ຊາວກັງວົນໃຈ ຄ່າຊົດເຊີຍ ໂຄງການພັດທະນາ ເມືອງທັນສະໄໝ ນະຄອນຫຼວງວຽງຈັນ 450 ປີ

ໂຄງການພັດທະນາເມືອງທັນສະໄໝ ນະຄອນຫຼວງ 450 ປີ ທີ່ຈະສ້າງຂຶ້ນໃນເຂດເມືອງໄຊເສດຖາ ແລະເມືອງຫາດຊາຍຟອງ ນະຄອນຫຼວງວຽງຈັນນັ້ນ ຍັງຢູ່ໃນຂັ້ນຕອນ ຂອງການຫາລືເລື່ອງຄ່າຊົດເຊີຍຄວາມເສຍຫາຍ ກັບຊາວບ້ານ ທີ່ຈະສູນເສຍທີ່ດິນທໍາກິນ ຮວມທັງດິນນາ ຊຶ່ງທາງໂຄງການຈະກວມເອົາ ໃນຂະນະທີ່ຊາວບ້ານຍັງບໍ່ຮູ້ວ່າ ຄ່າຊົດເຊີຍທີ່ຈະໄດ້ນັ້ນ ຈະເປັນໄປແບບໃດ, ອີງຕາມຄໍາເວົ້າ ຂອງເຈົ້າໜ້າທີ່ບ້ານ ຢູ່ໃນເຂດສໍາຣວດໂຄງການ ເມືອງທັນສະໄໝ ຕໍ່ວິທຍຸເອເຊັຽເສຣີ ໃນມື້ວັນທີ 12 ກັນຍານີ້.

“ສໍາຫລດດິນເພີ່ນສໍາຫລວດໄປແລ້ວ ແຕ່ວ່າເພິ່ນຍັງບໍ່ຮູ້ລາຍລະອຽດວ່າຈະຊົດເຊີຍແນວໃດ ຂະເຈົ້າບໍ່ໄດ້ກັງວົນໃຈຄັນເຂົາເຈົ້າໄດ້ເງິນຄ່າຊົດເຊີຍ ດິນນາ ສ່ວນຫລາຍເປັນດິນນາ ແຕ່ວ່າຍັງຕົກລົງກັນຢູ່ເດ້ ຂະເຈົ້າກໍບໍ່ທັນວ່າສິວ່າເຮັດໂດຍພະລະການເດ້ ມີການຕົກລົງກັນວ່າ ເອີ ດຽວນີ້ດິນເຈົ້າລາຄາເໝາະສົມເທົ່າໃດ ພາກລັດຕີລາຄາລົງມາເທົ່າໃດ ເຈົ້າຢາກໄດ້ເທົ່າໃດ ຜູ້ສໍາປະທານເສັຽຫາຍໃຫ້ເທົ່າໃດ ຕ້ອງໄດ້ຕົກລົງກັນອີກເທື່ອນຶ່ງ.”

ພ້ອມດຽວກັນນັ້ນ ຊາວບ້ານ ຢູ່ບ້ານໜອງແປນ ເມືອງຫາດຊາຍຟອງ ທີ່ຮູ້ກ່ຽວກັບໂຄງການດັ່ງກ່າວ ກໍເວົ້າເຖິງເລື້ອງຄ່າຊົດເຊີຍນັ້ນວ່າ ດຽວນີ້ ຍັງບໍ່ມີການລົມກັນເທື່ອ. ແຕ່ຊາວບ້ານ ທີ່ຈະໄດ້ຮັບຜົນກະທົບນັ້ນ ກໍຢາກໄດ້ຄ່າຊົດເຊີຍ ທີ່ເໝາະສົມ ກັບລາຄາຕົວຈິງ ແລະພາກັນຈົ່ມກ່ຽວກັບເລື່ອງທີ່ວ່ານີ້.

“ກໍມີແຕ່ຈົ່ມກັນຫັ້ນແຫລະ ສິໄດ້ຄ່າຊົດເຊີຍບໍ່ ຊົດເຊີຍໃຫ້ເຂົາໄດ້ເຂົາກໍອອກ ກໍບໍ່ໄດ້ມີບັນຫາ ຖ້າວ່າຊົດເຊີຍຕາມທີ່ວ່າຄວາມຕ້ອງການຂອງເຂົາ ສົມມຸດວ່າເຂດນັ້ນເຂົາຂາຍດິນຕາລາງແມັດເທົ່າໃດ ຊົດເຊີຍໃຫ້ເຂົາເທົ່ານັ້ນ ເຂົາກໍອອກບໍ່ມີບັນຫາ.”                                                   ເວົ້າເຖິງການລົງທຶນຂອງໂຄງການທີ່ວ່ານີ້ ເຈົ້າໜ້າທີ່ ພະແນກຊັບພະຍາກອນ ທໍາມະຊາດ ແລະສິ່ງແວດລ້ອມ ນະຄອນຫຼວງວຽງຈັນ ກໍ່ເວົ້າໃນມື້ດຽວກັນນີ້ວ່າ ມີມູນຄ່າການລົງທຶນ 150 ຕື້ກີບ ແລະຈະນໍາໃຊ້ເນື້ອທີ່ທັງໝົດ 2,372 ເຮັກ ຕາ. ໂຄງການນີ້ ຈະກວມເອົາ 10 ບ້ານ ໃນສອງເມືອງ ຄືເມືອງໄຊເສດຖາ ແລະເມືອງຫາດຊາຍຟອງ. ປັດຈຸບັນ ໂຄງການດັ່ງກ່າວ ຍັງຢູ່ໃນຂັ້ນຕອນ ຂອງປະເມີນຜົນກະທົບ ຕໍ່ສິ່ງແວດລ້ອມ, ແຜນຄຸ້ມຄອງ ແລະແຜນຕິດຕາມກວດກາສິ່ງແວດລ້ອມ, ຍັງບໍ່ທັນໄດ້ເລີ່ມກໍ່ສ້າງເທື່ອ ດັ່ງທ່ານກ່າວວ່າ:

