ທາງການຢຸດຊ່ອຍເຫຼືອ ຊາວບ້ານ ເຂື່ອນແຕກ

ສຸພັດຕາ
2021-06-24
Share
ທາງການຢຸດຊ່ອຍເຫຼືອ ຊາວບ້ານ ເຂື່ອນແຕກ ສະພາບຂອງເຮືອນຖາວອນ ທີ່ສ້າງໃຫ້ຜູ້ປະສົບພັຍເຂື່ອນແຕກ ເມືອງສນາມໄຊ ທີ່ ສ່ວນໃຫຍ່ຍັງບໍ່ແລ້ວ ຢ່າງສົມບູນ ຍ້າຍເຂົ້າຢູ່ໄດ້.
ນັກຂ່າວພົລເມືອງ

ໃນຕອນເຊົ້າຂອງມື້ວັນທີ 7 ມິຖຸນາ 2021, ໄດ້ມີກອງປະຊຸມ ຄະນະກັມມະການ ຄຸ້ມຄອງພັຍພິບັດຂັ້ນສູນກາງ ຢູ່ກະຊວງປ້ອງກັນ ປະເທດ ພາຍໃຕ້ການເປັນປະທານ ຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກຣັຖມົນຕຣີ ຣັຖມົນຕຣີກະຊວງ ປ້ອງກັນປະເທດ ແລະ ປະທານຄະນະກັມມະການ ຄຸ້ມຄອງພັຍພິບັດຂັ້ນສູນກາງ.

ໃນກອງປະຊຸມຄັ້ງນີ້, ປະທານ ແລະ ຜູ້ເຂົ້າຮ່ວມ ໄດ້ປະກອບຄໍາຄິດຄໍາເຫັນ ແລະຜ່ານບົດຣາຍງານຫຍໍ້ ກ່ຽວກັບການຟື້ນຟູເມືອງ ສນາມໄຊ ແຂວງອັດຕະປື ທີ່ໄດ້ຮັບຜົລກະທົບ ຈາກສັນເຂື່ອນ D ຂອງເຂື່ອນເຊປຽນ-ເຊນໍ້ານ້ອຍແຕກ ໃນເດືອນ ກໍຣະກະດາ ປີ 2018 ຊຶ່ງ ບົດຣາຍງານມີເນື້ອໃນ ທີ່ສຳຄັນທັງໝົດ 12 ຂໍ້, ແລະ ຂໍ້ສໍາຄັນ ທີ່ເຣີ່ມຈາກຂໍ້ ທີ່ 6 ມີດັ່ງນີ້:

6. ແຕ່ປີ 2020-2023 ເຈົ້າໜ້າທີ່ ຈະເອົາໃຈໃສ່ວຽກງານໃຫຍ່ໆ 6 ວຽກງານ ຄື: ວຽກພັທນາສີມືແຮງງານ, ວຽກປົກປ້ອງເດັກ, ວຽກ ສຶກສາທິການ ແລະ ກິລາ, ວຽກສາທາຣະນະສຸຂ, ວຽກ ກະສິກັມ ແລະປ່າໄມ້ ແລະ ວຽກຄຸ້ມຄອງພັຍພິບັດ,

7. ອຳນາດການປົກຄອງ ແຂວງອັດຕະປື ແລະ ບໍລິສັດຜູ້ພັທນາ ເຂື່ອນເຊປຽນ-ເຊນ້ໍານ້ອຍ PNPC ໄດ້ເຊັນບົດບັນທຶກຄວາມ ເຂົ້າໃຈ ຮ່ວມກັນ ໃນການຮັບຮອງ ເອົາມູລຄ່າຊົດເຊີຍ ແລະ ຟື້ນຟູຕາມແຜນແມ່ບົດ ສະບັບເລຂທີ 01/ຄກພ.ອປ, ລົງວັນທີ 10 ເມສາ 2020 ໃນມູລຄ່າ (835 ຕື້ປາຍກີບ) 835.880.000.000 ກີບ, ແຕ່ມູລຄ່າ ດັ່ງກ່າວ ແມ່ນບໍ່ໄດ້ຮວມ ເອົາການຊົດເຊີຍ ໃນຣາຍການທີ 06 ທີ່ມີ: ສິ່ງປຸກສ້າງ, ເງິນສົດ-ວັດຖຸມີຄ່າ ທີ່ເສັຽຫາຍ, ອັດຖິ, ຂໍ້ມູລຕົກຫຼົ່ນ ທີ່ຍັງບໍ່ສາມາດເອກພາບໂຕເລຂ ເສັຽຫາຍໄດ້,

