ຊາວບ້ານເຂື່ອນເຊລະນອງ 1 ຍັງລໍາບາກ

ອຸ່ນແກ້ວ ສຸກສະຫວັນ
2020-02-24
ອີແມວລ໌
ຄໍາເຫັນ
Share
ພິມ
ຣະບົບໄຟຟ້າ ເຂົ້າບ້ານ ຈັດສັນໃໝ່ ໃຫ້ປະຊາຊົນ 2 ບ້ານ ຢູ່ເມືອງນອງ ແຂວງສະຫວັນນະເຂດ.
ຣະບົບໄຟຟ້າ ເຂົ້າບ້ານ ຈັດສັນໃໝ່ ໃຫ້ປະຊາຊົນ 2 ບ້ານ ຢູ່ເມືອງນອງ ແຂວງສະຫວັນນະເຂດ.
ຮູບພາບຈາກ : ນັກຂ່າວພົລເມືອງ

ປະຊາຊົນ 88 ຄອບຄົວຢູ່ບ້ານເບົານ້ຳ ແລະບ້ານເລົ່ານ້ຳ ຢູ່ເມືອງນອງ ແຂວງສວັນນະເຂດ ທີ່ຖືກຍົກຍ້າຍຈາກໂຄງການເຂື່ອນ ເຊລະນອງ 1 ຍັງທຸກຍາກລຳບາກ ຍ້ອນວ່າ ເຂົາເຈົ້າຍັງບໍ່ທັນໄດ້ຮັບຄ່າຊົດເຊີຍ ແລະ ບໍ່ມີທີ່ດິນທຳການຜລິດກະສິກັມ. ປະຊາຊົນ ຜູ້ທີ່ຖືກ ຍົກຍ້າຍ ໄດ້ກ່າວຕໍ່ເອເຊັຽເສຣີ ວ່າ:

"ຍັງບໍ່ໄດ້ຮັບອີກ ຍັງບໍ່ບອກຈັກມື້ໃດ ຈ່າຍຫັ້ນ, ຊິໄດ້ເຮັດຢູ່ນ່າ ມັນກໍຖ້ວມໝົດແລ້ວ, ຈັດສັນກໍຄືຫັ້ນແລ້ວ ຄັນບຸກເບີກຄັກແນ່ ກໍຊິເອົາຢູ່ ບໍ່ໄດ້ຕິດດອກຮັບບໍ່ໄດ້ເລີຍ ຊິນຳໃຊ້ບໍ່ໄດ້ ຢາກຖາງກໍບໍ່ພໍຖາງ ຈູດເອົາກໍບໍ່ໄໝ້."

ອີງຕາມປະຊາຊົນ ໂຄງການຈະຈ່າຍຄ່າຊົດເຊີຍໃຫ້ມູນຄ່າ 40 ລ້ານກີບຕໍ່ເຮັກຕາ ແລະປະຊາຊົນ ກໍຍອມຮັບເອົາເງື່ອນໄຂ ໃນລາຄານີ້. ໂຄງການບອກວ່າ ຈະຈ່າຍໃຫ້ໃນຕົ້ນປີ 2020 ແຕ່ ມາເຖີງປັດຈຸບັນ ກໍຍັງບໍ່ທັນໄດ້ຈ່າຍເທື່ອ ສ່ວນວ່າ ດິນ ຊົດເຊີຍໃຫ້ປະຊາຊົນນັ້ນ ຍັງເປັນດິນປ່າເຮື້ອ ທີ່ບໍ່ທັນໄດ້ມີການບຸກເບີກໃຫ້ ແລະ ປະຊາຊົນ ກໍຍັງບໍ່ສາມາດເຮັດນາ ໃນດິນຕອນດັ່ງກ່າວໄດ້.

ຖນົນຫົນທາງຍັງຢູ່ໃນສະພາບເປ່ເພ ເຮັດໃຫ້ການເດີນທາງມີຄວາມຫຍຸ້ງຍາກ ແລະ ການສນອງນ້ຳສະອາດ ໃຫ້ປະຊາຊົນກໍຍັງບໍ່ພຽງພໍນັ້ນ, ໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ. ເຮືອນຈັດສັນໃຫ້ປະຊາຊົນ ຢູ່ນັ້ນກໍຍັງບໍ່ທັນສຳເຣັດ, ຈະເຫັນໄດ້ວ່າ ຝາເຮືອນຍັງບໍ່ທັນ ແລ້ວ ແລະ ປັດຈະບັນ ປະຊາຊົນ ຕ້ອງຫາໄມ້ມາເຮັດຝາເຮືອນ ດ້ວຍຕົນເອງ. ປະຊາຊົນທ່ານ ກ່າວຕື່ມອີກວ່າ:

