ທາງການສັ່ງຫ້າມຂາຍເຄື່ອງ ແຄມທາງ

ພູວົງສ໌
2020-10-01
ອີແມວລ໌
ຄໍາເຫັນ
Share
ພິມ
ໂຕຢ່າງການຕັ້ງຮ້ານຄ້າຂາຍເຄື່ອງ ຂອງພໍ່ຄ້າ-ແມ່ຄ້າ ຕາມແຄມທາງ ໃກ້ກັບຄິວຣົດເມ ຕລາດເຊົ້າວຽງຈັນ ທີ່ກວມເອົາທາງຍ່າງ, ເຊິ່ງຖືວ່າບໍ່ຖືກຣະບຽບ ຂອງທາງການລາວ ຖ່າຍຮູບເມື່ອ ເດືອນທັນວາ 2019 ຖ່າຍໂດຍ: TS
ໂຕຢ່າງການຕັ້ງຮ້ານຄ້າຂາຍເຄື່ອງ ຂອງພໍ່ຄ້າ-ແມ່ຄ້າ ຕາມແຄມທາງ ໃກ້ກັບຄິວຣົດເມ ຕລາດເຊົ້າວຽງຈັນ ທີ່ກວມເອົາທາງຍ່າງ, ເຊິ່ງຖືວ່າບໍ່ຖືກຣະບຽບ ຂອງທາງການລາວ ຖ່າຍຮູບເມື່ອ ເດືອນທັນວາ 2019 ຖ່າຍໂດຍ: TS
RFA

ພໍ່ຄ້າ-ແມ່ຄ້າຈຳນວນນຶ່ງ ຢູ່ເມືອງໄຊເສດຖາ ນະຄອນຫຼວງວຽງຈັນ ຮູ້ສຶກກັງວົນວ່າ ຈະຫາບ່ອນຂາຍເຄື່ອງຍາກ ພາຍຫຼັງທີ່ທາງການ ນະຄອນຫຼວງວຽງຈັນ ໄດ້ປະກາດວ່າ ຈະມີການຈັດຣະບຽບ ການຄ້າຂາຍ ຕາມແຄມທາງ ແລະ ຢາກໃຫ້ພາກຣັຖ ຫາບ່ອນໃໝ່ໃຫ້ ເພື່ອສາມາດຂາຍເຄື່ອງໄດ້. ດັ່ງເຈົ້າຂອງຮ້ານຂາຍເຄື່ອງແຄມທາງ ຜູ້ຂໍສງວນຊື່ ແລະ ສຽງ ທ່ານນຶ່ງ ທີ່ຂາຍເຄື່ອງຕາມແຄມທາງ ໃນເຂດເມືອງ ໄຊເສດຖາ ນະຄອນຫຼວງວຽງຈັນ ໄດ້ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນວັນທີ 30 ກັນຍາ ນີ້ວ່າ:

ທ່ານວ່າ: “ຖ້າເພິ່ນບໍ່ໃຫ້ພວກພໍ່ຄ້າ-ແມ່ຄ້າຂາຍເຄື່ອງຂອງ ຢູ່ແຄມທາງ ຈະໃຫ້ໄປຂາຍຢູ່ໃສ? ຢູ່ຕລາດ ພື້ນທີ່ຂາຍເຄື່ອງ ກະເຕັມໝົດແລ້ວ. ຫາກເພິ່ນມີພື້ນທີ່ ໃຫ້ໄປຂາຍເຄື່ອງຂອງ ແລ້ວກໍລາຄາບໍ່ແພງ ຄ່າເຊົ່າຕໍ່ລອງໄດ້ ກໍຖືວ່າເປັນທາງອອກໃຫ້ ເພາະເຮົາເປັນຄົນຫາເຊົ້າກິນຄ່ຳ ຣາຍໄດ້ບໍ່ສູງ ພໍຫາລ້ຽງຄອບຄົວໄປແຕ່ລະມື້ເທົ່ານັ້ນ.”

