ປໂຍດມີໜ້ອຍ ຈາກໂຄງການ ສີທັນດອນ: ວິຊາການ

ສຸພັດຕາ
2019-05-10
ອີແມວລ໌
ຄໍາເຫັນ
Share
ພິມ
ໂຄງການ ເຂດເສຖກິຈພິເສດ ມະຫານະທີ ສີທັນດອນ ຢູ່ເມືອງໂຂງ ແຂວງຈໍາປາສັກ
ໂຄງການ ເຂດເສຖກິຈພິເສດ ມະຫານະທີ ສີທັນດອນ ຢູ່ເມືອງໂຂງ ແຂວງຈໍາປາສັກ
RFA/TP

ໂຄງການ ເຂດເສຖກິຈພິເສດ ມະຫານະທີ ສີທັນດອນ ຢູ່ເມືອງໂຂງ ແຂວງຈໍາປາສັກ ທີ່ວ່າດຽວນີ້ ຢູ່ໃນແຜນໄລຍະທີ່ 1 ຄື; ກໍ່ສ້າງຖນົນ ອ້ອມດອນໂຂງ ແລະເຈຣະຈາ ຂໍສັມປະທານທີ່ດິນກັບຣັຖບານ ແລະປະຊາຊົນ 8 ບ້ານນັ້ນ ຈະກະທົບຕໍ່ການດໍາລົງຊີວິດ ຂອງປະຊາຊົນ ທ້ອງຖິ່ນ ແລະຈະສ້າງຜົນປໂຍດ ໃຫ້ປະຊາຊົນ ພຽງເລັກໜ້ອຍ.

ກ່ຽວກັບເຣື້ອງນີ້ ຍານາງ Shalmali Guttal ຜູ້ອໍານວຍການ Focus on the Global South ທີ່ມີຫ້ອງການຕັ້ງຢູ່ບາງກອກ ປະເທດໄທ ກ່າວຕໍ່ວິທຍຸເອເຊັຽເສຣີ ໃນວັນທີ 10 ພຶສພາ ນີ້ວ່າ:

ທ່ານວ່າ “ປົກກະຕິແລ້ວ ປະຊາຊົນຈະເສັຽດິນ ໃຫ້ກັບເຂດເສຖກິຈພິເສດ, ເສັຽເຂດແດນ ແລະຂະເຈົ້າ ບໍ່ສາມາດເຂົ້າເຖິງ ແຫຼ່ງຊັພຍາກອນ ທັມມະຊາດ ທີ່ມີຄວາມສໍາຄັນ ຕໍ່ການດໍາລົງຊີວິດຂອງປະຊາຊົນ ສ່ວນໃຫຍ່ຜູ້ທີ່ເຮັດກະສິກັມ, ຫາປາ ແລະຫາກິນຕາມທັມມະຊາດ.”

ໃນຂນະດຽວກັນ ເຈົ້າທີ່ອົງການສາກົນໃນລາວ ທ່ານນຶ່ງ ກໍເວົ້າວ່າ ຄົນລາວອາດໄດ້ເປັນພຽງແຕ່ກັມມະກອນເທົ່ານັ້ນ, ດັ່ງທ່ານກ່າວວ່າ:

“ຄົນລາວເຮົາ ກໍເປັນພຽງແຕ່ກັມມະກອນ ຣາຍໄດ້ຂັ້ນຕໍ່າເທົ່ານັ້ນ ເປັນພຽງແຕ່ຍາມ, ເປັນກັມມະກອນ ແຖບຍັງຖືກເອົາລັດເອົາປຽບ, ຊຶ່ງກໍ ບໍ່ໄດ້ຕອບໂຈດ ນະໂຍບາຍ ຂອງພັກຣັຖ ທີ່ບອກວ່າ ມີເຂດເສຖກິຈພິເສດຫຼາຍ ຈະເຮັດໃຫ້ ສ້າງວຽກເຮັດງານທໍາ ແມ່ນຢູ່ວຽກເຮັດງານທໍາ ແຕ່ເປັນວຽກທີ່ ໄດ້ເງິນຣາຍໄດ້ຕໍ່າ ບໍ່ເຮັດໃຫ້ຊີວິດການເປັນຢູ່ດີຂຶ້ນ.”

ກ່ຽວກັບເຣື້ອງນີ້ ເຈົ້າໜ້າທີ່ຫ້ອງການ ເມືອງໂຂງ ທ່ານນຶ່ງ ກໍໃຫ້ຄໍາເຫັນວ່າ ເປັນໄປໄດ້ຍາກ ທີ່ເຈົ້າຂອງໂຄງການ ຈະຮັບເອົາຄົນລາວ ເຂົ້າເຮັດວຽກ:

“ໂຮງແຮມຫ້າດາວ ເພິ່ນກໍຕ້ອງເອົາຄົນງານເປັນພັນ ແຕ່ວ່າ ຄົນລາວເຮົານິ່ ມັນສິມີຣະດັບ ພໍໄດ້ເຮັດນໍາເຂົາຫຼືບໍ່ ເພາະພາສາ ເຈົ້າກະບໍ່ ເປັນເນາະ ພາສາຈີນເຈົ້າກໍໄດ້ ເຂົາຈະຈ້າງເຈົ້າບໍ່ ຄວາມຮູ້ບໍ່ເກ່ັ່ງ ທາງດ້ານຄອມພິວຕອກ ຄອມພິວເຕີ້ ເຂົາກະບໍ່ເອົາແຫຼ້ວ ເຂົາກໍເອົາ ຄົນຂອງເຂົາຫ້ັນແຫຼະ ມາເຮັດອີກ ເຮົາກໍຕົກໄປອີກ.”

