ພາຍຸຣະດູຮ້ອນ ພັດເຂົ້າລາວ ນ້ຳຖ້ວມຊັບສິນ ປະຊາຊົນ

ພາຍຸເຂດຮ້ອນ ດີເປຼ່ຊັນ ພັດເຂົ້າລາວ ເຮັດໃຫ້ມີຝົນຕົໜັກຕິດຕໍ່ກັນ ຢູ່ເມືອງຄໍາເກີດ, ເມືອງວຽງທອງ ແຂວງບໍຣິຄໍາໄຊ, ເມືອງຈໍາພອນ ແລະເມືອງວິລະບູຣີ ແຂວງສວັນ ນະເຂດ ແລະເມືອງຊໍາໃຕ້ ແຂວງຫົວພັນ ມາຕັ້ງແຕ່ມື້ວັນທີ 25 ເຖິງວັນທີ 27 ກັນຍານີ້, ເຮັດໃຫ້ນໍ້າຖ້ວມທົ່ງນາ, ສວນມັນຕົ້ນ, ສວນຜັກຂອງປະຊາຊົນ, ໂຮງຮຽນ ແລະຖນົນຫົນທາງໄດ້ຮັບຜົລກະທົບ. ພ້ອມກັນນັ້ນເຂື່ອນ ໄຟຟ້າອາເລື້ອຍຂອງວຽດນາມ ປ່ອຍນໍ້າລົງມາ ເຮັດໃຫ້ນໍ້າຖ້ວມຂົວຂ້າມເຊກອງ ນໍາດ້ວຍ.

ສະເພາະຢູ່ບ້ານນາແປ ເມືອງຄໍາເກີດ ແຂວງບໍຣິຄໍາໄຊ ຝົນຕົກໜັກຕິດຕໍ່ກັນ 2-3 ມື້ທີ່ຜ່ານມາ ເຮັດໃຫ້ນໍ້າພາວໄຫລຖ້ວມທົ່ງນາ ທີ່ເຂົ້າກໍາລັງມານ ແລະສວນມັນຕົ້ນ ທີ່ມັນຕົ້ນກໍາລັງໃຫຍ່ ຊຶ່ງຄາດວ່າ ຈະບໍ່ໄດ້ຮັບຜົລຜລິດ ເຕັມເມັດເຕັມໜ່ວຍ ແລະບາງຄອບຄົວ ຈະບໍ່ມີເຂົ້າກິນພຽງພໍ, ອີງຕາມຄໍາເວົ້າຂອງເຈົ້າໜ້າທີ່ ທີ່ກ່ຽວຂ້ອງ ເມືອງຄໍາເກີດ ນາງນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 27 ກັນຍານີ້.

“ຕົກ 2-3 ມື້ຫລັງນີ້ ມື້ນີ້ເຊົາແລ້ວ ຖ້ວມສວນຖ້ວມນາ ນາມັນຢູ່ຕໍ່າເດ້ ກໍາລັງໃສ່ໜ່ວຍເຂົາກໍດາຍ ມັນສືບກໍ່ ແບບວ່າມັນກໍາລັງຕັ້ງທ້ອງຫັ້ນນ່າ ນໍ້າກໍຖ້ວມມັນກໍຍຸບ ເສັຽຫລາຍເຮັກຕ້າຣ໌ຢູ່ເດ້ ເອົາໄດ້ ແຕ່ມັນບໍ່ໄດ້ 100% ໄດ້ 50 50 ນໍ້າພາວມັນໄຫລມາແຕ່ຊາຍແດນພຸ້ນນ່າ ຊາຍແດນ ລາວ-ວຽດ. ຖ້າພາຍຸເຂົ້າວຽດເຂົ້າຈີນ ແລ້ວຮອດເລີຍ ເອື້ອຍນ່າ.”

