ທາງການຫຼວງນໍ້າທາ ຕັດຕົ້ນຝີ່ນ ຖິ້ມ

ເມື່ອຕົ້ນເດືອນກູມພາ ທາງການແຂວງ ຫລວງນໍ້າທາ ທໍາລາຍພື້ນທີ່ ປູກຝິ່ນ ທີ່ປະຊາຊົນລັກປູກ ຢູ່ເຂດບ້ານສວນຢາ ເມືອງຫຼວງນໍ້າທາ ຈໍານວນ 1.2 ເຮັກຕ່າ ແລະ ໄດ້ສົ່ງຕົວຜູ້ກະທໍາຜິດ ໄປດໍາເນິນຄະດີ ຕາມຣະບຽບ, ອິງຕາມຄໍາເວົ້າ ຂອງເຈົ້າໜ້າທີ່ ຜແນກກະສິກັມ ແລະປ່າໄມ້ ແຂວງຫລວງນໍ້າທາ ທ່ານນຶ່ງ ກ່າວຕໍ່ ວິທຍຸ ເອເຊັຍເສຣີ ໃນວັນທີ່ 25 ກູມພາ ນີ້:

“ປູກຝິ່ນບໍ; ກວດກາໄດ້ພວກເຮົາ ກໍປັບໃຫມ ຕາມຣະບຽບເນາະ ສ່ວນການດໍາເນິນຄະດີ ຫັ້ນທັງໝົດ ພວກເຮົາຈະສົ່ງໃຫ້ເມືອງ ຄິດວ່າມີ ຂ້ອນຂ້າງຫລາຍ ເຜົ່າມົ້ງຫັ້ນແລ້ວ ເຂົາປູກ.”

ເຈົ້າໜ້າທີ່ທ່ານນີ້ເວົ້າວ່າ ຕາມການສັນນິຖານ ບວກກັບຣະຍະຜ່ານມາ ທີ່ມີເຈົ້າໜ້າທີ່ຕໍາຣວດ-ທະຫານ ແຂວງຫຼວງນໍ້າທາເຂົ້າໄປທໍາລາຍ ຕົ້ນຝີ່ນ ຢູ່ເລື່ອຍໆຄິດວ່າ ຍັງມີຕົ້ນຝິ່ນ ທີ່ປະຊາຊົນລັກປູກ ຫລາຍສົມຄວນ ເພາະເຂົາເຈົ້າ ມີຄວາມເຊື່ອວ່າຝິ່ນ ເປັນຢາເສິມສຸຂພາບ. ສໍາລັບວິທີການ ທໍາລາຍຕົ້ນຝິ່ນຂອງເຈົ້າໜ້າທີ່ ຄັ້ງນີ້ຄື: ເອົາໄມ້ຟາດ ແລະເອົາພ້າ ຖາງຕັດຕົ້ນຝິ່ນ ຖີ້ມ.

ທ່ານວ່າສາເຫດ ທີ່ຍັງມີການລັກລອບປູກຝິ່ນ ສ່ວນນຶ່ງນັ້ນ ກໍແມ່ນມາຈາກ ເຈົ້າໜ້າທີ່ ທະຫານບາງຄົນ ເມື່ອອອກໄປກວດກາ ລາດຕາເວັນ ແລ້ວເຫັນວ່າ ປ່າເຂດນັ້ນ ອຸດົມສົມລົບຕາຜູ້ຄົນ ເໝາະສົມສໍາຫລັບການປູກຝິ່ນເລີຍຈ້າງ ປະຊາຊົນລັກ ປູກໃຫ້

”ອິງໃສ່ທະຫານເນາະ ແຕ່ວ່າທະຫານ ມັນກໍບ່ເປັນໃຈໃຫ້ເຮົາບາງເທື່ອ ເຮົາກໍອາສັຍກໍາລັງທະຫານ ອອກໄປກວດລາດຕະເວັນ ຮ່ວມກັນ ແຕ່ບາງເທື່ອໄປເຫັນຊັບພະຍາກອນ ທີ່ອຸດົມສົມບຸນ ໃນເຂດນັ້ນແລ້ວມາບອກໃຫ້ຊາວບ້ານ ຫຼືບອກໃຫ້ຜູ້ອື່ນນັ້ນ ເຂົ້າໄປຈຸດຄົ້ນ.”

ຢ່າງໃດກໍຕາມໜັງສືພິມ ປກສ ຂອງທາງການລາວ ຣາຍງານ ເມື່ອວັນທີ 11 ມົກຣາ 2019 ວ່າ ໃນສົກປີ 2017-2018 ຍັງມີປະຊາຊົນ ຈໍານວນບໍ່ນ້ອຍ ລັກປູກຝີ່ນ ຢູ່ຕາມພື້ນທີ່ ຫ່າງໄກສອກຫລີກ ຈາກສາຍຕາ ຂອງເຈົ້າໜ້າທີ່, ແລະ ວ່າຈາກຂໍ້ມູນ ພາບຖ່າຍ ດາວທຽມ ກ່ຽວກັບ ພື້ນທີ່ ປູກຝີ່ນໃນລາວ ມີປະມານ 5,008 (5 ພັນ 8) ເຮັກຕາ ໃນຂນະທີ່ ເຈົ້າໜ້າທີ່ລາວ ຣາຍງານວ່າ ກວດພົບ ພຽງແຕ່ 468 ເຮັກຕາ.

ຕາມຣາຍງານ ເວົ້າວ່າ ແຂວງ ທີ່ ຍັງມີ ມີການປູກ ຝີ່ນໃນລາວ  ມີຢູ່  7 ແຂວງ ຄື: ແຂວງ ຜົ້ງສາລີ, ຫົວພັນ, ຫລວງພຣະບາງ, ອຸດົມໄຊ, ບໍ່ແກ້ວ, ຊຽງຂວາງ, ແລະ ແຂວງ ຫລວງນໍ້າທາ.