ນັກຮຽນລາວສົນໃຈ ສະມັກສອບເສັງ ວິທະຍາໄລເຕັກນິກ-ວິຊາຊີບການລົດໄຟ

ວິທະຍາໄລເຕັກນິກ-ວິຊາຊີບການລົດໄຟ ໄດ້ເປີດສອບເສັງໃນວັນທີ 27 ສິງຫາ 2024 ທີ່ຜ່ານມາເພື່ອຄັດເລືອກເອົານັກສຶກສາ ເຂົ້າຮຽນໃນສົກຮຽນປະຈຳປີ 2024-2025 ຈຳນວນ 360 ຄົນແຕ່ຕົວຈິງພົບວ່າມີນັກຮຽນສະມັກສອບ ຈໍານວນ 500 ປາຍຄົນເຊິ່ງຖືວ່າມີນັກຮຽນ ໃຫ້ຄວາມສົນໃຈກັນຫຼາຍ ຈົນເກີນກຳນົດສາເຫດກໍ່ຍ້ອນວ່າ ນັກຮຽນຫຼາຍຄົນມີຄວາມຫວັງວ່າ ຮຽນຈົບໄປຈະມີໂອກາດສູງ ໃນການເຂົ້າເຮັດວຽກກັບບໍລິສັດລົດໄຟ ລາວ-ຈີນ ແລະ ກໍ່ຫວັງວ່າຈະໄດ້ເງິນເດືອນສູງ. ດັ່ງນັກສຶກສາ ປີ.1 ທີ່ຮຽນຢູ່ວິທະຍາໄລເຕັກນິກ-ວີຊາຊີບ ການລົດໄຟກ່າວຕໍ່ວິທຍຸເອເຊັຽເສຣີ ໃນວັນທີ 02 ກັນຍາ ນີ້ວ່າ:

“ທີ່ວ່ານ້ອງສົນໃຈແມ່ນໜຶ່ງ ກໍ່ຄືມັນເປັນວິທະຍາໄລໃໝ່ ສອງມັນມີໜ້າວຽກໃໝ່ກໍ່ຄືໜ້າວຽກ ທາງລົດໄຟທີ່ວ່າປະເທດລາວເຮົາ ມັນຫາກໍ່ມີຕາມອາຈານເພິ່ນວ່າ ໂອກາດແມ່ນ 80-90% ເຮົາຈົບມາເຮົາໄດ້ເຮັດວຽກກັບທາງລົດໄຟຊີ້ນ່າ ຄ່າຕອບແທນກໍ່ສູງແດ່ເຮົາ ຕ້ອງໄດ້ພື້ນຖານພາສາຈີນ ແດ່ເພາະເຮັດວຽກກັບຄົນຈີນ.”

ຂະນະທີ່ນັກຮຽນອີກນາງໜຶ່ງ ທີ່ໄປສະມັກສອບເສັງເຂົ້າວິທະຍາໄລ ເຕັກນິກ-ວິຊາຊີບການລົດໄຟກໍ່ກ່າວວ່າທີ່ຕົນເອງ ສົນໃຈສະມັກສອບເສັງຢູ່ວິທະຍາໄລເຕັກນິກ-ວິຊາຊີບການລົດໄຟ ແຫ່ງນີ້ກໍ່ຍ້ອນເຊື່ອວ່າຮຽນຈົບອອກມາຈະຊອກວຽກງານທຳງ່າຍ ເພາະຈົບຈາກໂຮງຮຽນການລົດໄຟໂດຍກົງ.

“ເຂົ້າໄປຫຼາຍ 500 ປາຍຄົນຜົນປະກາດຖ້າວ່າຕິດກາໄດ້ຮຽນກາຄິດໄວ້ລ່ວງໜ້າຢູ່ວ່າຄັນວ່າອັນຮຽນຈົບມາຊອກວຽກໜ້າຈະບໍ່ຍາກ.”