8. ແຂວງ ແລະ ບໍລິສັດ PNPC ຕ້ອງໄດ້ສືບຕໍ່ເຈຣະຈາ ໃນການຈັດຕັ້ງປະຕິບັດໂຄງການຟື້ນຟູ ເມືອງສນາມໄຊ ທຸກໆໂຄງການທີ່ ນໍາໃຊ້ງົບປະມານ ຕາມແຈ້ງການຣັຖບານ, ເຊິ່ງ ປະກອບມີ: ງົບປະມານການຊ່ອຍເຫຼືອ ປຸກເຮືອນ ຂອງອົງການຈັດຕັ້ງສາກົລ, ການຊ່ວຍເຫຼືອປຸກເຮືອນ ແລະ ຂົວ ຂອງຣັຖບານໄທຍ ແລະ ບ້ວງການຊົດເຊີຍ ແຜນແມ່ບົດ ຂອງ ບໍຣິສັດ PNPC ນັ້ນແມ່ນ ທາງແຂວງ ເປັນຜູ້ຮັບຜິດຊອບ ຄຸ້ມຄອງ ແລະ ຈັດຕັ້ງປະຕິບັດ,

9. ວຽກສົງເຄາະປະຊາຊົນ ທີ່ອາສັຍຢູ່ສູນພັກຊົ່ວຄາວ ໃນ 05 ສູນ ແມ່ນໄດ້ມີການເບີກຈ່າຍ ເງິນອັດຕຣາກິນ ແລະ ເງິນແຮຖົງໃຫ້ ປະຊາຊົນ ຈໍານວນ 250.000 ກີບ/ຄົນ/ເດືອນ, ເຊິ່ງ ໄດ້ຈັດຕັ້ງປະຕິບັດມາຮອດເດືອນ 12 ປີ 2020 ເບີກຈ່າຍເຂົ້າໃຫ້ປະຊາຊົນ ໃນ 05 ສູນພັກເຊົາ 20 ກິໂລ/ຄົນ/ເດືອນ ຮອດເດືອນ 12 ປີ 2020 ມີຜູ້ໄດ້ຮັບນະໂຍບາຍ ສົງເຄາະ ທັງໝົດ 3.612 ຄົນ, ມາຮອດປີ 2020, ຄະນະກັມມະການຄຸ້ມຄອງ ພັຍພິບັດຂັ້ນສູນກາງ ແລະ ແຂວງ ໄດ້ເຮັດການປະເມີນ ຊີວິດການເປັນຢູ່ ຂອງ ປະຊາຊົນ ເຊິ່ງເຫັນວ່າ ມີຫຼາຍ ຄອບຄົວ ສາມາດກຸ້ມຕົນເອງ ແລະ ໄດ້ຣາຍງານຜົນ ການປະເມີນ ໃຫ້ຣັຖບານຮັບຊາບ,

10. ປັດຈຸບັນ, ອຳນາດການປົກຄອງແຂວງ ກໍາລັງອອກຂໍ້ຕົກລົງ ຮັບຮອງຜົລການລົງປະເມີນ ຊີວິດການເປັນຢູ່ ຂອງປະຊາຊົນ ແລະ ພິຈາຣະນາ ຫຼຸດນະໂຍບາຍ ເຂົ້າກິນຈາກ 20 ກິໂລ/ຄົນ/ເດືອນ ມາເປັນ 12 ກິໂລ/ຄົນ/ເດືອນ,

11. ສໍາລັບນະໂຍບາຍ ເງິນສົດ 250.000 ກີບ/ຄົນ/ເດືອນນັ້ນ ຈະໃຫ້ພຽງແຕ່ ກຸ່ມເປົ້າໝາຍ ສະເພາະ ເປັນຕົ້ນ: ຄອບຄົວ ທີ່ຍັງບໍ່ ສາມາດກຸ້ມຕົນເອງໄດ້ເທື່ອ, ຄອບຄົວທີ່ມີຫົວໜ້າ ຄອບຄົວເປັນເພດຍິງ, ຜູ້ພິການ ແລະ ຜູ້ອາຍຸສູງໃນຄອບຄົວ ທຸກຍາກ ເດັກນ້ອຍ ກໍາພ້າ-ກໍາພອຍ, ແລະ

12. ສ່ວນຄອບຄົວ ຜູ້ປະສົບພັຍເຂື່ອນແຕກອື່ນໆ ແມ່ນຫັນໄປສູ່ຮູບແບບ ການພັທນາ ແລະ ສົ່ງເສີມການຜລິດ, ຊຸກຍູ້ໃຫ້ເຂົາເຈົ້າ ເຂົ້າຮ່ວມກຸ່ມການຜລິດໃຫ້ຫຼາຍຂຶ້ນ ໂດຍເຣີ່ມ ປະຕິບັດແຕ່ເດືອນ 1 ປີ 2021 ເປັນຕົ້ນມາ.

