ຕໍາຣວດໄທ ຈັບ ເຄືອ​ຂ່າຍ ຢາ​ເສບ​ຕິດ

ຈໍາປາທອງ
2019-09-24
ອີແມວລ໌
ຄໍາເຫັນ
Share
ພິມ
ກອງບັງຄັບການ ສືບສວນ ພາກ 3 ຂອງໄທ ຈັບ ທ້າວ ຣັດຊະພູມ ສຸດຫລ້າ ຊາວໄທ ຢູ່ ທະນາຄານ ແຂວງມຸກດາຫານ ໃນຂໍ້ຫາ ສົມຮູ້ຮ່ວມຄິດກັນ ຟອກເງິນ ເພື່ອ ຄ້າຢາເສບຕິດ ໃນເຄືອຂ່າຍໃຫຍ່ ຂອງລາວ
ກອງບັງຄັບການ ສືບສວນ ພາກ 3 ຂອງໄທ ຈັບ ທ້າວ ຣັດຊະພູມ ສຸດຫລ້າ ຊາວໄທ ຢູ່ ທະນາຄານ ແຂວງມຸກດາຫານ ໃນຂໍ້ຫາ ສົມຮູ້ຮ່ວມຄິດກັນ ຟອກເງິນ ເພື່ອ ຄ້າຢາເສບຕິດ ໃນເຄືອຂ່າຍໃຫຍ່ ຂອງລາວ
Screen captured citizen journalist video

ກອງບັງຄັບການສືບສວນ ພາກ 3 ຂອງໄທ ຈັບ ທ້າວ ຣັດຊະພູມ ສຸດຫລ້າ ຊາວໄທ, ຊຶ່ງມີ​ພັ​ລ​ຍາ ເປັນ​ຄົນ​ລາວ ແຂວງສວັນນະເຂດ, ຢູ່ ທະນາຄານແຂວງມຸກດາຫານ ໃນຂໍ້ຫາສົມຮູ້ຮ່ວມຄິດກັນ ຟອກເງິນ ເພື່ອຄ້າຢາເສບຕິດ ໃນເຄືອຂ່າຍໃຫຍ່ ຂອງລາວ ໂດຍມີເງິນ 200 ປາຍລ້ານບາດ ໜູນວຽນໃນ 10 ບັນຊີເງິນຝາກທະນາຄານ ໃນໄລຍະ 4 ເດືອນ ຫລັງມານີ້, ອີງຕາມຄໍາເວົ້າ ຂອງເຈົ້າໜ້າທີ່ ຕໍາຣວດໄທ ຕໍ່ວິທຍຸເອເຊັຽເສຣີ ໃນມື້ວັນທີ 23 ກັນຍາ ນີ້:

"ທ່ານເວົ້າວ່າ ຖືກຈັບຄວາມຜິດກ່ຽວກັບຟອກເງິນ ແລະກໍຮວມຫົວກັນຕັ້ງແຕ່ 2 ຄົນຂຶ້ນໄປ ເພື່ອກະທໍາຄວາມຜິດ ຟອກເງິນ. ມີຍອດເງິນ ຂອງຄົນຮ້າຍ ພວກຄ້າຢາເສບຕິດ ທີ່ໂອນເຂົ້າບັນຊີ ແລ້ວໂອນຜ່ານ 2-3 ບັນຊີ ຈົນໄປເຖິງໂຕທ້າວ ຣັດຊະພູມ."

ທ່ານກ່າວຕື່ມວ່າ ທ້າວ ຣັດຊະພູມ ໃຫ້ການປະຕິເສດ ຂໍ້ກ່າວຫານັ້ນ ແລະຢືນຢັນວ່າ ເງິນນັ້ນເປັນເງິນສຸຈຣິດ, ໄດ້ຈາກການເປີດຮ້ານຮັບ ປ່ຽນເງິນຕຣາ ຢູ່ເມືອງອຸທຸມພອນ ແຂວງສວັນນະເຂດ ທີ່ມີລູກຄ້າໂອນເງິນເຂົ້າບັນຊີ ທະນາຄານຂອງຕົນ ແລ້ວຕົນກໍຈະນໍາເງິນນັ້ນ ຂ້າມໄປລາວ ເພື່ອໃຫ້ລູກຄ້າມາຮັບປ່ຽນເງິນຕຣາ.

ເບື້ອງຕົ້ນ ເຈົ້າໜ້າທີ່ຕໍາຣວດໄທ ຄັດຄ້ານການປະກັນຕົວທ້າວ ຣັດຊະພູມ ແລະສົ່ງໄປຂັງຢູ່ຄຸກ ແຂວງສີສະເກດ ເພື່ອລໍຖ້າສານຕັດສິນ ດັ່ງທີ່ທ່ານກ່າວວ່າ:

"ກໍຄັດຄ້ານການປະກັນຕົວ ຢ້ານຈະຫລົບໜີ ອອກນອກປະເທດ. ເຂົາມີພູມລໍາເນົາຢູ່ທີ່ ສປປ ລາວ, ຝາກຂັງເມື່ອວັນສຸກທີ່ແລ້ວ."

ຄະດີຂອງ ທ້າວ ຣັດຊະພູມ ສືບເນື່ອງມາຈາກເຈົ້າໜ້າທີ່ຕໍາຣວດໄທ ໄດ້ຈັບຜູ້ຕ້ອງຫາຄົນນຶ່ງພ້ອມ ຢາບ້າ 2 ພັນເມັດ. ຜູ້ຕ້ອງຫາຄົນນັ້ນ ໃຫ້ການວ່າ ໄດ້ໂອນເງິນຈ່າຍຄ່າຢາບ້າ ເຂົ້າບັນຊີ ທະນາຄານຂອງ ທ້າວ ຫານລຶກ ທີ່ຈັບຍັງບໍ່ທັນໄດ້. ບັນຊີເງິນ ຂອງ ທ້າວ ຫານລຶກ ໄດ້ຖືກສົ່ງຕໍ່ເຂົ້າ ຫລາຍບັນຊີ ຊຶ່ງນຶ່ງໃນນັ້ນ ແມ່ນບັນຊີຂອງ ທ້າວ ຣັດຊະພູມ ຜົວເຈ໊ນາງ ທີ່ມີທຸຣະກິດຮ້ານ ຮັບປ່ຽນເງິນຕຣາ ແລະ ຮັບຊື້-ຂາຍຄໍາ ຢູ່ເມືອງ ອຸທຸມພອນ ຊຶ່ງນາງໄດ້ລົງຂໍ້ຄວາມທາງເຟສບຸກ ວ່າຂນະນີ້ທະນາຍຄວາມ ກໍາລັງປະກອບເອກກະສານຫຼັກຖານ ຢືນຢັນເຖິງຄວາມບໍຣິສຸດ ຕໍ່ເຈົ້າໜ້າທີ່ ທາງການ.

ຂອງກາງ ທີ່ເຈົ້າໜ້າທີ່ຍຶດໄດ້ຈາກ ທ້າວ ຣັດຊະພູມ ມີຮວມທັງເງິນໄທ 1 ລ້ານ 5 ແສນບາດ, ເງິນກີບ 55 ລ້ານກີບ, ບັນຊີເງິນຝາກ ທະນາຄານ 4 ບັນຊີ, ບັດ ເອທີເອັມ 5 ໃບ, ຣົດໃຫຍ່ 1 ຄັນ ແລະ ເຄື່ອງຂອງມີຄ່າ ອີກຈຳນວນນຶ່ງ.

ເຕັມຫນ້າ