ຍິງລາວ 3 ຄົນ ຖືກຄ້າມະນຸດໄປປະເທດພະມ້າ ດີໃຈສຸດຊຶ້ງທີ່ໄດ້ກັບຄືນບ້ານເກີດ

ຜູ້ຍິງລາວສາມຄົນ ທີ່ມີນາມສົມມຸດວ່າ ນາງນ້ຳຕານ, ນາງນົກ ແລະນາງຝ້າຍ ອາຍຸ 13 ປີ, 17 ປີ ແລະ 19 ປີ ຕາມລຳດັບ ຈາກນະຄອນຫຼວງວຽງຈັນ ທີ່ຖືກປ່ອຍໂຕ ອອກຈາກຮ້ານຄາຣາໂອເກະ ຂອງຄົນຈີນ ຢູ່ເມືອງລາ ຣັຖສານ ປະເທດພະມ້າ ເມື່ອເດືອນກຸມພາທີ່ຜ່ານມານັ້ນ ດີໃຈຫຼາຍ ທີ່ໄດ້ກັບຄືນປະເທດລາວໃນວັນທີ່ 13 ເດືອນກຸມພາ ປີ 2024 ນີ້.

ນາງຝ້າຍ ນຶ່ງໃນສາມຄົນນັ້ນ ກ່າວກັບວິທະຍຸເອເຊັຍເສຣີ ໃນວັນທີ່ 20 ກຸມພາ 2024 ວ່າ:

“ຮອດລາວພໍ່ດີປະມານວັນທີ່ 14 ຕອນແລງໆ ກໍດີໃຈ ຮູ້ສຶກໂລ່ງ ຮູ້ສຶກສະບາຍໃຈຂຶ້ນ ເຂົາເຈົ້າກໍຖ່າຍຮູບ ຖ່າຍຫຍັງ ເຂົາເຈົ້າກໍຖາມສຳມະໂນຄົວອີຫຍັງ ເຂົາເຈົ້າກໍໄປກິນເຂົ້າ ກິນເຂົ້າແລ້ວ ເຂົາເຈົ້າກໍພາມາສຳພາດ ເຂົາເຈົ້າມີແຕ່ບອກວ່າ ຄັນມາບໍ່ແກ້ວຫັ້ນ ຜູ້ໃດຊວນມາ ໄປພະມ້າເດ່ ໃຜເອົາໄປວ່າຊັ້ນ ແລ້ວນ້ອງກໍບອກວ່າ ຫົວໜ້າເກົ່າ ຕອນທີ່ຢູ່ບໍ່ແກ້ວຫັ້ນເອົາໄປ ດີໃຈ ດີໃຈທີ່ໄດ້ກັບມາ ນ້ອງວ່າ ຄົນເຂົາເຈົ້າຈັບໄດ້ແລ້ວ ກໍ່ນ້ອງຊິຂຶ້ນໄປເຮັດວຽກຢູ່ໄທອີກ.”

ສ່ວນນາງນົກ ໄດ້ເລົ່າເຖິງຄວາມຮູ້ສຶກທີ່ໄດ້ກັບຄືນປະເທດລາວ ເທື່ອນີ້ວ່າ ໃນເວລາຢູ່ພະມ້າ ນາງອຸກມົກອຸກໃຈຫຼາຍ ເຖິງຂັ້ນຢາກຂ້າໂຕຕາຍ ຍ້ອນຖືກກົດຂີ່ຂົ່ມເຫັງຈາກຫົວໜ້າຄົນຈີນ ທີ່ບັງຄັບໃຫ້ພໍ່ແມ່ຂອງນາງຫາເງິນມາໃຊ້ໜີ້ໃຫ້ໄດ້ ແລະຂູ່ວ່າ ຈະຂາຍໃຫ້ຮ້ານບັນເທີງຂອງຄົນຈີນອື່ນໆ.

ຕອນນີ້ ນາງກໍດີໃຈ ທີ່ຖືກປ່ອຍໂຕ ແລະທີ່ລອດຊີວິດມາໄດ້ ເພາະໃນເວລາຢູ່ພະມ້າ ພວກເຂົາທັງສາມເກືອບຂ້າໂຕຕາຍ.