ພ້ອມດຽວກັນນນີ້ ເຈົ້າໜ້າທີ່ວິທະຍາໄລເຕັກນິກ-ວິຊາຊີບ ການລົດໄຟ ທີ່ຂໍສະຫງວນຊື່ ແລະ ຕໍາແໜ່ງກ່າວວ່າວິທະຍາໄລເຕັກນິກ-ວິຊາຊີບ ການລົດໄຟນີ້ ບໍ່ແມ່ນຂອງຈີນແຕ່ເປັນຂອງລັດຖະບານລາວ ໂດຍກົງ. ສ່ວນຄ່າຮຽນແມ່ນຈ່າຍຕາມໜ່ວຍກິດທີ່ລັດຖະບານກຳນົດໄວ້ຄືກັບວິທະຍາໄລເຕັກນິກ-ວິຊາຊີບໃນທົ່ວປະເທດ ແລະ ທີ່ລັດຖະບານເປີດໂຮງຮຽນນີ້ ກໍ່ຍ້ອນຕ້ອງການສ້າງຄົນງານ ແລະ ບຸກຄະລາກອນທີ່ຕອບສະໜອງບຸກຄະລາກອນ ໃຫ້ກັບບໍລິສັດທາງລົດໄຟ ລາວ-ຈີນ ເພາະຈາກທີ່ເຄີຍປະສານງານກັບທາງລົດໄຟ ລາວ-ຈີນ ເຂົາເຈົ້າຍັງຂາດບຸກຄະລາກອນ ຈຳນວນຫຼາຍແຕ່ທາງວິທະຍາໄລເຕັກນິກ-ວິຊາຊີບການລົດໄຟບໍ່ໄດ້ຮັບຮອງວ່າ ຈົບໄປແລ້ວຈະໄດ້ເຮັດວຽກກັບບໍລິສັດ ລົດໄຟ ລາວ-ຈີນ ເພາະທາງບໍລິລັດ ລົດໄຟລາວ-ຈີນເຂົາເຈົ້າກໍ່ມີເງື່ອນໄຂໃນການຮັບພະນັກງານເຂົ້າເຮັດວຽກ ໂດຍການສອບເສັງແຕ່ນັກສຶກສາທີ່ຈົບຈາກນີ້ ໄປກໍ່ຈະມີໂອກາດສູງກ່ວານັກສຶກສາທີ່ມາຈາກບ່ອນອື່ນ.

“ນີ້ແມ່ນໂຮງຮຽນຂອງພາກລັດກະຊວງສຶກສາລາວ ເປັນຜູ້ຄຸ້ມຄອງກໍ່ແມ່ນເຮົາສ້າງແຮງງານເພື່ອຕອບສະໜອງແຮງງານ ໃຫ້ທາງບໍລິສັດທາງລົດໄຟ ລາວ-ຈີນ ເຂົາເຈົ້າກໍມີຄວາມຕ້ອງການບຸກຄະລາກອນ ກໍ່ຍັງບໍ່ທັນພຽງພໍເທື່ອນັກສຶກສາ ຖ້າວ່າຈະຈົບໄປແລ້ວ ຈະມີໂອກາດຫຼາຍກວ່າ ແຕ່ວ່າທາງລົດໄຟກໍ່ມີເກນໃນການຮັບຈະມີການສອບເສັງ ທົ່ວໄປຄືເພິ່ນເຄີຍຮັບຜ່ານມາ.”

ສໍາລັບການເປີດສອບເສັງ ຂອງວິທະຍາໄລເຕັກນິກ-ວິຊາຊີບ ການລົດໄຟປີນີ້ເປັນປີທີ 2 ໂດຍປີ 2023 ເປັນປີທຳອິດກໍ່ເປີດຮັບນັກສຶກສາ 360 ຄົນເຊັ່ນກັນ ແລະ ລວມປີນີ້ນໍາກໍ່ຈະມີນັກສຶກສາ ທັງໝົດ 720 ຄົນ. ສ່ວນການສອບເສັງ ເຂົ້າຈະບໍ່ມີສອບເສັງພາສາຈີນ ແຕ່ສ່ວນໃຫຍ່ເປັນວິຊາຄະນິດສາດ, ຟີຊິກ, ພາສາລາວ, ພາສາອັງກິດ ແລະ ຄວາມຮູ້ທົ່ວໄປເຊິ່ງຈະມີ 6 ສາຂາຄື. ສາຂາເຕັກນິກຫົວລົດໄຟ, ສາຂາເຕັກນິກຕູ້ລົດໄຟ, ສາຂາສື່ສານສັນຍານການລົດໄຟ, ສາຂາວິສະວະກຳທາງລົດໄຟ, ສາຂາຄຸ້ມຄອງການຂົນສົ່ງທາງລົດໄຟ ແລະ ສາຂາການສະໜອງໄຟຟ້າລົດໄຟ ມີຫຼັກສູດຮຽນ 3 ປີ, ແຕ່ເມື່ອໄດ້ເຂົ້າຮຽນແລ້ວວິທະຍາໄລເຕັກນິກ-ວິຊາຊີບການລົດໄຟ ຈະມີການສອນພາສາຈີນໃຫ້ນໍາດ້ວຍ.

