ອະດີດຜູ້ເຮັດວຽກຕອບແຊັດ ເລົ່າວ່າວຽກນີ້ສ່ຽງຕໍ່ການຄ້າມະນຸດ

ອະດີດຜູ້ເຮັດວຽກຕອບແຊັດ ໃນເຂດເສດຖະກິດພິເສດ ສາມຫຼ່ຽມຄໍາໄດ້ໃຫ້ສໍາພາດຕໍ່ວິທຍຸເອເຊັຽເສຣີກ່ຽວກັບການໄປເຮັດວຽກຕອບແຊັດ ໃນເຂດດັ່ງກ່າວວ່າ ອາດສ່ຽງຕໍ່ການຖືກຄ້າມະນຸດ ໂດຍຜ່ານການເຮັດວຽກ. ອະດີດຜູ້ເຮັດວຽກຕອບແຊັດ ໄດ້ເລົ່າປະສົບການດັ່ງກ່າວ ໃນແຕ່ໄລຍະຂອງການເຮັດວຽກ ໂດຍເລີ່ມຈາກການໂຄສະນາ ຊວນເຊື່ອວ່າ ຈະໄດ້ຮັບເງິນເດືອນສູງ ແຕ່ພໍມາເຮັດຕົວຈິງແລ້ວ ພັດບໍ່ໄດ້ດັ່ງທີ່ສັນຍາໄດ້ລະບຸໄວ້ ໃນຕອນສະມັກເຂົ້າມາເຮັດວຽກ.

“ເຮົາເຮັດໄດ້ປະມານໄປ 2 ເດືອນ 3 ເດືອນ ບໍ່ຄືທີ່ເຂົາເຈົ້າເວົ້າວ່າເຮັດໄດ້ເທົ່ານີ້ໄດ້ເທົ່ານີ້ຄືຕາມເຂົາເຈົ້າຂຽນຕົວຈິງເຂົາຈະໄລ່ໃຫ້ເປັນມື້ 130ຢວນ  ຈະນີ້ແຕ່ເຂົາຈະມີຂໍ້ອ້າງທີ່ວ່າບໍ່ຢາກໃຫ້ເຮົາເຕັມເຮົາລືມປິດໄຟບໍ່ເຮົາມີຂີ້ເຫຍື້ອຖີ້ມໄວ້ຫ້ອງບໍ່, ຍອດກຸ່ມບໍ່ມີຫຼາຍເດືອນນີ້ແລ້ວເຂົາເຈົ້າຮູ້ຈະໄດ້ຈ່າຍເງິນແລ້ວເຂົາເຈົ້າບໍ່ຢາກຈ່າຍເນາະຄັນມີຫຼາຍເຂົາເຈົ້າເລີ່ມຄັດເອົາຄົນອອກບອກວ່າຂ້ອຍບໍ່ເອົາພະນັກງານມາແຕ່ບາດນີ້ເຂົາບອກໃຫ້ຫຼອກຫຼອກຄົນເຂົ້າມາອີກຄືນ້ອງເອົາເຂົ້າມານີ້ 3 ຄົນເປັນພີ່ນ້ອງເປັນໝູ່ກັນເຂົາວ່າຈະໃຫ້ 4-5 ພັນນີ້ແຫຼະ 3 ຄົນນ່າເປັນເງິນຄ່າແນະນໍາແຕ່ສຸດທ້າຍໝໍ່ຈະຮອດມາແລ້ວເຂົາເຈົ້າຫາເລື່ອງຕິນ້ອງທັງເງິນເດືອນ ທັງເງິນຄົນໄລ່ອອກມາເລີຍບໍ່ໃຫ້ເຮົາເລີຍເຮົາກໍ່ໄດ້ເສຍຄົນໃຫ້ເຂົາແຕ່ບໍ່ໄດ້ເງິນນໍາເຂົາເຈົ້າຫັ້ນນ່າ.”

ອະດີດພະນັກງານຕອບແຊັດ ໄດ້ເລົ່າຕື່ມກ່ຽວກັບວິທິີການຫຼອກລໍ້ ໃຫ້ເຫຍື່ອເຂົ້າມາລົງທຶນ ຂັ້ນຕອນນີ້ແມ່ນຈະຕ້ອງເຮັດໃຫ້ເຫຍື່ອຫຼົງເຊື່ອ ໂດຍທຳອິດໃຫ້ເຫຍື່ອໄດ້ກຳໄລກ່ອນ ພໍລົງທຶນຫຼາຍຂຶ້ນກຸ່ມຕອບແຊັດກໍ່ຈະປິດບັນຊີ ຜູ້ເປັນເຫຍື່ອກໍ່ສູນເສຍເງິນ.

