ຄຳຂໍ ຂອງພໍ່ແມ່ ເດັກນ້ອຍ ທີ່ຖືກຄ້າມະນຸດ ໄປກາສິໂນ ຂອງຈີນ ໃນພະມ້າ

ພາຍຫຼັງທີ່ ວິທຍຸເອເຊັຽເສຣີ ໄດ້ຣາຍງານຂ່າວ ກ່ຽວກັບເດັກນ້ອຍລາວ ຖືກຄ້າມະນຸດ ໄປໂຮງກາສິໂນ ຂອງຈີນ ໃນເມືອງເມັຍວະດີ ຣັຖກະຢິ່ນ ປະເທດພະມ້າ ທີ່ມີຄົນຊັກຊວນໄປວ່າ ເຮັດວຽກແບບສະບາຍ ໄດ້ເງິນເດືອນສູງ ແຕ່ສຸດທ້າຍແລ້ວ ກັບຖືກຂາຍຕໍ່ ແລະ ຖືກບັງຄັບໃຫ້ເຮັດວຽກ ຫຼອກລວງເອົາເງິນຄົນອື່ນ ຜ່ານທາງອິນເຕີເນັດ ຖ້າເຮັດວຽກໃຫ້ເຂົາບໍ່ໄດ້ ກໍຖືກລົງໂທດ, ຖືກທຸບຕີ, ຖືກທໍຣະມານ, ຖືກເອົາໃຊ້ໄຟຟ້າຊ໊ອດ ຕ່າງໆນາໆ.

ສ່ວນທາງພໍ່ແມ່ຜູ້ປົກຄອງ ກໍມີແຕ່ໂສກເສົ້າທຸກໃຈ ໂດຍສະເພາະໃນຊ້ວງບຸນປີໃໝ່ລາວ ຍ້ອນຂາດລູກເຕົ້າ ມາຄົບໜ້າພໍ້ຕາກັນ ພາຍໃນຄອບຄົວ ຕາມປະເພນີຂອງລາວເຮົາ ທີ່ພວກລູກຫຼານ ຕ້ອງມາສົມບັດສົມມາພໍ່ແມ່ ດັ່ງທີ່ເຄີຍປະຕິບັດກັນມາ.

ວິທຍຸ ເອເຊັຽເສຣີ ໄດ້ສໍາຜັດ ແລະ ເຂົ້າໃຈໃນຄວາມຮູ້ສຶກ ຂອງພວກພໍ່ແມ່ເດັກນ້ອຍ ເຫຼົ່ານັ້ນໄດ້ດີ ເມື່ອໄດ້ສົນທະນາ ກັບຜູ້ເປັນພໍ່ ຢູ່ແຂວງຫຼວງນໍ້າທາ ທີ່ມີລູກຊາຍ ຍັງຕິດຄ້າງຢູ່ກາສິໂນ ຂອງຈີນ ໃນພະມ້າ ເຊິ່ງທ່ານ ກ່າວຕໍ່ວິທຍຸ ເອເຊັຽເສຣີ ໃນມື້ວັນທີ 18 ເມສາ 2023 ວ່າ:

“ປີໃໝ່ກໍ ພໍ່ກະບໍ່ຢາກໄປຫຼີ້ນໄປທ່ຽວປານໃດ ຄິດອີ່ດູລູກແດ່ ລູກອີ່ພໍ່ນີ້ ໄດ້ 3 ເດືອນແລ້ວ ບໍ່ໄດ້ລົມພໍ່ລົມແມ່ ເຮົາກໍບໍ່ໄດ້ຍິນສຽງລູກ ໄດ້ 3 ເດືອນແຫຼະ.”

ແຕ່ອີກຢ່າງນຶ່ງ ກໍຍັງຮູ້ສຶກວ່າ ດີໃຈ ທີ່ ວິທຍຸ ເອເຊັຽເສຣີ ໄດ້ມີຣາຍງານຂ່າວ ອອກໃຫ້ທຸກຄົນໄດ້ຮັບຟັງ ໄດ້ຮັບຮູ້ ເຖິງເຫດການທີ່ໂຫດຮ້າຍ ທາຣຸນນີ້.

