ຄວາມຄືບໜ້າ ເດັກນ້ອຍລາວ 16 ຄົນເຫຍື່ອຄ້າມະນຸສ ໃນກາສິໂນຈີນ ທີ່ປະເທດພະມ້າ

ກ່ຽວກັບເຣື່ອງ ເດັກນ້ອຍລາວ 16 ຄົນ ໃນນີ້ ມີເພດຍິງ 8 ຄົນ ແລະເພດຊາຍ 8 ຄົນ ມີອາຍຸ ລະຫວ່າງ 15-22 ປີ ເຊິ່ງຖືກປ່ອຍອອກມາຈາກໂຮງກາສິໂນ ໂກຊາຍ ຂອງຈີນ  ໃນເມືອງເມັຽວະດີ ປະເທດພະມ້າ ຕັ້ງແຕ່ວັນທີ 29 ເດືອນສິງຫາ 2023, ແຕ່ປັດຈຸບັນ ຍັງບໍ່ທັນໄດ້ກັບປະເທດລາວເທື່ອ ພວກຂະເຈົ້າ ຍັງຖືກກັກຂັງ ຢູ່ທີ່ ສະຖານີຕໍາຣວດ ຕມ ເມືອງເມັຽວະດີ ປະເທດພະມ້າຢູ່ ຊຶ່ງເຈົ້າໜ້າທີ່ ທີ່ກ່ຽວຂ້ອງ ໃນນະຄອນຫຼວງວຽງຈັນ ກໍຍັງລໍຖ້າ ການແຈ້ງຕອບກັບມາ ຈາກສະຖານທູດລາວ ທີ່ປະຈໍາຢູ່ປະເທດພະມ້າ ນັ້ນຢູ່, ອີງຕາມຄວາມເວົ້າ ຂອງເຈົ້າໜ້າທີ່ທີ່ກ່ຽວຂ້ອງ ໃນນະຄອນຫຼວງວຽງຈັນ ທ່ານນຶ່ງ ໄດ້ກ່າວຕໍ່ວິທຍຸເອເຊັຽເສຣີ ເມື່ອວັນວັນທີ 13 ຕຸລາ 2023 ວ່າ:

“ຕອນນີ້ ທາງສະຖານທູດທາງລາວເຮົາ ກໍາລັງເຮັດໜັງສືສເນີ ສະຖານທູດລາວ ປະຈໍາຢູ່ພະມ້ານ່າ ເພິ່ນກໍາລັງ ເຮັດໜັງສືສເນີ ຫາທູດພະມ້າ ສເນີກ່ຽວກັບ ການຊ່ວຍເຫຼືອຫັ້ນແຫຼະ ເຮົາກະຍັງລໍຖ້າຄໍາຕອບ ຈາກທາງທູດ (ສະຖານທູດລາວ ທີ່ປະຈໍາຢູ່ປະເທດພະມ້າ) ຫັ້ນແຫຼະ ເພາະວ່າ ເຮົາກະໄດ້ປະສານທາງທູດແລ້ວເດ້ ວ່າຊິມີແຜນແບບໃດ, ສົ່ງແບບໃດ, ຄ່າໃຊ້ຈ່າຍອີ່ຫຍັງຫັ້ນນ່າ ລະບາດນີ້ ເຮົາກະຍັງລໍຖ້າຄໍາຕອບຈາກ ທູດປະຈໍາຢູ່ພະມ້າຫັ້ນ (ທູດລາວ ປະຈໍາຢູ່ປະເທດພະມ້າ) ອີກຢູ່ ເພິ່ນກະຍັງລໍຖ້າຂໍ້ມູນ ຢູ່ຄືກັນຫັ້ນແຫຼະ.”

ເຈົ້າໜ້າທີ່ທ່ານນີ້ ຍັງອະທິບາຍໃຫ້ຮູ້ເຖິງສາເຫດ ທີ່ເດັກນ້ອຍລາວ ທັງ 16 ຄົນນີ້ ຖືກກັກຂັງຢູ່ທີ່ນັ້ນ ເປັນເວລາຫຼາຍອາທິດ ນີ້ວ່າ:

“ຄັນວ່າຍ້ອນຫຍັງຫວາ ນຶ່ງມາກະ ເຂົ້າເມືອງຜິດກົດໝາຍ ກະມັນບໍ່ມີ ພາສປອດ ວີຊ້າ ອີ່ຫຍັງນ່າ, ສອງມາ ເປັນຄົນທີ່ລັກລອບເຂົ້າເມືອງເນາະ ຂໍ້ມູນທາງຂອງທາງສະຖານທູດ ກົງສູນເພິ່ນແຈ້ງຕອບມາ ວ່າພວກຣາຍຊື່ 16 ຄົນນີ້ ມັນບໍ່ມີ ສະນັ້ນໃຫ້ເຮົານີ້ໄດ້ລໍຖ້າ ເພາະວ່າທາງທູດ ເພິ່ນກະໄດ້ເຮັດໜັງສືສເນີ ຊ່ວຍຢູ່ ເພື່ອມີວິທີການ ຊິສົ່ງມອບ-ຮັບແບບໃດຫັ້ນນ່າ ເພາະວ່າທາງເຮົາ (ປະເທດລາວ) ຍັງບໍ່ໄດ້ເຊັນສັນຍາ IOM ກັບພວກພະມ້າ ຫັ້ນນ່າ ມັນກະເລີຍມີຂໍ້ຫຍຸ້ງຍາກໂຕນີ້ ນີ້ແຫຼະ IOM ມັນກະເປັນແບບອັນ ສູນໃຫ້ການຊ່ອຍເຫຼືອ ພວກຕ້ານການຄ້າມະນຸຸດນີ້ນ່າ.)

ເຈົ້າໜ້າທີ່ທ່ານດຽວກັນນີ້ ຍັງຝາກຄວາມເຖິງ ບັນດາພໍ່ແມ່ຜູ້ປົກຄອງ ຂອງເດັກນ້ອຍ ທັງ 16 ຄົນດັ່ງກ່າວ ນີ້ນໍາດ້ວຍ:

“ບໍ່ຕ້ອງເປັນຫ່ວງ ມີແຕ່ລໍຖ້າ ເພາະວ່າເຂົາຢູ່ຫັ້ນ ເຂົາກະຢູ່ດີແລ້ວ ເພາະວ່າມັນຕົກຖືກມືຕໍາຣວດແລ້ວ ບໍ່ໄດ້ຢູ່ໃນໂຕເຂດ ເມັຽລະວະດີ ລະຫັ້ນນ່າ ມັນກະຊິບໍ່ເປັນຫຍັງຫຼາຍດອກ.”

ທາງດ້ານພໍ່ແມ່ຜູ້ປົກຄອງ ຂອງເດັກນ້ອຍ ໃນແຂວງຫຼວງນໍ້າທາ 1 ໃນ 16 ຄົນ ທີ່ລູກໄດ້ອອກມາ ຈາກໂຮງກາສິໂນ ຂອງຈີນ ແລະຮູ້ຂ່າວຄວາມຄືບໜ້າຂອງລູກຊາຍ ກໍກ່າວດ້ວຍຄວາມດີໃຈ ຕໍ່ວິທຍຸເອເຊັຽເສຣີ ໃນວັນທີ 18 ຕຸລາ 2023 ວ່າ:

“ກໍດີອົກດີໃຈຫັ້ນແຫຼະ ໃນເມື່ອວ່າ ຮູ້ຂ່າວອັນນີ້ຂຶ້ນມາ ກໍວ່າດີໃຈ ວ່າ ເອີ່...ເພິ່ນກໍຄືວ່າໄດ້ເບິ່ງໄດ້ແຍງຫັ້ນນ່າ ເພິ່ນກໍຄືວ່າມີການປະກອບອີ່ຫຍັງ ເລັກໆໜ້ອຍໆ ກະດີໃຈຢູ່ ວ່າຮັບຮູ້ວ່າ ລູກຢູ່ບ່ອນນີ້ບ່ອນນັ້ນ ລະຂະເຈົ້າປອດພັຍດີ ໄດ້ຢູ່ດີກິນດີ ກະດີໃຈຢູ່ແລ້ວ ເປັນແນວໃດ ກະຢາກໃຫ້ທາງເຈົ້າໜ້າທີ່ເພິ່ນ ຮີບດ່ວນອີກຫັ້ນນ່າ ເປັນແນວໃດກໍ ໃຫ້ເພິ່ນເລັ່ງລັດອີກ ເປັນໄປໄດ້ກໍເນາະ ຄືວ່າຫັ້ນແຫຼະ ພໍ່ແມ່ແຕ່ລະຄົນ ກໍລໍຖ້າ ມັນກະດົນເຕີບແລ້ວເນາະ ຮອດວັນທີ 29 ກໍໄດ້ 2 ເດືອນລະ ຄັນເປັນໄປໄດ້ກະຢາກໃຫ້ເອົາອອກມາໄວໆນີ້.”