“ແບບເຮົາຊັກຊວນເຂົາເຈົ້າມາລົງທຶນ ຊື້ຫຼຽນເປັນສະກຸນເງິນຕ່າງປະເທດ ຈາກນີ້ເພື່ອໃຫ້ເຂົາເຈົ້າເອົາເງິນຝາກເຂົ້າມາແລ້ວ ກໍ່ໃຫ້ເຂົາເຈົ້າແລກເປັນເງິນໂດລາແລ້ວກໍ່ເທຣດເອົາກຳໄລ ແລ້ວກໍ່ໄປແບບນີ້ນີ້ນ່າຄືເຮົາຝາກເງິນທະນາຄານແບບນີ້ນ່າ. ເອື້ອຍເຮົາຝາກເງິນທະນາຄານ ຄັ້ງແລກທີ່ເຮົາຝາກໃຫ້ດອກເບ້ຍ ເຂົາເຈົ້າໄປພ້ອມຄືຝາກມາໝື່ນໜຶ່ງ ເຂົາຈະໃຫ້ກຳໄລໄປໝື່ເອັດຮອບທີສອງ. ເຮົາຈະບອກໃຫ້ລູກຄ້າເພີ່ມທຶນ ຈາກໝື່ນໜຶ່ງແລ້ວກໍ່ເພີ່ມເປັນແສນ ແລ້ວກໍ່ຄັ້ງທີສອງເຂົາຈະເບິ່ງວ່າ ລູກຄ້າຄົນນັ້ນຍັງມີເງິນຢູ່ບໍ່ ຫຼືວ່າບໍ່ມີຖ້າວ່າ ຍັງເຂົາກໍ່ຈະປ່ອຍອອກໄປອີກ ຈາກແສນໜຶ່ງກຝໍໄດ້ໄດ້ແສນເອັດ ປ່ອຍໃຫ້ໄດ້ໄປກ່ອນໃຫ້ເຂົາເຈົ້າຕາຍໃຈຫັ້ນນ່າ ໄດ້ໄດ້ໄດ້ໄປແລ້ວບາດນີ້ກໍພະຍາຍາມສືບວ່າ ລາວມີຫຍັງແດ່ ຖ້າເຂົາເຈົ້າຮູ້ເຂົາເຈົ້າບໍ່ມີແລ້ວ ກໍ່ຈະປິດບັນຊີເລີຍ.”

ອະດີດພະນັກງານຕອບແຊັດ ເລົ່າເຖີງການເຮັດວຽກວ່າ ຖ້າຜູ້ໃດບໍ່ເຊື່ອຟັງເຂົາຈະໄລ່ອອກ ແລະຂຶ້ນບັນຊີດຳພ້ອມ. ໂດຍອະດີດຜູ້ຕອບແຊັດ ບອກວ່າບໍ່ເອົາເງິນເດືອນເຂົາຈຶ່ງປ່ອຍອອກມາ ໂດຍບໍ່ໄດ້ຫຍັງ ແລະບໍ່ກ້າແຈ້ງຕໍ່ເຈົ້າໜ້າທີ່ ວ່າກຸ່ມນີ້ຄ້າມະນຸດຕົນເອງກໍ່ຢ້ານ.

