AI ຖືກນຳໃຊ້ ໃນການຄ້າມະນຸດ ແລະ ອາດຊະຍາກໍາ

ປັດຈຸບັນ ກຸ່ມກໍ່ອາດຊະຍາກໍາ ຂ້າມຊາດ ໃນພາກພື້ນ ອາຊີຕາເວັນອອກສຽງໃຕ້ ໂດຍສະເພາະ ກຸ່ມທີ່ຢູ່ ໃນປະເທດລາວ, ມຽນມາ ແລະ ກໍາປູເຈຍ ຫັນໄປນໍາໃຊ້ ເຕັກໂນໂລຊີ AI ໃນການຊ່ອຍ ກໍ່ອາດຊະຍາກໍາ ຫຼາຍຂຶ້ນ ເຮັດໃຫ້ ທັງຈໍານວນເຫຍື່ອ ທີ່ຖືກຄ້າມະນຸດ ແລະ ເຫຍື່ອ ທີ່ຖືກຕົວະເອົາເງິນ ຂອງຂະບວນການດັ່ງກ່າວ ມີຈໍານວນ ເພີ່ມຂຶ້ນເລື້ອຍໆ, ອີງຕາມຄວາມເວົ້າ ຂອງທ່ານ ເຈຄອບ ຊິມສ (Jacob Sims) ຜູ້ຊ່ຽວຊານດ້ານອາດຊະຍາກຳ ຂ້າມຊາດ, ສະຖາບັນ ສັນຕິພາບ ສະຫະຣັດ ອາເມຣິກາ ທີ່ກ່າວຕໍ່ ວິທຍຸ ເອເຊັຽ ເສຣີ ໃນມື້ວັນທີ 7 ພະຈິກ ທີ່ສະມາຄົນ ນັກຂ່າວຕ່າງປະເທດ ຢູ່ປະເທດໄທ ວ່າ:

“ປັດຈຸບັນ ເຕັກໂນໂລຊີ ຖືກນໍາໄປໃຊ້ ເພື່ອກໍ່ອາດຊະຍາກໍາໄດ້ຫຼາຍວິທີ ໃນນັ້ນ ອົງກອນອາດຊະຍາກໍາຂ້າມຊາດ ທີ່ຢູ່ພາກພື້ນ ອາຊີຕະວັນອອກສຽງໃຕ້ ໂດຍສະເພາະ ກຸ່ມທີ່ຕັ້ງຢູ່ໃນລາວ, ມຽນມາ ແລະກໍາປູເຈຍ ທີ່ໃຊ້ປະໂຫຍດຈາກຄວາມກ້າວໜ້າ ຂອງເຕັກໂນໂລຊີ ໃນການຕົວະຕົ້ມເຫຍື່ອ ຈາກທົ່ວໂລກ ໂດຍໃຊ້ເຫຍື່ອຈາກການຄ້າມະນຸດ ໃນຂະບວນການ.”

ດ້ານ ທ່ານ Byan Winch ຜູ້ຈັດການໂຄງການ ດ້ານອາດຊະຍາກໍາ ຂ້າມຊາດ ແລະເຕັກໂນໂລຊີ ຈາກອົງກອນ "ສຳນັກງານ ສະໜັບສະໜູນ ລະດັບຂົງເຂດ ຂອງຂະບວນການບາຫຼີ" Regional Support Office of the Bali Process ກ່າວວ່າ ເຕັກໂນໂລຊີ AI ທີ່ອົງການ ອາດຊະຍາກໍາ ຂ້າມຊາດ ນໍາມາໃຊ້ ໃນປະຕິບັດການ ເພື່ອຕົວະຕົມເອົາເງິນທາງອອນລາຍ ມີຫຼາຍປະເພດ ເປັນຕົ້ນ ການປອມແປງສຽງ, ການເຮັດຮູບໂຄສະນາ ເພື່ອຕົວະເຫຍື່ອ ໃຫ້ມາເຮັດວຽກ ຫຼື ຕົວະເອົາເງິນ, ການໃຊ້ແຊັດບ໋ອດ (Chat bot) ທີ່ມີພາສາ ທີ່ຫຼ່ຽນໄຫຼ ກວ່າເກົ່າ ໃນການຕອບແຊັດ, ການແປພາສາ ຮວມເຖິງ ການປ່ຽນຮູບໃບໜ້າ ດ້ວຍໂປແກມ Deepfake.

