ຊາວລາວ, ຊາວຫວຽດນາມ 22 ຄົນ ຖືກຊ່ວຍອອກຈາກ ສາມຫຼ່ຽມຄຳ

ເດືອນມັງກອນ ປີ 2023 ເຖິງເດືອນ ພຶດສະພາ ປີ 2024 ທາງການແຂວງບໍ່ແກ້ວ ຊ່ອຍເຫຼືອຄົນລາວ ແລະຄົນຫວຽດນາມ ທັງໝົດ 20-22 ຄົນ ສ່ວນຫຼາຍ ເປັນເພດຍິງ ແລະໃນນັ້ນ ມີອາຍຸ 18 ປີຂຶ້ນໄປ ແລະບໍ່ເຖິງ 18 ປີ ພາຍຫຼັງພວກເຂົາເຈົ້າ ເປັນກຸ່ມສ່ຽງ ແລະຜູ້ຖືກເຄາຮ້າຍ ຈາກການຄ້າມະນຸດ ແອບແຝງເຮັດວຽກຕອບແຊັດ ຢູ່ເຂດເສດຖະກິດພິເສດສາມຫຼ່ຽມຄໍາ ແຂວງບໍ່ແກ້ວ, ຖືກຕົວະໄປເຮັດວຽກ ເປັນສາວຂາຍບໍລິການທາງເພດ ຢູ່ປະເທດມຽນມາ ແລະແຕ່ງດອງແອບແຝງຢູ່ຈີນ.

ສະເພາະ 5 ເດືອນ ຕົ້ນປີ 2024 ທາງການແຂວງບໍ່ແກ້ວ ຊ່ອຍເຫຼືອຄົນຫວຽດນາມ ທີ່ຖືກກໍານົດໂຕ ໂດຍຜູ້ຊ່ຽວຊານດ້ານການຄ້າມະນຸດ ວ່າ ເປັນຜູ້ຖືກເຄາະຮ້າຍ ຈາກການຄ້າມະນຸດ ໄດ້ທັງໝົດ 3 ຄົນ ຍ້ອນຖືກຕົວະມາເຮັດວຽກຕອບແຊັດ ຢູ່ເຂດເສດຖະກິດພິເສດສາມຫຼ່ຽມຄໍາ, ຖືກນາຍຈ້າງຍຶດພາດສະປອດ, ເຮັດວຽກບໍ່ໄດ້ເງິນເດືອນ ແລະເຮັດວຽກ ບໍ່ມີເວລາພັກຜ່ອນ, ຕາມຄວາມເວົ້າ ຂອງເຈົ້າໜ້າທີ່ທີ່ກ່ຽວຂ້ອງ ແຂວງບໍ່ແກ້ວ ກ່າວຕໍ່ວິທຍຸເອເຊັຽເສຣີ ໃນວັນທີ 23 ພຶດສະພາ 2024 ນີ້ວ່າ:

“ປະມານ 11 ຄົນ ແລ້ວກໍ່ໃນກຸ່ມນັ້ນກຸ່ມສ່ຽງ ຈາກການຄ້າມະນຸດນີ້ ປະມານ 8 ຄົນ ແລ້ວກໍ່ຂູດຮີດແຮງງານ ອີກ 3 ຄົນ ເປັນຊາວຕ່າງປະເທດເນາະ ເປັນປະເທດຫວຽດນາມ ປັດຈຸບັນນີ້ ກໍ່ຍັງແມ່ນ ຍັງຄ້າງຢູ່ສູນພັກຊົ່ວຄາວນີ້ ຍ້ອນວ່າ ທີ່ເຮົາຊ່ວຍມານີ້ ເຂົາເຈົ້າແລ້ວ ບໍ່ມີພາດສະປອດ ແລ້ວພາດສະປອດຫັ້ນ ຈະຖືກນາຍໜ້າຫັ້ນຍຶດໄວ້ ລະດຽວນີ້ຫັ້ນ ແມ່ນເຮົາກໍາລັງກະກຽມ ປະສານຫາສະຖານທູດຫວຽດນາມ ຫວຽດນາມ ນີ້ແມ່ນເຂົາເຈົ້າຫັ້ນ ຖືກຕົວະຍົວະເນາະເບື້ອງຕົ້ນ ຫັ້ນແມ່ນມາເຮັດວຽກຕອບແຊັດ ຕອບລາຍຫັ້ນ ແລ້ວສຸດທ້າຍຫັ້ນ ເອົາເຂົາເຈົ້າມາເຮັດໂດຍທີ່ວ່າ ບໍ່ມີເວລາພັກຜ່ອນ ແລ້ວກໍ່ໂດຍທີ່ວ່າບໍ່ໄດ້ຮັບເງິນເດືອນເຈົ້າ.”

