ບັນຫາຊາວໜຸ່ມຕິດ ຢາເສບຕິດ

ມີຊາວໜຸ່ມປະມານ 40 ຄົນ ຢູ່ບ້ານນາສາລາ ເມືອງໄຊທານີ ນະຄອນຫຼວງວຽງຈັນ ຕິດຢາເສບຕິດ ແລະ ສິ່ງທີ່ຮ້າຍໄປກ່ວານັ້ນເດັກນ້ອຍ ອາຍຸ 7 ຫາ 8 ປີ ຖືກພວກຜູ້ໃຫຍ່ໃຊ້ ເປັນເຄື່ອງມືສົ່ງຢາໃຫ້ ລູກຄ້າ. ຊາວບ້ານນາສາລາ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 26 ມິຖຸນາ ວ່າ:

"ຜູ້ເກົ່າໄປດຳເນີນຄະດີ ຈັກ 2 ເທື່ອ 3 ເທື່ອ ມາແລ້ວ ມັນກໍຍັງເຮັດຄືເກົ່າ, ບາດນີ້ມາແລ້ວ ມາຂຍາຍເປັນວົງກວ້າງໄດ໋ ລະແມ່ນລະດົມໃຫ້ ລູກຫຼານເອົາພວກເດັກນ້ອຍອາຍຸ 7 - 8 ປີ ໄປເປັນເຄື່ອງມື ສົ່ງຢາມ້າໃຫ້ເຂົາຊິໄດ໋ ມັນເຮັດນ່າ. ມັນຍົວະເດັກນ້ອຍ ເສບຢາມ້າ, ເດັກນ້ອຍ ບໍ່ໄດ້ຢູ່ໃນສາຍຕາ ພວກເຮົາຕິດຕາມ."

ພວກເສບຢາບ້າ ບໍ່ພໍໃຈເຂົ້າມາຈູດເຮືອນກອງຫຼອນບ້ານ, ຊາວບ້ານ ທ່ານນີ້ ກ່າວວ່າ:

"ບາດນີ້ ເຮົາຊິເຮັດແນວໃດໄດ້ ເພາະວ່າ ຕຳຣວດມັນກໍຢູ່ເສີຍໆ, ເຮົາປາບເທື່ອນຶ່ງ ມັນຈູດເຮືອນກອງຫຼອນເຮົາ ບາດນີ້ນະ."

ແຕ່ເຈົ້າໜ້າທີ່ກ່ຽວຂ້ອງເມືອງໄຊທານີ ໄດ້ກ່າວວ່າ ເຈົ້າໜ້າທີ່ບໍ່ມີງົບປະມານ ໃນການລົງເຮັດວຽກ:

"ກ່ຽວກັບບັນຫາ ຄ້າຂາຍຢາເສບຕິດຖືວ່າແຜ່, ແຕ່ວ່າເວົ້າເລື່ອງເຈົ້າໜ້າທີ່ ເຮົານີ້ເວົ້າງ່າຍໆເນີ ງົບປະມານໃນການແກ້ໄຂພວກເຮົາຊອກ ຍາກຫຼາຍບໍ່ມີເງິນແລ້ວ. ຖ້າວ່າມີຫາງສຽງ ຈາກປະຊາຊົນ ພວກເຮົາຈະໃຊ້ອ້າຍນ້ອງ ເຮົານີ້ເນີ ລົງໄປເກັບກຳບັນດາຂໍ້ມູນ."

ນອກຈາກນີ້ ຢູ່ເຂດບ້ານຫົວເມືອງໃຕ້ ນະຄອນ ໄກສອນ ພົມວິຫານ ແຂວງສວັນນະເຂດ ມີ 40 ຄອບຄົວ ທີ່ພົວພັນກັບຢາເສບຕິດ, ຊາວບ້ານຫົວເມືອງໃຕ້ ໄດ້ກ່າວຕໍ່ເອເຊັຽເສຣີ ວ່າ:

"ເຮົາກໍມີຢູ່ປະມານ 40 ກວ່າຄອບຄົວ ທີ່ວ່າມີການພົວພັນກັບຢາເສບຕິດນ່າ, ຕິດແລ້ວກໍອອກບໍ່ໄດ້ຊິແຫຼະ.,ຢາກໃຫ້ທາງຣັຖບານເພິ່ນໃຫ້ ເຫັນຄວາມສຳຄັນໂຕນີ້ເນາະ ຂອງຊາວໜຸ່ມເຮົານີ້, ແລ້ວກໍຕັ້ງສູນປິ່ນປົວເນາະ."

ຜູ້ທີ່ໄດ້ຮັບການບຳບັດໃຫ້ເຊົາຢາແລ້ວ ກໍຍັງກັບຄືນໄປເສບຄືເກົ່າ, ເຈົ້າໜ້າທີ່ກ່ຽວຂ້ອງ ໄດ້ກ່າວວ່າ:

"ເອີສູນໆ ເຂົາເຮັດວຽກສຸຂສຶກສາ ອົບຮົມແຫຼະ ເຂົາກໍມີຢາກິນ ຢາປົວຫັ້ນແຫຼະເນາະ, ອັນນັ້ນມັນກໍຂຶ້ນຢູ່ກັບຈິດໃຈຄົນ ບາງຄົນກໍເລີກ ບາງຄົນ ກໍໄປສແວງຫາຄືນເນາະ, ມັນກໍຢາກຢູ່ມັນ ເລື່ອງຈິດໃຈ ຂອງຄົນເຮົານີ້ເນາະ. ເອີດີແທ້ ພວກເຮົາຈະຕ້ອງເປັນເຈົ້າການນຳກັນ ພຸ້ນແຫຼະ ນັບແຕ່ສະຖາບັນຄອບຄົວເນາະ."