ການນໍາໃຊ້ AI ໃນປະຕິບັດການ ຕົວະຕົ້ມ ທາງອອນລາຍ ຊ່ອຍຫຼຸດຜ່ອນຕົ້ນທຶນ ໃນການຮັບສະໝັກ ຄົນເຮັດວຽກ ເພີ່ມລາຍຮັບ ຍ້ອນສາມາດຕົວະ ເອົາເງິນໄດ້ຫຼາຍຂຶ້ນ ອີກທັງຫຼຸດຄວາມສ່ຽງ ໃນການຖືກກວດກາ ຈາກເຈົ້າໜ້າທີ່:

“ແກ້ງສະແກມເມີ້ ໃຊ້ AI ໃນການຮັບສະໝັກວຽກ ເພື່ອຕົວະເຫຍື່ອ ໃຫ້ມາເຮັດວຽກ ແລະຕົວະເອົາເງິນ ອີກເທື່ອໜຶ່ງ ເມື່ອຕົວະເອົາ ເງິນໄດ້ຫຼາຍຂຶ້ນ ກໍ່ຈະມີ ເງິນທຶນ ໃນການຂະຫຍາຍ ປະຕິບັດ ການໃຫ້ຊັບຊ້ອນ ແລະ ແນບນຽນກວ່າເກົ່າ ໃນອະນາຄົດ ຕໍ່ໜ້າ ການໃຊ້ AI ທີ່ເຮົາເຫັນຕອນນີ້ ຈະຂະຫຍາຍໂຕຂຶ້ນ ແລະ ເປັນອັນຕະລາຍ ກວ່າເກົ່າ.”

ກ່ອນໜ້ານີ້ ຄືຕັ້ງແຕ່ ວັນທີ່ 9 ຫາ ວັນທີ 26 ເດືອນສິງຫາ ທີ່ຜ່າມາ ລັດຖະບານລາວ ໄດ້ລົງປະຕິບັດການ ກວາດລ້າງ ກຸ່ມແກ້ງ ສໍ້ໂກງທາງ ໂທລະຄົມ ຫຼື Call Center ຂ້າມຊາດ ຢູ່ເຂດເສດຖະກິດພິເສດ ສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ສາມາດກວາດລ້າງ ແກ້ງຄອລເຊັນເຕີ້ ໄດ້ຢ່າງໜ້ອຍ 240 ຫົວໜ່ວຍ.

ເຖິງຢ່າງໃດກໍຕາມ, ແກ້ງຄອລເຊັນເຕີ້ ບາງສ່ວນ ໄດ້ຫັນປ່ຽນ ທຸລະກິດ ໂທລະຄົມ ເປັນທຸລະກິດ ປະເພດ ພະນັນອອນລາຍ ເປັນຕົ້ນ ການຫຼີ້ນໄພ້ ອອນລາຍ ຫຼື ເກມຫວຍ ສະຫຼອດ (Slot) ເພື່ອຕົວະເອົາເງິນແທນ ເຊິ່ງໃນການກວາດລ້າງ ທີ່ຜ່ານມາ ສາມາດຈັບທຸລະກິດ ກາສິໂນອອນລາຍ ໄດ້ຢ່າງນ້ອຍ 37 ຫົວໜ່ວຍ.

