ທາງການລາວອະທິບາຍ ຄ່າກວດໂຄວິດ-19

ສຸພັດຕາ
2021-01-05
Share
ທາງການລາວອະທິບາຍ ຄ່າກວດໂຄວິດ-19 ທ່ານ ຮສ. ດຣ. ບຸນກອງ ສີຫາວົງ ຣັຖມົນຕຣີກະຊວງສາທາຣະນະສຸຂ ຄາດວ່າປີ 2021 ປະຊາຊົນລາວປະມານ 1 ລ້ານ 4 ແສນຄົນ ຈະໄດ້ຮັບວັກຊິນກັນພຍາດໂຄວິດ-19 ໂດຍການຊ່ວຍເຫຼືອຈາກ GAVI
ສູນຂ່າວສານການແພດສຸຂສຶກສາ

ທາງການລາວຊີ້ແຈງສາເຫດ ທີ່ເກັບຄ່າບໍຣິການ ກວດວິເຄາະເຊື້ອພຍາດໂຄວິດ-19 ສູງເຖິງ 1 ລ້ານ 2 ແສນກີບ ນັ້ນກໍເພາະວ່າ ຣັຖບານລາວ ຕ້ອງໄດ້ສັ່ງຊື້ອຸປກອນການວິເຄາະ ເຊື້ອນັ້ນມາຈາກຕ່າງປະເທດ, ຜ່ານມາອຸປກອນ ແລະ ເຄມີທີ່ນໍາໃຊ້ໃນການກວດ ວິເຄາະ ເຊື້ອພຍາດໂຄວິດ-19, ສ່ວນຫຼາຍ ໄດ້ຮັບການຊ່ອຍເຫຼືອ ຈາກ ປະເທດເພື່ອນບ້ານ ແລະ ສາກົລ ຈຶ່ງສາມາດກວດວິເຄາະ ໃຫ້ປະຊາຊົນ ໂດຍບໍ່ຕ້ອງເກັບຄ່າບໍຣິການ, ແຕ່ປັດຈຸບັນ ແມ່ນມີຈໍາກັດ ແລະ ສາກົລ ກໍຢາກໃຫ້ປະເທດລາວກຸ້ມຕົນເອງ.

ເຖິງຢ່າງໃດກໍຕາມ ການເກັບຄ່າບໍຣິການ ກວດວິເຄາະເຊື້ອໂຄວິດ-19 ນັ້ນ ແມ່ນເກັບນໍາແຕ່ກຸ່ມເປົ້າໝາຍ ຮວມທັງນັກທຸຣະກິຈ ເທົ່ານັ້ນ, ສ່ວນຜູ້ທີ່ມີຣາຍໄດ້ໜ້ອຍເຊັ່ນຄົນງານ ຈະບໍ່ໄດ້ຈ່າຍ, ດັ່ງເຈົ້າໜ້າທີ່ສະເພາະກິຈ ປ້ອງກັນເຊື້ອພຍາດໂຄວິດ-19 ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 5 ມົກກະຣາ 2021 ນີ້ວ່າ:

“ຕອນນີ້ອົງການສາກົລ ຂະເຈົ້າກະເລີ້ມ ບໍ່ໃຫ້ການສນັບສນຸນ ແລະ ເພິ່ນບອກໃຫ້ລາວ ມີຄວາມເຂັ້ມແຂງ ດ້ວຍຕົນເອງ ເລີຍເຮັດ ເປັນກອງທຶນ ເພາະວ່າ ຄ່ານໍ້າຢາກວດວິເຄາະ ແລະ ກໍຄ່າຊຸດ ຊຸດປ້ອງກັນ ຕ້ອງນໍາເຂົ້າກໍຕ້ອງໄດ້ເກັບ ຈາກຜູ້ທີ່ມີຄວາມສາມາດ ຈ່າຍໄດ້ ຫັ້ນນະເນາະ.”

ທ່ານກ່າວຕື່ມວ່າ ສໍາລັບຄົນງານລາວ ທີ່ມີຣາຍໄດ້ໜ້ອຍ ທັງຢູ່ໃນລາວ ແລະ ເຮັດວຽກຢູ່ຕ່າງປະເທດ ທີ່ຕ້ອງການກັບມາລາວ ກໍສາມາດ ເຂົ້າຮັບການກວດເຊື້ອພຍາດໂຄວິດ-19 ໄດ້ ໂດຍບໍ່ຕ້ອງເສັຽຄ່າໃຊ້ຈ່າຍ.