“ຍັງບໍ່ທັນໄດ້ເລີ້ມເທື່ອ ຊ້ວງນຶ່ງຫັ້ນເຂົາເລີ້ມສໍາຫລວດ ຄວາມເປັນໄປໄດ້ສ່ວນນຶ່ງ ເຂົາກໍບໍ່ຢາກເຜີຍແຜ່ເດ້ ຄັນຢາກໄດ້ໃຫ້ເພິ່ນມາພົວພັນຢູ່ຫ້ອງການໂລດ.”

ເມື່ອກ່ອນໜ້ານີ້ ໃນເດືອນພະຈິກ 2021 ຫ້ອງວ່າການ ນະຄອນຫຼວງວຽງຈັນ ໄດ້ອອກແຈ້ງການ ຫ້າມຊື້-ຂາຍດິນ ຮວມທັງບໍ່ໃຫ້ປຸກສ້າງ, ຈົກໜອງນໍ້າ ແລະຈົກດິນຂາຍ ໃນຂອບເຂດການສຳຣວດໂຄງການດັ່ງກ່າວ ໂດຍທີ່ທາງການບ້ານຈະກໍານົດຂອບເຂດທີ່ດິນ ໄວ້ຢ່າງຈະແຈ້ງວ່າ ດິນສ່ວນໃດຫ້າມຊື້-ຂາຍ ເພື່ອສະ ຫງວນພື້ນທີ່ ໄວ້ສໍາລັບໂຄງການນີ້ ດັ່ງຜູ້ປະກອບການຊື້-ຂາຍດິນ ຢູ່ເມືອງໄຊເສດຖາ ນາງນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 12 ກັນຍານີ້ວ່າ:

“ທາງບ້ານເພິ່ນຈະບອກຂອບເຈດໄວ້ຫັ້ນນ່າ ກໍຄືສະຫງວນໄວ້ເລີຍຫັ້ນນ່າ ສະ ຫງວນກໍຄືຊື້ຂາຍບໍ່ໄດ້ ຢູ່ໃນເຂດໂຄງການຊີ້ນ່າ ເນື້ອທີ່ອີ່ຫຍັງຕ່າງໆ ກໍຫລາຍໆ ໂດຍໂຕນີ້ມັນດົນເຕີບແລ້ວໄດ໋ ຫລາຍປີແລ້ວ ແຕ່ວ່າຍັງບໍ່ທັນເຫັນເປັນຮູບເປັນຮ່າງເນາະ ແຕ່ວ່າຂອບເຂດເພິ່ນໝາຍໄວ້ເບິດແລ້ວ.”

ໂຄງການພັດທະນາເມືອງທັນສະໄໜ ນະຄອນຫຼວງ 450 ປີ ແມ່ນກຸ່ມບໍລິສັດ ດວງຈະເລີນ ພັດທະນາກໍ່ສ້າງຈໍາກັດ ເປັນຜູ້ລົງທຶນ ສຶກສາ ສໍາຫລວດ ເກັບ ກໍາຂໍ້ມູນ ຕາມທີ່ໄດ້ກໍານົດໄວ້ ຢູ່ໃນບັນທຶກຄວາມເຂົ້າໃຈກັນ ຫລື MOU ໃນປີ 2022.

ຂ່າວເວົ້າວ່າ ໂຄງການທີ່ວ່ານີ້ ສ້າງຂຶ້ນເພື່ອດຶງດູດການຄ້າ, ການລົງທຶນ ແລະການພັດທະ ນາພື້ນທີ່ເປົ່າຫວ່າງ ທີ່ເປັນປ່າໂຄກ, ນາເຮື້ອ ໃຫ້ເປັນເຂດທັນສະ ໄໜ ທີ່ປະກອບມີ 9 ເຂດ ຮວມທັງເຂດການຄ້າ, ການລົງທຶນ ແລະການບໍລິ ການ, ເຂດອຸດສາຫະກໍາປຸ່ງແຕ່ງ, ເຂດບ້ານຈັດສັນ ແລະທີ່ຢູ່ສໍາລັບຜູ້ສູງອາຍຸ, ເຂດກິລາ ແລະເຂດທ່ອງທ່ຽວ.