ຊາວບ້ານຈາກເຂື່ອນນໍ້າເທີນ 1 ລໍາບາກ

ມະນີຈັນ
2020-02-21
ອີແມວລ໌
ຄໍາເຫັນ
Share
ພິມ
ໃນເຂດການກໍ່ສ້າງ ເຂື່ອນນໍ້າເທີນ 1
ໃນເຂດການກໍ່ສ້າງ ເຂື່ອນນໍ້າເທີນ 1
ຮູບພາບຈາກ : ນັກຂ່າວພົລເມືອງ

ໂຄງການເຂື່ອນນໍ້າເທີນ 1 ສ້າງບ້ານຈັດສັນຫ້ວຍຫອຍ ເມືອງວຽງທອງ ແຂວງບໍລິຄໍາໄຊ ສໍາເຣັດແລ້ວ ພ້ອມໃຫ້ປະຊາຊົນ 335 ຄອບຄົວ ຍ້າຍເຂົ້າໄປຢູ່. ແຕ່ຊາວບ້ານຜູ້ນຶ່ງ ທີ່ໄດ້ຮັບຜົລກະທົບເວົ້າຕໍ່ RFA ໃນມື້ວັນທີ 21 ກຸມພາ ນີ້ວ່າທາງການໃຫ້  ປະຊາຊົນໂຍກຍ້າຍ ເຂົ້າ ໄປຢູ່ບ້ານຈັດສັນ ໂດຍທີ່ຍັງບໍ່ມີນໍ້າ ບໍ່ມີການຈັດສັນອາຊີບ ແລະ ບໍ່ມີທີ່ດິນ ທໍາມາຫາກິນ:

“ໄທເຮົາກໍຍັງບໍ່ຈັກ ອັນນີ້ເຣື່ອງການຢູ່ການກິນ ເຂົາຍັງບໍ່ບອກ ປະຊາຊົນມີແຕ່ຄອຍກິນນໍາພັກນໍາຣັດ ເລີຍບໍ່ໄດ້ເຮັດຫຍັງ ເຮັດກໍບໍ່ມີບ່ອນ ເຮັດ ບ່ອນອັນນັ້ນຂະເຈົ້າ ຖາງດິນກະສິກັມ ກໍບໍ່ເບີກໃຫ້ບໍ່ແບ່ງໃຫ້ ຈັກສ່ວນ ນາກໍບໍ່ເຮັດໃຫ້.”

ຊາວບ້ານຜູ້ນີ້ເວົ້າຕໍ່ໄປວ່າ ເປັນເວລາເກືອບ 3 ປີ ແລ້ວທີ່ພວກເຂົາເຈົ້າ ບໍ່ໄດ້ເຮັດໄຮ່ເຮັດນາ ຍ້ອນດິນທີ່ເຄີຍທໍາມາຫາກິນ ແຕ່ກ່ອນຖືກ ໂຄງການ; ບາງຄອບຄົວ ເງິນບໍ່ພໍໃຊ້ຈ່າຍ ກໍອອກໄປຫາເຮັດວຽກເປັນກັມກອນ ຢູ່ໃນເມືອງ, ຍ້າຍເຂົ້າໄປຢູ່ບ້ານຈັດ ສັນໃໝ່ແລ້ວ ກໍຍັງບໍ່ ໄດ້ດິນເຮັດໄຮ່ເຮັດນາ ຄືເກົ່າ. ຊາວບ້ານອີກຜູ້ນຶ່ງ ກໍ່ເວົ້າໃນທໍານອງດຽວກັນພຽງສັ້ນໆວ່າ ນອກຈາກການຊົດເຊີຍສິ່ງຕ່າງໆແລ້ວ ຊາວບ້ານ ກໍຕ້ອງການດິນ ເພື່ອເຮັດໄຮ່ເຮັດນາ ສ້າງອາຊີບລ້ຽງຄອບຄົວ:

“ເຈົ້າ ເຈົ້າ ບໍ່ມີຫັ້ນແຫລະ ການທໍາມາຫາກິນ ຂອງພໍ່ແມ່ປະຊາຊົນ ກໍບໍ່ມີ ອາຊີບກໍບໍ່ມີ ຢາກໄດ້ຫັ້ນແລ້ວ ຢາກໄດ້ດິນນີ້.”