ຜູ້ເປັນແມ່ຜູ້ນີ້ ຍັງກ່າວເຖິງເຣື່ອງຄ່າໃຊ້ຈ່າຍຕ່າງໆ ຂອງການເດີນທາງກັບມາປະເທດລາວ ຂອງລູກເຕົ້ານັ້ນວ່າ:

“ຄັນທາງລ້າທາງການເພິ່ນຊ່ວຍ ກະດີອົກດີໃຈນໍາ ຄັນວ່າ ໂອ້..ທາງລ້າທາງການເພິ່ນວ່າ ໂອ່ ຄືຊິບໍ່ມີ ການຊິຊ່ວຍເຫຼືອແລ້ວ ຄັນເພິ່ນວ່າ ໂອ່ຍ...ມັນບໍ່ງົບ ໃນວ່າ ເດັກນ້ອຍນີ້ ຂະເຈົ້າກະໄປທາງທີ່ຜິດກົດໝາຍ ບໍ່ຊ່ວຍເດີ້ ມີແຕ່ວ່າ ຊ່ວຍເລັ່ງຊ່ວຍແລ່ນຊໍ່ານີ້ ກະດີອົກດີໃຈ ກະບໍ່ເປັນຫຍັງ ແຕ່ວ່າເຣື່ອງຄ່າໃຊ້ຈ່າຍ ຄ່າກິນຄ່າຢູ່ ກໍຄັນວ່າເພິ່ນບໍ່ຊ່ວຍກໍ ພໍ່ແມ່ທາງນີ້ກໍຊ່ອຍກະບໍ່ເປັນຫຍັງ ພໍ່ແມ່ກະຈະອອກ ກະບໍ່ເປັນຫຍັງ.”

ແມ່ຂອງເດັກນ້ອຍ ໃນແຂວງຫຼວງນໍ້າທາ ຄົນທີ 2 ທີ່ລູກຊາຍ ໄດ້ອອກມາຈາກກາສິໂນຂອງຈີນ ເຊັ່ນກັນນັ້ນ ກໍກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ດີໃຈຫຼາຍໂອ່ເນາະ ໄດ້ຮູ້ຂ່າວ ລູກສົ່ງໃຫ້ແມ່ເຖົ້າຮູ້ແບບນີ້ ແມ່ເຖົ້າກໍ ຂີນອົກຂີນໃຈ ນ້ອຍອົກນ້ອຍໃຈທຸກມື້ ຂີນອົກຂີນໃຈ ເປັນຫ່ວງລູກຫຼາຍຢ່າງນັ້ນ ດຽວນີ້ ກໍກະໄວ້ອົກໄວ້ໃຈນໍາລູກແບບນີ້ອໍ້ ລູກຍັງຂ່າວ ຍັງສົ່ງຂ່າວໃຫ້ແມ່ເຖົ້າ ແມ່ເຖົ້າກໍດີໃຈຕາມນີ້ ເປັນແນວໃດກະຂໍນໍາ ຂໍນົບຂໍໄຫວ້ແຫຼະ ເປັນແນວໃດກະສົ່ງຂ່່າວໃຫ້ແມ່ເຖົ້າແດ່ ເປັນແນວໃດກໍ ໃຫ້ແມ່ເຖົ້າດີໃຈຫັ້ນ.”

ສ່ວນຜູ້ເປັນເອື້ອຍຜູ້ນຶ່ງ ຢູ່ນະຄອນຫຼວງວຽງຈັນ ທີ່ໄດ້ຮູ້ຂ່າວຄວາມຄືບໜ້າ ຂອງນ້ອງສາວ ທີ່ໄດ້ອອກມາພ້ອມກັນ 1 ໃນ 16 ຄົນນີ້ ກໍກ່າວຄືກັນວ່າ:

“ຄັນວ່າໄດ້ຍິນຂ່າວແບບນີ້ ລະກະດີໃຈແຫຼະ ກະມີແຕ່ຊິແຈ້ງທາງພໍ່ແມ່ຕື່ມ ວ່າໃຫ້ເພິ່ນແບບ ບໍ່ໃຫ້ຄຶດຫຼາຍກ່ອນນັ້ນຫັ້ນນ່າ ໃຫ້ເພິ່ນແບບ ໃຫ້ໂລ່ງໃຈແດ່ໜ້ອຍນຶ່ງຫັ້ນນ່າ ວ່າໄດ້ຍິນຂ່າວ ທີ່ວ່າ ປອດພັຍບໍ່ ເສັຍຊີວິດ ລະກະບໍ່ເປັນຫຍັງຫັ້ນນ່່າ.”

