ຄ່າຊົດເຊີຍຈາກຂົວນໍ້າຮຸ່ງ ຊາວບ້ານ ຍັງບໍ່ໄດ້

ໄຊຍາ
2019-04-12
ອີແມວລ໌
ຄໍາເຫັນ
Share
ພິມ
ຂົວຂ້າມນໍ້າຮຸ່ງ ເມືອງໄຊຍະບູລີ
ຂົວຂ້າມນໍ້າຮຸ່ງ ເມືອງໄຊຍະບູລີ
ຮູບພາບຈາກ : ກຸສລະຈິຕໂຕ ພິກຂຸ‎

ໂຄງການກໍ່ສ້າງຂົວຂ້າມນໍ້າຮຸ່ງ ໄດ້ສ້າງຜົລກະທົບໃຫ້ກັບປະຊາຊົນ ບ້ານນາຍາວ ແລະ ບ້ານທ່ານາ ເມືອງໄຊຍະບູລີ ແຂວງໄຊຍະບູລີ ຈຳນວນ 17 ຄອບຄົວ ໂດຍໂຄງການດັ່ງກ່າວ ໄດ້ບຸກເບີກ ເນື້ອທີ່ດິນ ຕັ້ງແຕ່ເດືອນ ມົກກະຣາ ຜ່ານມາ ເຊິ່ງໄປກວມເອົາດິນ ຂອງ ປະຊາຊົນ.

ເຖິງແມ່ນວ່າທາງແຂວງໄຊຍະບູລີ ໄດ້ຈັດສັນເນື້ອທີ່ດິນຕອນໃໝ່ໃຫ້ຢູ່ ແຕ່ປະຊາຊົນຍັງບໍ່ທັນໄດ້ຮັບ ການຊ່ອຍເຫລືອ. ປະຊາຊົນຈຳນວນ 17 ຄອບຄົວທີ່ໄດ້ໂຍກຍ້າຍ ອອກຈາກພື້ນທີ່ເດີມ ເພື່ອມອບດິນໃຫ້ ໂຄງນັ້ນຈຳນວນນຶ່ງຕ້ອງໄດ້ເຊົ່າເຮືອນຢູ່ ແລະອີກຈຳນວນນຶ່ງມີຖານະ ທຸກຍາກ ຈື່ງໄດ້ມ້າງເຮືອນຫລັງເກົ່າ ມາປຸກຕູບຢູ່, ດັ່ງຄຳເວົ້າຂອງປະຊາຊົນ ບ້ານນາຍາວ ເມື່ອວັນທີ 11 ເມສາ ນີ້ວ່າ:

"ຈຳນວນນຶ່ງບໍ່ມີບ່ອນຢູ່ກໍ່ໄດ້ໄປເຊົ່າຢູ່ນັ້ນແຫລະ ຈຳນວນນຶ່ງກໍ່ໄດ້ມ້າງກອງໄວ້ຫັ້ນແລ້ວ ກໍ່ມາປຸກຕູບຢູ່ຊົ່ວຄາວ ຍັງບໍ່ທັນໄດ້ຮັບການຊ່ອຍ ເຫລືອເທື່ອເນາະ ຢູ່ບ່ອນເກົ່າມັນຈະຢູ່ບໍ່ໄດ້ ອັນຂົວມາລົງ ແລ້ວດິນ ທີ່ຖົມໃສ່ຂົວ ມັນຈະສູງກາຍເຮືອນຮອດ 10 ແມັດ ດີບໍ່ດີ ອັນຂີ້ດິນ ມັນຈະຖົມເຮືອນ."

ເຖິງວ່າການປົກຄອງທ້ອງຖິ່ນໄດ້ສເນີໄປຫາແຂວງ ຕັ້ງແຕ່ປີ 2018 ຈົນເຖິງປັດຈຸບັນເພິ່ນຍັງວ່າໃຫ້ລໍຖ້າ ຈະໄດ້ສເນີຂັ້ນຕໍ່ໄປ ແຕ່ຍັງບໍ່ທັນ ຮູ້ວ່າຈະໄດ້ ຄຳຕອບເມື່ອໃດ. ນອກຈາກນີ້ ປະຊາຊົນ ບ້ານນາຕໍໃຫຍ່ 10 ປາຍຄອບຄົວກໍ່ໄດ້ຮັບຜົລກະທົບ ຈາກໂຄງການນີ້ເຊັ່ນກັນ ແຕ່ຍັງບໍ່ທັນໄດ້ໂຍກຍ້າຍ ປະຊາຊົນຍັງອາສັຍຢູ່ທີ່ເດີມ ເນື່ອງຈາກໂຄງການຍັງບໍ່ທັນໄດ້ ບຸກເບີກທີ່ດິນ ທີ່ຢູ່ອາສັຍ ບ້ານນາຕໍໃຫຍ່ ເທື່ອ ແຕ່ໄດ້ບຸກເບີກເນື້ອທີ່ ກະສິກັມໄປແລ້ວ.

"ເພາະວ່າເສັ້ນທາງນີ້ເຮົາບໍ່ໄດ້ບຸກເບີກເທື່ອເນາະ ເສັ້ນທາງໃຫ້ຣົດແລ່ນໄປໄດ້ຫັ້ນນ່າ ແລ້ວເຮົານີ້ ກໍ່ສ້າງຂົວກ່ອນຂົວນີ້ ມັນບໍ່ຖືກເຮືອນ ຖືກແຕ່ດິນກະສິກັມ ດິນສວນ ຂອງປະຊາຊົນ ເພິ່ນກໍ່ຖາມ ເນາະ ຫລັງຈາກການກໍ່ສ້າງ ເຮົາໄດ້ລົງມືແລ້ວ ແຕ່ຄ່າຊົດເຊີຍນີ້ກໍ່ຍັງບໍ່ໄດ້ເທື່ອ ແຕ່ວ່າໄດ້ສເນີຢູ່ເນາະ ກໍລໍຖ້າທາງຣັຖ ທາງແຂວງ ທາງເມືອງເພີ່ນກຳລັງ ຄົ້ນຄວ້າພິຈາຣະນາ."

ປັດຈຸບັນໂຄງການຂົວຂ້າມນໍ້າຮຸ່ງ ກຳລັງລົງເສົາເຂັມ ສຳເຣັດແລ້ວ 5,29% . ໂຄງການດັ່ງກ່າວນີ້ຣັຖບານລາວ ເປັນໂຄງການກູ້ຢືມ ບໍ່ມີດອກເບັ້ຍຈາກທະນາຄານ Bank Austis AG ປະເທດ ອອສເຕຣເລັຍ ມູນຄ່າ 6 ລ້ານຢູໂຣ ຫລື ປະມານ 70 ຕື້ກີບ ເພື່ອສ້າງ ຂົວຂ້າມນໍ້າຮຸ່ງ 2 ແຫ່ງ ຄື ຈຸດຂ້າມຣະວ່າງບ້ານທ່ານາ ຫາ ບ້ານນາຍາວ ແລະ ຈຸດຂ້າມບ້ານາເລົາ ຫາ ບ້ານນາຕໍໃຫຍ່.  ທັງສອງ ຂົວມີຂນາດເທົ່າກັນ ກວ້າງ 10,50 ແມັດ ຍາວ 103,40 ແມັດ.

ເຕັມຫນ້າ