ຂ.ບໍ່ແກ້ວສົ່ງຄົນຈີນ ຕົກຄ້າງ ກັບເມືອຈີນ

ສຸພັດຕາ
2020-05-20
ອີແມວລ໌
ຄໍາເຫັນ
Share
ພິມ
ປະຊາຊົນຄົນຈີນ ທີ່ ເຂົ້າມາຝັງຮາກຖານ ເປີດຮ້ານອາຫານຮ້ານຄ້າ ຢູ່ເຂດເສຖກິດພິເສດ ສາມຫຼ່ຽມຄໍາ ຂ.ບໍ່ແກ້ວ
ປະຊາຊົນຄົນຈີນ ທີ່ ເຂົ້າມາຝັງຮາກຖານ ເປີດຮ້ານອາຫານຮ້ານຄ້າ ຢູ່ເຂດເສຖກິດພິເສດ ສາມຫຼ່ຽມຄໍາ ຂ.ບໍ່ແກ້ວ
RFA

ເມື່ອວັນທີ 19 ພຶສພາ 2020 ນີ້ ຢູ່ເຂດເສຖກິຈພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໄດ້ມີການສົ່ງໂຕນັກທ່ອງທ່ຽວ ຮວມທັງ ຄົນງານສັນຊາດຈີນ ທີ່ຕົກຄ້າງຈໍານວນ 300 ປາຍຄົນ ກັບຄືນປະເທດ ຊຶ່ງຈໍານວນດັ່ງກ່າວ ມີທັງນັກທ່ອງທ່ຽວຊາວຈີນ ທີ່ເຂົ້າມາຫຼີ້ນ ຄາຊິໂນ ແລະ ພັກເຊົາຢູ່ເຂດເສຖກິຈແຫ່ງນີ້ ກ່ອນຈະມີການແຜ່ຣະບາດຂອງເຊື້ອພຍາດໂຄວິດ-19 ຫຼັງຈາກນັ້ນ ກໍເດີນທາງກັບປະເທດ ບໍ່ໄດ້ ແລະ ຄົນງານຈີນທີ່ບໍ່ມີວຽກເຮັດງານທໍາ, ດັ່ງເຈົ້າໜ້າທີ່ຄະນະສະເພາະກິຈ ເມືອງຕົ້ນເຜິ້ງ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 20 ພຶສພາ ນີ້ວ່າ:

“ມັນເປັນແຮງງານ ກະນັກທ່ອງທ່ຽວ ທີ່ມາທ່ຽວຢູ່ເຂດສາມຫຼ່ຽມຄໍາ ລະກະຊ້ວງນີ້ເປັນຊ້ວງທີ່ບໍຣິສັດ ສາມຫຼ່ຽມຄໍາ ບໍ່ເປີດບໍຣິການ ບາດນີ້ ຈໍານວນນັກທ່ອງທ່ຽວ ກັບຄົນງານທີ່ບໍ່ມີວຽກເຮັດ ອັນນັ້ນຫັ່ນນາ ຮວບຮວມແລ້ວກະສົ່ງກັບ.”

ທ່ານເວົ້າວ່າ ການສົ່ງຄົນຈີນ ທີ່ຕົກຄ້າງກັບປະເທດເທື່ອນີ້ ແມ່ນເປັນເທື່ອທໍາອິດຂອງເຂດເສຖກິຈພິເສດ ສາມຫຼ່ຽມຄໍາ ສ່ວນຈະມີການສົ່ງ ຄົນງານຈີນ ກັບເພີ້ມຕື່ມຫຼືບໍ່ນັ້ນ ກໍຍັງບໍ່ທັນຄາດການໄດ້ເທື່ອ ເນື່ອງຈາກຕ້ອງໄດ້ລໍຖ້າບໍຣິສັດ ພາຍໃນເຂດດັ່ງກ່າວ ເປັນຜູ້ເບິ່ງສະພາບການ ໂຕຈິງ ແລະພິຈາຣະນາຕາມຄວາມເໜາະສົມ ຊຶ່ງຍັງມີຄົນຈີນອີກຫຼາຍຄົນ ທີ່ຍັງເຮັດວຽກຢູ່ ຮວມທັງພໍ່ຄ້າ-ແມ່ຄ້າ ທີ່ເປີດຮ້ານ ອາຫານ ແລະ ຂາຍເຄື່ອງນໍາ.

ໃນຂນະທີ່ ຊາວເມືອງຕົ້ນເຜິ້ງ ທ່ານນຶ່ງເຊື່ອວ່າ ການສົ່ງຄົນຈີນຈໍານວນດັ່ງກ່າວກັບຄືນປະເທດ ອາຈກ່ຽວກັບ ມາຕການຫຼຸດຜ່ອນຄວາມສ່ຽງ ການແຜ່ຣະບາດ ຂອງເຊື້ອພຍາດໂຄວິດ-19 ແລະ ບາງເທື່ອ ຄົນຈີນທີ່ຕົກຄ້າງຢູ່ລາວ ເປັນເວລາດົນ ກໍມີການຮ້ອງຂໍໃຫ້ສົ່ງພວກເຂົາເຈົ້າ ກັບບ້ານ:

“ມັນເຂົາສ່ົງຄົນຈີນກັບປະເທດ 300 ກວ່າຄົນ ມັນສົ່ງສະເພາະທີ່ວ່າມັນເຣື່ອງໂຄວິດ ປິດດ່ານຊື່ໆເດ້ ດຽວນີ້ຍັງບໍ່ທັນເປີດໃຫ້ເທື່ອ ເຂົາຢາກ ຈະກັບຫັ່ນນາ ເຂົາປິດກະຍ້ອນ ບໍ່ຮູ້ວ່າກໍານົດເປີດເມື່ອໃດນະ.”

