ແມ່ຍີງລາວສ່ຽງຕົກເປັນເຫຍື່ອການຄ້າມະນຸດໄປຈີນ

ໃນປັດຈຸບັນປະຊາຊົນລາວ ຍັງພົບເຫັນນາຍໜ້າລາວໂພດສ໌ໂຄສະນາຫາແມ່ຍີງລາວໄປເປັນເມັຍຄົນຈີນຢູ່ໃນສື່ສັງຄົມອ໋ອນລາຍໂດຍສະເພາະ ເຟສບຸກ ແລະ ຕິກຕ໋ອກ ໂດຍໃຫ້ຂໍ້ສະເໜີໃຫ້ຄ່າດອງຫຼາຍເຖີງ 100-120 ລ້ານກີບຖ້າໜ້າຕາງາມກໍ່ໄດ້ຫຼາຍກ່ວາ 120-150 ລ້ານກີບ.

 ວິທຍຸເອເຊັຽເສຣີໄດ້ມີໂອກາດລົມນໍານາຍໜ້າຄົນລາວຈຶ່ງໄດ້ລາຍລະອຽດເພີ່ມວ່າຄ່າດອງຈະຫຼາຍກ່ວາ 120-150 ລ້ານກີບນັ້ນຖ້າແມ່ຍີງລາວບໍ່ແມ່ນແມ່ຮ້າງ ແລະ ຍັງເປັນສາວອາຍຸລະຫວ່າງ 18-35 ປີ ພ້ອມທັງມີຄຳໃຫ້, ພາໄປຊື້ໂທລະສັບມືຖື ແລະ ແລ່ນວິຊ້າໄປຈີນແຕ່ໃຫ້ເປັນວິຊ້າເພື່ອການທ່ອງທ່ຽວບໍ່ແມ່ນວິຊ້າແຕ່ງດອງລະຫວ່າງຄົນລາວກັບຄົນຕ່າງປະເທດ. ດັ່ງນາຍໜ້າກ່າວຕໍ່ວິທຍຸເອເຊັຽເສຣີໃນວັນທີ 19 ສິງຫາວ່າ.

 “ ຜູ້ສາວມັນຈະໄດ້ຫຼາຍກ່ວາແມ່ຮ້າງເດີ້ແຕ່ວ່າເບິ່ງຮູບເບີ່ງຫຍັງກ່ອນເຄີຍມີຜົວເຄີຍມີລູກບໍ່ເວົ້າເລື່ອງໂທລະສັບຖ້າວ່າເຮົາຢູ່ນໍາເຂົາຕໍ່ໄປເນາະອັນນີ້ເຮົາຢາກໄດ້ຄືເຮົາຂໍເອັງແຕ່ວ່າຄຳກັບຄ່າດອງນີ້ແມ່ນຈ່າຍກ່ອນຈັ່ງຄ່ອຍໄປເປັນເມັຍເຂົາມີພາສປອດແລ້ວໄປແລ່ນວິຊ້າກໍ່ບໍ່ໄດ້ດົນແລ່ນວິຊ້າໄປປຸບແບບວ່າມາເດືອນປາຍມາເດືອນປາຍສອງເດືອນເຮົາຕ້ອງໄດ້ແລ່ນກັບໄປແລ່ນວິຊ້າໄປແຕ່ງງານອີກຜົວກໍ່ໄປເມັຍກໍ່ໄປໄປນໍາກັນ”

 ກ່ຽວກັບເລື່ອງນີ້ເຈົ້າໜ້າທີ່ທີ່ເຮັດວຽກສະກັດກັ້ນ ແລະ ຕ້ານການຄ້າມະນຸດກ່າວວ່າຮູບແບບທີ່ນາຍໜ້າໂຄສະນາຫາແມ່ຍີງລາວໄປເປັນເມັຍຈີນນັ້ນເປັນການໂຄສະນາຊວນເຊື່ອ. ດັ່ງທ່ານກ່າວວ່າ.