“ຖ້າຄົນໃດທີ່ວ່າບໍ່ຟັງເຂົາ ຖຽງເຂົາເຈົ້າຫຼາຍ ເຂົາເຈົ້າຈະໃຫ້ອອກແຕ່ຈະໃສ່ບັນຊີດໍາ ໃຫ້ອັນນີ້ເຮົາບໍ່ໄດ້ຖຽງເຂົາ ເຮົາຍອມຮັບເຂົາບໍ່ໃຫ້ເງິນເດືອນເຈົ້າເດີ້. ເຮົາກໍ່ບໍ່ເອົາກໍ່ແລ້ວມີແຕ່ວ່າສໍ່ານີ້ ໃຫ້ເຂົາປ່ອຍອອກດີໆ ຖ້າວ່າບໍ່ອອກຟຣີໆ. ເຂົາເຈົ້າຈະໃສ່ບັນຊີດຳໃຫ້ຫັ້ນນ່າ ຖ້າວ່ານ້ອງເອົາຕຳຫຼວດ ຫຼືເຮົາມີຫຍັງທີ່ວ່າເປັນກ່ຽວກັບຄ້າມະນຸດ ເອົາໄປນີ້ຢ້ານມັນເກີດເລື່ອງເກີດລາວດຽວ ມັນຈະບໍ່ຈົບເພາະວ່າເຮົາຮູ້ຢູ່ວ່າຄົນຈີນເຂົາເຈົ້າມີເງິນ ຄົນລາວເຮົາກໍ່ຢ້ານຕຳຫຼວດລາວ ເປັນຄົນຂອງເຂົາແດ່ນ້ອງກໍ່ເລີຍວ່າ ຍອມຍອມທຸກຢ່າງມີແຕ່ເພິ່ນບອກວ່າ. ເອີ ເປັນແນວໃດກ່ຽວກັບເລື່ອງນີ້ເພິ່ນແນະນໍາສື່ໆ ເຮັດຫຍັງໄປເວົ້າກໍ່ບໍ່ໄດ້ເພາະວ່າ ເປັນຖີ່ນເຂົາເຈົ້າເນາະ ແລ້ວອີກຢ່າງໜຶ່ງເງິນມັນກໍ່ພຽງເລັກນ້ອຍ ເຮົາກໍ່ຢາກເວົ້າວ່າ ມັນເລັກນ້ອຍສຳລັບເຈົ້າຢູ່ແຕ່ມັນຫຼາຍສຳລັບເຮົາ.”

ເຫດຜົນເປັນຫຍັງ ຄົນຈຶ່ງເຂົ້າມາເຮັດວຽກຕອບແຊັດ, ອະດີດຜູ້ເຮັດວຽກຕອບແຊັດ ກ່າວເສີມວ່າ ເສດຖະກິດຂອງລາວ ສະໄໝນີ້ ລາຍໄດ້ບໍ່ພຽງພໍ ເຄື່ອງຂອງແພງຫຼາຍ ເຊິ່ງວຽກຕອບແຊັດນີ້ ເບິ່ງຄືວ່າມີລາຍໄດ້ຫຼາຍ. ຄົນສ່ວນຫຼາຍກໍ່ຫວັງໄດ້ລາຍຮັບສູງ ຈຶ່ງເຂົ້າມາເຮັດວຽກນີ້ໂດຍບໍ່ຮູ້ວ່າ ວຽກຕອບແຊັດແມ່ນວຽກຕົວະເອົາເງິນລົງທຶນ.

“ດຽວນີ້ເສດຖະກິດລາວເຮົາສະໄໝນີ້ ເຄື່ອງຂອງແພງເນາະລາຍໄດ້ບໍ່ພຽງພໍມາຮູ້ກ່ຽວກັບຕອບແຊັດນີ້ ມັນໄດ້ຫຼາຍເພາະວ່າເງິນຂັ້ນຕໍ່າ ທີ່ມາຕອບສື່ໆ ເດືອນໜຶ່ງນີ້ໄດ້ປະມານ 10 ລ້ານແລ້ວເດ້ມັນຄ່າຄອງຊີບ ມັນສູງກ່ວາເງິນເດືອນທົ່ວໄປທີ່ເຮົາໄດ້ 2-3 ລ້ານຢູ່ນອກທົ່ວໄປເດ້. ຈິດໃຈນ້ອງທີ່ເຂົ້າມາໃນສາມຫຼ່ຽມນີ້ ນ້ອງຄິດວ່ານ້ອງຢາກມາຫາເງິນ ຈັກເລັກຈັກນ້ອຍແລ້ວໄດ້ທຶນແລ້ວນ້ອງຈະໄປຕໍ່ຍອດຮ້ານແປງລົດ. ນ້ອງແລ້ມາເຈິແບບນີ້, ຖາມນ້ອງເລີຍວ່ານ້ອງກໍ່ບໍ່ຢາກໄດ້ບໍ່ຄືເຂົາເຈົ້າວ່າ ມາເຮັດຢູ່ນີ້ມັນເປັນວຽກສີເທົາແດ່. ເຮົາກາບໍ່ແນ່ນອນວ່າ ເຮົາຈະໄດ້ຕາມທີ່ຂະເຈົ້າຢາກໄດ້ບໍ່ເພາະວ່າ ມາເຮັດນີ້ໄດ້ເງິນຫຼາຍເດ້ ແຕ່ເຈົ້າຈະຄິດບໍ່ວ່າເຈົ້າຈະເຮັດໄດ້ບໍ່ ແລ້ວເຂົາຈະໃຫ້ເງິນເຈົ້າບໍ່ບາງບໍລິສັດ ດີໃຈ ເຂົາກໍ່ໃຫ້ແທ້ບາງບໍລິສັດກໍ່ເຂົາເຈົ້າຂາຍຕໍ່ໄປ ກໍ່ໄປຊື້ຄົນໃໝ່ເຂົ້າມາ ເຂົາເຈົ້າຈະຄືຄ້າຄ້າມະນຸດເລີຍເຈົ້າ.”

