ແມ່ຍິງຊົນເຜົ່າຍັງມີ ຄວາມສ່ຽງ

ສຸພັດຕາ
2020-09-15
ອີແມວລ໌
ຄໍາເຫັນ
Share
ພິມ
ແມ່ຍິງແລະເດັກນ້ອຍ ຢູ່ເຂດນອກເມືອງອາດສະພັງທອງ ແຂວງສວັນນະເຂດ
ແມ່ຍິງແລະເດັກນ້ອຍ ຢູ່ເຂດນອກເມືອງອາດສະພັງທອງ ແຂວງສວັນນະເຂດ
RFA

ປັດຈຸບັນແມ່ຍິງຊົນເຜົ່າຢູ່ລາວ ສ່ວນຫຼາຍມີຄວາມສ່ຽງສູງ ທີ່ຈະຕົກເປັນເຫຍື່ອຂອງຄວາມຮຸນແຮງ ແລະການຄ້າມະນຸດຢູ່ ຍ້ອນຄອບຄົວ ມີຖານະທຸກຍາກ, ບໍ່ມີຣາຍໄດ້ ແລະບໍ່ໄດ້ເຂົ້າ ເຖິງການສຶກສາ ເຮັດໃຫ້ບໍ່ມີຄວາມຮູ້ ທີ່ຈະເປັນສິ່ງປ້ອງກັນໂຕເອງ ໃນການຖືກນາຍໜ້າ ຫຼືຄົນຮູ້ຈັກເຂົ້າມາຕົວະຍົວະ ໃນລັກສນະ ພາໄປເຮັດວຽກ ຢູ່ຕ່າງປະເທດ ຫຼືຫຼອກໃຫ້ແຕ່ງງານ ກັບຄົນຕ່າງປະເທດ ຊຶ່ງສ່ວນນຶ່ງກໍຫວັງວ່າ ຈະມີເງິນຈໍານວນຫຼາຍ ແລະເຮັດໃຫ້ມີຊີວິດ ທີ່ດີຂຶ້ນ, ອີງຕາມຄວາມເວົ້າ ຂອງເຈົ້າໜ້າທີ່ ສູນກາງສະຫະພັນ ແມ່ຍິງລາວ ທ່ານນຶ່ງຜູ້ຂໍສງວນ ຊື່ແລະຕໍາແໜ່ງ ຕໍ່ວິທຍຸເອເຊັຽເສຣີ ໃນວັນທີ 15 ກັນຍາ ນີ້:

“ຜູ້ຕົກເປັນເຫຍື່ອ ຖືກເຄາະຮ້າຍ ຈາກການຖືກໃຊ້ຄວາມຮຸນແຮງ ສ່ວນຫຼາຍກະຈະເປັນແມ່ຍິງເນາະ ມີຄວາມທຸກຍາກ ແລະກະບໍ່ໄດ້ເຂົ້າ ເຖິງການສຶກສາຈັ່ງຊີ້ ກໍຈະຕົກເປັນເຫຍື່ອ ຂອງ ການຄ້າມະນຸດໄດ້ງ່າຍ ແຕ່ວ່າຫຼັກໆ ທີ່ເຮົາພົບເຫັນຫຼາຍ ພວກຊົນເຜົ່ານີ້ລະ ສໍາລັບຄົນທີ່ ວ່າງງານ ກໍມີບາງກໍຣະນີ ທີ່ເປັນແບບນັ້ນ ສ່ຽງທີ່ຖືກຄ້າມະນຸດ.”

ທ່ານກ່າວຕື່ມວ່າ ຜ່ານມາ ກໍມີຫຼາຍອົງການໃຫ້ທຶນສນັບສນຸນ ເປັນຕົ້ນອົງການຢູນິເຊັຟ, ມູນນິທິເອເຊັຍ ແລະອົງກອນວ້ອຍ ສ່ວນໃຫຍ່ຈະ ເປັນທຶນ ແກ່ພະນັກງານທີ່ເຮັດວຽກງານ ກ່ຽວຂ້ອງ ເພື່ອອົບຮົມຄວາມຮູ້ ແລະລົງໄປໂຄສະນາ ຂໍ້ມູນຂ່າວສານຕ່າງໆ ໃຫ້ແກ່ປະຊາຊົນ:

“ສໍາລັບທຶນການຊ່ວຍເຫຼືອເນາະ ກໍມີຢູ່ຫຼາຍທຶນທີ່ໃຫ້ການສນັບສນຸນ ໃນນັ້ນກໍຈະມີ ມູນນິທິເອເຊັຍ ແລະ ອົງການວ້ອຍເນາະ ແລະ ກະ ຢູນິເຊັຟ ຊ່ວຍໃຫ້ຄໍາປຶກສາ ແລະກະຕອບຂໍ້ມູນ ຂ່າວສານ ທາງກົດໝາຍ ແລ້ວກະຖ້າວ່າ ຕົກຢູ່ໃນເງື່ອນໄຂ ການຊ່ວຍເຫຼືອຂອງພວກເຮົາ ກະຈະໄດ້ຊ່ວຍເຫຼືອ.”