ດັ່ງທ່ານກ່າວຕື່ມວ່າ:

“ເອີ່! ອີ່ພໍ່ກໍເຫັນແຕ່ຂ່າວ ອັນເຂົາສົ່ງມາໂທລະສັບ ກະເບິ່ງຂ່າວຫັ້ນ ຄຶດວ່າເຈົ້ານາຍ ຊິຊ່ວຍກັນເບິ່ງ ຊ່ວຍກັນຄົ້ນຄວ້າ ພິຈາຣະນາ ເຣື່ອງລູກພວກເຮົາ ທີ່ຕົກຄ້າງຢູ່ພຸ້ນນ່າ. ຄັນເຈົ້ານາຍ ກະເປັນຫ່ວງເປັນໃຍ ກະຄືຊິອັນນັ້ນແຫຼະ. ທາງພໍ່ພີ້ກະດີໃຈແຫຼະ ອັນເບິ່ງຂ່າວຫັ້ນນ່າ.”

ແມ່ຂອງເດັກນ້ອຍຊາຍ ອີກຄົນນຶ່ງ ກໍເວົ້າເຖິງການສລອງບຸນປີໃໝ່ລາວ ປີນີ້ ໂດຍທີ່ບໍ່ມີລູກຊາຍຢູ່ນໍາ ນັ້ນວ່າ:

“ຄືວ່າຫັ້ນແຫຼະເນາະ ຫຼີ້ນປີໃໝ່ກໍ ບໍ່ມ່ວນປານໃດແຫຼະ ເພາະວ່າ ເຮົາກໍບໍ່ມ່ວນຈິດມ່ວນໃຈ ເພາະວ່າລູກເຮົາ ກໍຍັງຕິດຄ້າງຢູ່ພຸ້ນເນາະ. ແນວໃດກະຢາກຂໍຝາກ ແນວໃດກໍຢາກຫາທາງຂັ້ນເທິງເພິ່ນ ຫຼາຍພາກສ່ວນ ແນວໃດກໍຢາກໃຫ້ຊ່ອຍເຫຼືອ ເອົາລູກຂອງພວກແມ່ໆນີ້ ອອກມາໃຫ້ແດ່ຫັ້ນນ່າ.”

ນາງກ່າວຕື່ມວ່າ ເຖິງແນວໃດກໍຕາມ ກໍຢາກໃຫ້ລູກໄດ້ຮູ້ວ່າ ດຽວນີ້ ມີແຕ່ໃຫ້ລູກອົດທົນ ພະຍາຍາມເຮັດວຽກໄປກ່ອນ ສ່ວນແມ່ທາງພີ້ ຈະຫາທຸກວິທີທາງ ຊ່ອຍລູກໃຫ້ໄດ້ກັບບ້ານ:

“ລູກຊາຍຫັ້ນ ໂທຫາເອື້ອຍລາວ ວ່າ ເປັນແນວໃດ ເອື້ອຍ ເຂົາອີ່ແມ່ ກະແລ່ນຢູ່ບໍ ແລ່ນເອົາອອກນີ້ນ່າ ເຂົາເຮັດແນວໃດ ແລ່ນໄປຂັ້ນໃດແລ້ວ ມັນຄືວ່າມິດແທ້ ຄືວ່່າບໍ່ມີຫຍັງເກີດຂຶ້ນຫັ້ນນ່າ ທາງນີ້ກະບອກວ່າ ບອກນ້ອງເດີ້ ວ່າ ແມ່ກໍແລ່ນ ກະແລ່ນຢູ່ນີ້ແຫຼະ ແຕ່ວ່າບໍ່ຮູ້ ວ່າມື້ໃດຊິໄດ້ອອກ ມື້ໃດເຂົາຊິໄປຊ່ວຍ ໃຫ້ນ້ອງຫັ້ນ ພຍາຍາມເຮັດວຽກຫັ້ນໄປ.”

ຂະນະດຽວກັນ ຜູ້ເປັນແມ່ອີກຄົນນຶ່ງ ທີ່ລູກຊາຍ ຍັງຕິດຄ້າງຢູ່ພະມ້າ ກໍກ່າວວ່າ ດີໃຈທີ່ມີຂ່າວອອກມາໃຫ້ຮັບຟັງ ແລະ ອາຈພໍຊ່ອຍໄດ້ ໃນທາງໃດທາງນຶ່ງ ທີ່ຈະກະຕຸ້ນໃຫ້ທຸກພາກສ່ວນ ທີ່ກ່ຽວຂ້ອງ ຮີບຮ້ອນຫາທາງແກ້ໄຂ:

“ເອີ່! ກະຍັງວ່າ ຄັນວ່າເປັນຈ່ານີ້ ກະເອີ່ ພໍດີໃຈມາໜ້ອຍນຶ່ງຫັ້ນນ່າ. ແບບວ່າ ເອີ່! ພໍວ່່າແຈ້ງໃຫ້ພໍ່ແມ່ແຕ່ລະຄົນ ຂະເຈົ້າກໍດີໃຈເນາະ ນັກຂ່າວເພິ່ນກໍສົ່ງມາ ແບບນີ້ແບບນັ້ນ. ເອີ່ ພໍ່ແມ່ແຕ່ລະຄົນ ກະວ່າດີໃຈມາໜ້ອຍນຶ່ງຫັ້ນນ່າ ແບບວ່າ ເພິ່ນກໍມີການຊ່ວຍເຫຼືອ ຢາກບໍ່ຢາກກໍ ເອີ່ ມີນັກຂ່າວ ສົ່ງຂ່າວມາແບບນີ້ ແບບນັ້ນຫັ້ນນ່າ ເຂົາເຈົ້າກໍດີໃຈ ໄປໜ້ອຍນຶ່ງ ມີແຕ່ວ່າ ເອີ່ ມີແຕ່ລໍຖ້າເບິ່ງວ່າ ຊ່ວງປີໃໝ່ນີ້ ແລ້ວລະກໍຟັງຂ່າວຕື່ມ.”

ນາງກ່າວຕື່ມວ່າ ຫຼາຍມື້ຜ່ານມາ ຈົນມາຮອດມື້ນີ້ ກໍບໍ່ມີຫຍັງຄືບໜ້າ ເຣື່ອງການຊ່ອຍເຫຼືອ:

“ບໍ່ມີຫຍັງເກີດຂຶ້ນເລີຍ ຄຶດວ່າແຊລໆ ຂະເຈົ້າກະສົ່ງມາ ກະສົ່ງໃຫ້ທາງກຸ່ມ ສົ່ງໃຫ້ພໍ່ແມ່ແຕ່ລະຄົນເນາະ ຄັນວ່າຮູ້ເບີ້ຂະເຈົ້າ ອັນແມ່ກໍສົ່ງໃຫ້ ມີແຕ່ວ່າສົ່ງໃຫ້ແບບນີ້ແຫຼະເນາະ ແລ້ວເຂົາເຈົ້າກະແຊລຫຼາຍເນາະ ແລ້ວກໍຄຶດວ່າເນາະ ຊິມີທາງການເພິ່ນ ທາງການຊິມີການເວົ້າ ການວ່າຫຍັງໜ້ອຍນຶ່ງ ກະບໍ່ມີຫຍັງເລີຍ ແລ້ວຈິເຮັດຈັ່ງໃດບາດນີ້ ອັນມີທາງແກ້ບໍ່ ຫຼືວ່າ ຊິມີທາງຊ່ວຍທາງວິທີໃດແດ່ ເພາະວ່າພໍ່ແມ່ແຕ່ລະຄົນ ກະເລີຍວ່າ ໂທໆນໍາແຕ່ແມ່ນີ້ເນາະ ວ່າແມ່ເອີ່ຍ ເປັນຈັ່ງໃດ ຄືວ່າມິດຈີ່ຫຼີ່ແທ້.”

ສ່ວນແມ່ ຂອງເດັກນ້ອຍຜູ້ຍິງຄົນນຶ່ງ ທີ່ລູກສາວຍັງຕິດຄ້າງ ຢູ່ພະມ້າ ກໍຄິດວ່າ ຄົງບໍ່ມີຫວັງ ທີ່ລູກສາວ ຈະໄດ້ຮັບການຊ່ອຍເຫຼືອ ເພາະເຮັດຫຍັງໄປ ກະຍັງມິດງຽບຢູ່:

“ບໍ່ມີຫຍັງຄືບໜ້າເລີຍນ່ານ້ອງ ຊິເອົາຫຍັງລົງກໍທໍ່ນັ້ນ ຊິເອົາຫຍັງແຊລໄປທໍ່ນັ້ນ ບໍ່ມີໂທມາເລີຍຕໍາຣວດກະດາຍ ບໍ່ມີຜູ້ໃດຄອມເມັ້ນແມ່ນຫຍັງ ເຈົ້າໜອກເຈົ້ານາຍ ສັງກະແບບນັ້ນເລີຍ.”

