດເສດ ຖະກິດພິເສດສາມຫລ່ຽມຄໍາ ຜູ້ນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 21 ສິງ ຫານີ້ ເຖິງບໍລິສັດ ທີ່ຕົນເຄີຍເຮັດວຽກນໍານັ້ນວ່າ ໄດ້ປິດລົງ ກ່ອນຈະຖືກຕໍາຫຼວດລົງກວດກາ. ແລະວ່າ ດຽວນີ້ ຕົນເອງກໍໄດ້ກັບເມືອບ້ານ ຢູ່ນະຄອນຫຼວງວຽງຈັນແລ້ວ ຍັງຢູ່ບ້ານລ້າໆ ບໍ່ໄດ້ຫາວຽກໃໝ່ເຮັດເທື່ອ ແລະຄ່າເຮັດວຽກຕອບແຊັດນັ້ນ ຕົນກໍຍັງບໍ່ທັນໄດ້ເງິນເດືອນ ຈາກນາຍຈ້າງເທື່ອ.

“ຕໍາຫລວດມາກວດ ຕໍາຫລວດສ່ວນຫລາຍມາກວດ ແລ້ວກໍຫົວໜ້າໃຫ້ກັບກ່ອນແຕ່ວ່າເງິນເດືອນຍັງບໍ່ໄດ້ເລີຍ ບໍລິສັດບໍ່ປິດແຕ່ວ່າ ຂະເຈົ້າໃຫ້ອອກກ່ອນ ນ່າຈະແມ່ນຕຶກອື່ນຖືກກວດແລ້ວ ແລ້ວຂະເຈົ້າຢ້ານຖືກກວດ ຂະເຈົ້າເລີຍຍຸບບໍລິສັດນີ້ກ່ອນ.”

ແລະຄົນຂັບລົດຕູ້ ຢູ່ເມືອງຕົ້ນເຜິ້ງ ແຂວງບໍ່ແກ້ວ ຜູ້ນຶ່ງກໍເວົ້າວ່າ ປັດຈຸບັນ ລົດໂດຍສານ ອອກຈາກເມືອງຕົ້ນເຜິ້ງ ໄປເມືອງອື່ນໆຫຼາຍ ຍ້ອນຄົນງານລາວ ຈໍານວນຫຼາຍ ໄດ້ພາກັນກັບບ້ານ ຫລັງຈາກກຸ່ມແກ້ງເຊນເຕີ ໃນເຂດເສດຖະກິດພິເສດສາມຫຼ່ຽມຄໍາ ປິດໂຕລົງ, ມີພຽງຄົນງານສ່ວນນຶ່ງເທົ່ານັ້ນ ທີ່ຍັງຢູ່ໃນເຂດດັ່ງກ່າວ.

“ແມ່ນໆ ກັບເບິດເລີຍ ບໍ່ມີໃຜແລ້ວມີໜ້ອຍດຽວ ຂະເຈົ້າກັບບ້ານຍ້ອນບໍ່ມິວຽກເຮັດ ກັບບ້ານບໍ່ມີບ່ອນໄປ ເລີ້ມກັບແຕ່ດົນແລ້ວ ປະມານທິດປາຍນີ້ບໍ່ ແມ່ນໆ ກັບຫລາຍ ກັບຈົນເກືອບເບິດພຸ້ນແຫລະ ລົງຕະຫລອດ ຕໍາຫລວດລົງຕະຫລອດ ທຸກເດືອນ.”

ພ້ອມດຽວກັນນັ້ນ ນາຍໜ້າຮັບສະມັກພະນັກງານຕອບແຊັດ ຢູ່ເມືອງຕົ້ນເຜິ້ງ ນາງນຶ່ງ ກໍເວົ້າຕໍ່ວິທຍຸເອເຊັຽເສຣີວ່າ ປັດຈຸບັນ ຕໍາຫຼວດລາວ ສົມທົບກັບຕໍາຫຼວດຈີນ ເຂົ້າກວດລ້າງ ບໍລິສັດຕອບແຊັດ ໃນເຂດສາມຫຼ່ຽມຄໍາຫຼາຍ ຈົນຫຼາຍບໍລິສັດຢ້ານ ແລະໄດ້ປິດໂຕລົງ ກ່ອນຈະຖືກກວດລ້າງ. ສ່ວນບໍລິສັດຈີນ ທີ່ຄົນລາວ ໄດ້ເຮັດວຽກຈັດຫາພະນັກງານຕອບແຊັດໃຫ້ນັ້ນ ກໍໄດ້ປິດໂຕລົງ ແລະໄດ້ໂຍກຍ້າຍ ພະນັກງານຂອງຕົນ ອອກຈາກເຂດນັ້ນ ຍ້ອນບໍ່ຢາກໃຫ້ພະນັກງານຖືກຈັບ. ແລະວ່າ ດຽວນີ້ ບໍລິສັດ ຍັງປິດໂຕ ເພື່ອລໍຖ້າເບິ່ງແນວໂນ້ມ ວັນທີ 25 ສິງຫານີ້ວ່າ ຈະມີຕໍາຫຼວດ ລົງມາກວດກາຕື່ມອີກ ຫຼືບໍ່. ຖ້າບໍ່ມີການລົງກວດກາຕື່ມ ກໍຈະກັບໄປເປີດບໍລິສັດອີກ ໃນຕົ້ນເດືອນກັນຍາ ທີ່ຈະມາເຖິງນີ້.