ປັດຈຸບັນ ຍັງມີຕຶກສະແກມເມີ້ ຢ່າງໜ້ອຍ 1 ຕຶກ ຖືກຕັ້ງຂຶ້ນ ໃນນະຄອນຫຼວງວຽງຈັນແລ້ວ ໂດຍເປັນຕຶກ ທີ່ສາມາດບັນຈຸຄົນໄດ້ ຢ່າງໜ້ອຍ 200 ຄົນ ມີຜູ້ຄຸມຕຶກ ຖືອາວຸດ ສະແດງໃຫ້ເຫັນວ່າ ເຖິງແມ່ນວ່າ ຈະມີການກວາດລ້າງຄັ້ງໃຫຍ່ ແຕ່ກໍ່ບໍ່ໄດ້ໝາຍຄວາມວ່າ ແກ້ງສະແກມເມີ້ ໄດ້ໝົດໄປຈາກລາວ ຍ້ອນກຸ່ມແກ້ງດັ່ງກ່າວ ຈະຫາເຕັກນິກ ແລະວິທີການໃໝ່ໆ ໃນການຕົວະຕົ້ມ, ອີງຕາມຄວາມ ຂອງທ່ານນາງ ມີນາ ຊ໋ຽງ (Mina Chiang) ຜູ້ອໍານວຍການ ອົງກອນ Human Research Consultancy:

“ຢ່າງທີ່ເຮົາຮູ້ ວ່າຕັ້ງແຕ່ ວັນທີ 26 ສິງຫາ ໄດ້ມີການກວາດລ້າງ ແກ້ງຄອລເຊັນເຕີ້ ໃນເຂດເສດຖະກິດພິເສດ ແຕ່ບໍ່ໄດ້ໝາຍຄວາມວ່າ ຈະບໍ່ມີແກ້ງອາດຊະຍາກໍາແລ້ວເນາະ ສ່ວນຫຼາຍ ແກ້ງຄອລເຊັນເຕີ້ ຈະຫັນປ່ຽນເປັນທຸລະກິດພະນັນອອນລາຍແທນ ຕອນນີ້ ຕຶກແກ້ງສະແກມເມີ້ ບໍ່ໄດ້ມີແຕ່ ໃນເຂດເສດຖະກິດພິເສດເທົ່ານັ້ນ ແຕ່ເຮົາເລີ່ມເຫັນຕຶກແບບນີ້ ປາກົດຂຶ້ນ ໃນນະຄອນຫຼວງວຽງຈັນນໍາ.”

ຮູບແບບການສໍ້ໂກງຊັບ ທາງໂທລະຄົມ ທີ່ພົບເຫັນໃນລາວ ແລະ ປະເທດອ້ອມຂ້າງ ຈະມີຢູ່ຫຼາຍຮູບແບບ ເຊັ່ນ: ການໂຄສະນາ ຂາຍເລກ 6 ໂຕ ທັງເລກລາວ, ເລກຫວຽດນາມ ແລະ ເລກໄທ ຖ້າຫາກຕ້ອງການ ຖືກເລກ 6 ໂຕ ຈະຕ້ອງໄດ້ໂອນເງິນ ໃຫ້ກຸ່ມຄອລເຕີ້ ເພື່ອລົງທະບຽນ ແຕ່ສຸດທ້າຍ ບໍ່ຖືກທັງເລກ ບໍ່ໄດ້ທັງເງິນ.

ໜຶ່ງໃນເຕັກນິກ ທີ່ແກ້ງຄອລເຊັນເຕີ້ ໃຊ້ໃນການຕົວະຕົ້ມເຫຍື່ອ ຢ່າງແພ່ຫລາຍໃນທົ່ວໂລກ ເອີ້ນວ່າ “ການເຊືອດໝູ” ຫຼື “Pig Butchering” ໂດຍເປັນການຕົວະ ໃຫ້ເຫຍື່ອ ຮ່ວມລົງທຶນ ໃນລະບົບສະກຸນເງິນ ດິຈິຕອນປອມ, ເຮັດໃຫ້ເຫຍື່ອທົ່ວໂລກ ສູນເສຍເງິນຄຳທັງໝົດ ທີ່ພວກເຂົາເຈົ້າມີ ໃຫ້ກັບຂະບວນການຕົວະຕົ້ມ ອອນລາຍນີ້.