ການຊ່ອຍເຫຼືອແມ່ຍິງລາວ 3 ຄົນ ເຫຍື່ອຄ້າມະນຸສ ຢູ່ປະເທດພະມ້າ

ສະຖານທູດລາວ ປະຈໍາພະມ້າ, ກົມຕໍາຣວດສະກັດກັ້ນ ແລະຕ້ານການຄ້າມະນຸສ ແລະສະຫະພັນແມ່ຍິງ ຂັ້ນເມືອງ ປະສານງານໄປຫາທາງການພະມ້າ ເພື່ອຊ່ອຍເຫຼືອ ແມ່ຍິງ ແລະເດັກນ້ອຍແມ່ຍິງ ລາວ ຈໍານວນ 3 ຄົນ ທີ່ຖືກຮຽກຄ່າໄຖ່ ຫຼາຍສິບພັນຢວນ ພາຍຫຼັງ ຖືກຕົວະໄປເຮັດວຽກ ເປັນສາວຮ້ານ, ຮ້ານນວດແຜນບູຮານ ແລະສາວບໍຣິການທາງເພດ, ແຕ່ຖືກກຸ່ມຄ້າມະນຸສ ກັກຂັງ, ໃສ່ກັບມື, ຖືກຕີ, ຖືກຍຶດເງິນທີ່ໄດ້ຈາກການເຮັດວຽກ, ໃຫ້ເຂົ້າກິນມື້ລະຄາບ ແລະຖືກຂາຍຕໍ່ ໃຫ້ຜູ້ປະກອບຈາກຈີນ ໄປເລື້ອຍໆ ຢູ່ທີ່ເມືອງລາ ຣັຖສານ (Shan State) ປະເທດພະມ້າ.

ກ່ຽວກັບເຣື່ອງນີ້ ສະຖານທູດລາວ ປະຈໍາປະເທດພະມ້າ ຍອມຮັບວ່າ ມີກໍຣະນີ ທີ່ເດັກນ້ອຍແມ່ຍິງລາວ ຈໍານວນບໍ່ໜ້ອຍ ຖືກຄ້າມະນຸສ ຢູ່ເມືອງລາ ແທ້ ແລະໄດ້ດໍາເນີນການ ສົ່ງຂໍ້ມູນ ກ່ຽວກັບເຫຍື່ອທີ່ຖືກຄ້າມະນຸສ ໄປໃຫ້ກະຊວງການຕ່າງປະເທດ ຂອງປະເທດພະມ້າແລ້ວ ພ້ອມຍອມຮັບວ່າ ການຊ່ອຍເຫຼືອເຫຍື່ອທີ່ຖືກຄ້າມະນຸສ ເປັນຄວາມທ້າທາຍ ຂອງຣັຖບານພະມ້າ ແລະລາວ ທີ່ຈະປະສານງານກັບກຸ່ມ ຜູ້ມີອິດທິພົນໃນພື້ນທີ່, ຕາມຄວາມເວົ້າ ຂອງເຈົ້າໜ້າທີ່ ທີ່ກ່ຽວຂ້ອງ ຜູ້ປະສານງານ ລະຫວ່າງປະເທດລາວ ແລະພະມ້າ ໃນປະເດັນ ການຊ່ອຍເຫຼືອພົລເມືອງລາວ ທີ່ຕົກເປັນເຫຍື່ອຄ້າມະນຸສ ຢູ່ປະເທດພະມ້າ, ບໍ່ປະສົງອອກຊື່, ສຽງ ແລະຕໍາແໜ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 18 ມົກຣາ ນີ້ວ່າ:

“ຣັຖບານພະມ້າ ເຂົ້າບໍ່ເຖິງນ່າ. ມັນເຂດຊົນເຜົ່າ ດັ່ງນັ້ນແຫຼະ. ຮູ້ເທົ່າບໍ່ເຖິງການ ແຈ້ງມາຫາສະຖານທູດ, ສະຖານທູດໄດ້ແຈ້ງໄປຫາ ກະຊວງຕ່າງປະເທດ ພະມ້າ. ກະບວນນີ້ເນາະ ໃຫ້ທາງການພະມ້ານີ້ແຫຼະ ເປັນຜູ້ຊ່ວຍ ເຮົາເຂົ້າໄປບໍ່ເຖິງ. ເອີ່ ສົ່ງ (ຂໍ້ມູນເດັກນ້ອຍຜູ້ຍິງ ແລະແມ່ຍິງລາວ) ມາເນາະ. ຈະເຮັດໄປຕາມລະບຽບການນີ້ແຫຼະເນາະ. ຕໍາຣວດລາວ ມີເຄືອຂ່າຍນໍາເຂົາເຈົ້າບໍ ຕໍາຣວດໄທຍ ມີເຄືອຂ່າຍນໍາວ້າແດງ ເດ້.”

