ນະຄອນຫຼວງວຽງຈັນ ສັ່ງປິດຮ້ານຊື້-ຂາຍໂລຫະ

ຜະແນກອຸດສາຫະກຳແລະການຄ້ານະຄອນຫຼວງວຽງຈັນ ອອກແຈ້ງການເມື່ອວັນທີ່ 6 ສິງຫາ 2024 ສັ່ງໃຫ້ປິດຊົ່ວຄາວ ກິດຈະການການຊື້-ຂາຍແລະເກັບເສດໂລຫະ ໂດຍສະເພາະເຫຼັກເສດຢູ່ໃນເຂດນະຄອນຫຼວງ ຍ້ອນວ່າໃນໄລຍະຜ່ານມາ ມີຄົນລັກເຫຼັກຈາກທາງລົດໄຟລາວ-ຈີນ ຈາກທາງດ່ວນ ແລະຈາກທີ່ອື່ນໆຫຼາຍເກີນໄປ. ແຕ່ຈຸດປະສົງອັນແທ້ຈິງຂອງການສັ່ງປິດດັ່ງກ່າວ ແມ່ນ ເພື່ອຈັດໃຫ້ມີຄວາມເປັນລະບຽບຮຽບຮ້ອຍແລະຄວາມຈົບງາມຂອງນະຄອນຫຼວງວຽງຈັນ ທີ່ຈະເປັນເຈົ້າພາບຈັດກອງປະຊຸມສຸດຍອດອາຊ່ຽນໃນເດືອນຕຸລາຈະມາເຖິງນີ້ ແລະແຈ້ງການສະບັບນີ້ ຈະມີຜົນບັງຄົບໃຊ້ນັບແຕ່ມື້ປະກາດ ຈົນເຖິງໄລຍະເວລາ ຫຼັງຈາກກອງປະຊຸມສຸດຍອດອາຊ່ຽນສິ້ນສຸດລົງ.

ເຈົ້າໜ້າທີ່ນະຄອນຫຼວງວຽງຈັນທ່ານໜຶ່ງ ທີ່ບໍ່ປະສົງບອກຊື່ແລະຕຳແໜ່ງ ໄດ້ກ່າວເຖິງຈຸດປະສົງດັ່ງກ່າວກັບວິທະຍຸເອເຊັຍເສຣີໃນວັນທີ່ 6 ກັນຍາ 2024 ນີ້ວ່າ:

“ກໍລະນີວ່າ ມີອັນແຂກຜູ້ນຳ ຄົນໄປເກັບຊື້ເຫຼັກເສດຫຼືວ່າຫຍັງຕ່າງໆ ຂີ່ລົດເລາະແບບບໍ່ງາມຫຼືອີຫຍັງຕ່າງໆ ເບິ່ງມັນບໍ່ດີຫຼາຍປານໃດ ມັນບໍ່ງາມຕາ ສົມມຸດວ່າ ເຮົາບໍ່ຮັບຊື້ ຄົນໄປເກັບມາຂາຍ ມັນກໍບໍ່ອອກເລາະ ໄປເກັບໄປຊື້ໄປຂາຍກັນຈັ່ງຊີ້ໜ່າ.”

ສ່ວນຈຸດປະສົງເພື່ອຢຸດຕິການລັກເຫຼັກເສດນັ້ນ ເຈົ້າໜ້າທີ່ນະຄອນຫຼວງວຽງຈັນ ກໍຢືນຢັນວ່າ ທາງການນະຄອນຫຼວງ ອອກແຈ້ງການສະບັບນີ້ ກໍເພື່ອກະກັດກັ້ນການລັກເຫຼັກ ເປັນຕົ້ນນ໊ອດ ຮົ້ວກັ້ນທາງລົດໄຟ ທາງດ່ວນ ຝາປິດຮ່ອງນ້ຳ ແລະເຫຼັກຈາກບ່ອນອື່ນໆ.