ສ່ວນທີ່ເຫຼືອອີກ 8 ຄົນ ເປັນຄົນລາວນັ້ນ ຖືກກໍານົດໂຕ ໂດຍຜູ້ຊ່ຽວຊານ ດ້ານການຄ້າມະນຸດ ວ່າ ເປັນກຸ່ມສ່ຽງ ຜູ້ຖືກເຄາະຮ້າຍ ຈາກການຄ້າມະນຸດ ເຖິງແມ່ນພວກເຂົາເຈົ້າ ຈະຄົບອົງປະກອບວ່າ ເປັນຜູ້ຖືກເຄາະຮ້າຍ ຈາກການຄ້າມະນຸດ ຢູ່ປະເທດມຽນມາ ກໍ່ຕາມ ແຕ່ພາຍຫຼັງ 7-14 ມື້ ທີ່ພວກເຂົາເຈົ້າ ຢັ້ງຢືນກັບຕໍາຫຼວດວ່າ ໂຕເອງ ສະໝັກໃຈໄປເປັນສາວບໍລິການທາງເພດ ຢູ່ປະເທດມຽນມາເອງ ຈຶ່ງຖືກກໍານົດໂຕວ່າ ເປັນກຸ່ມສ່ຽງ ຜູ້ຖືກເຄາະຮ້າຍ ຈາກການຄ້າມະນຸດ, ດັ່ງເຈົ້າໜ້າທີ່ ທີ່ກ່ຽວຂ້ອງ ແຂວງບໍ່ແກ້ວ ຜູ້ດຽວກັບຂ້າງເທິງ ກ່າວວ່າ:

“ເບື້ອງຕົ້ນຫັ້ນນ່າ ໄປເປັນສາວແຄັດເຊຍ ໄປເປັນສາວເສີບ ບາດສຸດທ້າຍແລ້ວ ເອົາເຂົາໄປເປັນສາວບໍລິການ (ທາງເພດ) ແລ້ວແບບວ່າ ຜູກມັດດ້ວຍໜີ້ສິນເດ້ ຄັນຊິເວົ້າໄປເນາະ ມັນກໍ່ຄົບອົງປະກອບ ຂອງການຄ້າມະນຸດຫັ້ນແຫຼະ 3 ຄົນ ຫຼ້າສຸດນີ້ແມ່ນ ຖືວ່າມີແຕ່ຄົນໜຶ່ງ ເຂົາເຈົ້າພາກັນເສບສິ່ງເສບຕິດ ຈະນີ້ນີ້ນ່າ ແລ້ວຕື່ນເຊົ້າມາ ແລະແມ່ນມີຄົນລັກເອົາໄປຂາຍຢູ່ປະເທດ ມຽນມາ ແລ້ວບາດນີ້ ເວລາການໃຫ້ຂໍ້ມູນມິຫຍັງຕ່າງໆຫັ້ນນ່າ ແລ້ວຜູ້ຖືກເຄາະຮ້າຍສ່ວນຫຼາຍ ເຂົາເຈົ້າບໍ່ຍອມຮັບ ວ່າເຂົາເຈົ້າເປັນຜູ້ຖືກເຄາະຮ້າຍ ເຂົາເຈົ້າເວົ້າວ່າ ເຂົາເຈົ້າບໍ່ສະໝັກໃຈໄປເອງ ແລ້ວບາດນີ້ເຮົາສາວເຖິງຄົນທີ່ ເອົາເຂົາເຈົ້າໄປຂາຍ ແລ້ວບໍ່ໄດ້ ແລ້ວເຮົາເອົາຂໍ້ມູນ ແລ້ວເຮົາກໍານົດໂຕອອກມາຫັ້ນນ່າ ແລ້ວບໍ່ແມ່ນຜູ້ຖືກເຄາະຮ້າຍຫັ້ນນ່າ ເພາະວ່າການກໍານົດໂຕຂອງເຂົາເຈົ້າໜ້າທີ່ຕໍາຫຼວດ ລະແມ່ນ 7-14 ມື້ເດ້.”