ໃນຕອນທ້າຍ ອະດີດພະນັກງານຕອບແຊັດບອກວ່າ ສໍາລັບບໍລິສັດຕອບແຊັດທີ່ຕົນເອງເຮັດນັ້ນ ແມ່ນເປັນຂອງຄົນຈີນ ໄດ້ເມຍຄົນລາວ ແລະຫາກໍ່ເປີດບໍລິສັດ ໄດ້ປະມານ 5 ເດືອນ.

ກ່ຽວກັບເລື່ອງນີ້ ນັກຂ່າວວິທຍຸເອເຊັຽເສຣີ ພະຍາຍາມຕິດຕໍ່ຫາເຈົ້າໜ້າທີ່ ແຂວງບໍ່ແກ້ວທີ່ດູແລເລື່ອງແຮງງານ ໃນເຂດເສດຖະກິດສາມຫຼ່ຽມຄຳ ແຕ່ໂທໄປເຈົ້າໜ້າທີ່ຍັງຄາປະຊຸມ.

ອີງຕາມການລາຍ ຂອງສື່ພາຍໃນປະເທດ ເມື່ອວັນທີ 20 ມິຖຸນາ 2024 ຜ່ານມາ ວ່າເຈົ້າໜ້າທີ່ຕຳຫຼວດ ກອງບັນຊາການ ປກສ ເຂດເສດຖະກິດ ພິເສດສາມຫຼ່ຽມຄຳ ສົມທົບກັບກຳລັງປ້ອງກັນຊາດ ປະຈຳເຂດ, ເຈົ້າໜ້າທີ່ຕຳຫຼວດຈີນ, ໜ່ວຍຮັກສາຄວາມປອດໄພ ເຂດເສດຖະກິດພິເສດສາມຫຼ່ຽມຄຳ ໄດ້ເຂົ້າຈັບກຸ່ມແກ້ງສໍ້ໂກງທາງໂທລະຄົມ ຢູ່ພາຍໃນເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ.

 ໃນນີ້ສາມາດຈັບແກ້ງ ຄອລເຊັນເຕີ້ ໄດ້ທັງໝົດ 280 ຄົນ ຍິງ 7 ຄົນພ້ອມດ້ວຍຂອງກາງ ໂທລະທັບມືຖື 1,345 ໜ່ວຍ, ຄອມພີວເຕີ້ຕັ້ງໂຕະ 458 ຊຸດ. ຈາກນັ້ນໃນວັນທີ 23 ມິຖຸນາ 2024 ກໍ່ໄດ້ມີພິທີມອບ-ຮັບຄົນສັນຊາດຈີນ ຈຳນວນດັ່ງກ່າວພ້ອມຂອງກາງ ໃຫ້ເຈົ້າໜ້າທີ່ຝາຍຈີນ ຢູ່ຊາຍແດນ ລາວ-ຈີນ ດ່ານບໍ່ເຕັນ-ບໍ່ຫານ ຕາງໜ້າຝ່າຍລາວມອບໂດຍ ພັນໂທ ສຸດ ອິນທອງໄຊ ຮອງພະແນກຕຳຫຼວດກວດຄົນ ເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ. ຕາງໜ້າໃຫ້ຝ່າຍຈີນຮັບໂດຍ ພັນເອກ ຈ້າວເຊີງຈຸນ ຫົວໜ້າຫ້ອງການ ປ້ອງກັນຄວາມສະຫງົບ ຂອງກິ່ງສິບສອງປັນນາ ເພື່ອໄປດຳເນີນຄະດີ ຕາມກົດໝາຍໃນປະເທດຈີນ.