ເດັກນ້ອຍຊົນເຜົ່າ ແຂວງສາລະວັນອາຍຸຕໍ່າກ່ວາ 18 ປີ ຖືກຕົວະໄທ 3 ຄົນ

ປະມານເດືອນພຶດສະພາ ຫາ ເດືອນກໍລະກົດ 2024 ເຈົ້າໜ້າທີ່ໄທຊ່ວຍເດັກຍີງລາວທີ່ເປັນຄົນຊົນເຜົ່າຈາກແຂວງສາລະວັນ 3 ຄົນ ກັບຄືນປະເທດລາວໄດ້ທັງໝົດ. ໃນນັ້ນ 2 ຄົນອາຍຸປະມານ 15-17 ປີຖືກນາຍໜ້າຄົນລາວຕົວະໄປຄ້າແຮງງານແລ້ວບໍ່ໄດ້ຮັບເງິນເດືອນຢູ່ຮ້ານອາຫານໂດຍມີໜ້າທີ່ເລາະຂາຍເຄື່ອງຕາມສະຖານທີ່ຕ່າງ ໆ. ຖ້າຂາຍບໍ່ໄດ້ກໍ່ຖືກທຳຮ້າຍຮ່າງກາຍ. ສ່ວນອີກ 1 ຄົນ ອາຍຸ 13-14 ປີໄປເຮັດວຽກເປັນແມ່ບ້ານແລ້ວຖືກລ່ວງລະເມີດທາງເພດ. ດັ່ງເຈົ້າໜ້າທີ່ແຂວງສາລະວັນກ່າວຕໍ່ວິທຍຸເອເຊັຽເສຣີໃນວັນທີ 08 ສິງຫາ ນີ້ວ່າ.

“ຄ້າແຮງງານນ່າເຂົ້າກຸ່ມສ່ຽງຄ້າມະນຸດພໍພຽງສໍ່າ ມ.1-ມ.2 ນີ້ໝູ່ຕົວະໄປແລ້ວກໍ່ໄປນໍາໝູ່ໄປຢູ່ກໍ່ບໍ່ໄດ້ເງິນ. ຮ້ານອາຫານນ້ອຍ ໆ ແຕ່ລະມື້ເຂົາໃຫ້ໄປເລາະຂາຍຕາມຄີວລະຕາມອີ່ສັງນີ້ນ່າຂາຍບໍ່ໄດ້ເຂົາກໍ່ຕີຖືກລະເມີດຖືກຂົ່ມຂືນອີ່ສັງຫັ້ນແມ່ນເປັນງານບ້ານ.”

ທ່ານກ່າວຕື່ມວ່າເດັກຍີງລາວທັງ 3 ຄົນ ມີຖານະທຸກຍາກຕັດສີນໃຈອອກຈາກການຮຽນເພື່ອໄປເປັນຄົນງານຫາເງິນຢູ່ໄທແຕ່ສຸດທ້າຍພັດຖືກຄ້າແຮງງານ, ຖືກລ່ວງລະເມີດທາງເພດ. ທັງ 3 ຄົນຖືກນາຍໜ້າຄົນລາວຕົວະຍົວະໄປຂາຍແຮງງານຢູ່ປະເທດໄທດ້ວຍວິຊ້າທ່ອງທ່ຽວ.

ກ່ອນໜ້າທີ່ເຈົ້າໜ້າທີ່ໄທເຂົ້າໄປຊ່ວຍເດັກຍີງລາວທັງ 3 ຄົນແມ່ນ 1 ໃນ 3 ເດັກຍີງລາວໄດ້ສົ່ງຂໍ້ຄວາມຜ່ານສື່ສັງຄົມອ໋ອນລາຍໄປຫາໝູ່ເພື່ອໃຫ້ໝູ່ໄປແຈ້ງຄວາມນໍາເຈົ້າໜ້າທີ່ໄທ ແລະ ກ່ອນທີ່ເຈົ້າໜ້າທີ່ໄທຈະສົ່ງເດັກຍີງ 3 ຄົນກັບຄືນປະເທດລາວແມ່ນໄດ້ນໍາເອົາເດັກຍີງທັງໝົດເຂົ້າສູ່ຂະບວນການຟື້ນຟູຈິດໃຈນໍາທາງການໄທກ່ອນປະມານ 1 ເດືອນ.

ເຈົ້າໜ້າທີ່ຂັ້ນທ້ອງຖີ່ນແຂວງສາລະວັນກ່າວວ່າຍ້ອນຄວາມທຸກຍາກທີ່ເດັກຍີງປະເຊີນຢູ່ທຸກມື້ເປັນສາເຫດຕົ້ນຕໍເຮັດໃຫ້ພວກເຂົາເຈົ້າຕັດສີນໃຈອອກຈາກການຮຽນແຕ່ຍັງນ້ອຍໄປເຮັດວຽກຢູ່ໄທແລ້ວຕົກເປັນຜູ້ຖືກເຄາະຮ້າຍ. ດັ່ງທ່ານກ່າວວ່າ.