“ຍົກ ແບບຍົກຄວາມໂຊກຮ້າຍ ຍົກແບບອີຫຍັງທຸກຢ່າງ ທີ່ແບບເຮັດໃຫ້ນ້ອງກົດດັນ ແບບນ້ອງຢູ່ຫ້ອງມື້ນັ້ນ ນ້ອງຄິດຊິຂ້າໂຕຕາຍເດ່ເອື້ອຍ ເພາະວ່າແບບມັນເຮັດໃຫ້ນ້ອງແບບມັນໝົດຫົນທາງ ທີ່ຈະໄປ ມັນມືດແປດດ້ານ. ສມອງແບບຄິດຫຍັງບໍ່ອອກເລີຍນ່າ ຕອນນັ້ນນ່າ ນ້ອງກັບໝູ່ນ້ອງວ່າ ຊິກິນຢາຂັດຫ້ອງນ້ຳຢູ່ນຳກັນສອງຄົນ ແບບໄຫ້ນັງໄຫ້ສາມມື້ສາມຄືນ. ເຂົ້າກໍບໍ່ຍອມກິນອີກ ພາກັນກົດດັນແຮງວ່າ ຊິພາກັນກິນຢາຂັດຫ້ອງນ້ຳຫັ້ນ. ແລ້ວມັນມີຄົນນຶ່ງ ມາເວົ້າປອບພວກນ້ອງ ຖ້າສົມມຸດ. ພວກນ້ອງຕາຍໄປແລ້ວ ພໍ່ແມ່ແຮງຊິລຳບາກໃຈຕື່ມ. ລູກບໍ່ໄດ້ກັບບ້ານ ກໍຊິໄປຕາຍຢູ່ພະມ້າອີກ ເຂົາເຈົ້າວ່າຈັ້ງຊີ້. ພວກລູກກໍເອີຄິດໄດ້.”

ທາງດ້ານເຈົ້າໜ້າທີ່ ສະຫະພັນແມ່ຍິງລາວ ແຂວງບໍ່ແກ້ວ ຢືນຢັນວ່າ ໃນວັນທີ່ 20 ກຸມພາ 2024, ຍິງລາວທັງສາມ ຕ້ອງໄດ້ພັກຜ່ອນຢູ່ສູນໃຫ້ຄໍາປຶກສາ ແລະປ້ອງກັນແມ່ຍິງ ແລະເດັກນ້ອຍຂອງແຂວງບໍ່ແກ້ວ ກ່ອນຈະຖືກສົ່ງກັບຄືນ ໄປບ້ານຂອງພວກເຂົາເຈົ້າ ຢູ່ນະຄອນຫຼວງວຽງຈັນ ຫຼືອາດຈະຖືກສົ່ງໄປສູນທີ່ແຂວງຫຼວງນ້ຳທາ.

ດັ່ງເຈົ້າໜ້າທີ່ ສະຫະພັນແມ່ຍິງລາວ ທ່ານນີ້ ໄດ້ກ່າວວ່າ:

“ມີສາມຄົນ ຍັງບໍ່ໄດ້ສົ່ງເທື່ອນີ່ ຍັງຢູ່ສູນຢູ່ນີ້ຢູ່ຫັ້ນ. ໂອ່ ຖ້າແຕ່ຕຳຣວດແລ່ນເອກກະສອກ ເອກກະສານ ໝົດແລ້ວ ຊິໄດ້ສົ່ງກັບໄປພຸ້ນ. ໄປວຽງຈັນເລີຍ ຫຼືວ່າຢູ່ສູນຫຼວງນ້ຳທາບໍ່.”

ໃນຂະນະດຽວກັນ ເຈົ້າໜ້າທີ່ຕຳຣວດ ແຂວງບໍ່ແກ້ວ ໄດ້ກ່າວກັບວິທະຍຸເອເຊັຍເສຣີ ໃນວັນທີ່ 20 ກຸມພາ 2024 ວ່າ ທາງການລາວ ແລະພະມ້າ ກໍໄດ້ຣາຍງານມາຫາກອງບັນຊາການ ປກສ ແຂວງບໍ່ແກ້ວ ໃຫ້ໄປຮັບເອົານາງນ້ຳຕານ, ນາງນົກ ແລະນາງຝ້າຍ ຢູ່ທ່າເຮືອ ເມືອງຕົ້ນເຜິ້ງ ແລະໃຫ້ຊ່ວຍເຫຼືອພວກເຂົາເຈົ້າ ໃນດ້ານກົດໝາຍຕ່າງໆ.

ສ່ວນເຈົ້າໜ້າທີ່ ຄະນະກັມມະການຕ້ານການຄ້າມະນຸດ ແຂວງບໍ່ແກ້ວ ໄດ້ສົ່ງຣາຍງານຂຶ້ນຫາຂັ້ນເທິງ ແລະຈະລໍຖ້າຂັ້ນເທິງ ແນະນຳວ່າ ຕຳຣວດຄວນດຳເນີນຄະດີແນວໃດ ກັບນາຍໜ້າ ທີ່ເປັນຄົນລາວ ທີ່ຕົ້ວະຍົ້ວະ ເອົາຜູ້ຍິງທັງສາມໄປຂາຍທີ່ປະເທດພະມ້າ. ນາຍໜ້າອາດຈະໄດ້ໃຊ້ຄ່າທົດແທນ ຖືກດຳເນີນຄະດີ ຫຼືຖືກສຶກສາອົບຮົມ.

