ສະຖານີຣົດໄຟໃກ້ແລ້ວ ຄ່າຊົດເຊີຍ ຍັງບໍ່ແລ້ວ

ມາເຖິງປັດຈຸບັນ ການກໍ່ສ້າງສະຖານີຣົດໄຟ ລາວ-ຈີນ ຢູ່ຈຸດບ້ານໂຄກສະອາດ ເມືອງໄຊທານີ ນະຄອນຫລວງ ວຽງຈັນ ມີຄວາມ ຄືບໜ້າ 70% ຊຶ່ງຂນະນີ້ກໍາລັງຢູ່ໃນຣະຫວ່າງ ການຕົບແຕ່ງພາຍໃນ ແລະຕິດຕັ້ງຣະບົບໄຟຟ້າ ໂດຍຄາດວ່າຈະສໍາເຣັດໃນ ເດືອນ ກັນຍາ 2021 ນີ້, ອີງຕາມການຣາຍງານັລ້າສຸດຂອງ ທ່ານ Xio Qianwen ຜູ້ອໍານວຍການ ບໍຣິສັດທາງຣົດໄຟລາວ-ຈີນ ຈໍາກັດ ໃນມື້ວັນທີ 10 ມິຖຸນານີ້.

ກ່ຽວກັບເຣື່ອງນີ້ ເຈົ້າໜ້າທີ່ກົມຄຸ້ມຄອງທາງຣົດໄຟ ທ່ານນຶ່ງທີ່ຂໍສງວນຊື່ແລະສຽງ ເວົ້າຕໍ່ວິທຍຸເອເຊັຍເສຣີວ່າ ປັດຈຸບັນບໍຣິສັດຜູ້ຮັບ ເໝົາກໍ່ສ້າງ ກໍາລັງເລັ່ງສ້າງສະຖານີດັ່ງກ່າວ ແລະ ສະຖານີແຫ່ງອື່ນໆ ໃຫ້ສໍາເຣັດຕາມແຜນທີ່ວາງໄວ້, ແຕ່ທ່ານບໍ່ສາມາດໃຫ້ ຣາຍລະອຽດໄດ້, ຕ້ອງລໍຖ້າໃຫ້ທາງບໍຣິສັດ ທາງຣົດໄຟລາວ-ຈີນ ເປັນຜູ້ຣາຍງານ.

ເພື່ອຂໍຮູ້ຣາຍລະອຽດ ວິທຍຸເອເຊັຍເສຣີ ໄດ້ຕິດຕໍ່ໄປຫາ ບໍຣິສັດທາງຣົດໄຟລາວ-ຈີນ ຈໍາກັດ, ແຕ່ບໍ່ມີພະນັກງານຄົນໃດສາມາດໃຫ້ ຄໍາເຫັນໄດ້ ຍ້ອນບໍ່ມີໜ້າທີ່ ໃຫ້ຂໍ້ມູລຕໍ່ສື່ມວນຊົນ, ຕ້ອງໄດ້ລໍຖ້າ ໃຫ້ຜູ້ອໍານວຍການບໍຣິສັດ ເປັນຜູ້ຖແລງຂ່າວ.

ເຖິງແມ່ນວ່າການກໍ່ສ້າງສະຖານີຣົດໄຟຫຼາຍແຫ່ງ ມີຄວາມຄືບໜ້າໄປເລື້ອຍໆກໍຕາມ ແຕ່ການໄກ່ເກັ່ຍຫຼາຍຢ່າງ ແລະການຊົດເຊີຍ ຄວາມເສັຍຫາຍໃຫ້ປະຊາຊົນ ທີ່ໄດ້ຮັບຜົລກະທົບ ຈາກການສ້າງສະຖານີ ວຽງຈັນ ນັ້ນກໍຍັງບໍ່ຄົບຖ້ວນ, ມີຜູ້ໄດ້ຮັບ ຄ່າຊົດເຊີຍ ໄປແດ່ແລ້ວຈໍານວນນຶ່ງ.

