ຊາວບ້ານຜູ້ເສັຽດິນ ທວງ ຄ່າຊົດເຊີຽ

ໄມຊູລີ
2019-10-29
ອີແມວລ໌
ຄໍາເຫັນ
Share
ພິມ
ເຂດ ໂຮງງານ ອຸດສາຫະກັມ ສວັນ-ເຊໂນ
ເຂດ ໂຮງງານ ອຸດສາຫະກັມ ສວັນ-ເຊໂນ
ຮູບພາບຈາກ: ນັກຂ່າວພົລເມືອງ

ປະຊາຊົນບ້ານນາທາດ ແລະ ບ້ານຫລັກ 28 ປະມານ 30 ຄອບຄົວ ຢູ່ເມືອງອຸທຸມພອນ ແຂວງສວັນນະເຂດ ທີ່ເສັຽດິນ ຮວມທັງໝົດ ປະມານ 24 ເຮັກຕາຣ໌ ເມື່ອ 5 ປີກ່ອນ ໃຫ້ແກ່ໂຄງການ ເຂດເສຖກິດພິເສດ ສວັນ-ເຊໂນ ຂອງທາງການລາວ  ຍັງບໍ່ໄດ້ ຄ່າຊົດເຊີຍ, ອິງຕາມຄໍາເວົ້າ ຂອງປະຊາຊົນ ບ້ານນາທາດ ເມືອງອຸທຸມພອນ ແຂວງສວັນນະເຂດ ທ່ານນຶ່ງ ຕໍ່ວິທຍຸເອເຊັຽເສຣີ ໃນວັນທີ 29 ຕຸລາ ນີ້:

“ຫລາຍປີແລ້ວໃດ໋ ຄືວ່າຫັ້ນແຫລະ ເພາະວ່າ ເສັຽພາສີ ເສັຽອາກອນ ຂ້ອຍກໍເສັຽເນາະ ຄັນວ່າຖືກໂຄງການອັນນີ້ ເສຖກິດ ພິເສດ ເຊໂນ ນີ້ແຫລະ ແທນທີ່ສິໄດ້ເງິນທົດແທນ ຂ້ອຍວ່າຕາມຣະບຽບ ກົດໝາຍ ບ້ານເຮົາ ແຕ່ບໍ່ຮູ້ຄືກັນວ່າ ເຂົາຄ້າງຢູ່ໃສ.”

ທ່ານເວົ້າວ່າ ດິນທີ່ເສັຽໃຫ້ໂຄງການ ເຂດເສຖກິດພິເສດ ເປັນດິນ ປະຊາຊົນ ທີ່ເຄີຍໃຊ້ເປັນ ບ່ອນທໍາມາຫາກິນ ມາແຕ່ ລຸ້ນປູ່ຍ່າຕາຍາຍ ເຖິງແມ່ນວ່າ ຈະບໍ່ມີໃບຕາດິນ ເປັນຂອງຕົນເອງ ແຕ່ທຸກປີ ແຕ່ລະຄອບຄົວ ຕ້ອງເສັຽພາສີ-ອາກອນ ທີ່ດິນແກ່ຣັຖ ຕາມຣະບຽບ ກົດໝາຍ ຫາກທາງການຈະເອົາດິນ ໄປພັທນາ ເປັນແນວອື່ນ ກໍຄວນຫາດິນ ບ່ອນໃໝ່ ໃຫ້ປະຊາຊົນໃຊ້ ເປັນບ່ອນທໍາມາຫາກິນ ຫຼືບໍ ກໍຈ່າຍເງິນ ຊົດເຊີຍໃຫ້ແກ່ເຂົາເຈົ້າ ເພື່ອຊື້ດິນຕອນໃໝ່ ທໍາມາຫາກິນ.

ຕໍ່ບັນຫາຄວາມຂ້ອງໃຈ ຂອງປະຊາຊົນ ບ້ານນາທາດ ວ່າ ຍ້ອນຫຍັງ ທາງການລາວ ຈິ່ງບໍ່ຈ່າຍເງິນຄ່າຊົດເຊີຍ ໃຫ້ປະຊາຊົນເທ່ືອນັ້ນ ເຈົ້າໜ້າທີ່ ປະຈໍາເຂດ ເສດຖກິດພິເສດ ສວັນ-ເຊໂນ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນັ້ນວ່າ ດິນໃນຂອບເຂດ ເສຖກິດພິເສດ ບໍ່ໄດ້ກວມເອົາ ດິນ ຂອງປະຊາຊົນ ຕາມທີ່ປະຊາຊາຊົນ ອ້າງອິງ ເພາະດິນທຸກຕອນ ເປັນດິນຂອງຣັຖ:

“ບ້ານນາທາດ ຢູ່ເມືອງອຸທຸມພອນ ຄັນຢູ່ເຂດບໍ່ມີນາດິນ ປະຊາຊົນ ເພາະວ່າເຂດເສຖກິດ ພິເສດເນາະ ໂຊນນັ້ນ ໂຊນນີ້ ມັນກະດຽວມີ ຂອບເຂດຂອງມັນ ດິນຂອງຣັຖບານເດ່.”