ຊາວບ້ານເມືອງແສນ ນຶ່ງໃນຈໍານວນ 8 ບ້ານ ທີ່ຈີນກໍາລັງຂໍສັມປະທານທີ່ດິນ ເຮັດໂຄງການນັ້ນ ກໍໄດ້ກ່າວ ຕໍ່ວິທຍຸເອເຊັຽເສຣີ ໃນມື້ ດຽວກັນນີ້ວ່າ ບໍ່ໄດ້ຂັດຂ້ອງ ກັບໂຄງການພັທນາ, ແຕ່ໂຄງການພັທນາໂຕນີ້ ຈະເຮັດໃຫ້ຊາວບ້ານ ຕ້ອງຍ້າຍ ໄປຢູ່ບ່ອນອື່ນ ພວກຂະເຈົ້າ ຈຶ່ງບໍ່ຢາກໃຫ້ມີ:

“ໂອ່ ໂຕເມືອງນິ່ ມັນມີບ້ານຫີນສິ່ວ, ບ້ານເມືອງແສນ ແລ້ວກໍເຂດຊົນນະບົດ ຫຼາຍໆ ຫຼາຍບ້ານ ຢູ່ທົ່ວເມືອງນິ່ ເຂົາບໍ່ຢາກໃຫ້ເຮັດແຫຼະ ມັນເຂດ ໂຕເມືອງ ບໍ່ຢາກໂຍກຍ້າຍ ອິສັງນັ່ນແຫຼະ ມັນກໍບໍ່ຄືກັບບັານຫຼັງເດີມ ບໍ່ຢາກໃຫ້ເຮັດ ບໍ່ຢາກຍ້າຍ.”

ໂຄງການ ເຂດເສຖກິຈພິເສດ ມະຫານາທີ ສີທັນດອນ ມູນຄ່າ 9 ຕື້ໂດລາ ສະຫະຣັດ ເປັນໂຄງການ ຂອງກຸ່ມບໍຣິສັດ ພັທນາລາວ ມະຫານະທີ ສີທັນດອນ Hongkong investment ຈໍາກັດ, ຊຶຶ່ງມີແຜນພັທນາ ແຕ່ ປີ 2018 ຮອດປີ 2050 ມີການດໍາເນີນການ 6 ໄລຍະ.

ປັດຈຸບັນ ຢູ່ໃນຣະຍະທີ່ 1 ຄືການສ້າງຖນົນຄອນກຣີດ ອ້ອມດອນໂຂງ ໄລຍະທາງ 43 ກິໂລແມັດ ແລະເຈຣະຈາ ສັມປະທານດິນ ກັບ ຣັຖບານ ແລະປະຊາຊົນ 8 ບ້ານ ຈໍານວນ 140 ຄອບຄົວ, ແຕ່ຊາວບ້ານ ຍັງບໍ່ຍິນຍອມຍົກດິນໃຫ້ຈີນ ແລະ ເຣື້ອງດັ່ງກ່າວ ຊາວບ້ານ ໄດ້ຮ້ອງຮຽນຫາສະພາແຫ່ງຊາດແລ້ວ, ແຕ່ຍັງບໍ່ໄດ້ຄໍາຕອບ ທີ່ຈະແຈ້ງ ວ່າຊາວບ້ານ ຈໍາເປັນຕ້ອງຍົກທີ່ດິນ ໃຫ້ຈີນສັມປະທານຫຼືບໍ່.

ຄໍາເຫັນ (2)
Share

YoungE

ຈາກ Laos

ໂຄງການນີ້ແມ່ນໂຄງການພິເສດ ຂອງພວກເຈົ້ານາຍຂາຍທາດລາວ ໄກ້ຄົນຈີນເພືອຜົນໄດ້ ຂອງພວກຂາຍຊາດຂົ່ມເຫງກົດຂີ່ ປະຊາຊົນລາວ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 29, 2019 08:38 AM

PM2021

ຈາກ VTE

ບໍ່ເຫັນດີນຳທີ່ຕັ້ງໂຄງການ ເປັນບອ່ນທີ່ມີປະຊາຊົນດຳລົງຊີວິດ ມາແຕ່ດົນນານແລ້ວ. ຄັນຢາກພັດທະນາແມ່ນໄປພັດທະນາບອ່ນບໍ່ມີຄົນຢູ່ ບອ່ນຍັງບໍ່ທັນມີການພັດທະນາຫຍັງ ບອ່ນຜີບໍ່ທອ່ງຄົນບໍ່ທ່ຽວພຸ້ນ ຄັນຊັ້ນຊິເອີ້ນວ່າພັດທະນາແນວໃດ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 15, 2019 06:34 AM

ເຕັມຫນ້າ