ສ່ວນຜູ້ທີ່ໄດ້ຮັບຜົລກະທົບ ທີ່ຍັງບໍ່ທັນໄດ້ຮັບຄ່າຊົດເຊີຍ ພາກສ່ວນທີ່ກ່ຽວຂ້ອງ ກໍຍັງບໍ່ໄດ້ເອີ້ນໄປໂອ້ລົມ ຣາຍລະອຽດກ່ຽວກັບການ ຊົດເຊີຍນັ້ນແຕ່ຢ່າງໃດ ດັ່ງຊາວບ້ານທີ່ຍັງບໍ່ໄດ້ ຮັບຄ່າຊົດເຊີຍ ທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 11 ມິຖຸນານີ້ວ່າ:

“ບໍ່ໄດ້ໃຫ້ ຍັງບໍ່ຮູ້ເທື່ອນ່າ ບໍ່ຮູ້ມື້ ໂອ໋ ຍາກແຫລະ ໄດ້ກະໄດ້ນໍາເພິ່ນຫັ້ນແຫລະ ຄັນບໍ່ໄດ້ກໍບໍ່ໄດ້ ຍັງລໍຖ້າ.”

ທ່ານກ່າວຕື່ມວ່າ ຖ້າເປັນໄປໄດ້ ຢາກໃຫ້ພາກສ່ວນທີ່ກ່ຽວຂ້ອງ ເລັ່ງໃຫ້ການຊົດເຊີຍ, ຊ້າສຸດບໍ່ຢາກໃຫ້ກາຍປີນີ້ ຍ້ອນຕົນໄດ້ເສັຽ ທີ່ດິນໃຫ້ແກ່ໂຄງການນີ້ໄປແລ້ວ ຕັ້ງແຕ່ປີ 2019, ດັ່ງນັ້ນ ຈຶ່ງເຫັນສົມຄວນ ທີ່ຈະໄດ້ຮັບເພື່ອຄວາມເປັນທັມ.

ໃນຂນະດຽວກັນ ເຈົ້າໜ້າທີ່ບ້ານນຶ່ງ ທີ່ຢູ່ໃກ້ກັບການສ້າງສະຖານີວຽງຈັນໃຕ້ ເວົ້າວ່າ ຊາວບ້ານຢູ່ໃນເຂດບ້ານຂອງຕົນ ທີ່ໄດ້ຮັບຜົລ ກະທົບຈາກໂຄງການທີ່ວ່ານີ້ ໄດ້ຮັບຄ່າຊົດເຊີຍ ໄປຫລາຍຄອບຄົວແລ້ວ, ຍັງເຫລືອປະມານ 10% ທີ່ຍັງລໍຖ້າການຊົດເຊີຍນັ້ນຢູ່ ຊຶ່ງຄາດກັນວ່າ ຈະໄດ້ຮັບພາຍໃນປີນີ້:

“ກະຍັງໜ້ອຍນຶ່ງດອກ ຍັງບໍ່ໄດ້ເພາະວ່າບາງເທື່ອຂະເຈົ້າ ບໍ່ທັນຕົກລົງເຣື່ອງຣາຄາເບາະ ອິຫຍັງຫັ້ນນ່າ ກະສິແມ່ນເກືອບ 90% ໄດ້ໝົດແລ້ວບໍ່ຈັກ ໂຄງການຂະເຈົ້າຈ່າຍໃຫ້ ໂດຍກົງເລີຍນະ.”

ແລະຊາວບ້ານຢູ່ເມືອງໄຊທານີ ທ່ານນຶ່ງ ທີ່ໄດ້ຮັບຜົລກະທົບ ຈາກການສ້າງສະຖານີຣົດໄຟ ຊຶ່ງໄດ້ຮັບຄ່າຊົດເຊີຍແລ້ວນັ້ນ ກໍເວົ້າ ວ່າຫລາຍຄອບຄົວໄດ້ຮັບຄ່າຊົດເຊີຍ ໄປແລ້ວ ແລະ ບາງຄອບຄົວກໍພໍໃຈ ນໍາມູລຄ່າການຊົດເຊີຍ ທີ່ໄດ້ຮັບ ແລະຮູ້ສຶກວ່າຄຸ້ມຄ່າ ຕໍ່ການເສັຍທີ່ດິນ ໃຫ້ໂຄງການໄປ:

“ໂອ໋ ເຮົາ ໄດ້ຮັບການຊົດເຊີຍຮຽບຮ້ອຍແລ້ວ ບໍ່ມີບັນຫາຫຍັງ ຊົດເຊີຍສົມຣາຄາ ຄຸ້ມຄ່າ ເຂົາໄດ້ກັນໝົດແລ້ວແຫລະ.”

