ຜູ້ເສຍດິນໃຫ້ໂຄງການໂລຈິສຕິກ ຢູ່ນະຄອນຫຼວງວຽງຈັນ ຮຽກຮອ້ງຄ່າຊົດເຊີຍສູງຂຶ້ນ

ປະຊາຊົນ ທີ່ໄດ້ຮັບຜົນກະທົບ ຈາກໂຄງການເຂດໂລຈິສຕິກ ນະຄອນຫຼວງວຽງຈັນ ໄລຍະ 2 ຂອງບໍລິສັດ ວຽງຈັນໂລຈິສຕິກພາກ ຈໍາກັດ ແລະບໍລິສັດວິທະຍາສາດ ແລະອຸດສາຫະກໍາ ການກໍ່ສ້າງ (China Construction Science and Industry Corporation) ຂອງຈີນ ສະເໜີໃຫ້ປັບຂຶ້ນຄ່າຊົດເຊີຍ ທີ່ດິນ ຊຶ່ງຖືກຜົນກະທົບ ຈາກໂຄງການດັ່ງກ່າວ ຈາກ 150,000 ກີບຕໍ່ຕາແມັດ ເປັນ 210,000 ກີບ. ເຂດທີ່ວ່ານີ້ ເປັນເຂດດຽວກັນ ທີ່ຖືກໂຄງການທາງລົດໄຟ ລາວ -ຈີນ ກວມເອົາ, ແລະໄດ້ໃຫ້ຄ່າຊົດເຊີຍ ຫຼາຍກວ່າ ທີ່ທາງໂຄງການເຂດໂລຈິສຕິກ ຕີລາຄາໃຫ້.

ຍ້ອນເປັນຄືແນວນັ້ນ ຊາວບ້ານຫຼາຍຄອບຄົວ ຈຶ່ງຍັງບໍ່ທັນຮັບຄ່າຊົດເຊີຍນັ້ນເທື່ອ ຍ້ອນເຫັນວ່າ ຄ່າຊົດເຊີຍທີ່ທາງໂຄງການສະເໜີໃຫ້ນັ້ນ ຕໍ່າເກີນໄປ, ເປັນການສະເໜີໃຫ້ ແບບບໍ່ເປັນທໍາ, ອີງຕາມຄໍາເວົ້າຂອງຊາວບ້ານ ຢູ່ບ້ານຊຽງດາ ເມືອງໄຊເສດຖາ ຜູ້ນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 2 ສິງຫານີ້.

“ຍັງບໍ່ທັນໄດ້ເທື່ອເດີ ເຮົາກໍບໍ່ໄດ້ສະເໜີນໍາຂະເຈົ້າຫັ້ນນ່າ ພວກຫັ້ນນ່າລົງມາກວດເບິ່ງ ບໍລິສັດມາກວດເບິ່ງ ແຕ່ກໍບໍ່ເຫັນເຂົາມາຈັກເທື່ອ ແມ່ນ ຢາກໄດ້ຄ່າເປັນທໍາຫັ້ນແຫລະ ແຕ່ວ່າຂະເຈົ້າໃຫ້ນີ້ມັນບໍ່ຖືກ.”

ທ່ານກ່າວຕື່ມວ່າ ເມື່ອກ່ອນໜ້ານີ້ ເຈົ້າໜ້າທີ່ທາງການທີ່ກ່ຽວຂ້ອງ ໄດ້ໃຫ້ຊາວ ບ້ານ ໄປເປີດບັນຊີທະນາຄານ ລໍຖ້າການໂອນເງິນຄ່າຊົດເຊີຍ, ຊາວບ້ານບາງສ່ວນກໍໄດ້ໄປເປີດຖ້າຮັບເອົາຄ່າຊົດເຊີຍ ທີ່ທາງໂຄງການສະເໜີໃຫ້ນັ້ນແລ້ວ, ແຕ່ສໍາລັບທ່ານ ແມ່ນຍັງບໍ່ທັນໄດ້ໄປເປີດ ຍ້ອນຍັງບໍ່ຮູ້ວ່າ ເງິນຊົດເຊີຍນັ້ນ ຈະໄດ້ເທົ່າໃດ ຈະເໝາະສົມ ຫຼືບໍ່ກໍຍັງບໍ່ຮູ້.