ອີກກໍຣະນີນຶ່ງ ທີ່ເກີດຂຶ້ນ ຢູ່ບ້ານຫ້ວຍຫລ້າ ເມືອງໄຊທານີ ນະຄອນຫຼວງວຽງຈັນ ມີຊາວໜຸ່ມ 2 ຄົນ ອາຣະວາດ ຕີພໍ່ ຕີແມ່ ຍ້ອນຂໍເງິນ ບໍ່ໄດ້, ຊາວບ້ານຫ້ວຍຫລ້າ ກ່າວຕໍ່ເອເຊັຽເສຣີ ວ່າ:

"ຂໍເງິນແມ່ບໍ່ໄດ້ລະຕີແມ່ນ່າ, ມ້າງເຮືອນມ້າງຕູ້ທຸບຈອກ ໄດ້ເອົາມາສຶກສາອົບຮົມໄວ້. ຊ້ວງໂຄວິດ ເພິ່ນບໍ່ຮັບເດີເນາະ ເພິ່ນບໍ່ໃຫ້ຄົນເຂົ້າ ຄົນອອກ ກໍຈຳເປັນໄດ້ເອົາມາຂັງໄວ້ ຫ້ອງການບ້ານຫັ້ນ. ຊ່ວຍຄັນບໍ່ຊ່ວຍ ມັນຊິຂ້າພໍຂ້າແມ່ ເຮັດຈັ່ງໃດລະ."

ອີງຕາມຂໍ້ມູນຈາກຊາວບ້ານ, ຢູ່ບ້ານຫ້ວຍ ມີຜູ້ຕິດຢາເສບຕິດ ປະມານ 30 ຄົນ. ກ່ຽວກັບເລື່ອງຢາເສບຕິດ, ທ່ານ ທອງລຸນ ສີສຸລິດ ນາຍົກຣັຖມົນຕຼີ ໄດ້ກ່າວຢູ່ໃນກອງປະຊຸມ ສະພາ ໃນວັນທີ 25 ມິຖຸນາ ຕອນນຶ່ງວ່າ:

"ອັນນີ້ແຫລະ ຣັຖບານໄດ້ເອົາໃຈໃສ່ ພາກສ່ວນກ່ຽວຂ້ອງ ກໍໄດ້ເອົາໃຈໃສ່. ຂໍໃຫ້ສະມາຊິກສະພາ ເປັນຫູເປັນຕານຳກັນ ກະຊ່ອຍປາບປາມ ອັນນີ້ໃຫ້ໄດ້. ຖ້າພວກເຮົາ ປ່ອຍໂຕນີ້ ໄປຄົນເຮົາ ຂ້າພະເຈົ້າໄດ້ເວົ້າຫຼາຍເທື່ອແລ້ວ ເດັກນ້ອຍເຮົາ ລູກຫຼານເຮົາ ມີແຕ່ຮ່າງເທົ່ານັ້ນໄດ໋ ບໍ່ມີມັນສມອງ ບໍ່ມີສະຕິປັນຍາ ເພື່ອສ້າງສາ ປະເທດຊາດບ້ານເມືອງໄດ້. ບາດນີ້ ເວລານັ້ນ ບ້ານເມືອງ ຈະເປັນແນວໃດ."

ເນື່ອງໃນວັນສາກົນຕ້ານຢາເສບຕິດ ວັນທີ 26 ມິຖຸນາ ຄົບຮອບ 33 ປີ, ທ່ານ ທອງລຸນ ສີສຸລິດ ນາຍົກຣັຖມົນຕຼີ ກໍໄດ້ຮຽກຮ້ອງໃຫ້ທຸກ ພາກສ່ວນ ຈົ່ງພ້ອມກັນເປັນເຈົ້າການ ເຂົ້າຮ່ວມການສະກັດກັ້ນ ຕ້ານ ແລະ ແກ້ໄຂບັນຫາ ຢາເສບຕິດ ໃຫ້ຫລຸດໜ້ອຍຖອຍລົງ ເປັນຕົ້ນ ແມ່ນບັນດາ ຊົນເຜົ່າທາງພາກເໜືອ ຫັນໄປປະກອບອາຊີບ ອື່ນທີ່ໝັ້ນຄົງ ແລະ ຖືກກົດໝາຍແທນການປູກຝິ່ນ ທີ່ເປັນນຶ່ງໃນຢາເສບຕິດ ປະເພດຮ້າຍແຮງ ທີ່ແຜ່ລະບາດຢູ່ໃນລາວ.

ເນື້ອທີ່ຜູ້ຝິ່ນຢູ່ປະເທດລາວ, ອີງຕາມຂໍ້ມູນຈາກສຳນັກງານ UNODC ປະຈຳລາວ, ໃນປີ 2015 ມີເນື້ອທີ່ ປູກຝິ່ນ ຢູ່ປະເທດລາວ ປະມານ 5,700 ເຮັກຕ້າຣ໌ ໃນນັ້ນ ຢູ່ແຂວງຜົ້ງສາລີ ກວມເອົາ 3,000 ເຮັກຕ້າຣ໌.