ຊາວບ້ານຢູ່ເມືອງຫາດຊາຍຟອງ ທ່ານນຶ່ງ ທີ່ໄດ້ຮັບການຊົດເຊີຍ ຈາກທາງໂຄງການສ້າງສະຖານີຣົດໄຟ ໄປແລ້ວ ເວົ້າວ່າຕົນຮູ້ສຶກ ພໍໃຈນໍາຄ່າຊົດເຊີຍ ທີ່ໄດ້ຮັບຈາກທາງໂຄງການ ແລະປັດຈຸບັນ ຕົນຍັງເຫລືອເງິນຄ່າຊົດເຊີຍ ຢູ່ຈໍານວນນຶ່ງ ເພື່ອເອົາໄວ້ຊື້ດິນ:

“ໂຕຖືກໂຄງການຣົດໄຟຫັ້ນຫວະ ຂ້າມທາງມາຄົນລະເບື້ອງ ປະມານກິໂລນຶ່ງນີ້ແຫຼະຂະເຈົ້າມາໄລ່ ໃຫ້ໝົດແລ້ວແຫຼະຫຼາຍເຕີບລະບໍ໋ ກະພໍມີຢູ່.”

ເມື່ອວັນທີ 10 ມິຖຸນານີ້ ທ່ານ ສອນໄຊ ສີພັນດອນ ຮອງນາຍົກຣັຖມົນຕຣີ, ຣັຖມົນຕຣີກະຊວງແຜນການ ແລະການລົງທຶນໄດ້ໄປ ຕິດຕາມຄວາມຄືບໜ້າ ຂອງການສ້າງສະຖານີ ຣົດໄຟລາວ-ຈີນ ຢູ່ຈຸດບ້ານໂຄກສະອາດ ເມືອງໄຊທານີ ຊຶ່ງເປັນສະຖານີທີ່ເຊື່ອມຕໍ່ ໃສ່ທາງດ່ວນວຽງຈັນ ໝາຍເລກ 1, ສະຖານີແຫ່ງນີ້ມີເນື້ອທີ່ທັງໝົດ 15 ພັນຕາແມັຕ ແລະ ມີການຈັດສັນແຕ່ລະໂຊນເພື່ອອໍານວຍ ຄວາມສະດວກ ໃຫ້ແກ່ຜູ້ມາໃຊ້ບໍຣິການ ໃນອະນາຄົດ, ອີງຕາມຣາຍງານຂອງໜັງສືພິມ Vientiane Times ວັນທີ 11 ມິຖຸນານີ້.

ທາງຣົດໄຟລາວ-ຈີນຈະມີສະຖານີ ໂດຍສານ ທັງໝົດ 10 ແຫ່ງ ຄືຢູ່ໃນນະຄອນຫລວງວຽງຈັນ, ຢູ່ເມືອງໂພນໂຮງ, ວັງວຽງ ແລະ ກາສີ ແຂວງວຽງຈັນ, ຢູ່ແຂວງຫລວງພຣະບາງ, ຢູ່ເມືອງງາ, ເມືອງໄຊ ແລະ ເມືອງນາໝໍ້ ແຂວງອຸດົມໄຊ ແລະ ຢູ່ນາເຕີຍ, ບໍ່ເຕັນ ແຂວງຫລວງນໍ້າທາ.

ປັດຈຸບັນ ການກໍ່ສ້າງທາງຣົດໄຟລາວ-ຈີນ ແຕ່ນະຄອນຫລວງວຽງຈັນ ເຖິງບໍ່ເຕັນ ທີ່ມີຄວາມຍາວ 422.4 ກິໂລແມັດ ຄືບໜ້າໄປໄດ້ ປະມານ 94% ແລະມີກໍານົດກໍ່ສ້າງສໍາເຣັດ ແລະ ເປີດໃຊ້ໃນທ້າຍປີນີ້. ໂຄງການດັ່ງກ່າວ ໄດ້ເລີ່ມກໍ່ ສ້າງມາຕັ້ງແຕ່ເດືອນ ທັນວາ 2016, ມູລຄ່າ ກໍ່ສ້າງປະມານ 5.9 ຕື້ໂດລາ ສະຫະຣັຖ.