ແມ່ຍິງລາວ ທີ່ລໍຖ້າການຊ່ອຍເຫຼືອ ຢູ່ເມືອງລາ ຣັຖສານ ປະເທດພະມ້າ ກ່າວວ່າ ຜູ້ປົກຄອງຂອງໂຕເອງ ແລ່ນເອກກະສານ ຕັ້ງແຕ່ເດືອນພຶສຈິກາ 2023 ເພື່ອຂໍການຊ່ອຍເຫຼືອຈາກທາງການລາວ ມາຮອດປັດຈຸບັນ ກໍບໍ່ມີຄວາມຄືບໜ້າ ຍ້ອນບ່ອນທີ່ໂຕເອງຖືກຮຽກຄ່າໄຖ່ ເປັນເຂດປົກຄອງພິເສດ.

ດັ່ງນາງກ່າວ ໃນມື້ດຽວກັນນີ້ວ່າ:

“ແຕ່ວ່າ ອີ່ແມ່ຫັ້ນ ແຈ້ງໄປທາງລາວແລ້ວ ແຈ້ງໄປຫຼາຍແລ້ວ ຢູ່ໃບຫັ້ນຂະເຈົ້າກະວ່າມັນຮອດນີ້ ຂະເຈົ້າວ່າ ເຂົາເຈົ້າຖ້າຢູ່ບ່ອນອື່ນນ່າ ສະຖານທູດລາວ ທາງພະມ້າຫັ້ນມາເອົາໄດ້ ແຕ່ວ່າ ອັນນີ້ ມັນເປັນຢູ່ໃນເມືອງລາ ເປັນເມືອງທີ່ແບບວ່າ ເປັນເມືອງ ທີ່ສ່ວນໂຕຂອງເຂົາເຈົ້າ ບໍ່ສາມາດມາເອົາພວກເຮົາອອກໄປໄດ້.”

ຂະນະທີ່ ຝາກຝັ່ງຂອງທາງການລາວ ໃນປະເທດລາວ ກໍຄື ກົມຕໍາຣວດສະກັດກັ້ນ ແລະຕ້ານການຄ້າມະນຸສ ກະຊວງປ້ອງກັນຄວາມສງົບແຫ່ງຊາຕ ກໍໄດ້ປະສານງານ ໄປຍັງສະຖານທູດລາວ ປະຈໍາພະມ້າ ເພື່ອຊ່ອຍເຫຼືອເຫຍື່ອທີ່ຖືກຄ້າມະນຸສແລ້ວ ແຕ່ບໍ່ສາມາດຊີ້ແຈງໄດ້ວ່າ ສະຖານທູດລາວ ປະຈໍາພະມ້າ ດໍາເນີນການໄປຮອດໃສແລ້ວ ຍ້ອນບໍ່ກ້າວກ່າຍວຽກງານກັນ.

ດັ່ງເຈົ້າໜ້າທີ່ ທີ່ກ່ຽວຂ້ອງ ກະຊວງປ້ອງກັນຄວາມສງົບແຫ່ງຊາຕ ກ່າວໃນມື້ດຽວກັນນີ້ວ່າ:

“ເຮົາກໍໄປສານໄປຫາ ທາງເບື້ອງພະມ້າເນາະ ເບື້ອງພະມ້າ ເພິ່ນກໍໍຊິດໍາເນີນການຊ່ວຍເຫຼືອ ກໍບໍ່ຮູ້ວ່າ ຂັ້ນຕອນເພິ່ນດໍາເນີນແບບໃດເນາະ ເຮົາກໍບໍ່ສາມາດກ້າວກ່າຍເຖິງ ຫຼືວ່າໄປເບິ່ງໂຕຈິງນໍາເພິ່ນໄດ້ ບໍ່ຮູ້ວ່າ ເບື້ອງທາງໃນເພິ່ນສະດວກບໍ ຫຼຶືວ່າ ເພິ່ນອີ່ຫຍັງ ເພິ່ນງ່າຍບໍ່ ຫຼືວ່າເພິ່ນຍາກແນວໃດ ເຮົາກໍບໍ່ເຂົ້າໃຈນໍາເພິ່ນຫັ້ນແຫຼະເນາະ ເຮົາກໍມີແຕ່ຊຸກຍູ້ ໄປທາງການເຮົານີ້ແຫຼະ.”

ດ້ານຜູ້ປົກຄອງ ຂອງເຫຍື່ອທີ່ຖືກຄ້າມະນຸສ ຢູ່ເມືອງລາວ ກ່າວວ່າ ເຈົ້າໜ້າທີ່ຕໍາຣວດ ຈາກກົມຕໍາຣວດສະກັດກັ້ນ ແລະຕ້ານການຄ້າມະນຸສ ບອກກັບທາງຜູ້ປົກຄອງ ຂອງເຫຍື່ອ ທີ່ຖືກຄ້າມະນຸສວ່າ ປັດຈຸບັນ ມີແມ່ຍິງ ແລະເດັກນ້ອຍແມ່ຍິງລາວ ຈໍານວນທັງໝົດ 10 ຄົນ ທີ່ຕ້ອງການຄວາມຊ່ອຍ ອອກຈາກເມືອງລາ ຣັຖສານ ປະເທດພະມ້າ ແລະຄາດວ່າ ເຈົ້າໜ້າທີ່ ທີ່ກ່ຽວຂ້ອງ ຈະຊ່ອຍເຫຼືອທຸກຄົນອອກມາພ້ອມກັນໃນເທືື່ອດຽວ ໃນນີ້ ຮວມເຖິງ ກຸ່ມແມ່ຍິງແລະເດັກນ້ອຍແມ່ຍິງ ທີ່ຖືກຮຽກຄ່າໄຖ່ນໍາດ້ວຍ.

“ແລ່ນເອກກະສານ ເພິ່ນກໍແຈ້ງກັນວ່າຊັ້ນ ເພາະວ່າແມ່ ແມ່ກະຍັງບໍ່ຮູ້ ເພາະວ່າ ເພິ່ນວ່າ ແຈ້ງກັນມາຫັ້ນ ມັນມີ 10 ຄົນ ແລ້ວເພິ່ນວ່າ ຊິເຂົ້າໄປເອົາໃຫ້ບາດດຽວ ກໍມີຊື່ລູກແມ່ນໍາ.”

ສ່ວນເຈົ້າໜ້າທີ່ ສະຫະພັນແມ່ຍິງ ຂັ້ນເມືອງ ຈໍານະຄອນຫຼວງວຽງຈັນ ກ່າວວ່າ ພາກສ່ວນທີ່ກ່ຽວຂ້ອງ ຈະໃຫ້ການຊ່ອຍເຫຼືອ ແລະບໍ່ໃສ່ບົດລົງໂທດ ແກ່ເຫຍື່ອທີ່ຖືກຄ້າມະນຸສ.

ດັ່ງຍານາງ ກ່າວໃນມື້ດຽວກັນນີ້ວ່າ:

“ທາງເມືອງເຮົາ ມີແຕ່ເກັບກໍາຂໍ້ມູນ ແລ້ວກໍຣາຍງານເພິ່ນເນາະ ຣາຍງານ ເຮັດບົດຣາຍງານຕາມສາຍ ແມ່ຍິງ ນະຄອນຫຼວງມັນດ່ວນ ມັນດ່ວນແບບນັ້ນແລ້ວນ່າ ເພິ່ນກໍຊ່ວຍເຫຼືອເລີຍ ມັນກໍເດັກນ້ອຍເນາະ ແບບເຂົາເຈົ້າກໍຮູ້ເທົ່າບໍ່ເຖິງການ ກະມີແຕ່ຄິດວ່າມັນ ມັນງ່າຍບັກຫຼາຍໆ ບ້ານເຮົາ ດຽວນີ້ນ່າ ບໍ່ເປັນຫຍັງດອກ ເພິ່ນໃຫ້ການຊ່ວຍເຫຼືອຢູ່ແລ້ວ ເຮົາບໍ່ໄດ້ມີໂທດຫຍັງດອກ ມີແຕ່ຜູ້ທີ່ ເອົາເຮົາໄປຫັ້ນແຫຼະ ພວກນາຍໜ້າພຸ້ນແຫຼະ ມີໂທດ.”

