ການລ້າຄ້າຂາຍສັດປ່າ ຍັງມີຫຼາຍ

ປັຈຈຸບັນການລ້າ ແລະ ຄ້າຂາຍສັດປ່າຢູ່ລາວ ຍັງມີສະພາບທີ່ໜ້າເປັນຫ່ວງຫຼາຍ ໂດຍສະເພາະຢູ່ເຂດຊົນນະບົດ ທີ່ມີການລ້າສັດປ່າ ເຊິ່ງ ມັນຕິດພັນກັບການດຳຣົງຊີວິດ ຂອງ ປະຊາຊົນ, ດັ່ງ ແຂວງຈຳປາສັກ ກໍແມ່ນແຂວງນຶ່ງ ທີ່ປະເຊີນກັບບັນຫາດັ່ງກ່າວ ໂດຍຍັງພົບວ່າມີ ການລັກລອບລ້າສັດປ່າ ແລະ ຄ້າຂາຍສັດປ່າ ແບບຜິດກົດໝາຍ. ດັ່ງ ເຈົ້າໜ້າທີ່ ຫ້ອງການກະຊວງສິກັມ ແລະ ປ່າໄມ້ ແຂວງຈຳປາສັກ ໄດ້ກ່າວຕໍ່ເອເຊັຽເສຣີ ໃນວັນທີ 20 ສິງຫາ ນີ້ວ່າ: ທາງຂແນງການທີ່ກ່ຽວຂ້ອງ ກໍຊ່ອຍກັນສະກັດກັ້ນ ຕາມດ່ານຕ່າງໆ ໃນແຂວງ:

"ການສະກັດກັ້ນ ຢູ່ທາງດ່ານຫຍັງຫັ້ນແຫຼະ ສ່ວນຫຼາຍມັນເປັນທັງການລັກລອບ ການນໍາເຂົ້າແນວນັ້ນນ່າ ໄປທາງດ່ານປະເພນີທາງເບື້ອງ ສຸຂຸມາຫຍັງພຸ້ນນ່າ ກາກວດ ກາອາສັຍພວກ ຂແນງທາງດ່ານສະກັດກັ້ນ ດຽວນີ້ນະທາງຊ່ອງເມັກ."

ໃນຂນະທີ່ຢູ່ເມືອງຫິນເຫີບ ແຂວງວຽງຈັນ ເຈົ້າໜ້າທີ່ພາຍໃນເມືອງ ຫາກໍທຳຣາຍ ອາວຸດລ້າສັດປ່າ ຂອງປະຊາຊົນ ທີ່ສມັກໃຈມາມອບ ໃຫ້ເຈົ້າໜ້າທີ່ທ້ອງຖິ່ນ ຕາມປະກາດແຈ້ງການເມື່ອ ເດືອນກໍຣະກະດາ ທີ່ຜ່ານມາ ເພື່ອສະກັດກັ້ນ ການລ້າສັດປ່າແບບຜິດກົດໝາຍ, ດັ່ງ ເຈົ້າໜ້າທີ່ເມືອງຫິນເຫີບ ແຂວງວຽງຈັນ ໄດ້ກ່າວວ່າ:

"ກາເພິ່ນໄດ້ມີແຈ້ງການເກັບກູ້ ແລະ ທ້ອນໂຮມອາວຸດລ້າເນື້ອຕ່າງໆ ຫັ້ນຫລະເນາະ ທາງ ປກສ ເພິ່ນກາລົງປະຕິບັດວຽກງານ ແລະ ປະຊາຊົນ ຈຳນວນນຶ່ງເພິ່ນກາ ເກັບກູ້ ແລະ ເອົາຄືນ ມາສົ່ງໃຫ້ທາງອຳນາດການປົກຄອງ ກຸ່ມບ້ານເພື່ອໄປສົ່ງມອບໃຫ້ ທາງຂແນງການ ກ່ຽວຂ້ອງນັ້ນ."

ທ່ານໄດ້ກ່າວຕື່ມວ່າ ປັຈຈຸບັນຢູ່ພາຍໃນເມືອງຫິນເຫີບ ສັດປ່າເຫຼືອນ້ອຍຫຼາຍຍ້ອນໃນໄລຍະ ຜ່ານມາປະຊາຊົນຮວມທັງກຸ່ມຄ້າຂາຍສັດປ່າ ຈາກຕ່າງແຂວງໄດ້ເຂົ້າມາລ້າສັດປ່າ ຈຳນວນຫຼາຍເພື່ອນຳໄປຂາຍ.

ທາງດ້ານເຈົ້າໜ້າທີ່ ເມືອງໝອກ ແຂວງຊຽງຂວາງ ກໍໄດ້ມີແຈ້ງການ ໃຫ້ປະຊາຊົນຫ້າມລ້າສັດປ່າ ແລະ ສັດນໍ້າແບບຜິດກົດໝາຍພ້ອມທັງ ໃຫ້ນຳອາວຸດລ້າສັດປ່າສົ່ງມອບໃຫ້ ເຈົ້າໜ້າທີ່ ຖ້າຜູ້ໃດຝ່າຝືນຈະໄດ້ຮັບໂທດ ຕາມກົດໝາຍ.