ເຈົ້າໜ້າທີ່ສະຫະພັນແມ່ຍິງ ນະຄອນຫຼວງວຽງຈັນ ທ່ານນຶ່ງ ຜູ້ຂໍສງວນຊື່ແລະຕໍາແໜ່ງ ກ່າວວ່າ ແມ່ຍິງທີ່ຍາກໄປເຮັດວຽກ ຢູ່ຕ່າງປະເທດ ແລະແມ່ຍິງທີ່ມັກແຕ່ງງານ ກັບຄົນຕ່າງ ປະເທດ ສ່ວນໃຫຍ່ມີຄວາມສ່ຽງສູງຄືກັນ ທີ່ຈະຖືກຄ້າມະນຸດ ເພາະຜ່ານມາ ກໍມີຫຼາຍ ກໍຣະນີ ໃຫ້ເຫັນຢູ່:

“ກໍມີຫຼາຍກໍຣະນີ ໂຕຢ່າງເດັກນ້ອຍ ບໍ່ມີວຽກເຮັດງານທໍາ ໄປເຮັດວຽກຢູ່ໄທຍ ຫັ້ນນ່າ ກໍຈະມີຄວາມສ່ຽງ ທີ່ຈະຖືກຫຼອກໄປຂາຍ ແລະກໍການ ແຕ່ງງານ ແບບປອມຫັ່ນນ່າ ສ່ວນໃຫຍ່ ເປັນຄົນຈີນ ແຕ່ງງານແລ້ວ ແລ້ວກະເອົາໄປຂາຍຕໍ່ກໍມີ ກໍຣະນີ້ນິ່.”

ທ່ານເວົ້າວ່າ ເຖິງແມ່ນວ່າ ຈະມີເຈົ້າໜ້າທີ່ ລົງໂຄສະນາເຜີຍແຜ່ກົດໝາຍ ວ່າດ້ວຍ ການຕ້ານ ການຄ້າມະນຸດ ແລະ ການຕ້ານການໃຊ້ ຄວາມຮຸນແຮງ ຕໍ່ແມ່ຍິງແລະເດັກນ້ອຍ ຢູ່ເລື້ອຍໆ ແຕ່ບາງເທື່ອ ກໍບໍ່ໄດ້ທົ່ວເຖິງເທົ່າທີ່ຄວນ.

ໃນຂນະທີ່ ເຈົ້າໜ້າທີ່ ສະຫະພັນແມ່ຍິງ ເມືອງອາດສະພັງທອງ ແຂວງສວັນນະເຂດ ຜູ້ຂໍສງວນຊື່ແລະຕໍາແໜ່ງ ກ່າວວ່າ ໂດຍທົ່ວໄປແລ້ວ ກໍຍັງມີແມ່ຍິງ ຖືກໃຊ້ຄວາມຮຸນແຮງ ແລະຖືກຄ້າມະນຸດ ຢູ່ ໂດຍສະເພາະ ຜູ້ທີ່ໄປອອກແຮງງານ ຢູ່ຕ່າງປະເທດ ເພາະຢູ່ເມືອງອາດສະ ພັງທອງ ກໍມີ 1 ກໍຣະນີ ໃນປີ 2019 ທີ່ເຈົ້າໜ້າທີ່ ຊ່ອຍກັບມາໄດ້ ເຊິ່ງໄປເຮັດວຽກ ຢູ່ໄທຍຕັ້ງແຕ່ອາຍຸ 13 ປີ ແລ້ວນາຍຈ້າງກໍກັກຂັງ ໄວ້ແຕ່ໃນເຮືອນ ບໍ່ໃຫ້ອອກໄປໃສ:

“ການຕົກເປັນເຫຍື່ອເມືອງເຮົາຣາຍນຶ່ງເນາະ ລາວໄປທໍາງານ ຊ່ວງອາຍຸ ໄດ້ປະມານ 13 ປີ ນີ້ແຫຼະ ຊ່ວງນັ້ນຂໍ້ມູນຂ່າວສານ ກໍບໍ່ຄືສມັຍ ທຸກມື້ນີ້ ຕົກຮອດປີ 2019 ປະມານ 7-8 ປີ ພຸ້ນເດ້ ເພາະວ່າ ເຮັດວຽກຢູ່ບ້ານແຫຼະ ແຕ່ອອກທາງນອກບໍ່ໄດ້.”