ນາງກ່າວຕື່ມວ່າ ສໍາລັບປີນີ້ ນໍ້າຖ້ວມຢູ່ບ້ານນາແປ ເປັນເທື່ອທໍາອິດ ແຕ່ກ່ອນນໍ້າຈະຖ້ວມ ຊາວບ້ານກໍໄດ້ເຝົ້າລະວັງ ໃນຂະນະທີ່ຝົນຕົກແຮງ, ມ້ຽນເຄື່ອງຂອງໄປໄວ້ບ່ອນສູງ ແລະຫລັງຈາກນໍ້າຖ້ວມທົ່ງນາ ແລະສວນມັນຕົ້ນແລ້ວ ເຈົ້າໜ້າທີ່ກໍໄດ້ໄປເກັບກໍາ ຮິບໂຮມຜົລເສັຍຫາຍ ເພື່ອຫາແນວທາງຊ່ອຍເຫລືອ.

ມື້ວານນີ້ ວັນທີ 26 ກັນຍາ ສວນຜັກຂອງປະຊາຊົນ: ຜັກກາດຊອມ, ຜັກກາດຕີນໝີ, ຜັກຫອມປ້ອມ, ຜັກບົ້ງ ທີ່ຢູ່ແຄມຫ້ວຍນໍ້າເງິນ ບ້ານຈອມທອງ ເມືອງວຽງທອງ ແຂວງບໍຣິຄໍາໄຊ ຖືກນໍ້າຖ້ວມຫລາຍ ຮວມໄປເຖິງສວນຜັກນັກຮຽນ ຢູ່ໂຮງຮຽນມັທຍົມຈອມທອງ ກໍຖືກນໍ້າຖ້ວມ ຂະນະນີ້ ອໍານາດການປົກຄອງບ້ານ ກໍາລັງເກັບກໍາຜົລເສັຍຫາຍ ເພື່ອຣາຍງານຂັ້ນເທິງ.

ດັ່ງນາຍຄຣູ ໂຮງຮຽນມັທຍົມຈອມທອງ ກ່າວໃນມື້ດຽວກັນນີ້ວ່າ:

“ເບື້ອງຕົ້ນກໍປູກຜັກປູກຫຍັງ ລຽບນໍ້າຫັ້ນນ່າ. ນໍ້າເງິນນ່າ ໂອ໋. ນໍ້າໄຫລແຮງ ກົກໄມ້ໃຫຍ່ໆ ລໍາຖັງຊິຈົມວ່າຫັກອິຫຍັງແຕ່ວ່າ ປີນີ້ ມັນກໍມີຜົລກະທົບລື່ນທຸກປີ.”

ສໍາລັບຢູ່ບ້ານເຫລົ່າສຸລິຍະ ເມືອງຈໍາພອນ ແຂວງສັວນນະເຂດ ຝົນຕົກຕິດຕໍ່ກັນຫລາຍມື້ ຈົນເຖິງມື້ວານນີ້ ເຮັດໃຫ້ນໍ້າຖ້ວມເຂົ້າໃນນາ 20-30 ເຮັກຕ້າຣ໌ ຊຶ່ງຄາດວ່າ ຈະບໍ່ໄດ້ຜົລຜລິດເລີຍ ແລະບາງຄອບຄົວຈະຂາດເຂີນເຂົ້າກິນ. ເຈົ້າໜ້າທີ່ທີ່ກ່ຽວຂ້ອງ ໄດ້ເກັບກໍາຂໍ້ມູນ ຄວາມເສັຍຫາຍ ເພື່ອຣາຍງານໃຫ້ຂັ້ນເທິງແລ້ວ.

ດັ່ງເຈົ້າໜ້າທີ່ ທີ່ກ່ຽວຂ້ອງ ເມືອງຈໍາພອນ ກ່າວໃນມື້ດຽວກັນນີ້ວ່າ:

“ຜູ້ໃດເປັນນາທົ່ງດຽວ ບໍ່ມີ 2 ທົ່ງ ກໍອຶດຫັ້ນແຫລະ ບາງຄົນກໍມີບ່ອນທົດແທນ ທາງເທິງຫັ້ນເດ້ມັນບໍ່ໄດ້ຖ້ວມ ກໍຍັງພໍໄດ້ແກ້ໜ້ອຍນຶ່ງ ມື້ວານນີ້ກໍຖ້ວມ ແຕ່ມັນໄປຊໍ້າບ່ອນເກົ່າຫັ້ນເດ້. ປີນີ້ຝົນຕົກຕໍ່ເນື່ອງ ເຮັດໃຫ້ມັນບໍ່ມີການບົກແຫ້ງ. ນາລຸ່ມຫັ້ນນ່າ ນໍ້າຖ້ວມທົ່ງນານີ້ ໂອ້ຍເວົ້າແລ້ວ ມັນຕໍ່ມາເລີຍນ່າ 3 ມື້ບົກກໍເຮັດແນວໃດ ເຂົ້າມັນແນບມັນຍູ້ ບາດຍີ້ມັນຖ້ວມເສັດ ມັນເປື່ອຍ ໃບມັນຍັງມີຂີ້ຕົມຢູ່ ໂຕຢ່າງຫັ້ນນ່າ ນໍ້າຖ້ວມຕື່ມອີກ.”

ຢູ່ເມືອງວິລະບູຣີ ປະຊາຊົນກໍສັນຈອນໄປມາຫຍຸ້ງຍາກ ຍ້ອນການສ້າງຂົວຫ້ວຍມາລາ ທີ່ສ້າງມາຫລາຍປີບໍ່ແລ້ວ ນໍ້າຖ້ວມຂົວ ສູງປະມານ 30-40 ຊັງຕີແມັດ ໃນຕອນບ່າຍ ປະມານ 3 ໂມງຂອງວັນທີ 26 ກັນຍານີ້, ເຮັດໃຫ້ຣົຖຜ່ານໄປມາບໍ່ໄດ້ຊົ່ວຄາວ, ທາງທີ່ເປັນດິນແດງ ເປັນຕົມ ເປັນບວກ ເປັນຂຸມ.

ດັ່ງປະຊາຊົນເມືອງວິລະບູຣີ ເວົ້າໃນມື້ວັນທີ 27 ກັນຍານີ້ວ່າ:

“ເຂົາເຈົ້າກໍາລັງເຮັດຂົວຫັ້ນນ່າ ແຕ່ວ່າດຽວນີ້ຍັງໄປໄດ້ຢູ່ ສົມມຸດມື້ນີ້ຫັ້ນນ່າ ຝົນ ມັນບໍ່ມີຝົນ ຄັນຖ້າມັນມີຝົນແບບຕົກຕໍ່ເນື່ອງ ນໍ້າຊິຖ້ວມຢູ່ບ່ອນຫ້ວຍມາລາຫັ້ນນ່າ. ເຂົາເຈົ້າຊິເຮັດຂົວ ແຕ່ຍັງບໍ່ແລ້ວ ເຂົາເຈົ້າເຮັດແຕ່ດົນແລ້ວ ຍັງບໍ່ແລ້ວເທື່ອ ເທົ້າປານນີ້ຢູ່ ນໍ້າຍັງຖ້ວມຢູ່ ຝົນຕົກໝົດມື້ຊື່ໆກໍຖ້ວມແລ້ວ.”

ຢູ່ເມືອງຊໍາໃຕ້ ແຂວງຫົວພັນ ຝົນກໍຕົກໜັກ, ດິນເຈື່ອນຖົມທາງ ລະຫວ່າງບ້ານນໍ້າໃຕ ແລະບ້ານຊໍາໃຕ້ ເຮັດໃຫ້ຣົຖໃຫຍ່ ບໍ່ສາມາດແລ່ນຜ່ານໄດ້, ໄປໄດ້ແຕ່ຣົຖຈັກ.

ອີງຕາມການແຈ້ງເຕືອນ ກ່ຽວກັບລະດັບນໍ້າເຊກອງ ແຂວງອັດຕະປື, ບໍຣິສັດຫຸ້ນສ່ວນເຂື່ອນໄຟຟ້ານໍ້າຕົກ ພາກກາງວຽດນາມ ໄດ້ປ່ອຍນໍ້າອອກຈາກເຂື່ອນ ອາເລື້ອຍ ໃນປະຣິມານ 100-600 ແມັດກ້ອນຕໍ່ວິນາທີ ໃນມື້ວັນທີ 26 ກັນຍານີ້, ເຮັດໃຫ້ລະດັບນໍ້າເຊກອງສູງຂຶ້ນ ຈາກ 3.6 ແມັດ ເປັນ 7.6 ແມັດ ຂະນະທີ່ລະດັບນໍ້າເຕືອນໄພ ຢູ່ທີ່ 17.5 ແມັດ ແລະເຂດອັນຕະລາຍ 18.5 ແມັດ.