ຊາວບ້ານ ທ່ານນຶ່ງ ຢູ່ເມືອງໄຊເສດຖາ ນະຄອນຫຼວງວຽງຈັນ ກ່າວວ່າ ການຈັດຣະບຽບຜູ້ຂາຍເຄື່ອງຂອງ ຕາມແຄມທາງ ເປັນເຣື່ອງທີ່ດີ, ແຕ່ວ່າ ຄວນພິຈາຣະນາ ເປັນສະເພາະຮ້ານ ແລະ ຄວນຕັກເຕືອນກັນ ກໍພໍ ຍ້ອນຫຼາຍຮ້ານ ຕັ້ງຮ້ານຂາຍເຄື່ອງແບບກີດຂວາງທາງຍ່າງ, ແຕ່ບາງຮ້ານ ກໍເປັນຣະບຽບຮຽບຮ້ອຍດີ. ດັ່ງຍານາງກ່າວ ໃນມື້ດຽວກັນນີ້ວ່າ:

“ບໍ່ຄ່ອຍຮູ້ຣາຍລະອຽດວ່າ ເພິ່ນຊິເຮັດແນວໃດ, ແຕ່ວ່າຢາກຈັດຣະບຽບກໍດີ. ທາງເດີນບໍ່ຄ່ອຍສະດວກສບາຍເທົ່າໃດ ແລ້ວກໍຕ້ອງລົງມາຍ່າງ ເທິງຖນົນ. ບາງຮ້ານກະບໍ່ໄດ້ຕັ້ງຂວາງໄວ້ ກະເລີຍຢາກຕັກເຕືອນ ໄວ້ກໍພໍ.”

ກ່ຽວກັບເຣື່ອງນີ້, ເຈົ້າໜ້າທີ່ຜແນກອຸດສາຫະກັມ ແລະ ການຄ້າ ນະຄອນຫຼວງວຽງຈັນ ຜູ້ຂໍສງວນຊື່ ແລະ ຕຳແໜ່ງທ່ານນຶ່ງ ກ່າວໃນມື້ດຽວ ກັນນີ້ວ່າ ການຈັດຣະບຽບຮ້ານຄ້າຕາມແຄມທາງໃນໄລຍະນີ້ ແມ່ນອີງ ຕາມຣະບຽບກົດໝາຍ ທີ່ພາກຣັຖໄດ້ກຳນົດອອກມາ, ເຊິ່ງມີຣາຍລະ ອຽດຫຼາຍ. ໂດຍຫຼັກການແລ້ວ, ຜູ້ທີ່ຂາຍເຄື່ອງຂອງ ນອກຈາກສະຖານທີ່ ທີ່ພາກຣັຖກຳນົດ ຈະຖືວ່າຜິດຣະບຽບ, ໂດຍຈະຖືກ ປັບໄໝ ແລະ ຍຶດເຄື່ອງຂອງ.

“ຄືວ່າມັນເປັນຣະບຽບທີ່ວ່າ ການຄ້າຂາຍ ມັນຕ້ອງໄປຕາມຣະບຽບກົດໝາຍ ຂອງຣັຖບານກຳນົດມ້ຽນເນາະ. ບໍ່ຂາຍຕາມສະຖານທີ່ຣັຖກຳນົດ ໃຫ້ ລະເຂົາເຈົ້າບໍ່ຂາຍ. ລະເຂົາໄປຂາຍຕາມຖນົນບໍ ຫຼືວ່າບ່ອນ ຕລາດທີ່ເຮົາກຳນົດໃຫ້ຂາຍ, ແຕ່ວ່າຄ້າຂາຍບໍ່ຖືກ. ບໍ່ຂາຍໃນຕລາດ, ຊີ້ນ່າ. ແຄມທາງທີ່ບໍ່ແມ່ນຣັຖກຳນົດ ຈະປັບໄໝ ແລະ ຍຶດເຄື່ອງຂອງ.”