“ລັກນ໊ອດ ຮົ້ວກັນທາງລົດໄຟ ແລ້ວກໍມີຝາປິດຮ່ອງນ້ຳແດ່ ຕະແກງເຫຼັກ ຮ່ອງລະບາຍນ້ຳເສຍຢູ່ນຳແຄມທາງ ແລ້ວກໍສາຍຟືນສາຍໄຟເດ່ເນາະ ບໍ່ຢາກໃຫ້ມັນແຜ່ຫຼາຍເນາະ ຄັນເຮົາມີບ່ອນເກັບຊື້ຫຼາຍ ມັນກໍເກີນຂື້ນຫຼາຍ. ສັງເກດທາງດ່ວນໄປວັງວຽງ ເຫັນບໍ່ ຮາວກັນທາງຫັ້ນນ່າ ມັນຈະຫຼຸດ ເປັນຍ່ານ ເປັນຍ່ານໄປ ພວກຂີ້ລັກເນາະ ມັນເຂົ້າໄປແລ້ວ ມັນກໍຫັນເອົານ໊ອດໄປຂາຍເດ່ ເຫຼັກຮົ້ວທາງລົດໄຟ ເຂົາເຈົ້າເປັນຕາແກງ ຕານ່າງ ຄ້າຍໆວ່າ ແບບກັນສັດເຂົ້າມາ ມັນກໍເອົາໄປຂາຍເດ່.”

ແຈ້ງການສະບັບດັ່ງກ່າວ ມີຜົນບັງຄັບໃຊ້ໃນເກົ້າເຂດເມືອງໃນນະຄອນຫຼວງວຽງຈັນ. ຜົນປະກົດວ່າ ປັດຈຸບັນ ພວກພໍ່ຄ້າແມ່ ຊຶ່ງສ່ວນຫຼາຍເປັນຊາວວຽດນາມ ກໍໄດ້ຢຸດເຊົາການເລາະຊື້ເຫຼັກເສດແດ່ແລ້ວ ດັ່ງຊາວເມືອງຫາດຊາຍຟອງ ນະຄອນຫຼວງວຽງຈັນນນາງໜຶ່ງ ໄດ້ກ່າວກັບວິທະຍຸເອເຊັຍເສຣີວ່າ:

“ດຽວນີ້ ບໍ່ສູ້ເຫັນວຽດຂີ່ລົດເລາະຊື້ເດ່ 5-6 ຄົນພຸ້ນນ່າ ຂີ່ລົດໄລ່ຫຼັງກັນມາ ມີລໍ້ມີຫຍັງພ້ອມ ຊາເລັ່ງ ແຕ່ດຽວນີ້ ບໍ່ສູ້ເຫັນ.”

ສ່ວນຊາວບ້ານ ທີ່ຢູ່ໃກ້ທາງດ່ວນນະຄອນຫຼວງວຽງຈັນ-ວັງວຽງ ກໍເຫັນດີກັບທາງການ ເພື່ອແກ້ໄຂບັນຫາປະກົດການຍໍ້ທໍ້ ເປັນຕົ້ນກໍແມ່ນການລັກເຫຼັກແລະທອງຈາກທາງດ່ວນ.

“ມີການເສັຍຫາຍຢູ່ ສ່ວນຫຼາຍ ອັນນີ້ ກໍແມ່ນສາຍໄຟ ມັນກໍຕັ້ງບໍ່ເຮັດຫຍັງ ຫາລັກໄປຊື່ນີ້ແຫຼະ ຄັນວ່າກວດພໍ້ຫາເຫັນ ເຈົ້າໄປຊື້ຂາຍຢູ່ຮ້ານໃດ ກໍປະຕິບັດຕາມລະບຽບຫັ້ນແຫຼະ.”