“ ເປັນຮູບແບບການໂຄສະນາຊວນເຊື່ອເພາະວ່າບາງກຸ່ມຄົນເຂົາກໍ່ອາດຈະໃນຈຸດປະສົງກໍ່ຄືເງິນຄຳຫັ້ນແຫຼະໂດຍທີ່ບໍ່ໄດ້ຄຳນຶງເຖີງຄວາມສ່ຽງຖ້າເຂົາພໍໃຈກັນແທ້ນີ້ບໍ່ໄດ້ຜ່ານສື່ດອກໂຕນີ້ເຮົາກໍ່ຕ້ອງກວດສອບເບິ່ງບາງທີ່ນີ້ເຂົາເຈົ້າກໍ່ສ້າງຄວາມປັ່ນປ່ວນເຮົາຕ້ອງວິເຄາະຂ່າວກ່ອນຄືຜ່ານມາຂໍ້ມູນສ່ວນໜຶ່ງມັນກໍ່ອາດກວມເອົາ 80% ພຸ້ນແຫຼະຂໍ້ມູນຈິງ”

ເຈົ້າໜ້າທີ່ເຮັດວຽກເຮັດວຽກສະກັດກັ້ນ ແລະ ຕ້ານການຄ້າມະນຸດກ່າວຕື່ມວ່າໃນຮູບແບບທີ່ນາຍໜ້າໂຄສະນາຫາແມ່ຍີງລາວໄປເປັນເມັຍຈີນນັ້ນຍັງມີການເຊື່ອງຊ້ອນບາງຢ່າງທີ່ຈະເຮັດໃຫ້ແມ່ຍີງລາວເຂົ້າຂ່າຍຕົກເປັນກຸ່ມສ່ຽງຜູ້ຖືກເຄາະຮ້າຍຄ້າມະນຸດ. ດັ່ງທ່ານກ່າວຕື່ມວ່າ.

“ຮູບການມັນຈະມີການເຊື່ອງຊ້ອນບາງອັນເປັນບາງຢ່າງເຖີງວ່າຈະບໍ່ແມ່ນຮູບການຄ້າມະນຸດອາດຈະເປັນຮູບການອື່ນມັນຕ້ອງເບິ່ງທີ່ປາຍທາງຄືນ້ອງເວົ້ານີ້ມາແຕ່ງດອງແຕ່ວ່າຜົນສຸດທ້າຍບໍ່ໄດ້ເຮັດເອກະສານແຕ່ງດອງນີ້ມັນກໍ່ແບບລັກແຕ່ງດອງສອງມາກໍ່ກໍລະນີແບບແອບແຝງອາດຈະເອົາໄປຂູດຮີດແຮງງານຂູດຮີດທາງເພດອາດຈະໄປເປັນຄົນຮັບໃຊ້ຂໍທານ”

 ທ່ານໄດ້ກ່າວຢໍ້າຕື່ມວ່າເພື່ອເປັນການແກ້ໄຂບັນຫາເດັກຍີງ ແລະ ແມ່ຍີງລາວຖືກຕົວະແຕ່ງດອງແລ້ວຈະຕົກເປັນເຫຍື່ອຂອງການຄ້າມະນຸດນັ້ນພາກສ່ວນທີ່ກ່ຽວຂ້ອງທົ່ວປະເທດກໍ່ພະຍາຍາມທີ່ຈະລົງໂຄສະນາໃຫ້ຮູ້ເຖີງຜົນຮ້າຍຂອງການຄ້າມະນຸດແລະຮູບແບບການຄ້າມະນຸດແຕ່ວ່າການລົງໂຄສະນາກໍ່ຖືກຈຳກັດຍ້ອນຍັງຂາດງົບປະມານເຮັດໃຫ້ຂໍ້ມູນຂ່າວສານບໍ່ທົ່ວເຖີງໂດຍສະເພາະເຂດຫ່າງໄກສອກຫຼີກ.

  ກ່ຽວກັບເລື່ອງນີ້ປະຊາຊົນໄດ້ກ່າວວ່າາຕົນນເອັງເຫັນປະກາດຫາເມັຍລາວໃຫ້ຈີນມີຫຼາຍແຕ່ສະເພາະມຸມມອງຂອງຕົນເອັງທີ່ໄດ້ຜົວຈີນນັ້ນການເປັນເມັຍຈີນຖ້າຖືກຜູ້ດີກໍ່ດີ ຖືກຜູ້ບໍ່ດີກໍ່ບໍ່ດີ. ດັ່ງນາງກ່າວວ່າ.