ໃນຂະນະທີ່ ແມ່ຂອງເດັກນ້ອຍຍິງສາວ ຄົນນຶ່ງ ໃນແຂວງຫຼວງນໍ້າທາ ທີ່ລູກສາວ ໄດ້ອອກມາ 1 ໃນ 16 ຄົນ ກໍກ່າວດ້ວຍຄວາມທໍ້ໃຈ ວ່າ:

“ເຮົາຊິເຮັດຈັ່ງໃດນໍ້ນ້ອງ ຈັ່ງຈຶ່ງຊິຊ່ອຍເຫຼືອເດັກນ້ອຍນັ້ນໄດ້ ຫຼືວ່າ ເຂົາຈັບກັກຂັງ ແຮງໂພດບໍ ຫຼືວ່າຈັ່ງໃດດຽວນີ້ນ່າ ເອື້ອຍແລ້ວ ຈົນຊິສະຫຼົບແລ້ວນ່າ ເຣື່ອງນີ້ນ່າ ຖືກຄວບຄຸມໄປນີ້ ແມ່ນຍ້ອນຫຍັງບາດນີ້ນ່າ ປານໃດເຂົາຈຶ່ງຈິໄດ້ປ່ອຍໂຕ ແມ່ນຫຍັງໆຫັ້ນນ່າ ເຂົາຊິຂັງໄວ້ເຮັດຫຍັງ ດົນປານນັ້ນເນາະ.”

ກ່ຽວກັບເຣື່ອງເດັກນ້ອຍລາວ 16 ຄົນ ທີ່ໄດ້ອອກມາຈາກໂຮງກາຊິ ໂກຊາຍ ຂອງຈີນ ໃນເມືອງເມັຽວະດີ ປະເທດພະມ້າ ຕັ້ງແຕ່ວັນທີ 29 ເດືອນສິງຫາ 2023 ແລະຍັງຖືກກັກຂັງ ຢູ່ທີ່ ສະຖານີຕໍາຣວດ ຕມ ເມືອງເມັຽວະດີ ມາໄດ້ເກືອບ 2 ເດືອນນີ້ ທ່ານຟິວ ໂຣເບິດຊັ້ນ ຮອງຜູ້ອໍານວຍການ ອົງການຊິ້ງຊອມ ດ້ານສິດທິມະນຸສ ປະຈໍາເອເຊັຽ ມີຄວາມເຫັນກ່ຽວກັບເຣື່ອງນີ້ ຕໍ່ວິທຍຸເອເຊັຽເສຣີ ໃນວັນທີ 17 ຕຸລາ 2023 ວ່າ:

“ຕາມທັມມະດາແລ້ວ ອັນນີ້ກະເປັນ ຄວາມຮັບຜິດຊອບ ລະຫວ່າງຣັຖບານພະມ້າ ແລະຣັຖບານລາວເນາະ ແລະກໍຣັຖບານລາວ ກະຕ້ອງຈີ້ໃຫ້ຣັຖບານພະມ້າ ເຮັດວຽກ ສົ່ງເດັກນ້ອຍເລົ່ານັ້ນກັບບ້ານ ເພື່ອກັບໄປຫາຄອບຄົວ ອັນນີ້ເຮົາກະບໍ່ຮູ້ວ່າ ທາງພະມ້າ ແລະລາວ ເຂົາມີເຫດຜົນອັນໃດ ທີ່ຈະເຮັດວຽກຊ້າຂນາດນີ້ ແຕ່ຈັ່ງໃດ ເດັກນ້ອຍຈໍານວນດັ່ງກ່າວ ກະຕ້ອງໄດ້ກັບບ້ານໃຫ້ໄດ້ເນາະ ແລະກໍຄວນ ຈະກັບໃຫ້ໄວທີ່ສຸດ ມັນເຣື່ອງທີ່ໜ້າຕົກໃຈເນາະ ວ່າເປັນຫຍັງ ມັນຈຶ່ງເປັນແບບນີ້ (ທີ່ເດັກນ້ອຍນັ້ນ ຍັງຕິດຢູ່ຫັ້ນດົນປານນີ້) ທີ່ຈິງແລ້ວ ຄວນຈະມີອົງການສະຫະປະຊາຊາຕ ມາຊ່ວຍຢູ່ ອາຈຖາມລາວ ຖາມພະມ້າ ວ່າເປັນຫຍັງເຂົາຄືຍັງບໍ່ໄດ້ສົ່ງກັບ ອັນນັ້ນ ເປັນປະເດັນ ທີ່ອາຈຕ້ອງໃຊ້ເພື່ອຈະຜັກດັນ ໃຫ້ສອງຣັຖບານນີ້ ເຮັດໜ້າທີ່ຂອງເຂົາ ແລະດູແລເບິ່ງແຍງເດັກນ້ອຍ ໃຫ້ພວກເຂົາກັບບ້ານ ເມືອຫາພໍ່ແມ່ຜູ້ປົກຄອງ.”