ເຖິງຢ່າງໃດກໍຕາມ ຕາມໂຕເລຂ ທີ່ເປັນທາງການ ຈາກສະຖານທູດລາວ ປະຈໍາພະມ້າ ລະບຸວ່າ ແມ່ຍິງ ແລະເດັກນ້ອຍແມ່ຍິງລາວ ຜູ້ເຊິ່ງເປັນເຫຍື່ອການຄ້າມະນຸສ ຢູ່ເທດພະມ້າ ບໍ່ວ່າຈະເປັນ ເມືອງລາ ແລະເມືອງເລົ້າກ່າຍ ແຫ່ງຣັຖສານ ແລະເມືອງປາງຊາງ ແຫ່ງຣັຖວ້າ ຍັງລໍຖ້າການຊ່ອຍເຫຼືອຫຼາຍສິບຄົນ.

ດັ່ງເຈົ້າໜ້າທີ່ ທີ່ກ່ຽວຂ້ອງ ທີ່ປະສານງານລະຫວ່າງປະເທດລາວ ແລະພະມ້າ ໃນປະເດັນ ການຊ່ອຍເຫຼືອພົລເມືອງລາວ ທີ່ຕົກເປັນເຫຍື່ອຄ້າມະນຸສ ຢູ່ປະເທດພະມ້າ ທີ່ບໍ່ປະສົງອອກຊື່, ສຽງ ແລະຕໍາແໜ່ງ ຜູ້ດຽວກັບຂ້າງເທິງ ກ່າວວ່າ:

“ກໍເຈິຫຼາຍຢູ່ ຫຼາຍກໍຣະນີ້ຢູ່ ຍັງຫຼາຍ 20-30 ຍັງມີຫຼາຍ ມີທັງແຂວງວຽງຈັນ ມີທັງເມືອງເຟືອງບໍ, ທາງຄໍາມ່ວນ, ປາກເຊ, ຫຼວງນໍ້າທາ, ບໍ່ແກ້ວ ດັ່ງນັ້ນແຫຼະ ຮູ້ເທົ່າບໍ່ເຖິງການ ຢູ່ແຖວໆນັ້ນ ແຖວເມືອງລາ ຫັ້ນແຫຼະ.”

ນອກຈາກນີ້ ທີ່ຜ່ານມາ ກໍມີເດັກນ້ອຍ, ເຍົາວະຊົນ, ໜຸ່ມ-ສາວ ຈາກຫຼາຍແຂວງຂອງລາວ ຫຼາຍສິບຄົນ ທີ່ຕົກເປັນເຫຍື່ອການຄ້າມະນຸສ ຢູ່ກາສິໂນ ຂອງຈີນ ໃນເມືອງເມັຍວະດີ ຣັຖກະຢິ່ນ ປະເທດພະມ້າ ພາຍຫຼັງ ຖືກຕົວະໄປເຮັດວຽກ ໂດຍມີແຮງຈູງໃຈ ວ່າວຽກສະບາຍ, ໄດ້ເງິນດີ ແຕ່ສຸດທ້າຍ ກັບຖືກຂາຍຕໍ່ ແລະຖືກບັງຄັບ ໃຫ້ເຮັດວຽກ ຫຼອກລວງເອົາເງິນຄົນອື່ນ ຜ່ານທາງອິນເຕີເນັດ ຖ້າເຮັດບໍ່ໄດ້ຕາມຈໍານວນທີ່ເຂົາຕັ້ງໄວ້ ແມ່ນຖືກລົງໂທດ ດ້ວຍການທຸບຕີ, ທໍຣະມານ, ຖືກເອົາໄຟຟ້າຊັອດ ຕ່າງໆນາໆ.