“ ມັນກໍ່ມີຫັ້ນນ່າມີ ມີຫຼາຍ ມີຫຼາຍ ມີຫຼາຍຄົນຈີນມັນກໍ່ຖືກຜູ້ດີກໍ່ດີ ຖືກຜູ້ບໍ່ດີກໍ່ບໍ່ດີເອື້ອຍກໍ່ເອົາຜົວຈີນເອື້ອຍກໍດາຍແຕ່ຜົວເອື້ອຍລາວກໍ່ດີລາວບໍ່ໄດ້ອັນນັ້ນນັ້ນນ່າ”

 ປະຊາຊົນອີກທ່ານໜຶ່ງຜູ້ທີ່ຕິດຕາມຂ່າວກ່ຽວກັບແມ່ຍີງລາວແຕ່ງດອງກັບຄົນຈີນກ່າວວ່າຢາກໃຫ້ພາກສ່ວນທີ່ກ່ຽວຂ້ອງປາບປາມນາຍໜ້າຄົນລາວທີ່ຫາເມັຍໃຫ້ຜູ້ຊາຍຈີນຖ້າປາບປາມນາຍໜ້າຄົນລາວບໍ່ໄດ້ກໍ່ບໍ່ສາມາດແກ້ໄຂບັນຫາແມ່ຍີງລາວຈະຕົກເປັນເຫຍື່ອຂອງການຄ້າມະນຸດຈາກການຖືກຕົວະແຕ່ງດອງໄດ້. ດັ່ງທ່ານກ່າວວ່າ.

“ ມັນກໍ່ມີແຜນຫຍັງຂອງເຂົາເຈົ້າຫັ້ນແຫຼະເພາະວ່າຢູ່ຢູ່ຫຍັງເຂົາສິມາເອົາເງິນໃຫ້ເປັນ 100 ລ້ານ 400 ລ້ານໃຫ້ຄົນລາວໄປຢູ່ສໍາຄັນກໍ່ນາຍໜ້າຫັ້ນແຫຼະນາຍໜ້າຢູ່ບ້ານເຮົານີ້ເພາະວ່າມັນມີນາຍໜ້າເດ້ລົງເຟສລົງຫຍັງໃຫ້ຄົນເອົາຜົວຈີນຫັ້ນນ່າສ່ວນຫຼາຍກໍ່ຢາກປາບປາມຕົວນັ້ນຫັ້ນແລ້ວຫຼາຍຫັ້ນນ່າເພາະວ່າຖ້າເຮົາເຮັດຕົວນີ້ບໍ່ໄດ້ມັນກໍ່ແກ້ໄຂຈັ່ງໃດບໍ່ໄດ້ແລ້ວເພາະວ່າມັນລົງເຜີບແຜ່ຫຼາຍທັງເຟສທັງຕິກຕ໋ອກ”

 ນອກຈາກຮູບການໂຄສະນາຫາເມັຍໃຫ້ຄົນຈີນຜ່ານທາງສື່ສັງຄົມອ໋ອນລາຍແລ້ວເມື່ອເດືອນມີນາທີ່ຜ່ານມາກໍ່ຍັງມີຜູ້ຊາຍຈີນພາເມັຍຄົນລາວ ແລະ ຜູ້ແປພາສາໄປເລາະຫາເມັຍໃຫ້ນ້ອງຊາຍຄົນຈີນນໍາດ້ວຍ.

 ຕາມການໂຄສະນາຂອງສູນໃຫ້ຄໍາປຶກສາ ແລະ ປົກປ້ອງແມ່ຍີງ-ເດັກນ້ອຍໄດ້ໂຄສະນາຜ່ານສື່ສັງຄົມອ໋ອນລາຍໂດຍເນື້ອໃນລະບຸວ່າການຄ້າມະນຸດມີຫຼາຍຮູບແບບບໍ່ສະເພາະແຕ່ການຂູດຮີດທາງເພດແຕ່ຍັງມີການຂູດຮີດແຮງງານ, ການແຕ່ງດອງແອບແຝງ, ການຂາຍອາໄວຍະວະຂອງຮ່າງກາຍ, ການໃຫ້ຖືພາແທນທີ່ຂັດກັບກົດໝາຍຂອງ ສປປ ລາວລ້ວນແຕ່ແມ່ນຮູບການການຄ້າມະນຸດ.ໂດຍມີ ສື່ສັງຄົມອ໋ອນລາຍເປັນອີກເຄື່ອງມືໜຶ່ງຂອງພວກຄ້າມະນຸດນໍາໃຊ້ເຂົ້າໃນການຫຼອກລວງ ແລະ ຂົນຂວາຍໃຫ້ຜູ້ຄົນຫຼົງເຊື່ອ ແລະ ຕົກເປັນເຫຍື່ອຂອງການຄ້າມະນຸດໃນທີ່ສຸດ.