ທ່ານກ່າວຕື່ມວ່າ ນອກຈາກຮູບແບບ ການຄ້າມະນຸດ ທີ່ມາໃນຮູບແບບ ບັງຄັບໃຊ້ແຮງງານແລ້ວນັ້ນ ກໍຍັງມີ ຄ້າມະນຸດໃນຮູບແບບການ ແຕ່ງດອງກັບຄົນຕ່າງປະເທດ ໂດຍສະເພາະ ກັບຄົນຈີນ ແຕ່ສ່ວນໃຫຍ່ຈະຢູ່ທາງພາກເໜືອ ເພາະມີຊາຍແດນ ຕິດກັບປະເທດຈີນ.

ອີງຕາມການຣາຍງານຂ່າວ ຈາກໜັງສືພິມວຽງຈັນທາມສ ໃນວັນທີ 15 ກັນຍາ 2020 ກ່ຽວກັບເຣື່ອງນີ້ ອົງການຢູນິເຊັຟ ຕຣຽມຈະສນັບ ສນຸນການຊ່ອຍເຫຼືອ ໃນການຄຸ້ມຄອງ ແມ່ຍິງ ແລະເດັກນ້ອຍ ໂດຍຈະມອບສິ່ງຂອງ ທີ່ຈໍາເປັນ ໃຫ້ກັບສະຫະພັນແມ່ຍິງລາວ ໃນມື້ວັນທີ່ 17 ກັນຍາ ນີ້ ເປັນຕົ້ນ: ຍານພາຫະນະ, ອຸປກອນໄອທີ, ຊຸດສຸຂອານາມັຍ ຈະຖືກແຈກຈ່າຍ ໄປຍັງໜ່ວຍງານ ທີ່ສໍາຄັນ ເຊັ່ນ: ກົມການ ວາງແຜນ ແລະຄວາມຮ່ວມມື ຣະຫວ່າງປະເທດ ຂອງສະຫະພັນແມ່ຍິງ ໃນການພັທນາສໍານັກງານ ເພື່ອຄວາມກ້າວໜ້າ ຂອງແມ່ຍິງ ແລະ ເດັກນ້ອຍ ແລະສູນໃຫ້ຄໍາປຶກສາ ແລະຄຸ້ມຄອງ 2 ແຫ່ງ ຢູ່ນະຄອນຫຼວງວຽງຈັນ ແລະແຂວງຫຼວງນໍ້າທາ.

ແລະ ສິ່ງຂອງບໍຣິຈາກ ທີ່ເປັນປໂຍດ ຕໍ່ແມ່ຍິງແລະເດັກນ້ອຍ ຫຼາຍກວ່າ 1,000 ຄົນ ຈະໄດ້ຮັບການສນັບສນຸນ ແລະ ການຄຸ້ມຄອງ ທີ່ ຄອບຄຸມໃນຂນະທີ່ ຢູ່ສູນພັງພີງ ເຈົ້າໜ້າທີ່ ສະຫະພັນ ແມ່ຍິງລາວ ກໍາລັງເຮັດວຽກ ເພື່ອປົກປ້ອງແມ່ຍິງ ແລະເດັກນ້ອຍໃນຂັ້ນສູນກາງ ແລະຂັ້ນທ້ອງຖິ່ນ ຮວມທັງໃນ ແຂວງຫຼວງນໍ້າທາ, ແຂວງອັດຕະປື ແລະນະຄອນຫຼວງ ວຽງຈັນ.

ວິທຍຸເອເຊັຽເສຣີ ໄດ້ຕິດຕໍ່ໄປຫາເຈົ້າໜ້າທີ່ ອົງການຢູນິເຊັພ ເພື່ອສອບຖາມຣາຍຣະອຽດເພີ້ມຕື່ມ ແຕ່ເຈົ້າໜ້າທີ່ ຍັງບໍ່ສະດວກໃຫ້ສັມພາດ.

ເຕັມຫນ້າ