ຢ່າງໃດກໍຕາມ ເຖິງແມ່ນວ່າ ສະພາບການໃນພື້ນທີ່ ເຂດເສຖກິຈພິເສດ ສາມຫຼ່ຽມຄໍາ ຍັງມີຄວາມງຽບເຫງົາຢູ່ ແຕ່ບັນຍາກາດການຄ້າຂາຍ ຢູ່ໃນເທສບານເມືອງຕົ້ນເຜິ້ງ ກໍເຣີ່ມກັບມາຄ້າຂາຍໄດ້ ຕາມປົກກະຕິ ແລ້ວ ຫຼັງຈາກທີ່ທາງການໄດ້ຜ່ອນຜັນ ໃຫ້ສາມາດຄ້າຂາຍໄດ້ ແລະ ເດີນທາງໄປ-ມາ ໄດ້ທົ່ວປະເທດໄດ້ຢ່າງສະດວກ ແຕ່ພໍ່ຄ້າແມ່ຄ້າສ່ວນຫຼາຍ ກໍປະສົບບັນຫາ ລູກຄ້າໜ້ອຍກວ່າທີ່ຜ່ານມາ ແລະບໍ່ຮູ້ວ່າຈະ ກັບມາຄ້າຂາຍ ໄດ້ດີຍາມໃດ, ດັ່ງຜູ້ປະກອບການຢູ່ເມືອງຕົ້ນເຜິ້ງ ກ່າວວ່າ:

“ແມ່ນແຫຼະ ຫາກໍດີ ສອງສາມມື້ ມີລູກຄ້າເກົ່າເຮົາກະຍັງມາຫາປົກກະຕິໄດ້ຢູ່ ເຮົາບໍ່ໝັ້ນໃຈເນາະ ເຮົາບໍ່ຮູ້ວ່າສິເປັນຈັ່ງໃດ ແຕ່ຕອນນີ້ເພິ່ນ ກະເປີດແລ້ວ.”

ເມື່ອວັນທີ່ 8 ພຶສພາ ຜ່ານມານີ້ ເຂດເສຖກິຈພິເສດສາມຫຼ່ຽມຄໍາ ຫາກໍສົ່ງຄົນງານພະມ້າ ທີ່ບໍ່ມີວຽກເຮັດງານທໍາຈໍານວນ 125 ຄົນ ກັບຄືນປະເທດ ຕາມຄໍາສເນີຂອງເຈົ້າແຂວງ ທ່າຂີ້ເຫຼັກຂອງພະມ້າ ເພື່ອນໍາຄົນງານ ກັບຄືນປະເທດ ໃນໄລຍະທີ່ມີການແຜ່ຣະບາດ ຂອງເຊື້ອພຍາດໂຄວິດ-19.

ຢ່າງໃດກໍຕາມ ຕາມການຖແລງຂ່າວ ຂອງທ່ານ ດຣ ພູທອນ ເມືອງປາກ ຮອງຣັຖມົນຕຣີ ກະຊວງສາທາຣະນະສຸຂ ໃນວັນທີ 19 ພຶສພາ 2020 ນີ້ ຣະບຸວ່າ ມີຄົນເດີນທາງເຂົ້າມາລາວ ຈາກປະເທດຈີນ 90 ຄົນ ຊຶ່ງເດີນທາງຜ່ານ ສນາມບິນສາກົລວັດໄຕ ໃນນີ້ມີຄົນງານສ້າງ ທາງຣົດໄຟ ລາວ-ຈີນ ຈໍານວນ 77 ຄົນ ແລະ ນັກສຶກສາລາວ ທີ່ກັບມາຈາກຈີນອີກ 13 ຄົນ, ດັ່ງທ່ານກ່າວວ່າ:

“ຜູ້ເດີນທາງຜ່ານສນາມບິນວັດໄຕຈໍານວນ 90 ຄົນ ເຊິ່ງວ່າໃນນີ້ມີນັກສຶກສາລາວ ກັບຈາກເມືອງອູຮັ່ນ 8 ຄົນກັບຈາກເມືອງຊູໂຈ ຈໍານວນ 5 ຄົນ ແລ້ວກະມີແຮງງານຈີນ ມາສ້າງທາງຣົດໄຟ ຈໍານວນ 77 ຄົນ.”

ນອກຈາກນັ້ນ ຍັງມີຣາຍງານຕື່ມວ່າ ມີຄົນເດີນທາງເຂົ້າມາລາວ ຜ່ານທາງດ່ານຊາຍແດນລາວ-ໄທ ຈໍານວນ 1,761 ຄົນ ເຂົ້າມາທາງດ່ານ ຊາຍແດນລາວ-ວຽດນາມ ອີກ 584 ຄົນ.

ເຕັມຫນ້າ