“ມັນກໍປິດຫລາຍບໍລິສັດຢູ່ ເພາະວ່າບໍລິສັດ ຕໍາຫລວດຄົ້ນເຢິະ ກໍໄດ້ປິດຕົວລົງເລີຍ ເປີດກໍບໍ່ໄດ້ ແຕ່ວ່າຢູ່ກາຊີໂນດຽວນີ້ຫັ້ນ ບໍ່ມີໃຜສັ່ງເປີດບໍລິສັດເທື່ອ ຍ້ອນວ່າຕໍາຫລວດຍັງລົງ ຫລືມີ ຖ້າເບິ່ງແຕ່ວັນທີ 25 ຕໍາຫລວດວ່າເຂົາສິລົງຮອດວັນທີ 25 ແລ້ວເຂົາຍັງບໍ່ເລີກທີ່ຈະຄົ້ນ ເຮົາກໍເປີດບໍ່ໄດ້ ຖ້າວ່າຮອດວັນທີ 25 ແລ້ວຕໍາຫລວດບໍ່ເຂົ້າຄົ້ນ ແລ້ວບໍ່ເຮັດຫຍັງແລ້ວ ເຮົາກໍເປີດບໍລິສັດ ກໍໄດ້.”

ເລື່ອງການກວດລ້າງແກ້ງຄອນເຊນເຕີນີ້ ເຈົ້າໜ້າທີ່ ກອງບັນຊາການປ້ອງກັນຄວາມສະຫງົບແຂວງບໍ່ແກ້ວ ທ່ານນຶ່ງ ກ່າວເຖິງເລື້ອງການປະຕິບັດການເທື່ອນີ້ວ່າ ປກສ ໃນເຂດເສດຖະກິດພິເສດສາມຫຼ່ຽມຄໍາ ໄດ້ສົມທົບກັບ ປກສ ເມືອງຕົ້ນເຜິ້ງ ແລະຕໍາຫຼວດ ຈາກທາງການຈີນ ແລະຫວຽດນາມ ກວດລ້າງບໍລິສັດສະແກ້ມເມີເຫຼົ່ານັ້ນ. ສໍາລັບຄົນງານລາວ ທີ່ຖືກຈັບໄດ້ນັ້ນ ຫາກບໍ່ມີຄວາມຜິດຮ້າຍແຮງ ກໍຈະຖືກຕັກເຕືອນ ແລະປ່ອຍຕົວ ກັບບ້ານ. ສ່ວນຄົນງານ ທີ່ມີຄວາມຜິດ ກໍຈະຖືກດໍາເນີນຄະດີ ຕາມລະບຽບກົດໝາຍ ດັ່ງທີ່ທ່ານກ່າວວ່າ:

“ໂຕປກສ ເຂດ ເຂົາເຈົ້າໄປເຮັດຫັ້ນນ່າ ປກສ ເຂດພິເສດພຸ້ນນ່າຢູ່ແຖວເຂດເສດຖະກິດຫັ້ນນ່າ ກັບປກສ ເມືອງ ກັບປກສ ແຂວງ ຂະເຈົ້າລົງໄປເຮັດ ກໍ ຄັນບໍ່ຜິດຂະເຈົ້າໍປ່ອຍ ຜິດບໍ່ຮ້າຍແຮງກໍເຮັດໝາຍ ຫລືຕັກເຕືອນເພິ່ນກໍປ່ອຍ ຄັນມີຄວາມຜິດກໍໄດ້ ຊິຈັບ.”

ເມື່ອວັນທີ 31 ກໍລະກົດ ທີ່ຜ່ານມາ ຕໍາຫຼດລາວ ແລະຈີນ ສາມາດຈັບກຸ່ມແກ້ງ ຄອນເຊນເຕີຄົນຈີນ ໄດ້ທັງໝົດ 29 ຄົນ ພ້ອມຂອງກາງ ເປັນຄອມພິວເຕີ ແລະໂທລະສັບ ຈໍານວນນຶ່ງ. ໃນຈໍານວນນັ້ນ 20 ຄົນ ເຂົ້າມາລາວແບບຜິດກົດໝາຍແລະ 9 ຄົນ ເປັນຜູ້ຫຼົບໜີຈາກການຈັບກຸມຂອງທາງການຈີນ, ທັງໝົດ ຖືກສົ່ງຕົວກັບຄືນໄປຈີນ ຜ່ານດ່ານສາກົນບໍ່ເຕັນ-ບໍ່ຫານ ແຂວງຫຼວງນໍ້າທາ.

ຕໍ່ມາ ຕໍາຫຼວດລາວ ແລະຫວຽດນາມ ກໍໄດ້ຮ່ວມມືກັນ ຈັບກຸ່ມຄອນເຊນເຕີຄົນຫວຽດນາມ ໄດ້ 154 ຄົນ ພ້ອມຂອງກາງ ເປັນຄອມພິວເຕີ 20 ເຄື່ອງ ແລະໂທລະສັບ 298 ອັນ ໃນມື້ວັນທີ 2 ສິງຫານີ້. ຄົນທັງໝົດ ທີ່ຈັບໄດ້ ແມ່ນໄດ້ຖືກມອບ ໃຫ້ເຈົ້າໜ້າທີ່ຕໍາຫຼວດ ແຂວງຮ່າຕິງໄປແລ້ວ ໃນມື້ວັນທີ 3 ສິງຫານີ້.