ດິນ ທີ່ໄດ້ຮັບຜົນກະທົບ ຈາກໂຄງການເຂດໂລຈິສຕິກນີ້ ມີທັງດິນປຸກສ້າງ ແລະດິນສວນ ດິນນາ. ແຕ່ລາຍລະອຽດຂອງການຊົດເຊີຍ ແລະໄລຍະເວລາ ທີ່ຈະໄດ້ຮັບການຊົດເຊີຍນັ້ນ ຍັງບໍ່ຄັກບໍ່ແນ່ ຍ້ອນຍັງບໍ່ມີເຈົ້າໜ້າທີ່ ມາບອກໃຫ້ຮູ້ເທື່ອ, ບາງຄອບຄົວໄດ້ໄປແລ້ວ ເພີ່ນໃຫ້ເທື່ອລະໜ້ອຍ ດັ່ງຊາວບ້ານຊຽງດາ ເມືອງໄຊເສດຖາ ທີ່ໄດ້ຮັບຜົນກະທົບ ຈາກໂຄງການດັ່ງກ່າວ ເວົ້າວ່າ:

“ຍັງເທື່ອ ມັນກໍບາງຄອບຄົວກໍໄດ້ ບາງຄອບຄົວກໍຍັງບໍ່ທັນໄດ້ ເພິ່ນກໍທະຍອຍໃຫ້ເທື່ອລະໜ້ອຍ ເພິ່ນກໍຂຽນບົດບັນທຶກອີ່ຫຍັງໄວ້ແຫລະ ເພິ່ນກໍວ່າສິຈ່າຍ ແຕ່ກໍເພິ່ນບໍ່ຮູ້ວ່າສິຈ່າຍມື້ໃດ ກໍຍັງບໍ່ຮູ້ເທື່ອວ່າເພິ່ນສະເໜີໃຫ້ແບບໃດ ເພິ່ນກໍບໍ່ທັນມາແຈ້ງລະອຽດ ບາງຄອບຄົວເພິ່ນກໍແຈ້ງແລ້ວ ກໍລໍຖ້າການຊົດເຊີຍ ຊົດເຊີຍແລ້ວເພິ່ນກໍຍົກຍ້າຍອອກໃຫ້ ເພິ່ນບໍ່ທັນຊົດເຊີຍກໍຢູ່ກ່ອນ.”

ແລະຊາວບ້ານຊຽງດາ ທີ່ໄດ້ຮັບຜົນກະທົບຄືກັນນັ້ນ ອີກຜູ້ນຶ່ງກໍເວົ້າວ່າ ຢາກໃຫ້ພາກສ່ວນທີ່ກ່ຽວຂ້ອງ ມາຕົກລົງເຊັນສັນຍາຊົດເຊີຍກັບຊາວບ້ານ ໃຫ້ຈະແຈ້ງ, ຫາກບໍ່ມີລາຍລະອຽດ ກ່ຽວກັບເລື່ອງຄ່າຊົດເຊີຍ ກໍເປັນໄປບໍ່ໄດ້ ທີ່ຊາວບ້ານຈະ ໂອນດິນໃຫ້.

“ຕົກລົງກັນເຊັນສັນຍາກ່ອນວ່າ ຂະເຈົ້າສິໃຫ້ໃຜແນວໃດ ຂະເຈົ້າຊົດເຊີຍແນວໃດ ລາຄາຫັ້ນໄດ້ກະໂອນມາຕາມຫັ້ນ ແລ້ວກໍເຮົາສິໄດ້ໂອນໃຫ້ ເປັນໄປບໍ່ໄດ້ ຄັນສິເວົ້າລ້າໆ ບໍ່ມີການຊົດເຊີຍ.”

ເພື່ອຂໍຮູ້ລາຍລະອຽດ ກ່ຽວກັບເລື່ອງທີ່ວ່ານີ້ ວິທຍຸເອເຊັຽເສຣີ ໄດ້ພະຍາຍາມຕິດຕໍ່ໄປຫາຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມ ນະຄອນ ຫຼວງວຽງຈັນ ແຕ່ບໍ່ສາມາດຕິດຕໍ່ໄດ້.