ເຖິງຢ່າງໃດກໍຕາມ ກ່ຽວກັບເຣື່ອງເງິນອັດຕຣາກິນ ແລະ ເງິນຊ່ອຍເຫຼືອ ທີ່ທາງການ ເວົ້າວ່າຈະຕັດອອກນັ້ນ ຜູ້ສົບພັຍເຂື່ອນແຕກ ຜູ້ນຶ່ງ ໃນສູນດອກບົກ ກໍໃຫ້ທັສນະຂອງຕົນເອງ ຕໍ່ວິທຍຸເອເຊັຽເສຣີ ໃນວັນທີ 24 ມິຖຸນາ ນີ້ວ່າ:

“ເວົ້າເຣື່ອງຕັດອັດຕຣາກິນຫັ່ນ ເພິ່ນກະອັນນັ້ນຫັ້ນແຫຼະ ມື້ນັ້ນເພິ່ນກະແຈ້ງ ຄືແນວນັ້ນຫັ້ນແຫຼະ ບາດນີ້ຫຼາຍຄົນໂຈມຕີເດ້ ນາຍບ້ານ ກະບໍ່ຍອມເຊັນເດ້ ຄັນວ່າເພິ່ນຊິຈ່າຍ ກະແມ່ນ ເພິ່ນຄົ້ນຄວ້າໃໝ່ ມື້ນັ້ນເພິ່ນວ່າບໍ່ໆແຫຼະ ມີແຕ່ເພິ່ນເລືອກວ່າ ມີແຕ່ຄອບຄົວທຸກຍາກ ແທ້ໆເພິ່ນຊິຈ່າຍ ຖ້າກຸ້ມຢູ່ກຸ້ມກິນແລ້ວເພິ່ນບໍ່ຈ່າຍ ແນວນັ້ນເດ້ເພິ່ນເວົ້າເດ້ບາດນີ້ຫຼາຍຄົນ ເຂົາຂັດຂ້ອງນາຍບ້ານແຕ່ລະບ້ານຂັດ.”

ຜູ້ສົບພັຍຜູ້ນີ້ ກ່າວຕື່ມອີກວ່າ ກ່ອນໜ້ານີ້ ທີ່ຜູ້ປະສົບພັຍເຂື່ອນແຕກ ໝົດທຸກຄົນ ໃນ 5 ສູນໄດ້ຍິນ ໄດ້ຟັງນໍາກັນນັ້ນ ໃນເບື້ອງຕົ້ນ ແມ່ນວ່າ ເພິ່ນຊິເບິ່ງແຍງລ້ຽງດູ ປະຊາຊົນຜູ້ສົບພັຍ ໜັກນີ້ ຈົນຄົບ 5 ປີ ຈຶ່ງຈະຢຸດການຊ່ອຍເຫຼືອ:

“ເພິ່ນເວົ້າຫັ່ນແນວນີ້ ອັນນຶ່ງລະເພິ່ນເວົ້າ 5 ປີ, ອັນສອງມາລະວ່າ ຈົນວ່າການຢູ່ດີກິນດີ ມອບເຮືອນມອບຊານ ໃຫ້ພໍ່ແມ່ປະຊາຊົນ ໃຫ້ຢູ່ດີກິນດີ ມີຢູ່ມີກິນພຸ້ນແຫຼະ ຈຶ່ງຕັດອອກເພິ່ນວ່າ ແນວນັ້ນ ບາດສຸດທ້າຍ ເດືອນ 1 ປີ 2021 ມາແຈ້ງວ່າ ເງິນອັດຕຣາກິນນີ້ ໄດ້ຕັດອອກ ສໍາລັບຄອບຄົວ ທີ່ມີຢູ່ມີກິນ, ແຕ່ຄອບຄົວທຸກຍາກ ຈົນອິຫຼີອິຫຼໍ ແມ່ນເພິ່ນຍັງຊິຄົ້ນຄວ້າຢູ່ ເພິ່ນວ່າແນວນັ້ນ ເພິ່ນມາ ເກັບສະຖິຕິນີ້ ແມ່ນເພິ່ນມາເກັບຄອບຄົວ ທີ່ທຸກຍາກ ຈົນອິຫຼີອິຫຼໍ ເພິ່ນມາເກັບແລ້ວ ຢູ່ບ້ານໂຄກຫິນຄໍານີ້ ແມ່ນໄດ້ແຕ່ 30 ປາຍ ຄອບຄົວ ຫຼັງຈາກນັ້ນລະ ແມ່ນ ພໍຢູ່ພໍກິນວ່າຊັ້ນສະ ດຽວນີ້ຫັ້ນສໍາລັບຫິນຄໍານີ້ ມັນຖືກ 230 ປາຍນະ.”