ການປ່ອຍນໍ້າ ອອກຈາກເຂື່ອນ ຂອງວຽດນາມ ເຮັດໃຫ້ນໍ້າໃນເຂດທ່າບັກ ເມືອງກະລຶມເກົ່າສູງຂຶ້ນ, ຣົຖບໍ່ສາມາດແລ່ນຂ້າມຂົວໄດ້.

ດັ່ງເຈົ້າໜ້າທີ່ທີ່ກ່ຽວຂ້ອງ ເມືອງກະລຶມກ່າວໃນມື້ດຽວກັນນີ້ວ່າ:

“ຂົວຂ້າມນໍ້າເຊກອງຫັ້ນແຫລະ ໂຕເມືອງເກົ່າຫັ້ນແຫລະ ກໍຖ້ວມຫັ້ນແຫລະ ຣົຖຂ້າມບໍ່ໄດ້ຫັ້ນແຫລະ ແຕ່ບໍ່ແມ່ນຂົວໃຫຍ່ດອກ. ຄັນຂົວໃຫຍ່ຢູ່ເທສບານແຂວງຫັ້ນ ບໍ່ຖ້ວມດອກ ນໍ້າ ໃຫຍ່ແຫລະຍາມນີ້ ຄັນວ່າຝົນບໍ່ຕົກບໍ່ເປັນຫຍັງ ປົກຕິຄັນແຕກ ກໍບໍ່ເປັນຫຍັງ ຄັນວ່າບໍ່ຕົກທາງວຽດ ກໍບໍ່ເປັນຫຍັງ ເຂົາບໍ່ປ່ອຍເຂື່ອນ ຄັນມັນຕົກທາງວຽດເຂົາປ່ອຍເຂື່ອນ ຢ້ານເຂື່ອນແຕກ.”

ທ່ານກ່າວຕື່ມວ່າ ມາຮອດມື້ນີ້ ຍັງບໍ່ມີຣາຍງານ ຈາກອໍານາດການປົກຄອງບ້ານ ກ່ຽວກັບເຣື່ອງຜົລກະທົບ ຕໍ່ຜົລຜລິດ ແລະສັດລ້ຽງ ຂອງປະຊາຊົນ ຢູ່ເມືອງກະ ລຶມນີ້ເທື່ອ.

ແຕ່ເຖິງຢ່າງໃດກໍຕາມ ໃນມື້ວັນທີ 25 ກັນຍານີ້ ກົມອຸຕຸນິຍົມ ແລະອຸທົກກະສາດ ກໍໄດ້ແຈ້ງເຕືອນພາຍຸເຂດຮ້ອນ ດີເປຣສຊັນ ໃນວັນທີ 25-27 ກັນຍາ 2023 ນີ້ວ່າ ບາງທ້ອງຖິ່ນ ແຕ່ແຂວງພາກກາງ ຫາພາກໃຕ້ຂອງລາວ ຈະໄດ້ຮັບຜົລກະທົບ ຈາກພາຍຸ ດີເປຣສຊັນ ທີ່ກໍາລັງຢູ່ໃກ້ກັບແຄມຝັ່ງທະເລ ຂອງວຽດນາມ ແລະກໍາລັງທີ່ຈະເຄື່ອນເຂົ້າປະເທດລາວ ຊຶ່ງຈະເຮັດໃຫ້ຝົນຕົກ ແຕ່ຄ່ອຍຫາໜັກ ແລະຈະມີລົມພັດແຮງ ບາງພື້ນທີ່ ແລະອາດເກີດນໍ້າຖ້ວມໄດ້.