"ກົບໄມ້ ໄມ້ແປ້ນຝາເຮືອນນ່າ ບໍ່ມີບ່ອນນອນແລ້ວລົມມາ ເຮືອນຈັດສັນຫັ້ນແລ້ວ ເຂົາແອ້ມ ພັດແອ້ມເຄິ່ງນຶ່ງ ເຂົ້າບໍ່ໄດ້ແອ້ມໝົດເລີຍ ເຮັດອັນນີ້ ເຮັດແບບຢູ່ທຸກ ບໍ່ແມ່ນຊິເຮັດໃຫ້ສະບາຍ ຢູ່ດີ ຄືເຮືອນ ບໍ່ແມ່ນແຕ່ຜູ້ດຽວ 2 ບ້ານ ຄືດຽວໝົດ, ເຂົາເຮັດ."

ສ່ວນວ່າ ເຈົ້າໜ້າທີ່ຜແນກພະລັງງານ ແລະ ບໍ່ແຮ່ ແຂວງສວັນນະເຂດ ໄດ້ກ່າວຕໍ່ເອເຊັຽເສຣີ ວ່າຕອນນີ້ ບໍຣິສັດຈີນ ໃຫ້ເງິນຊົດເຊີຍແລ້ວ ແຕ່ຍັງຈ່າຍບໍ່ທັນໄດ້ ຍ້ອນວ່າບໍຣິສັດຈີນ ຈະເປັນຕົວແທນໃນການຈ່າຍເງິນຊົດເຊີຍ ແກ່ປະຊາຊົນ ແຕ່ເຂົາເຈົ້າ ເຂົ້າລາວບໍ່ທັນໄດ້ ຍ້ອນ ການລະບາດ ຂອງຂອງພຍາດ Corona virus.

ມູນຄ່າການຊົດເຊີຍ ໂຄງການຈະຈ່າຍໃຫ້ນັ້ນແມ່ນ 40 ລ້ານ ກີບຕໍ່ເຮັກຕາ ພ້ອມດ້ວຍດິນ 2 ເຮັກຕາ ຕໍ່ຄອບຄົວ ແຕ່ທີ່ດິນຊົດເຊີຍນັ້ນ ເປັນເຂດພູດອຍ ມີຄວາມຫຍຸ້ງຍາກ ໃນການບຸກເບີກ. ດັງເຈົ້າໜ້າທີ່ຜແນກພະລັງງານ ແລະ ບໍ່ແຮ່ ໄດ້ກ່າວຕໍ່ເອເຊັຽເສຣີ ວ່າ:

"ມີການຊົດເຊີຍຢູ່ ແຕ່ວ່ານາອາດຊິບໍ່ໄດ້ ມັນອາດເປັນສວນ ເປັນຫຍັງໄປນາມັນກໍຍາກແລ້ວເນາະ ມັນກໍບໍ່ງ່າຍເດ້ ເຮັດນານີ້ ພື້ນທີ່ມັນ ຈຳກັດ ແຖວນີ້ມັນເປັນພູ ບໍ່ແມ່ນເປັນທົ່ງພຽງ."

ເຈົ້າໜ້າທີ່ຍັງກ່າວຕື່ມອີກວ່າ ຍັງບໍ່ມີແຜນການເພື່ອບັນເທົາຄວາມທຸກຍາກ ໃຫ້ແກ່ປະຊາຊົນ ແຕ່ໄດ້ຮັບເອົາບັນຫາຕ່າງໆ ທີ່ເກີດຂຶ້ນ ໄປລົມກັບເຈົ້າຂອງ ໂຄງການ ຄື ບໍຣິສັດຈີນ ເພື່ອໃຫ້ຮີບຮ້ອນແກ້ໄຂ ຄວາມທຸກຍາກໃຫ້ແກ່ປະຊາຊົນ.

ໂຄງການເຂື່ອນໄຟຟ້າ ເຊລະນອງ 1 ຂນາດ 70 ເມັກກາວັດ ເລີ້ມກໍ່ສ້າງແຕ່ປີ 2017 ແລະ ກຳນົດສຳເຣັດການກໍ່ສ້າງໃນປີ 2022, ຖືຮຸ້ນໂດຍ ບໍຣິສັດ Yeig International Energy Development ຂອງຈີນ 70 ເປີເຊັນ, ບໍຣິສັດສວັນ ຂອງລາວ 15 ເປີເຊັນ, ບໍຣິສັດວິສາຫະກິດໄຟຟ້າລາວ 10 ເປີເຊັນ ແລະ ບໍຣິສັດ Sun Paper Holding Lao  ຂອງຈີນ ຖືຮຸ້ນ 5 ເປີເຊັນ ຊຶ່ງມູນຄ່າ ການລົງທຶນ ທັງໝົດ 150 ລ້ານໂດລາ.

ເຕັມຫນ້າ