ກ່ຽວກັບເຣື່ອງນີ້ ເອເຊັຽເສຣີ ໄດ້ຕິດຕໍ່ສອບຖາມໄປຍັງ ນາຍບ້ານ ຢູ່ສູນດອນບົກ ທ່ານໄດ້ ອະທິບາຍສູ່ຟັງວ່າ:

“ເຣື່ອງເພິ່ນຊິຈ່າຍຫັ້ນ ແຕ່ວ່າເຮົາບໍ່ຮູ້ ແຕ່ວ່າສໍາລັບປະຊາຊົນນີ້ ສອບຖາມນໍາການຈັດຕັ້ງ ພວກເຮົາຫັ່ນ ຢາກໄດ້ຫັ່ນແຫຼະ ເພາະ ສັນຍາໃນເບື້ອງຕົ້ນຫັ່ນວ່າ ຮອດປີ 2025 ຊິຢຸດ ການເບີກຈ່າຍຊີ້ນ່າ ໂຕນີ້ຫັ່ນ ແມ່ນທາງເຂື່ອນຫັ່ນແຫຼະ ເປັນຜູ້ເວົ້າ ກັບທາງ ພາກສ່ວນ SK ປະຊາຊົນນິ່ ຮູ້ເບິດ ໃນຈໍານວນຂອງຜູ້ປະສົບພັຍ ຄືບ້ານທ່າແສງຈັນ ພວກເຮົາ ໃນຈໍານວນ 126 ຄອບຄົວ ໄດ້ ຍິນເໝິດ ວ່າແຕ່ປີ 2018 ໄປຈົນຮອດ 5 ປີນ່າ, ແຕ່ວ່າມັນບໍ່ມີກໍານົດ ບໍ່ມີໃບສັນຍາ ລະກະສໍາລັບວ່າ ທັງທ່ານເຈົ້າແຂວງ ຫຼືວ່າ ທ່ານເຈົ້າເມືອງ ເພິ່ນ ກະອະທິບາຍຕື່ມ ເພາະວ່າໄດ້ຍິນ ທາງບໍຣິສັດຂອງເຂື່ອນ ໄດ້ເວົ້າມາ ແລະເພິ່ນໄດ້ວ່າ ເວົ້າຕາມບໍຣິສັດ ຂອງເຂື່ອນຫັ່ນເລີຍ ເພິ່ນວ່າ 5 ປີ, ບາດນີ້ເອົາໄປເອົາມາແຫຼະ ມາເບິ່ງແລ້ວຫັ່ນ ຖືວ່າຄໍາເວົ້າດັ່ງກ່າວຫັ່ນ ຄືການເບີກຈ່າຍອັດຕຣາ ກິນ ຫຼືວ່າເຂົ້າກິນ ຫຼືວ່າເງິນນີ້ນ່າ ມັນບໍ່ໄດ້ຕາມທີ່ເພິ່ນເວົ້າມານ່າ ຖືວ່າມາຮອດປັດຈຸບັນນີ້ ຖືວ່າປະຊາຊົນຫັ້ນ ມາສໍ້ມາສົນ ກັບການ ຈັດຕັ້ງພວກເຮົາ.”