ທ່ານກ່າວຕື່ມວ່າ ນອກຈາກການຈັດຣະບຽບການຄ້າຂາຍ ຕາມແຄມທາງແລ້ວ, ຍັງຈະມີການຈັດຣະບຽບການຄ້າຂາຍໃນຕລາດແຫ່ງ ຕ່າງໆ ທົ່ວນະຄອນຫຼວງວຽງຈັນນຳດ້ວຍ, ໂດຍຈະມີຂອບເຂດ ຂອງແຕ່ ລະຮ້ານ ຕ້ອງຕັ້ງສິນຄ້າ ບໍ່ໃຫ້ເກີນຂອບເຂດ ທີ່ທາງການກຳນົດ, ເຊິ່ງ ຈະອີງຕາມຣະບຽບ ຂອງທາງການກຳນົດອອກມາ.

ອີງຕາມການຣາຍງານ ໃນວັນທີ 24 ກັນຍາ ທີ່ຜ່ານມາ, ເມືອງໄຊເສດຖາ ນະຄອນຫຼວງວຽງຈັນ ໄດ້ມີແຈ້ງການ ໃຫ້ບັນດາພໍ່ຄ້າ-ແມ່ຄ້າ ທີ່ຂາຍເຄື່ອງຕາມແຄມທາງ ແລະ ທາງຍ່າງ ທີ່ບໍ່ຖືກຣະບຽບ ພາຍໃນ ເມືອງໄຊເສດຖາ ຕ້ອງຍ້າຍໄປຂາຍບ່ອນທີ່ພາກຣັຖກຳນົດໃຫ້ຂາຍ ເຊັ່ນວ່າ ຕລາດແຫ່ງຕ່າງໆ ແລະ ເຂດອະນຸຍາດເທົ່ານັ້ນ. ຫາກຜູ້ໃດຝ່າຝືນ ຈະຖືກປັບໄໝ ແລະ ຖືກຍຶດເຄື່ອງຂອງ, ເຊິ່ງທາງເມືອງ ໄດ້ມີຄນະສະເພາະກິຈ ອອກກວດກາຢູ່ຕລອດ.

ກ່ອນໜ້ານີ້, ວັນທີ 3 ກັນຍາ ທີ່ຜ່ານມາ, ຜແນກອຸດສາຫະກັມ ແລະ ການຄ້າ ນະຄອນຫຼວງວຽງຈັນ ກໍໄດ້ຈັດກອງປະຊຸມ ປຶກສາຫາລື ແຜນຈັດສັນແກ້ໄຂ ການຂາຍເຄື່ອງຊະຊາຍ ທີ່ບໍ່ເປັນຣະບຽບ ໃນເຂດ ນະຄອນຫຼວງວຽງຈັນ. ມີການຣາຍງານ ໃນກອງປະຊຸມວ່າຕ້ອງ ມີການຈັດຣະບຽບ ຍ້ອນຕ້ອງການເຮັດໃຫ້ ນະຄອນຫຼວງວຽງຈັນ ເປັນເມືອງ ທີ່ມີຄວາມສະອາດ, ສີວິລັຍ ແລະ ທັນສມັຍ. ໃນມໍ່ໆນີ້, ແຕ່ລະເມືອງ ຈະມີການຈັດສັນຄວາມເປັນຣະບຽບຮຽບຮ້ອຍ ອ້ອມຮອບຕລາດ ແລະ ການຂາຍເຄື່ອງແບບຊະຊາຍ. ຫາກຮ້ານຂາຍເຄື່ອງ ໃດທີ່ກະທຳຜິດ ກໍຈະມີການຍຶດເຄື່ອງຂອງ. ໃນໄລຍະຜ່ານມາ, ກໍມີການລົງກວດກາ ແລະ ຍຶດເຄື່ອງຂອງ ຈາກພໍ່ຄ້າ-ແມ່ຄ້າ ທີ່ເຮັດຜິດ ຣະບຽບແລ້ວ ຈຳນວນນຶ່ງ ແລະ ກໍຈະມີການລົງກວດກາ ເປັນແຕ່ລະໄລຍະ.

ເຕັມຫນ້າ