ເຈົ້າໜ້າທີ່ກະຊວງສາທາຣະນະສຸຂ ທີ່ ນະຄອນຫຼວງວຽງຈັນ ທ່ານນຶ່ງ ກ່າວວ່າ ຣາຍຣະອຽດ ຂອງການເກັບຄ່າກວດວິເຄາະເຊື້ອ ພຍາດໂຄວິດ-19 ນັ້ນແມ່ນສໍາລັບຄົນທົ່ວໄປເຊັ່ນ ນັກທຸຣະກິຈ, ຄົນງານຕ່າງປະເທດຈະເກັບ 1 ລ້ານ 2 ແສນກີບ, ສ່ວນຄົນປ່ວຍ, ຂ້າຣາຊການ, ນັກສຶກສາ ຈະເກັບ 50,000 ກີບ ແລະ ສໍາລັບຄົນງານລາວ ທີ່ມີຣາຍໄດ້ໜ້ອຍ ກໍບໍ່ຕ້ອງເສັຽຄ່າກວດ, ດັ່ງທ່ານກ່າວ ຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຄັນແມ່ນ 1 ລ້ານ 2 ແສນ ນິ່, ແມ່ນຄົນທົ່ວໄປ ຫຼືວ່າ ແມ່ນແຮງງານຕ່າງປະເທດ, ນັກທຸຣະກິຈ, ຫຼືວ່າ ພະນັກງານ ອົງກອນ ທົ່ວໄປ, 50 ພັນກີບນິ່, ແມ່ນຄົນປ່ວຍ ຫຼືວ່າ ພວກຂ້າຣາຊການ ຫຼືວ່າ ນັກສຶກສາ ຖ້າເປັນແຮງງານລາວ ເປັນກໍຣະນີ ທີ່ຣາຍໄດ້ ໜ້ອຍ, ຂະເຈົ້າກໍບໍ່ໃຫ້ເສັຽຄ່າກວດ ຄືກວດຟຣີເລີຍ.”

ເຈົ້າໜ້າທີ່ທ່ານນີ້ ກ່າວຕື່ມວ່າ, ການທີ່ ມີການເກັບຄ່າບໍຣິການ ການກວດເຊື້ອໂຄວິດ-19 ກໍຍ້ອນວ່າ, ອຸປກອນບາງຢ່າງ ລາວ ບໍ່ສາມາດຜລິດເອງໄດ້, ຕ້ອງນໍາເຂົ້າມາຈາກຕ່າງ ປະເທດ ເຮັດໃຫ້ມີຄ່າໃຊ້ຈ່າຍສູງ, ແຕ່ສໍາລັບກຸ່ມຄົນງານລາວ ຫຼືວ່າ ຄົນລາວ ທີ່ມີຣາຍໄດ້ໜ້ອຍນັ້ນ ກໍຕ້ອງໄດ້ພິຈາຣະນາ ເປັນກໍຣະນີໄປ ວ່າຜູ້ໃດ ໄດ້ກວດຟຣີ.

ປະຊາຊົນທ່ານນຶ່ງ ກ່່າວວ່າ ເຫັນແຈ້ງການ ເຣື່ອງການເກັບຄ່າກວດເຊື້ອພຍາດແລ້ວ, ແຕ່ກໍຮູ້ສຶກສົງສັຍຢູ່ວ່າ ຄ່າກວດເຊື້ອພຍາດ ໂຄວິດ-19 ທີ່ແທ້ຈິງນັ້ນ ມັນເທົ່າໃດກັນແທ້, ດັ່ງທີ່ທ່ານກ່າວວ່າ:

“ກໍເຫັນແຈ້ງການໂຕນັ້ນຢູ່, ແຕ່ວ່າມັນມີໂຕນຶ່ງອອກມາ ແຈ້ງການອອກມາມີຣາຍຣະອຽດ ມີໂຕນຶ່ງອອກມາແມ່ນວ່າ ປະຊາຊົນລາວ ກວດຟຣີ ມັນຍັງສັບສົນກັນຢູ່ນະ.”

ອີງຕາມການຣາຍງານຂອງສື່ທ້ອງຖິ່ນຢູ່ລາວ ເມື່ອວັນທີ 4 ມົກກະຣາ 2021 ທ່ານ ບຸນກອງ ສີຫາວົງ, ຣັຖມົນຕຣີ ກະຊວງ ສາທາຣະນະສຸຂ ໄດ້ອອກແຈ້ງການວ່າ, ຜ່ານມາອຸປກອນ ແລະເຄມີ ທີ່ນໍາໃຊ້ໃນ ການກວດວິເຄາະ ເຊື້ອພຍາດໂຄວິດ-19 ນັ້ນ, ສ່ວນຫຼາຍ ໄດ້ຮັບການຊ່ອຍເຫຼືອ ຈາກປະເທດເພື່ອນມິດ ແລະ ສາກົລ ຈຶ່ງສາມາດກວດວິເຄາະ ໃຫ້ປະຊາຊົນ ໂດຍບໍ່ຕ້ອງເກັບຄ່າ ບໍຣິການ, ແຕ່ປັດຈຸບັນມີຈໍານວນຈໍາກັດ ແລະ ສາກົລ ຢາກໃຫ້ກຸ້ມຕົນເອງ, ດັ່ງນັ້ນ ການວິເຄາະພຍາດໂຄວິດ-19 ແມ່ນຈໍາເປັນ ຕ້ອງໄດ້ເກັບຄ່າບໍຣິການ ໂດຍສະເພາະ ນໍານັກທຸຣະກິຈ ແລະ ຜູ້ທີ່ມີເງື່ອນໄຂ ທີ່ຈະຈ່າຍໄດ້, ແຕ່ກໍຣະນີກຸ່ມເປົ້າໝາຍ ແມ່ນອີງຕາມ ຂໍ້ຕົກລົງ ຂອງກະຊວງສາທາຣະນະສຸຂ ເລຂທີ 3439 ລົງວັນທີ 22 ທັນວາ 2020 ເປັນຕົ້ນ: ນັກທຸຣະກິຈ, ນັກທ່ອງທ່ຽວ, ບຸກຄົນ ທົ່ວໄປ, ແຮງງານຕ່າງປະເທດ ແລະ ຜູ້ສມັກໃຈກວດ ຊຶ່ງຕ້ອງເສັຽຄ່າ ບໍຣິການ 1 ລ້ານ 2 ແສນກີບ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