ເຈົ້າໜ້າທີ່ຄະນະກັມມະການຕ້ານການຄ້າມະນຸດທ່ານນີ້ ໃຫ້ຣາຍລະອຽດຕື່ມວ່າ:

“ເອີ ມີໜັງສືຈາກທາງການ ໜັງສືແຈ້ງທາງຜູ້ປົກຄອງ ຫຼືທາງສັງນີ້ແຫຼະມາວ່າ. ເອີ ດຽວນີ້ ລູກເພິ່ນ ຫຼືວ່າອັນຜູ້ທີ່ມີລາຍຊື່ ຂໍຄວາມຊ່ວຍເຫຼືອຫັ້ນ. ທາງພະມ້າເພິ່ນຈະມີການມອບຮັບ ຢູ່ຈຸດໃດຈຸດໃດ. ໄທເຮົາກໍໄດ້ມີການຂຶ້ນໄປຮັບຊ່່ວຍເຫຼືອ ທາງດ້ານກົດໝາຍວ່າຊັ້ນສາ. ຖ້າເບິ່ງບົດຣາຍງານກ່ອນເດີ້. ບົດຣາຍງານ ໄທເຮົາຊິ ສເນີຂັ້ນເທິງ ຈະດຳເນີນຄະດີຫຼືວ່າ ຈະທົດແທນຄ່າເສັຍຫາຍ ຫຼືວ່າ ຈະສຶກສາອົບຮົມ. ໂຕນີ້ຍັງບໍ່ທັນຕອບໄດ້ເດີ. ກຳລັງເຮັດບົດຣາຍງາານ ຂໍຄວາມເຫັນນຳຂັ້ນເທິງຢູ່.”

ນອກຈາກແມ່ຍິງລາວ ສາມຄົນນີ້ແລ້ວ ເມື່ອວັນທີ່ 28 ເດືອນມົກກະຣາ ປີ 2024 ເຈົ້າໜ້າທີ່ຕຳຣວດພະມ້າ ກໍໄດ້ຊົດຊ່່ວຍແມ່ຍິງລາວຄົນນຶ່ງ ອອກຈາກຮ້ານຄາຣາໂອເກະເຄທີວີຢູ່ເມືອງລາ ປະເທດພະມ້ານັ້ນອີກ. ແມ່ຍິງລາວຜູ້ນີ້​ມີຊື່ຫຼິ້ນວ່າ ນາງດາວ ປົກກະຕິນາງຢູ່ນະຄອນຫຼວງວຽງຈັນ. ນາງດາວກ່າວວ່າ ນາງກໍຖືກຕົ້ວະຍົ້ວະໄປພະມ້າ ແລ້ວກໍຖືກບັງຄັບຂາຍບໍຣິການທາງເພດ.

ກ່ອນນີ້ ສະຖານທູດລາວ ປະຈໍາປະເທດພະມ້າ, ກົມຕໍາຣວດສະກັດກັ້ນ ແລະຕ້ານການຄ້າມະນຸດ ແລະສະຫະພັນແມ່ຍິງລາວ ໄດ້ປະສານງານໄປຫາທາງການພະມ້າ ເພື່ອຊ່ອຍເຫຼືອເດັກນ້ອຍ ແມ່ຍິງລາວ ສາມຄົນນັ້ນ ທີ່ຖືກຮຽກຄ່າໄຖ່ ຫຼາຍສິບພັນຢວນ ພາຍຫຼັງ ຖືກຕົວະໄປເຮັດວຽກຢູ່ຮ້ານຄາຣາໂອເກະ ແຕ່ຊ້ຳພັດຖືກບັງຄັບໃຫ້ບໍຣິການທາງເພດ, ແລ້ວຖືກກຸ່ມຄ້າມະນຸດ ກັກຂັງ, ໃສ່ກັບມື, ຕີ, ແລະຍຶດເງິນທີ່ໄດ້ຈາກການເຮັດວຽກ ຂອງພວກເຂົາ, ໃຫ້ເຂົ້າກິນມື້ລະຄາບ ແລະຂາຍຕໍ່ ໃຫ້ນັກທຸຣະກິດຊາວຈີນຄົນອື່ນໆໃນເມືອງລາ ປະເທດພະມ້າ.

ພັນເອກ ດາວໄກ ເລີດລີວັນ ຮອງຫົວໜ້າກົມທະຫານຊາຍແດນ ພ້ອມທັງເປັນຫົວໜ້າ ກອງເລຂາຄະນະກໍາມະການ ຕ້ານການຄ້າມະນຸດ ກະຊວງປ້ອງກັນປະທດລາວ ໄດ້ກ່າວລາຍງານ ຢູ່ກອງປະຊຸມສະຫຼຸບວຽກງານ ຕ້ານການຄ້າມະນຸດ ປະຈຳປີ 2023 ແລະ ວາງທິດທາງແຜນການ ປະຈຳປີ 2024 ວ່າ ສປປລາວເປັນປະເທດໜຶ່ງ ທີ່ມີການຄ້າມະນຸດຫຼາຍ ທັງເປັນປະເທດຕົ້ນທາງ ແລະທາງຜ່ານ ຍ້ອນມີພູມມີປະເທດຕິດກັບ 5 ປະເທດ ຄື ຈີນ, ວຽດນາມ, ກຳພູຊາ, ໄທ, ແລະພະມ້າ.