ໂຄງການເຂດໂລຈິສຕິກຕອນນີ້ ເປັນສ່ວນພາກຂະຫຍາຍ ຂອງໂຄງການທ່າບົກທ່ານາແລ້ງ ແລະເຂດໂລຈິສຕິກພາກນະຄອນຫຼວງວຽງຈັນ. ໂຄງການທ່າບົກທ່ານາແລ້ງ ໄດ້ເລີ່ມໃຫ້ບໍລິສັດຕ່າງໆ ເຊົ່າພື້ນທີ່ດໍາເນີນການໄປແລ້ວ ຊຶ່ງສວ່ນຫຼາຍ ຈະເປັນບໍລິສັດການຄ້າ ທີ່ຕ້ອງການຂົນສົ່ງສິນຄ້າໄປປະເທດທີ 3. ສ່ວນ ລູກຄ້າ ທີ່ເປັນບໍລິສັດໂລຈິສຕິກໂດຍກົງ ຍັງບໍ່ຫຼາຍປານໃດ ດັ່ງເຈົ້າໜ້າທີ່ ບໍລິ ສັດວຽງຈັນໂລຈິສຕິກພາກຈໍາກັດ ຜູ້ນຶ່ງເວົ້າວ່າ:

“ຄົນທີ່ມາເຮັດເທຣດເດີທີ່ນີ້ ສ່ວນຫລາຍຈະແມ່ນພວກລາວກັບຈີນ ລ່ວຈະເປັນຕາງໜ້າໃຫ້ບໍລິສັດໄທຍເປັນສ່ວນໃຫຍ່ ສ່ວນຫລາຍຈະມາຕັ້ງປະເພດເທຣດເດີ ການຂົນສົ່ງສິນຄ້າໄປປະເທດທີ 3 ໄປຈີນ ໄປຢ່າງອື່ນກໍມາໃຊ້ບໍລິການ ແຕ່ວ່າຜູ້ປະກອບການທີ່ມາເຮັດໂລຊິສຕິກນີ້ແທບບໍ່ມີເລີຍ ສ່ວນຫລາຍກໍເປັນພວກເຮັດເທຣດເດີ ພວກການຄ້າເປັນສ່ວນໃຫຍ່.”

ໂຄງການເຂດໂລຈິສຕິກ ມີເນື້ອທີ່ 51.1 ເຮັກຕ້າຣ໌, ດິນ 90 ຕອນ ໄດ້ຮັບຜົນກະທົບ, ມູນຄ່າ 84 ຕື້ກີບ. ທາງໂຄງການ ໄດ້ຈ່າຍຄ່າຊົດເຊີຍໄປແລ້ວ 35 ຕອນ, ມູນຄ່າ 7.4 ຕື້ກີບ, ຍັງຄ້າງຢູ່ 55 ຕອນ, ມູນຄ່າ 76.6 ຕື້ກີບ.

ໂຄງການທ່ານາແລ້ງ ແລະເຂດໂລຈິສຕິກພາກນະຄອນຫຼວງວຽງຈັນ ຈະມີມູນຄ່າການກໍ່ສ້າງທັງໝົດ 547 ລ້ານໂດລາສະຫະຣັຖ, ຈະໃຊ້ພື້ນທີ່ເຖິງ 327 ເຮັກຕ້າຣ໌, ເລີ່ມຈາກສະຖານີໄຟຟ້າ ດົງໂພສີ ເມືອງຫາດຊາຍຟອງ ລຽບຕາມເສັ້ນທາງ ບ້ານດົງໂພສີ-ບ້ານຊຽງດາ ເຖິງທາງຕັດໃໝ່ ໃນເຂດບ້ານນາຄວາຍໃຕ້ ເມືອງໄຊເສດຖາ. ໂຄງການນີ້ ຈະປະກອບດ້ວຍ 7 ເຂດໃຫຍ່ ເຊັ່ນ ເຂດສາງນ້ຳມັນ, ເຂດຜລິດ ແລະປຸງແຕ່ງສິນຄ້າ ເພື່ອສົ່ງອອກ, ເຂດການຄ້າເສລີ, ເຂດຫ້ອງການບໍລິຫານ ແລະອື່ນໆ ຊຶ່ງຄາດວ່າ ຈະສ້າງໃຫ້ສຳເລັດ ພາຍໃນ 2-3 ປີຂ້າງໜ້ານີ້.