ສໍາລັບພໍ່ ຂອງເດັກນ້ອຍຊາຍ ອີກຄົນນຶ່ງ ທີ່ໄດ້ລົມກັບລູກຊາຍ ທີ່ຍັງຕິດຄ້າງ ຢູ່ພະມ້າ ໃນຊ່ວງບຸນປີໃໝ່ລາວ ກໍກ່າວວ່າ:

“ເຂົາກໍວ່າ ບໍ່ເປັນຫຍັງແລ້ວ ຊ່ວງໄລຍະອັນນີ້ ທ້າຍເດືອນ 3 ເຂົ້າມາເດືອນ 4 ນີ້ ບໍ່ໄດ້ທັບບໍ່ໄດ້ຕີ ບໍ່ໄດ້ທໍຣະມານ ວ່າຊັ້ນ ຄັນເປີດບິນໄດ້ນິ່ບໍ່ເປັນຫຍັງ ຄັນເປີດບິນບໍ່ໄດ້ເຂົາຕີແທ້ໆ ວ່າແບບນີ້ ແນວໃດກະຂໍໃຫ້ພໍ່ນີ້ລະເນາະ ປຶກສາທາງເຈົ້າໜ້າທີ່ລາວນີ້ ລະກະທຸກພາກສ່ວນນີ້ ລະກໍ ພະຍາຍາມໃຫ້ເອົາລູກເອົາຫຼານ ຄືນມາບ້ານໄວໆ ວ່າແບບນີ້.”

ຕໍ່ມາ ທາງເອເຊັຽເສຣີ ກໍໄດ້ຕິດຕໍ່ຫາເດັກນ້ອຍບາງຄົນ ໃນພະມ້າ ຊຶ່ງເຂົາເຈົ້າກໍບອກວ່າ ໃນມື້ວັນທີ 13 ເດືອນເມສາ 2023 ທາງບໍຣິສັດ ກໍໃຫ້ພັກວຽກມື້ນຶ່ງ ຜູ້ໃດເປີດບິນໄດ້ ຫຼື ໝາຍຄວາມວ່າ (ຫາລູກຄ້າໄດ້) ກໍມີສິດໄດ້ໂທຫາຄອບຄົວ ແຕ່ຖ້າຜູ້ໃດ ຫາລູກຄ້າບໍ່ໄດ້ ກໍບໍ່ໄດ້ໂທຫາຄອບຄົວ ແລະໃນທຸກມື້ນີ້ ເດັກນ້ອຍເລົ່ານີ້ ກໍຍັງລໍຖ້າການຊ່ອຍເຫຼືອ ຈາກທາງການລາວ ແລະ ທາງການພະມ້າຢູ່ ເພາະຕິດຢູ່ທີ່ນີ້ ໄດ້ 7 ເດືອນແລ້ວ.

ເມື່ອວັນທີ 10 ເມສາ 2023 ເອເຊັຽເສຣີ ໄດ້ຕິດຕໍ່ໄປຍັງ ກົມຕໍາຣວດ ສະກັດກັ້ນ ແລະຕ້ານການຄ້າມະນຸດ ນະຄອນຫຼວງວຽງຈັນ ເພື່ອຖາມເຖິງຄວາມຄືບໜ້າ ຂອງກອງປະຊຸມ ລະຫວ່າງ ຣັຖບານລາວ ແລະພະມ້າ ກ່ຽວກັບການປຶກສາຫາລື ເພື່ອຊ່ອຍເຫຼືອເດັກນ້ອຍລາວ ທີ່ຍັງຄ້າງຢູ່ພະມ້າ ຊຶ່ງເຈົ້າໜ້າທີ່ທີ່ກ່ຽວຂ້ອງທ່ານນຶ່ງ ທີ່ບໍ່ປະສົງອອກຊື່ ຕໍາແໜ່ງແລະສຽງ ກ່າວວ່າ:

“ກະຢູ່ໃນເດືອນນີ້ແຫຼະ ໃນໄລຍະເດືອນນີ້ແຫຼະ ເພາະວ່າເອກກະສານ ຂັ້ນເທິງໄດ້ເຫັນດີແລ້ວເນາະ ເຫັນດີທີ່ວ່າ ຢູ່ໃນໄລຍະທ້າຍເດືອນນີ້ແຫຼະ ຊິຈັດນ່າ ຢູ່ນະຄອນຫຼວງນີ້ນ່າ ເພາະວ່າເອກກະສານແມ່ນຫຍັງ ຖືວ່າສໍາເຣັດເໝິດແລ້ວເນາະ ທາງຂັ້ນເທິງ ໄດ້ອະນຸມັດເຫັນດີແລ້ວ ເຣື່ອງເຊີນທູດພະມ້າ ມາປຶກສາຫັ້ນນ່າ.”

ເຖິງຢ່າງໃດກໍຕາມ ວິທຍຸ ເອເຊັຽເສຣີ ກໍຍັງຈະຕິດຕາມຢູ່ຕໍ່ໄປ ຢ່າງບໍ່ລົດລະ ກ່ຽວກັບ ກໍຣະນີ ເດັກນ້ອຍລາວ ຖືກຄ້າມະນຸດ ໄປໂຮງກາສິໂນ ຂອງຈີນ ໃນປະເທດ ພະມ້າ.