ຂະນະທີ່ 1 ປີ ຜ່ານມາ ຄືປະມານເດືອນມັງກອນ ເຖິງເດືອນ ທັນວາ ປີ 2023 ຜ່ານມາ ທາງການແຂວງບໍ່ແກ້ວ ກໍ່ໄດ້ຊ່ອຍຄົນລາວ ເປັນກຸ່ມສ່ຽງ ແລະຜູ້ຖືກເຄາະຮ້າຍ ຈາກການຄ້າມະນຸດ ໄດ້ທັງໝົດ 10-12 ຄົນ ໃນນັ້ນ ມີທັງອາຍຸ ກາຍ 18 ປີ ແລະຕໍ່າກວ່າ 18 ປີ ໃນນັ້ນ ສ່ວນໃຫຍ່ ພວກເຂົາເຈົ້າ ຖືກກຸ່ມຄົນບໍ່ດີ ແອບແຝງແຕ່ງດອງຢູ່ລາວ ແລ້ວເອົາໄປຂາຍຕໍ່ໃຫ້ຜູ້ອື່ນ ຢູ່ຈີນ, ດັ່ງເຈົ້າໜ້າທີ່ ທີ່ກ່ຽວຂ້ອງ ແຂວງບໍ່ແກ້ວ ຜູ້ດຽວກັບຂ້າງເທິງ ກ່າວວ່າ:

“ຢູ່ໃນເຂດເສດຖະກິດເນາະ ຕາມການກໍານົດໂຕ ຂອງເຈົ້າໜ້າທີ່ຕໍາຫຼວດເນາະ ທີ່ວ່າກໍານົດອອກມາໄດ້ແທ້ໆຫັ້ນ 10-12 ຄົນເຈົ້າ ການແຕ່ງງານແບບແອບແຝງ ສໍາລັບປີ 2023 ເຈົ້າ ຂອງບໍ່ແກ້ວຫຼາຍເນາະ ເຮົາຊ່ວຍສ່ວນຫຼາຍແມ່ນເຂົາເຈົ້າຫັ້ນ ແຕ່ງງານແບບແອບແຝງ ແລ້ວກໍ່ແບບວ່າ ຫຼັງຈາກໄປປຸ໊ບແລ້ວແມ່ນວ່າ ເຂົາເຈົ້າຍຶດພາດສະປອດໄວ້ ແລ້ວເອົາໄປເປັນເມຍ ປະມານເດືອນໜຶ່ງ 2 ເດືອນ ແລ້ວກໍ່ຖືກຂາຍຕໍ່ແບບນີ້ຫັ້ນເນ່ ນອກຈາກນັ້ນແລ້ວ ຈະແມ່ນກຸ່ມສ່ຽງ ແລ້ວກໍ່ມີກໍາລັງກຽມ ສິເອົາໄປຂາຍຕໍ່ຢູ່ ຢູ່ປະເທດຈີນ ແລ້ວໄທເຮົາຊ່ວຍເຫຼືອໄດ້ ສ່ວນຫຼາຍເຂົາເຈົ້າເຮັດແບບນີ້ເນາະ ມາແຕ່ງງານປຸ໊ບ ແລ້ວກໍ່ໃນການສູ່ຂໍເນາະ ສູ່ຂໍໍລະກະບາງກໍລະນີ ກໍ່ຈະເອົາເງິນໃຫ້ພໍ່ແມ່ຫັ້ນ 30 ລ້ານ ຫຼື 60 ລ້ານເນາະ ໂດຍທີ່ວ່າເອົາໄປ ແລ້ວເຮັດເປັນເອົາບັດມາແລ່ນ ແລ້ວມາກວດສຸຂະພາບ ແລ້ວມາແລ່ນພາດສະປອດ ແລ້ວກໍ່ໄປ.”

ຂະນະທີ່ ເຈົ້າໜ້າທີ່ທີ່ກ່ຽວຂ້ອງ ເມືອງຫ້ວຍຊາຍ ກ່າວວ່າ ປີ 2023 ມີເດັກນ້ອຍແມ່ຍິງຊົນເຜົ່າ ອາຍຸບໍ່ເຖິງ 18 ປີ ທີ່ມີຖານະທຸກຍາກ ຖືກຄົນຈີນຕົວະແຕ່ງດອງ ໄປເປັນເມຍ ຢູ່ຈີນ ແລ້ວມາຮອດປັດຈຸບັນ ຕິດຕໍ່ບໍ່ໄດ້ ເປັນເວລາ ປະມານ 6 ເດືອນເແລ້ວ, ດັ່ງນາງກ່າວ ໃນມື້ດຽວກັນນີ້ວ່າ:

“ຄົນບ້ານເຮົານີ້ແຫຼະ ແບບວ່າ ເຂົາເຈົ້າເຫັນທາງເຟສແຫຼະເນາະ ເຫັນແລ້ວ ເຂົາເຈົ້າຫັ້ນມັກຫັ້ນນ່າ ມັກແລ້ວກໍ່ມີແບບວ່າ ມີນາຍໜ້າ ກໍ່ແມ່ນເນາະ ນາຍໜ້າຕິດຕໍ່ຫານ່າ ແລ້ວບາດນັ້ນ ກໍ່ແບບໄປສູ່ຂໍນໍາພໍ່ແມ່ນໂດຍຕົງເລີຍ ແລ້ວພໍ່ແມ່ຂະເຈົ້າກະ ຄວາມຮູ້ເທົ່າບໍ່ເຖິງການເນາະ ແລ້ວບໍ່ຮູ້ຫຍັງຫັ້ນນ່າ ແລ້ວກໍ່ເລີຍວ່າ ຮັບເອົາເງິນສິນສອດໂຕນັ້ນຫັ້ນ ແລ້ວຫຼັງຈາກອອກຈາກບ້ານໄປແລ້ວ ກໍ່ຕິດຕໍ່ຫາບໍ່ໄດ້ຫັ້ນນ່າ ແຕ່ສ່ວນຫຼາຍພໍ່ແມ່ຫັ້ນນ່າ ບໍ່ເຂົ້າໃຈນ່າ ການແຕ່ງດອງກັບຄົນຕ່າງປະເທດນີ້ ອັນນ່າຈະມີເອກກະສານຫຍັງແດ່ເນາະ ເຂົາເຈົ້າຊິຮັບຮູ້ໄດ້ນີ້ ກໍ່ສວຍເກີນໄປນ່າ ເພາະວ່າຄອບຄົວຫັ້ນ ກໍ່ມີລູກຫຼາຍຄົນ ວ່າຊິສາ ເຮືອນຢ້າວກໍ່ຈົນວ່າ ຝົນຕົກຮົ່ວໃສ່ຊິສາ ບໍ່ມີແນວມຸງນ່າ ກໍ່ມີມຸງຢູ່ ແຕ່ວ່າປູດເພໝົດນ່າ ເປັນຊ່ອງ ເປັນຮູໝົດຫັ້ນນ່າ.”

ນອກຈາກນີ້ ເມື່ອບໍ່ດົນທີ່ຜ່ານມາ ຄື ວັນທີ 15 ເດືອນພຶດສະພາ 2024 ສະຫະພັນແມ່ຍິງ ແຂວງບໍ່ແກ້ວ ໄດ້ເປີດກອງປະຊຸມຕິດຕາມ, ຊຸກຍູ້ ການນໍາໃຊ້ຄູ່ມື, ການປົກປ້ອງ, ຊ່ອຍເຫຼືອ ແລະການສົ່ງຕໍ່ ຜູ້ຖືກເຄາະຮ້າຍ ຈາກການຄ້າມະນຸດ ເຊິ່ງກອງປະຊຸມເທື່ອນີ້ ໄດ້ເວົ້າເຖິງ ການບັນທຶກຂໍ້ມູນ ລົງໃນລະບົບຖານຂໍ້ມູນ ເພື່ອມີສະຖິຕິ ໃນການຊ່ອຍເຫຼືອກຸ່ມສ່ຽງ ແລະຜູ້ຖືກເຄາະຮ້າຍ ຈາກການຄ້າມະນຸດຢ່າງຄັກແນ່ ພາຍຫຼັງ ກ່ອນໜ້ານີ້ ບໍ່ມີແນວນັ້ນ, ດັ່ງເຈົ້າໜ້າທີ່ ທີ່ກ່ຽວຂ້ອງຂັ້ນເມືອງ ຂອງແຂວງບໍ່ແກ້ວ ຜູ້ດຽວກັບຂ້າງເທິງ ກ່າວວ່າ:

“ປັບປຸງເພາະວ່າ ໃນການເບື້ອງຕົ້ນເນາະ ໃນປີ 2014 ເນາະ ແມ່ນວ່າ ສູນກາງສະຫະພັນແມ່ຍິງ ຫັ້ນແມ່ນໄດ້ເຮັດລະບົບ ເປັນຖານຂໍ້ມູນ ລາຍງານສະຖິຕິ ກ່ຽວກັບການຊ່ວຍເຫຼືອ ຜູ້ຖືກເຄາະຮ້າຍຫັ້ນນ່າ ແລ້ວໄທເຮົາກໍ່ມີຢູ່ຖານຂໍ້ມູນ ແຕ່ວ່າ ມັນກໍ່ຍັງບໍ່ລະອຽດ ແບບວ່າ ເປັນຕົ້ນ ຊ່ວຍເຫຼືອມາຂັ້ນຕອນເນາະ ມາແຕ່ບ້ານໃດ ເມືອງໃດ ເປັນເຜົ່າ ເປັນອີ່ຫຍັງຫັ້ນນ່າ ໄທເຮົາ ຍັງລະບຸບໍ່ລະອຽດ ມີແຕ່ວ່າ ເອີ່ ແມ່ນ ຊື່ ນາມ ສະກຸນ, ອາຍຸ, ບ້ານເກີດເມືອງນອນ ແຕ່ວ່າ ເຮົາຍັງບໍ່ເນັ້ນເຜົ່າ ຫຼືຊົນຊັັ້ນມິຫຍັງຫັ້ນ ເຂົາເຈົ້າກໍ່ເລີຍ ມາແນະນໍາ.”

ຂະນະທີ່ ເຈົ້າໜ້າທີ່ ທີ່ກ່ຽວຂ້ອງ ເມືອງຫ້ວຍຊາຍ ກ່າວວ່າ ກອງປະຊຸມ ຕິດຕາມ, ຊຸກຍູ້ ການນໍາໃຊ້ຄູ່ມື, ການປົກປ້ອງ, ຊ່ອຍເຫຼືອ ແລະການສົ່ງຕໍ່ຜູ້ຖືກເຄາະຮ້າຍ ຈາກການຄ້າມະນຸດເທື່ອນີ້ ຈະຊ່ອຍໃຫ້ສະຫະພັນແມ່ຍິງ ມີຂໍ້ມູນກ່ຽວກັບ ຜູ້ຖືກເຄາະຮ້າຍ ຈາກການຄ້າມະນຸດລະອຽດຂຶ້ນ, ດັ່ງນາງ ກ່າວວ່າ:

“ມັນຈະມີຄູ່ມື ເປັນຄູ່ມືເລີຍນ່າ ຕອນເຝີກຫັ້ນນ່າ ເປັນປື້ມເນາະ ເປັນປື້ມຫົວໃຫຍ່ໜ້ອຍໜຶ່ງເນາະ ແລ້ວບາດນັ້ນ ຄັນຖ້າເຮົາລງແລ້ວ ເຮົາຈະປັບໂຕນັ້ນລົງໄປເລີຍ ລົງບ້ານເລີຍ ກໍ່ດີຫຼາຍດ້ານເຈົ້າ ຜ່ານມາຫັ້ນເຮົາບໍ່ມີຄູ່ມືເຈົ້າເນາະ ເຮົາບໍ່ມີແບບຟອມຫັ້ນນ່າ ແລ້ວເຮົາກໍ່ເລີຍວ່າ ມີແຕ່ສໍາພາດໂຕຈິງ ແລ້ວເກັບກໍາຂໍ້ມູນບໍ່ລະອຽດເນາະ ຫຼັງຈາກມີແບບຟອມມາແລ້ວ ເຮົາກໍ່ເກັບລະອຽດ ສ່ວນຫຼາຍ ທາງແມ່ຍິງເມືອງ ຈະບໍ່ໄດ້ລົງ ມີແຕ່ວ່າແຂວງຫັ້ນ ພາໄປເຈົ້າ.”

ເຖິງຢ່າງໃດກໍ່ຕາມ ແຕ່ລະປີ ທີ່ຜ່ານມາ ສ່ວນຫຼາຍ ແຂວງບໍ່ແກ້ວ ມີຈໍານວນກຸ່ມສ່ຽງ ແລະຜູ້ຖືກເຄາະຮ້າຍ ຈາກການຄ້າມະນຸດ ທີ່ໄດ້ຮັບການຊ່ອຍເຫຼືອ ຈາກທາງການທີ່ກ່ຽວຂ້ອງ ຈໍານວນສູງ ເມື່ອທຽບໃສ່ ແຂວງພາກເໜືອຂອງລາວ ອີກທັງ ມາຮອດປັດຈຸບັນ ປະເທດລາວ ເປັນປະເທດປາຍທາງ ທີ່ມີການຄ້າມະນຸດ ແລະຄ້າແຮງງານແລ້ວ ສາເຫດໜຶ່ງ ກໍ່ຍ້ອນແຂວງບໍ່ແກ້ວ ມີເຂດເສດຖະກິດພິເສດສາມຫຼ່ຽມຄໍາ, ອີງຕາມຂໍ້ມູນ ຈາກສະຫະພັນແມ່ຍິງ ແຂວງບໍ່ແກ້ວ.