 ອີງຕາມການລາຍງານຂອງກະຊວງປ້ອງກັນປະເທດເມື່ອວັນທີ 20 ກຸມພາ 2024 ສະຫຼຸບວຽກງານການຈັດຕັ້ງປະຕິບັດວຽກງານຕ້ານການຄ້າມະນຸດປະຈຳປີ 2023 ວ່າ. ສປປ ລາວແມ່ນປະເທດໜຶ່ງທີ່ມີບັນຫາເລື່ອງການຄ້າມະນຸດເຊີ່ງສ່ວນຫຼາຍເປັນປະເທດຕົ້ນທາງ ແລະ ທາງຜ່ານທັງນີ້ກໍ່ເນື່ອງຈາກທີ່ຕັ້ງພູມສັນຖານມີຊາຍແດນຕິດຈອດກັບ 5 ປະເທດ.

  ປັດຈຸບັນລັດຖະບານໄດ້ມີການລົງທືນສຸມໃສ່ໃນການພັດທະນາພື້ນຖານໂຄງລ່າງເສດຖະກິດ, ວັດທະນາທຳ, ການທ່ອງທ່ຽວເຊີ່ງເປັນເງື່ອນໄຂອຳນວຍຄວາມສະດວກໃນການເດີນທາງເຂົ້າ-ອອກ, ບວກກັບຄ່ານິຍົມ, ລະດັບການສຶກສາ ແລະ ສີມືແຮງງານຍັງຈຳກັດ, ບັນຫາຄອບຄົວບໍ່ມີຄວາມສະຫງົບ, ຄວາມທຸກຍາກ, ການຂາດສະຕິລະວັງຕົວ, ຄວາມບໍ່ເຂົ້າໃຈກົດໝາຍ, ຄວາມຮັບຮູ້ຕໍ່ສະພາບການຄ້າມະນຸດຂອງປະຊາຊົນຍັງຈຳກັດ ແລະ ອື່ນ ໆ ເຊີ່ງເປັນເງື່ອນໄຂພາໃຫ້ເກີດມີອາດຊະຍາກຳການຄ້າມະນຸດ, ການຫຼອກລວງຄົນລາວໄປຕ່າງປະເທດຫຼືຫຼອກລວງຄົນຕ່າງປະເທດມາປະເທດລາວເພື່ອບັງຄັບໃຊ້ແຮງ ງານ ແລະ ບັງຄັບທາງເພດ, ພ້ອມກັນນັ້ນຍັງມີການຄ້າມະນຸດໃນຮູບແບບຖ່າຍທອດສົດເປືອຍກາຍອອກສື່ສັງຄົມອ໋ອນລາຍ.

 ເຊີ່ງເຫດການພົ້ນເດັ່ນໃນປີ 2023ແມ່ນພວກກຸ່ມຄົນທີ່ບໍ່ດີມີການຕົວະຍົວະຫຼອກລວງຜ່ານສື່ສັງຄົມອ໋ອນລາຍເຮັດໃຫ້ໄວໜຸ່ມ ຍີງ-ຊາຍພາກັນຫຼັ່ງໄຫຼໄປອອກແຮງງານ, ໄປແຕ່ງງານ, ໄປທ່ອງທ່ຽວແລ້ວຖືກບັງຄັບຂູດຮີດແຮງງານ, ບັງຄັບໃຫ້ຂາຍບໍລິການທາງເພດ, ຖືກຈັບຕົວຮຽກຄ່າໄຖ່ ແລະ ອື່ນ ໆ.