ພະນັກງານຣັດລະຫລວມຕໍ່ ໜ້າທີ່


2013-11-27
Share
F-officials ພະນັກງານຣັດລະຫລວມຕໍ່ ໜ້າທີ່ ຮັບສິນບົນ
RFA/LX

 

ປະຊາຊົນລາວຈົ່ມວ່າ ພະນັກງານຂອງຣັດ ມາການຊ້າເລີກໄວ ແລະ ມັກຮຽກຮ້ອງ ເອົາສິນບົນ. ບັນຫາດັ່ງກ່າວ ສ້າງຄວາມບໍ່ພໍໃຈ ໃຫ້ແກ່ ປະຊາຊົນຢ່າງຫລວງຫລາຍເຊັ່ນ: ເວລາໄປຂໍເຊັນເອກກະສານ ຢູ່ຫ້ອງການບ້ານຫຼືເມືອງ ຫຼືແຂວງ ຫລືກະຊວງກົມກອງຕ່າງໆຂອງຣັຖບານ. ເວລາເຂົ້າໄປເຮັດ ພາລະກິຈ ນໍາຫ້ອງການຕ່າງໆ ກໍຈະເຫັນ ພະນັກງານ ຂອງຣັດ ຫລາຍຄົນມາການຊ້າ ເມື່ອມາຮອດແລ້ວ ກໍບໍ່ຍອມເຊັນ ໜັງສືໃຫ້ງ່າຍໆ ທັງໆທີ່ວຽກງານ ກໍບໍ່ມີຫຍັງຫລາຍ ຕ້ອງມີເງິນສິນບົນ ຈຶ່ງເຊັນໃຫ້. ຊາວບ້ານຜູ້ນຶ່ງ ຊຶ່ງໄດ້ປະສົບພົບພໍ້ ບັນຫານີ້ດ້ວຍຕົນ ເອງ ໄດ້ຈົ່ມກັບນັກຂ່າວວິທະຍຸເອເຊັຍເສຣີວ່າ:

“ມັນຕົວຈິງທີ່ເຮົາໄປເຈີຫັ່ນນະ ມັນແບບເຮົາໄປແລ້ວພະນັກງານ ບໍ່ມາເຮັດວຽກຊັ່ງຊີ່ນະ ບາດເທື່ອວ່າເຮົານັ່ງຖ້າຢູ່ຫັ່ນນະ ເຮົາກະຢາກໄດ້ໄວ ຢາກໄດ້ໄວ ເຈົ້າຕ້ອງຈ່າຍດ່ວນ ໄດ໋ອ້າຍ ປະມານວ່າຮຽກຮ້ອງ ເອົາເງິນກັນ ທັງໆທີ່ວ່າຂະເຈົ້າກະບໍ່ໄດ້ ມີວຽກຫຍັງຫລາຍ. ບາດເທື່ອວ່າບໍ່ ຮອດໂມງ ເລີກວຽກເລີກງານ ໄປສາມໂມງ ພັດວ່າເລີກວຽກແລ້ວ ພາກັນກິນເຫລົ້າ ກິນເບັຍ ຕີບູນລະ. ຄັນວ່າຢາກໄດ້ດ່ວນ ອ້າຍຈ່າຍເງິນ ເພິ້ມເດີພັດວ່າ. ກຳນົດສາມມື້ ເພິ່ນຊິເຊັນໃຫ້ ຢາກໄດ້ມື້ນີ້ ຈ່າຍນຶ່ງ ແສນກີບ ຢາກໄດ້ມື້ອື່ນຈ່າຍ 50 ພັນກີບ.”

ຕາມກົດຣະບຽບ ພະນັກງານຂອງຣັດ ຕ້ອງເລີ້ມເຮັດວຽກນັບແຕ່ເວລາ 8 ໂມງເຄິ່ງແຕ່ເຊົ້າ ຈົນເຖິງເວລາບ່າຍ 4 ໂມງເຄິ່ງ ແຕ່ພະນັກງານ ສ່ວນຫລາຍໄປຊ້າ 10 ໂມງຈຶ່ງໄປເຖິງ ຮອດຕອນທ່ຽງ ກໍອອກໄປກິນທ່ຽງ ແລ້ວກັບມາຫ້ອງການ ຮອດບ່າຍ 3 ໂມງ ກໍກັບບ້ານແລ້ວ.

ຕໍ່ບັນຫານີ້ ພະນັກງານຂອງຣັຖບາງຄົນໃຫ້ເຫດຜົນວ່າ ພວກເຂົາບໍ່ມີກຳລັງໃຈເຮັດການໃຫ້ຣັດ ເພາະເງິນເດືອນຕໍ່າຊໍ້າບໍ່ໜໍາພັດຖືກຕັດ ເງິນ ອຸດໝູນອີກ ເຮັດຕາມເງິນ ແປວ່າເງິນບໍ່ດີ ກໍບໍ່ມີຜົນງານ. ບັນຫາເງິນເດືອນ ຕໍ່າ ບໍ່ພຽງແຕ່ເຮັດໃຫ້ບັນດາພະນັກງານຂອງພັກຂອງຣັດ ບໍ່ມີ ກໍາລັງໃຈເທົ່ານັ້ນ ແຕ່ຍັງພາໃຫ້ເກີດການສໍ້ຣາສບັງຫລວງ ຫລາຍຂື້ນ. ອົງການຄວາມໂປງໄສສາກົນ ທີ່ມີສັງນັກງານ ຢູ່ປະເທດເຍັຽຣະມັນ ຣາຍງານວ່າ ລາວເປັນປະເທດນຶ່ງ ທີ່ມີການສໍ້ຣາສບັງຫລວງ ຫລາຍທີ່ສຸດໃນໂລກ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