ທ່ານ ຟິວ ໂຣເບີດຊັ້ນ ຍັງກ່າວຕື່ມ ເຖິງການທີ່ເດັກນ້ອຍລາວ ຫຼືພົລເມືອງລາວ ທີ່ມີປັນຫາ ຢູ່ປະເທດພະມ້າ ນັ້ນວ່າ:

“ກ່ຽວໂຕນີ້ ທາງສະຖານທູດລາວ ກໍມີໜ້າທີ່ເດີນທາງໄປ ເມືອງເມັຽວະດີ ເພືິ່ອຈະໄປເບິ່ງເດັກນ້ອຍເລົ່ານັ້ນ  ແລະພິສູດວ່າ ພວກເຂົາເປັນໃຜ ພວກເຂົາເປັນປະຊາຊົນລາວ ຫຼືບໍ່ ຕາມທັມມະດາແລ້ວ ທາງສະຖານທູດລາວ ຢູ່ທີ່ພະມ້າ ກໍມີໜ້າທີ່ ທີ່ຕ້ອງໄປດູແລປະຊາຊົນລາວ ທີ່ມີປັນຫາຢູ່ພະມ້າ ອັນນັ້ນ ເປັນຄືໜ້າທີ່ທໍາອິດຂອງເຂົາ ມັນເປັນໜ້າທີ່ທີ່ສໍາຄັນທີ່ສຸດ ທີ່ເຈົ້າໜ້າທີ່ ຂອງສະຖານທູດລາວ ປ່ອຍປະລະເລີຍບໍ່ໄດ້.”

ເຖິງແນວໃດກໍຕາມ ແມ່ຂອງເດັກນ້ອຍຊາຍ ຜູ້ດຽວກັນກັບຂ້າງເທິງ ກໍຂໍຝາກຂໍ້ຄວາມນີ້ ເຖິງລູກຊາຍ ແລະເດັກນ້ອຍລາວ ທີ່ຖືກກັກຂັງ ຢູ່ບ່ອນດຽວກັບລູກຊາຍນັ້ນວ່າ:

“ຄັນວ່າລູກຊາຍໄດ້ຍິນ ກໍໃຫ້ຕັ້ງຈິດຕັ້ງໃຈສູ້ໆໄປຫັ້ນແຫຼະ ແມ່ກໍພຍາຍາມທາງນີ້ແລ້ວ ແຕ່ກໍຕ້ອງໄດ້ອົດທົນຄືວ່າຫັ້ນແຫຼະ ຜ່ານມາກະໄດ້ອົດມາຊໍ່ານີ້ແລ້ວ ອົດໆມາເຖິງຂັ້ນນີ້ແລ້ວ ອົດຕື່ມໜ້ອຍນຶ່ງ ກະຊິບໍ່ເປັນຫຍັງຕິ ອົດທົນຕື່ມໜ້ອຍນຶ່ງ ດຽວກໍຊິໄດ້ອອກມາແລ້ວ ແລ່ນກະສຸດທີ່ແລ່ນແລ້ວ ບໍ່ແມ່ນວ່າບໍ່ເລັ່ງບໍ່ແລ່ນທາງນີ້ທາງນັ້ນ ບາງທີລູກນີ້ອາຈບໍ່ຮູ້ເນາະ ວ່າເອີ່..ແມ່ຄືບໍ່ສົນໃຈ ແບບນີ້ແບບນັ້ນ ຄືລາວມັກເວົ້າວ່າ ເອີ່ ອີ່ແມ່ນີ້ ຄືວ່າບໍ່ສົນໃຈ ແນວນີ້ແນວນັ້ນຫັ້ນນ່າ ແຕ່ຄວາມຈິງກໍເລັ່ງສຸດຂີດແລ້ວ ບາງມື້ນ່າ ນອນກໍຈົນບໍ່ຫຼັບຫັ້ນນ່າ ຈົນຊອດແຈ້ງຫັ້ນນ່າ ເມົາຄຶດຫາລູກຫັ້ນ ຄຶດຫຼາຍກະຈົນຊິເປັນເປັ້ຍເປັນລົມຍ້ອນ ແນວໃດກະໃຫ້ລູກຢູ່ໃນຫັ້ນ ຄັນໄດ້ຍິນແລ້ວກໍ ອົດທົນເອົາເດີ້ລູກເດີ້ ດຽວກໍຊິໄດ້ກັບບ້ານແລ້ວ ມາເຖິງຂັ້ນນີ້ແລ້ວ ມີແຕ່ວ່າ ຝາກຝັງໃຫ້ລູກແຕ່ລະຄົນ ຢູ່ໃນຫັ້ນແຫຼະ ສູ້ໆນໍາກັນ ດຽວກໍຊິໄດ້ກັບບ້ານແລ້ວ ຄັນວ່າເປັນໄປໄດ້ ສົ່ງໃຫ້ຂະເຈົ້າຮູ້ ກະດີໃຈນໍາຫັ້ນນ່າ ເພາະວ່າ ອີກຢ່າງຄັນໄດ້ຍິນສຽງແມ່ແບບນີ້ ເຂົາກະຊິດີໃຈບຸ ເພາະວ່າ ບໍ່ໄດ້ຍິນມາ ເກືອບຊິ 4 ເດືອນ 5 ເດືອນນີ້ແລ້ວ.”