ກ່ຽວກັບຂໍ້ກັງວົນຂອງຊາວບ້ານ ເຈົ້າໜ້າທີ່ຫ້ອງການປົກຄອງ ແຂວງບໍລິຄໍາໄຊ ກ່າວວ່າ ກໍເປັນຫ່ວງແທນຊາວບ້ານ ທີ່ຈະຍ້າຍເຂົ້າມາຢູ່ ບ້ານຫ້ວຍຫອຍນີ້ ຊຶ່ງຍັງມີຫລາຍບັນຫາ ທັງເຣື່ອງການຈັດສັນອາຊີບ ການຈັດສັນທີ່ດິນ ເນື່ອງຈາກດິນທີ່ທາງໂຄງການ ບຸກເບີກໃຫ້ນັ້ນ ເປັນດິນຫີນແຮ່ ປູກພືດຫຍັງກໍບໍ່ໄດ້ ແລະແຫລ່ງນໍ້າກໍບໍ່ມີ:

“ໂອ໋... ຍັງສິຫຍູ້ງຍາກເມືອໜ້າຢູ່ ເວົ້າເຣື່ອງຈັດສັນອາຊີບນີ້ນະ ພື້ນທີ່ມັນບໍ່ມີເດ໊ ຈັດສັນແນວໃດ ດິນມັນສິປູກໄດ້ບໍ່, ມັນຍັງສິມີບັນຫາ ເຣື່ອງດິນຢູ່ດອກ ດຽວນີ້ມັນເປັນດິນແຮ່ ນໍາຫັ້ນນະອັນນີ້ລະໂອ໊ຍ ກວ່າສິປຸກເຮືອນແລ້ວ ກໍຍັງຍາກນະ ພາຍຫຼັງທີ່ວ່າ ໂຍກຍ້າຍອອກມາ ເຂົາກໍຈັ່ງລົງເອົາຂໍ້ມູນ ຢາກເຮັດຫຍັງເປັນອາຊີບຫລັກ.”

ທ່ານກ່າວຕື່ມວ່າ ເມື່ອອາທິດທີ່ຜ່ານມາ ທາງໂຄງການນໍ້າເທີນ 1 ເວົ້າວ່າ ຈ່າຍເງິນຊົດເຊີຍໃຫ້ປະຊາຊົນ ທີ່ໄດ້ຮັບຜົລກະທົບແລ້ວ 60 ເປີເຊັນ ຂອງມູນຄ່າການຊົດເຊີຍທັງໝົດ. ສ່ວນທີ່ເຫຼືອອີີກ 40 ເປີເຊັນ ຈະຈ່າຍຫລັງຈາກປະຊາຊົນໄດ້ຍ້າຍ ເຂົ້າມາຢູ່ ບ້ານຈັດສັນໃໝ່ ໝົດແລ້ວ ແລະຈະເກັບຂໍ້ມູນນໍາແຕ່ລະຄອບຄົວ ວ່າຄອບຄົວໃດຈະເຮັດ ອາຊີບຫຍັງ ເຮັດໄຮ່ເຮັດສວນ ຫລື ຕໍ່າຜ້າແພ.

ໂຄງການເຂື່ອນໄຟຟ້ານໍ້າເທີນ 1 ຂນາດ 650 ເມັກກາວັດ ເລີ່ມກໍ່ສ້າງມາແຕ່ປີ 2014 ຄາດວ່າຈະສ້າງແລ້ວໃນປີ 2021 ຈະຂາຍໄຟຟ້າ ໃນປີ 2022 ໃຫ້ແກ່ການໄຟຟ້າຝ່າຍ ຜລິດແຫ່ງປະເທດໄທ 80 ເປີເຊັນ, ອີກ 20 ເປີເຊັນຈະຂາຍໃຫ້ ຣັດວິສາຫະກິດໄຟຟ້າລາວ ເພື່ອ ໃຊ້ພາຍໃນປະເທດ.

ເຕັມຫນ້າ