ກ່ຽວກັບເລື່ອງນີ້ ອາຈານສອນ ທີ່ໂຮງຮຽນເຕັກນິກ-ວິຊາຊີບແບບປະສົມ ແຂວງໜຶ່ງ ກໍ່ກ່າວວ່າທ່ານເອງກໍ່ເຫັນແລ້ວວ່າ ມີວິທະຍາໄລເຕັກນິກ-ວິຊາຊີບ. ການລົດໄຟເປີດສອບເສັງເປັນປີທີ 2. ແນ່ນອນວ່ານັກຮຽນທີ່ມີເງື່ອນໄຂ ຫຼື ມີເງິນທຶນຮຽນກໍ່ຕ້ອງສົນໃຈ ເປັນເລື່ອງປົກກະຕິເພາະພໍ່ແມ່ສາມາດສົ່ງເສີມ ໃຫ້ຮຽນໄດ້ ແລະ ກໍ່ມີໂອກາດສູງທີ່ຈົບອອກມາຈະເຂົ້າເຮັດວຽກ ກັບບໍລິສັດທາງລົດໄຟເນື່ອງຈາກເຂົາເຈົ້າສອນກ່ຽວກັບດ້ານການລົດໄຟໂດຍກົງ. ໂຮງຮຽນ ແລະ ອຸປະກອນການຮຽນຕ່າງໆ ກໍ່ທັນສະໄໝກ່ວາຕ່າງແຂວງ. ສ່ວນນັກຮຽນທີ່ມີບໍ່ມີເງິນທຶນ ເຂົາເຈົ້າບາງຄົນກໍ່ເລືອກຮຽນໃນແຂວງຕົນເອງ ຫຼຸດຄ່າໃຊ້ຈ່າຍ. ບາງຄົນກໍ່ບໍ່ຮຽນໄປຊອກວຽກເຮັດງານທຳກໍ່ມີ.

“ໄລຍະ 2-3 ປີມານີ້ກະແສນັກຮຽນນີ້ໜ້ອຍລົງ ໃນປີນີ້ເຂົາກໍ່ມັກແດ່ການລົດໄຟນີ້ ມັນເປັນເລື່ອງໃໝ່ເງິນເດືອນສູງເຂົາກໍ່ຄິດວ່າ ຕ້ອງແມ່ນຮຽນຈົບແມ່ນຕ້ອງມີວຽກເຮັດຢ່າງແນ່ນອນ ຜູ້ທຸກຜູ້ຍາກເຂດຫ່າງໄກສອກຫຼີກບໍ່ມີເງື່ອນໄຂ ທາງເລືອກເຂົາກໍ່ຢູ່ແຂວງເຮົານີ້ແຫຼະ.”

ຢ່າງໃດກໍ່ຕາມປັດຈຸບັນ ບໍລິສັດທາງລົດໄຟ ລາວ-ຈີນ ໄດ້ຮັບພະນັກງານຄົນລາວ ເຂົ້າເຮັດວຽກໃນຂະແໜງການຕ່າງໆ ແລ້ວຈຳນວນ 3,500 ຄົນເຊິ່ງພະນັງານຈຳນວນດັ່ງກ່າວ ສ່ວນໜຶ່ງກໍແມ່ນພະນັກງານທີ່ຜ່ານການສອບເສັງ ຈາກບໍລິສັດ ທາງລົດໄຟ ລາວ-ຈີນ ຈຳກັດ ແລ້ວຖືກສົ່ງໄປຮຽນ ທາງດ້ານການລົດໄຟຢູ່ປະເທດຈີນໃນກ່ອນໜ້ານີ້ ແລະ ອີກສ່ວນໜຶ່ງ ກໍ່ແມ່ນພະນັກງານຊ່າງໃນດ້ານຕ່າງໆ ທີ່ສະມັກເຂົ້າເຮັດວຽກກັບບໍລິສັດ ທາງລົດໄຟລາວ-ຈີນ ຈຳກັດ. ອີງຕາມການລາຍງານຂອງທ່ານ ສົງລຽງ ຮອງຫົວໜ້າຄະນະກຳມະການ ການພັດທະນາ ແລະ ປະຕິຮູບແຫ່ງຊາດຈີນ.