ໃນໄລຍະເດືອນກັນຍາ ປີ 2022 ທີ່ຜ່ານມາ ມີເດັກນ້ອຍວັຍໜຸ່ມ-ຍິງສາວ ລາວ ອາຍຸລະຫວ່າງ 14-23 ປີ ຈໍານວນ 45 ຄົນ ຈາກເມືອງວຽງພູຄາ, ເມືອງນາແລ, ເມືອງສິງ, ເມືອງລອງ ແລະເມືອງຫຼວງນໍ້າທາ ແຂວງຫຼວງນໍ້າທາ ຖືກກຸ່ມແກ໊ງຄ້າມະນຸສ ທີ່ເປັນຄົນລາວ ຕົວະຍົວະ ວ່າ ຈະພາໄປເຮັດວຽກຕອບແຊັດ ຢູ່ກາຊິິໂນ ໃນເມືອງຕົ້ນເຜິ້ງ ແຂວງບໍ່ແກ້ວ ແຕ່ສຸດທ້າຍແລ້ວ ພັດພາໄປຂາຍຕໍ່ ໃຫ້ໄປເຮັດວຽກຕອບແຊັດ ຢູ່ກາສິໂນ ໂກຊາຍຂອງຈີນ ທີ່ເມືອງເມັຽວະດີ ຣັຖກະຢິ່ນ ຫຼື ຣັຖກະຫຣ່ຽງ ປະເທດພະມ້າ ແລະ ຖືກປ່ອຍໂຕ ກັບຮອດບ້ານແລ້ວ ວ່າງຕົ້ນປີ 2023 ຈໍານວນ 12 ຄົນ ດ້ວຍການໄຖ່ໂຕຂອງຄອບຄົວ ແລະເມື່ອວັນທີ 29 ເດືອນສິງຫາ 2023 ນີ້ ກໍຖືກປ່ອຍອອກມາອີກ 16 ຄົນ, ແຕ່ປັດຈຸບັນ ຍັງຖືກກັກຂັງ ຢູ່ທີ່ ສະຖານີຕໍາຣວດ ຕມ ເມືອງເມັຽວະດີ ປະເທດພະມ້າຢູ່ ນອກຈາກນີ້ ຍັງມີເດັກນ້ອຍລາວ ອີກ 16 ຄົນ ໃນນີ້ ເປັນເພດຍິງ 3 ຄົນ ແລະເພດຊາຍ 13 ຄົນ ຍັງຕິດຄ້າງ ຢູ່ໃນໂຮງກາສິໂນ ໂກຊາຍ ຂອງຈີນ ໃນເມືອງເມັຽວະດີ ປະເທດພະມ້້າ ເຊິ່ງພວກຂະເຈົ້າ ກໍລໍຖ້າການຊ່ອຍເຫຼືອ ຈາກທາງການລາວ ແລະພາກສ່ວນທີ່ກ່ຽວຂ້ອງຢູ່ທຸກມື້.