ວິທຍຸເອເຊັຽເສຣີ ໄດ້ຕິດຕໍ່ສອບຖາມເຣື່ອງດັ່ງກ່າວ ໄປຍັງ ບໍຣິສັດເຂື່ອນເຊປຽນເຊນໍ້ານ້ອຍ ຫຼື PNPC ເຈົ້າໜ້າທີ່ທ່ານນຶ່ງ ຊຶ່ງຂໍ ສງວນຊື່ແລະສຽງ ກ່າວວ່າ ສໍາລັບເງິນຊ່ອຍເຫຼືອ ເດັກນ້ອຍກໍ່າພ້າກໍາພອຍນັ້ນ ທາງບໍຣິສັດໄດ້ຈ່າຍໃຫ້ຄົບ ຈົນຂະເຈົ້າອາຍຸຮອດ 18 ປີ ເຮົາຈ່າຍໄປໝົດແລ້ວ ເງິນຂອງເດັກນ້ອຍກໍ່າພ້າ ກໍ່າພອຍນະ ແຕ່ວ່າເພິ່ນຮັກສາເງິນໄວ້ ແມ່ນເບື້ອງຣັຖ ຈະໄປຈ່າຍໃຫ້ຂະເຈົ້າ ເປັນໄລຍະໆເປັນປີຫຼືເປັນ 3 ເດືອນ 6 ເດືອນ ແມ່ນເບື້ອງຣັຖເນາະເບື້ອງບໍຣິສັດ ແມ່ນຈ່າຍຄົບຕາມການຕົກລົງຕາມກົດໝາຍແລ້ວ.

ສ່ວນເຣື່ອງການຈ່າຍເງິນອັດຕຣາກິນ ແລະ ເງິນຊ່ອຍເຫຼືອ 250,000 ກີບ/ຄົນ/ເດືອນ ໃຫ້ຜູ້ປະສົບພັຍເຂື່ອນແຕກ ທັງ 5 ສູນ ຈະມີ ກໍານົດຈ່າຍເຖິງປີໃດນັ້ນ ທ່ານບໍ່ສາມາດ ອະທິບາຍ ຣາຍຣະອຽດໃຫ້ຮູ້ໄດ້ ຊຶ່ງທ່ານໄດ້ແນະນໍາໃຫ້ ເອເຊັຽເສຣີ ໂທສອບຖາມໄປຍັງ ເຈົ້າໜ້າທີ່ຂອງ PNPC ທີ່ປະຈໍາຢູ່ພາກສນາມ ທີ່ຮັບຊອບວຽກງານພາກສ່ວນສັງຄົມ ສົງເຄາະຂອງບໍຣິສັດ ແຕ່ກໍບໍ່ສາມາດ ຕິດຕໍ່ໄດ້.

ພ້ອມດຽວກັນນີ້ ເອເຊັຽເສຣີ ກໍໄດ້ຕິດຕໍ່ສອບຖາມ ເຣື່ອງດັ່ງກ່າວໄປຍັງ ເຈົ້າໜ້າທີ່ກ່ຽວຂ້ອງ ໃນແຂວງອັດຕະປື ເຈົ້າໜ້າທີ່ທ່ານນຶ່ງ ຊຶ່ງ ຂໍສງວນຊື່ແລະຕໍາແໜ່ງ ກ່າວວ່າ ກ່ຽວກັບ ເຣື່ອງນີ້ວ່າ ທ່ານເຈົ້າແຂວງ ແຂວງອັດຕະປື ເພິ່ນຍັງຈະລົງ ໄປລຸລ່ວງໃຫ້ປະຊາຊົນ ເຂົ້າໃຈຕື່ມຢູ່:

“ໄປເວົ້າໃຫ້ເຂົ້າໃຈ ລຸລ່ວງ ໃຫ້ເຂົ້າໃຈວ່າ ອັນໃດຈັ່ງໃດ ແນວໃດນໍ້.”

ເຖິງຢ່າງໃດກໍຕາມ ຜູ້ປະສົບພັຍເຂື່ອນແຕກ ກໍຫວັງວ່າ ທາງການລາວ ແລະ ພາກສ່ວນທີ່ກ່ຽວຂ້ອງ ຄົງຈະສືບຕໍ່ຊ່ອຍເຫຼືອ ເຣື່ອງ ເງິນອັດຕຣາກິນ ແລະ ເງິນຊ່ອຍເຫຼືອ ຕ່າງໆ ໃຫ້ ພວກເຂົາເຈົ້າຄືເກົ່າ ຄືດັ່ງທີ່ເຄີຍເວົ້າໄວ້ກ່ອນໜ້ານັ້ນ ວ່າຈະດູແລຜູ້ສົບພັຍ ເຂື່ອນແຕກນີ້ ແຕ່ປີ 2018 ຈົນຮອດ ປີ 2025.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