"ອອກຄຳສັ່ງຂອງທ່ານເຈົ້າເມືອງ ເປັນນິຕິກັມ ຂອງທ່ານເຈົ້າເມືອງ ຫ້າມລ້າສັດນໍ້າ ສັດປ່າ ຄັນມີຜູ້ຝ່າຝືນແລ້ວແມ່ນເຮົາ ປະຕິບັດຕາມ ກົດໝາຍປ່າໄມ້ອາວຸດລ້າເນື້ອ ອອກຄຳສັ່ງຂອງ ທ່ານເຈົ້າເມືອງກໍຄືຂອງແຂວງ ແລ້ວຍັງສືບຕໍ່ລ້າລະແມ່ນ ເຮົາຈະໄດ້ດຳເນີນຕາມກົດໝາຍ."

ກ່ອນໜ້ານີ້ເຈົ້າໜ້າທີ່ ອົງການອະນຸຮັກສັດປ່າ ໃນລາວ ໄດ້ກ່າວຕໍ່ເອເຊັຽເສຣີ ວ່າປັຈຈຸບັນສັດປ່າ ຫຼາຍຊນິດທີ່ໃກ້ສູນພັນ ຍ້ອນປະຊາຊົນ ຫຼາຍທ້ອງຖິ່ນຍັງຂາດຈິດສຳນຶກ ໃນການອະນຸຮັກ.

"ຢູ່ລາວເຮົານີ້ກໍມີຫຼາຍຢູ່ເດ້ ກ່ຽວກັບເຣື່ອງໂຕສັດປ່າ ໂດຍສະເພາະ ກາຄື ພວກຊະນີກັບໂຕລີງ ນີ້ທີ່ວ່າຫາຍາກຢູ່ແລ້ວ ມູລນີທິ ກາຄືໄດ້ ເຂົ້າໄປປູກຈິດສຳນຶກ ໃຫ້ຂະເຈົ້າຮູ້ ເຖີງຄວາມສຳຄັນ ຂອງສັດປ່ານະ ສະກັດກັ້ນບໍ່ໃຫ້ປະຊາຊົນ ຂະເຈົ້າລ້າສັດແລ້ວກໍຈຳໜ່າຍສັດປ່າ."

ກ່ຽວກັບບັນຫາ ດັ່ງກ່າວຄົນລາວໃນເຂດຊົນນະບົດ ໄດ້ກ່າວວ່າທຸກມື້ນນີ້ ບໍ່ໄດ້ເຫັນສັດປ່າອີກ ເລີຍຍ້ອນທີ່ຜ່ານມາມີ ຄົນລ້າຈຳນວນຫຼາຍ ແລະ ທາງການກໍບໍ່ໄດ້ ສະກັດການລ້າສັດປ່າ ຢ່າງເຂັ້ມງວດ.

"ກາແນວຄົນບໍ່ຮັກສາຫັ້ນແຫຼະ ເມື່ອກ່ອນຫັ້ນນ່າດຽວນີ້ບໍ່ມີເລີຍ ບໍ່ເຫັນ ຮອດສັດປ່າແນ່ ເປັນໝູ ເປັນຟານເປັນຫຍັງມັນບໍ່ມີແລ້ວ ເມື່ອກ່ອນ ກາຍັງອັນນີ້ນິ ພັກຣັຖ ເພີ່ນບໍ່ຈຳກັດເນາະ ແລ້ວກາຄົນກາບໍ່ໄດ້ຮັກສາ ແດ່ໜີມັນກາໜີ ໄປແລ້ວເນາະ."

ເມື່ອເດືອນພືສພາປີ 2018 ຫ້ອງການສຳນັກງານນາຍົກຣັຖມົນຕຼີ ໄດ້ອອກຄຳສັ່ງເລກທີ 5 ກ່ຽວກັບການຈັດການ, ການກວດກາສັດປ່າ ແລະພືດປ່າຕ້ອງຫ້າມເຊິ່ງຄຳສັ່ງດັ່ງກ່າວ ໄດ້ເພີ່ມບົດລົງໂທດ ກ່ຽວກັບການຣະເມີດສັດປ່າ ໃຫ້ມີບົດລົງໂທດ ທີ່ແຮງຂື້ນ. ພ້ອມທັງໄດ້ຫາ ມາຕການຄຸ້ມຄອງສັດປ່າ ຢ່າງເຂັ້ມງວດຂຶ້ນ.

ຢ່າງໃດກໍຕາມປັຈຈຸບັນ ຣັຖບານລາວ ມີກົດໝາຍວ່າດ້ວຍສັດນໍ້າ-ສັດປ່າ ເພື່ອໃຊ້ສຳລັບລົງໂທດ ຜູ້ກະທັມຜິດກ່ຽວກັບສັດປ່າ ເຊິ່ງຢູ່ໃນ ມາຕຣາ 71 ຂອງກົດໝາຍວ່າດ້ວຍບຸກຄົນໃດມີ ຄວາມຜິດທາງອາຍາ ກ່ຽວກັບການລ້າສັດນໍ້າ-ສັດປ່າ ຫາຍາກຈະຖືກດຳເນີນຄະດີອາຍາ ມີໂທດຈຳຄຸກຕັ້ງແຕ່ 3 ເດືອນ ຫາ 5 ປີ ຂຶ້ນຢູ່ກັບ ແຕ່ລະກໍຣະນີ.