“ຍ້ອນຄວາມທຸກຍາກກໍ່ບໍ່ມີກໍ່ຈໍາເປັນຕັດສີນໃຈໄປນ່າຊົນເຜົ່າເວົ້າພາສາລາວກໍ່ບໍ່ຢາກທ່ຽງປານໃດນ່າສ່່ວນຫຼາຍແຖວນອກເຂົາຮຽນສ່ວນຫຼາຍບໍ່ສູ່ຈົບດອກສຳລັບແມ່ຍີງພໍ່ແມ່ກໍ່ບໍ່ມີກໍ່ຈຳເປັນຕັດສີນໃຈຂ້າມໄທຫັ້ນແຫຼະຊອກເງິນແຫຼະເວົ້າຊ່ວຍພໍ່ຊ່ວຍແມ່ນຫັ້ນແຫຼະເວົ້າຄວາມຮູ້ເທົ່າບໍ່ເຖີງການແບບວ່າເອົາໄປເລີຍບໍ່ໄດ້ຜ່ານແຮງງານບໍ່.”

ກ່ຽວກັບເລື່ອງນີ້ທ່ານຢາກໃຫ້ພາກສ່ວນທີ່ກ່ຽວຂ້ອງຈັບໂຕນາຍໜ້າຄົນລາວທີ່ຕົວະຍົວະເອົາລູກຫຼານໄປຄ້າແຮງງານມາດຳເນີນຄະດີຍ້ອນປະຈຸບັນຍັງບໍ່ທັນເຫັນນາຍໜ້າຄົນລາວຜູ້ນີ້ຖືກດຳເນີນຄະດີຕາມກົດໝາຍແຕ່ຢ່າງໃດ.

“ມີຜູ້ນາຍໜ້າເດ້ນໍາພາໄປນ່າແມ່ຍີງ 2 ຄົນເຂົາກໍ່ບໍ່ມີບັດມີຫຍັງຫັ້ນແລ້ວສຸດທ້າຍຖືກເຂົາເຈົ້າຂົ່ມເຫັງແບບວ່າໃຊ້ແຮງງານໜັກເຮັດໃຫ້ເຂົາສື່ ໆ ເດັກນ້ອຍຄວາມຮູ້ເທົ່າບໍ່ເຖີງການເຂົາວ່າໄດ້ເງິນດີເຂົາກໍ່ໄປຫັ້ນນ່າ.”

ໃນການແກ້ໄຂບັນຫາດັ່ງກ່າວອີງຕາມກົດໝາຍເດັກຍີງລາວທີ່ຖືກຄ້າແຮງງານ ແລະ ລ່ວງລະເມີດທາງເພດທັງ 3 ຄົນນີ້ຈະບໍ່ຖືກປັບໄໝ ແລະ ຈຳຄຸກຍ້ອນເຂົ້າເມືອງໄທຜິດກົດ ໝາຍແຕ່ຈະຖືກເຈົ້າໜ້າທີ່ລາວສຶກສາອົບຮົມເນື່ອງຈາກເປັນຜູ້ເສັຍຫາຍ. ນອກຈາກນັ້ນເດັກຍີງທັງ 3 ຄົນຈະໄດ້ຮັບຄ່າເສັຍຫາຍທາງແພ່ງຈາກຄູ່ກໍລະນີຄົນໄທແບ່ງເປັນເດັກຍີງລາວຜູ້ທີ່ຖືກລ່ວງລະເມີດທາງເພດຈຳນວນ 1 ຄົນໄດ້ຮັບເງິນຄ່າເສັຍຫາຍ 130,000 ບາດຮຽບຮ້ອຍແລ້ວ. ສ່ວນອີກສອງຄົນທີ່ຖືກຄ້າແຮງງານຈະໄດ້ຮັບເງິນຄ່າເສັຍຫາຍ 148,866 ບາດນັ້ນ. ຍັງບໍ່ທັນມີຂໍ້ມູນວ່າໄດ້ຮັບເງິນຄ່າເສັຍຫາຍຮຽບຮ້ອຍແລ້ວຫຼືຍັງ. ດັ່ງເຈົ້າໜ້າທີ່ເມືອງຕຸ້ມລານ ແຂວງສາລະວັນກ່າວວ່າ.

“ລ່ວງລະເມີດທາງເພດອີ່ຫຍັງຫັ້ນນ່າໂຕໄດ້ຮັບຄ່າເສັຍຫາຍອີ່ຫຍັງແມ່ນໄດ້ຮັບແລ້ວອີກ 2 ຄົນຍັງບໍ່ທັນຮູ້ລະອຽດເນາະກໍ່ຍັງຄົ້ນອີກແຕ່ວ່າເຂົ້າເມືອງຜິດກົດໝາຍກໍ່ປະຕິບັດກັບປະເທດເຮົາແລ້ວກໍ່ສອງສຶກສາອົບຮົມຫັ້ນແຫຼະ.”

ປະຈຸບັນເດັກຍີງລາວທັງໝົດ 3 ຄົນທີ່ຖືກຄ້າແຮງງານ ແລະ ລ່ວງລະເມີດທາງເພດໄດ້ກັບສູ່ຄອບຄົວຢ່າງປອດໄພ ແລະ ກັບໄປໃຊ້ຊີວິດຕາມປົກກະຕິທັງໝົດ. ໂດຍໄດ້ໄປເຮັດໄຮ່, ເຮັດສວນ ເຮັດນາ ຊ່ວຍຄອບຄົວເຊີ່ງກໍ່ມີພາກສ່ວນທີ່ກ່ຽວຂ້ອງຕິດຕາມຢ່າງໄກ້ຊິດ.ອີງຕາມການສຳພາດຂອງຜູ້ຖືກເຄາະຮ້າຍທັງ 3 ຄົນ.