ທ່ານວ່າ ຫາກເປັນດິນຂອງປະຊາຊົນ ມີໃບຕາດິນ ຫຼື ເອກກະສານ ການເສັຽພາສີ-ອາກອນ ຍັ້ງຍືນແທ້ ທາງການ ກໍພ້ອມທີ່ຈະ ໄກ່ເກັ່ຽ ແລະ ຊົດເຊີຽເງິນ ໃຫ້ປະຊາຊົນ ຕາມຣະບຽບກົດໝາຍ.

ປັຈຈຸບັນ ເຂດເສຖກິດ ພິເສດ ສວັນ-ເຊໂນ ມີເນື້ອທີ່ທັງໝົດ 950 ເຮັກຕາຣ໌ ເປັນການລົງທຶນຂອງ ຣັຖບານລາວ 100% ເຣີ້ມກໍ່ສ້າງ ມາແຕ່ປີ 2003 ມີບໍຣິສັດເຂົ້າໄປລົງທຶນ ແລ້ວ 97 ບໍຣິສັດ ເປັນຕົ້ນ ໂຮງງານອຸດສະຫະກັມ ປະກກອບຊິ້ນສ່ວນ ເອເລັກໂທນິກ ຈາກ ປະເທດຝຣັງ ໂຮງງານຜລິດ ເລັນສ໌ ແວ່ນຕາ ຈາກປະເທດຍີ່ປຸ່ນ ບໍຣິສັດ ນິກຄອນ ຕັ້ງໂຮງງານປະກອບ Digital  ແລະ ບໍຣິສັດ Toyota ຕັ້ງໂຮງງານຜລິດ ເບາະຣົຖ.

ຄໍາເຫັນ (1)
Share

ຜິດ​ຫວັງ

ການທີ່ຈຳໃຈຢູ່ ບໍ່ເຕັ້ນໂຕນໂຍນຫນີ ຂ້າມນ້ຳຂອງສ່ຽງຕາຍ ໄປປະເທດໄທນຳເພິ່ນ ກໍຄຶດວ່າ ຢາກຮັກສາດິນດອນຕ່ອນຫຍ້າ ມູນມັງບັນພະບຸລັດ ສືບທອດໄວ້ໃຫ້ ແລະ ກໍຄຶດວ່າ ພັກລັດ ຮັກແພງເປັນຫ່ວງເປັນໃຍ ປະຊາຊົນ ໃຫ້ສິດແກ່ຊາວນາ ແລະກຳມະກອນ, ປະຊາຊົນມີສິດໃຊ້ທີ່ດິນທຳກິນ ໃນດິນດອນ ຂອງຕົນເອງ ແລະ ຖ້າໃຜບໍ່ມີກໍມີສິດ ໄປທຳມາຫາກິນ ດິນແດນໃນປະເທດຊາດໄດ້. ແຕ່ໃນໂຕຈິງແລ້ວ ດິນມູນມັງທີ່ພໍ່ແມ່ ມອບໃຫ້ ກໍຍັງຖືກເຈົ້າໜ້າທີ່ລັດ ຜູ້ມີອຳນາດ ມາຂົ່ມຂູ່ເອົາ ບັງຄັບໃຫ້ໜີ ຈົນໄດ້ ຖ້າບໍ່ດັ່ງນັ້ນ ກໍຖືເອົາໄປ ອົບຮົມ ແລະ ຮຽນການເມືອງ ຂົ່ມຂູ່ຕ່າງໆນາໆ ຖືກຈັບ ຖືກຮາວີຕ່າງໆນາໆ. ການທີ່ການປະຕິວັດ ໄດ້ຮັບຜົນສຳເລັດໄດ້ ກໍມີປະຊາຊົນລ້ຽງເກືອ ຕັ້ງແຕ່ ທ່ານ ສຸພານຸວົງ, ໄກສອນ, ໜູຮັກ, ຄຳໄຕ, ພູມມີ ແລະ ຄົນອື່ນໆອີກ. ແຕ່ໃນເມື່ອ ປະຕິວັດໄດ້ແລ້ວ ກັບທໍລະຍົດ ປະຊາຊົນ ຫັກລັງປະຊາຊົນ ໂທດກຳນີ້ ຈະຫ້ອຍຄໍພວກຜູ້ນຳ ໄປຕະຫລອດຊາດໃດກໍຕາມ. ຖ້າຍັງມີຈິດສຳນຶກ ເປັນມະນຸດ ເປັນຄົນຮ່ວມຊາດແທ້ໆ ຄວນຄືນດິນດອນ ໃຫ້ແກ່ປະຊາຊົນ ໃຫ້ແກ່ເຈົ້າຂອງເຂົາຊະ ຢ່າຢາກໄດ້ຂອງເພິ່ນມາເປັນຂອງໂຕ ມັນຝືນກັບ ຄວາມເຊື່ອຖື ທາງສາດສະໜາພຸດຢູ່ແລ້ວ. ຂໍລະບາຍພຽງເທົ່ານີ້.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Oct 31, 2019 07:02 AM

ເຕັມຫນ້າ