ປະຊາຊົນຜູ້ນີ້ ກ່າວອີກວ່າ ແນ່ນອນ ຊາວບ້ານຫຼາຍຄົນ ໂດຍສະເພາະຜູ້ທຸກຍາກ ທີ່ຫາກິນດ້ວຍການເກັບເສດໂລຫະຂາຍ ກໍຕ້ອງໄດ້ຮັບຜົນກະທົບຈາກການສັ່ງປິດດັ່ງກ່າວ ເພາະບຸກຄົນເຫຼົ່ານີ້ ອາໃສມີລາຍໄດ້ຈາກການເກັບເສດໂລຫະ ເຊັ່ນສັງກະສີເກົ່າແລະກະບ໋ອງເບຍໄປຂາຍ.

ເຖິງໃດກໍຕາມ ປະກົດວ່າ ເຈົ້າໜ້າທີ່ເມືອງຕ່າງໆໃນນະຄອນຫຼວງວຽງຈັນ ກໍໄດ້ຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ ເຊັ່ນໄດ້ລົງໄປຕິດຕາມກວດກາຮ້ານຊື້-ຂາຍໂລຫະຫຼາຍຄັ້ງ ແລະກໍໄດ້ເຮັດບົດບັນທຶກກັບຮ້ານທີ່ລະເມີດແຈ້ງການ ດັ່ງເຈົ້າໜ້າທີ່ເມືອງສັງທອງທ່ານນຶ່ງ ໄດ້ກ່າວວ່າ:

“ເຂົາເຈົ້າເກັບສັງກະສິເກົ່າ ເປັນບ໋ອງເບຍ ເປັນອັນເຫຼັກເສດທຳມາການີ້ນ່າ ຂາຍນ່າ ແລ້ວເຂົາເຈົ້າກໍລົງເຮັດບົດບັນທຶກແລ້ວເດ່ ແລ້ວທາງເຮົາກໍໄດ້ເຮັດລາຍງານຫາທາງຜະແນກແລ້ວເດ່.”

ກ່ອນນີ້ ວິທະຍຸເອເຊັຍເສຣີ ໄດ້ລາຍງານວ່າ ນອກຈາກຫ້າມຊື້-ຂາຍເສດເຫຼັກ ທາງການນະຄອນຫລວງວຽງຈັນ ຍັງໄດ້ກວດກາປ້າຍຫ້າງຮ້ານ, ປ້າຍໂຄສະນາ ແລະປ້າຍແຄມທາງ ທີ່ບໍ່ຖືກຕ້ອງຕາມລະບຽບກົດໝາຍນັ້ນນຳ ແລະໄດ້ສັ່ງໃຫ້ເຈົ້າຂອງປ້າຍ ແກ້ໄຂປ້າຍໃຫ້ຖືກຕ້ອງ ກ່ອນຈະມີ ກອງປະຊຸມສຸດຍອດອາຊ້ຽນໃນເດືອນໜ້າ.

ອີກບັນຫານຶ່ງ ນະຄອນຫຼວງວຽງຈັນ ຍັງມີຖະໜົນຫົນທາງເປ່ເພແລະຖືກນ້ຳຖ້ວມຂັງ ໂດຍສະເພາະໃນຍາມຝົນ. ຕໍ່ບັນຫານີ້ ພະແນກໂຍທາທິການ ແລະຂົນສົ່ງ ນະຄອນຫຼວງວຽງຈັນ ກໍໄດ້ຈັດຕັ້ງຄະນະແກ້ໄຂຮ່ອງລະບາຍນໍ້າ ທີ່ມັກອຸດຕັນນັ້ນແລ້ວ.

ນອກຈາກນັ້ນ ທາງການນະຄອນຫຼວງວຽງຈັນ ກໍຍັງໄດ້ປັບປຸງບູລະນະປະຕູໄຊໃຫ້ສວຍງາມແລະໄດ້ກຳຈັດການຂາຍເຄື່ອງຂອງຊະຊາຍຕາມຖະໜົນຫົນທາງໃນເຂດນະຄອນຫຼວງນັ້ນນຳ ທັງໝົດເພື່ອຕ້ອນຮັບກອງປະຊຸມສຸດຍອດອາຊ່ຽນຄັ້ງຈະມາເຖິງ.