ສຳພາດເຫຍື່ອຄ້າມະນຸດ ທີ່ຖືກຕົວະໄປເຮັດວຽກ ໃນໂຮງກາສິໂນຂອງຈີນ ຢູ່ມຽນມາ ພາກ 2

ສະບາຍດີ ທ່ານຜູ້ຟັງ ທີ່ເຄົາລົບ ໃນມື້ນີ້ ເຮົາຈະມາຟັງສາລະຄະດີ ພາກສອງ ຂອງການໂອ້ລົມ ບອກເລົ່າ ຂອງຊາຍໜຸ່ມລາວ ທີ່ຖືກປ່ອຍໂຕກັບມາລາວ ຈາກໂຮງກາສິໂນ ໂກຊາຍ ຂອງຈີນ ທີ່ເມືອງເມຍວະດີ ປະເທດມຽນມາ ເມື່ອວັນ 15 ເດືອນພຶດສະພາ 2024 ທີ່ຜ່ານມາ.

ໃນເບື້ອງຕົ້ນ ພວກເຂົາເຈົ້າ ຖືກກຸ່ມແກ້ງຄ້າມະນຸດຕົວະ ທີ່ເປັນຄົນລາວ ຕົວະໄປເຮັດວຽກຕອບແຊັດ ຢູ່ໂຮງກາສິໂນ ດັ່ງກ່າວ ເປັນເວລາເກືອບ 2 ປີເຕັມ ຄືຕັ້ງແຕ່ ເດືອນສິງຫາ ປີ 2022 ຈົນຮອດວັນທີ 24 ເດືອນພຶດສະພາ ປີ 2024 ພວກເຂົາ ຈຶ່ງໄດ້ ກັບມາຫາຄອບຄົວ ທີ່ປະເທດລາວ.

ເຫດການ ໃນຊ້ວງເວລາທີ່ ຕົກໄປເປັນທາດ ຂອງຄົນຈີນ ໃນຖິ່ນດິນແດນ ອັນປ່າເຖື່ອນ ທີ່ບໍ່ມີພາກສ່ວນໃດ ຈະສາມາດຍື່ນມືເຂົ້າໄປຊ່ອຍເຫຼືອໄດ້ ຈົນກະທັ້ງ ການໄດ້ມາບ້ານ ກໍ່ແມ່ນດ້ວຍຄວາມເຕັມໃຈ ຂອງພວກເຂົາເອງ.

I-/ ເຮົາມາຟັງ ຈາກຊາຍໜຸ່ມຜູ້ທີ່ໜຶ່ງ ທີ່ໄດ້ໃຫ້ສໍາພາດ ຕໍ່ວິທຍຸເອເຊັຽເສຣີ ໃນມື້ວັນທີ 31 ເດືອນພຶດສະພາ 2024 ນີ້ໄດ້ເລີຍ.

1-/ ນັກຂ່າວຖາມ: ພວກນ້ອງ 14 ຄົນນີ້ ກະໄດ້ອອກມາແລ້ວ ລະເທົ່າທີ່ນ້ອງຮູ້ນີ້ ເປັນຈັ່ງ ອອກມາ ຍ້ອນສາເຫດໃດ ພໍ່ແມ່ປະກັນໂຕອອກມາບໍ ຫຼື ແນວໃດ ເຂົາຈຶ່ງປ່ອຍອອກມາ.?

1-/ ຜູ້ເຄາະຮ້າຍ ຕອບ: ອັນທີ່ປ່ອຍນີ້ ມັນປ່ອຍ ເພາະວ່າຄົບຕາມກໍານົດ ທີ່ເຂົານັດກັບເຮົາໄວ້ແລ້ວ ທາງບໍລິສັດ ເຂົານັດກັບເຮົາໄວ້ແລ້ວ ຄົບຕາມກໍານົດນັ້ນ ເຂົາກະເລີຍປ່ອຍ ບໍ່ແມ່ນວ່າ ໃຫ້ພໍ່ແມ່ມາໄຖ່ໂຕອອກ ອັນນີ້ບໍ່ແມ່ນ ແມ່ນເຮົາເອົາໂຕເຮົາລອດ ອອກມາເອງ.

2-/ ນັກຂ່າວຖາມ: ນ້ອງມາຮອດບ້ານແລ້ວ ປັດຈຸບັນນີ້ ເຮັດຫຍັງຢູ່ ຫຼືວ່າ ວາງແຜນເຮັດແນວໃດຕໍ່ໄປ?

2-/ ຜູ້ເຄາະຮ້າຍ ຕອບ: ປັດຈຸບັນ ຕອນນີ້ກະ ນອນພັກຟື້ນຮ່າງກາຍຢູ່ ລະວ່າ ຈະໄປເຮັດວຽກຄືເກົ່າແຫຼະ ມັນກະຢູ່ບ້ານກະບໍ່ມີຫຍັງ ເງິນກະບໍ່ໄດ້ ວ່າຊິເຂົ້າໄປເຮັດວຽກ ຢູ່ ສາມຫຼ່ຽມທອງຄໍາ.

3-/ ນັກຂ່າວຖາມ: ໄປເຮັດວຽກຫຍັງ ເຮັດວຽກຕອບແຊັດ ຄືເກົ່ານີ້ບໍ ຫຼືຈັ່ງໃດ?

3-/ ຜູ້ເຄາະຮ້າຍ ຕອບ: ບໍ່ໆ ຢູ່ຫັ້ນມັນມີເດັກເສີບ ເດັກເສີບ.

II-/ ບາດນີ້ ເຮົາມາຟັງການສໍາພາດ ຊາຍໜຸ່ມຜູ້ທີ່ສອງ ທີ່ໄດ້ເວົ້າເຖິງ ການຕັດສິນໃຈ ອອກຈາກໂຮງກາສິໂນ ຂອງຈີນ ໃນມື້ນັ້ນ ເຖິງແມ່ນວ່າ ຢູ່ປະເທດມຽນມາ ຈະມີສົງຄາມ ກໍ່ຕາມ.

1-/ ນັກຂ່າວຖາມ: ນອກຈາກສ່ຽງ ວ່າ 2,000 (ບາດຕໍ່ຄົນ) ທີ່ເພິ່ນຈະມາສົ່ງ ຂ້າມນໍ້າແລ້ວ ບໍ່ຢ້ານບໍ ເພາະວ່າ ຢູ່ມຽນມາ ກະມີສົງຄາມ ບໍ່ຢ້ານຖືກລູກຫຼົງ ເລື່ອງສົງຄາມເບາະ ຕອນນັ້ນ.?

1-/ ຜູ້ເຄາະຮ້າຍ ຕອບ: ຢ້ານ ແຕ່ກະ ເຮັດຫຍັງບໍ່ໄດ້ ກະຄິດຢູ່ ແຕ່ວ່າ ໝູ່ເຂົາກະຄິດ ເຂົາກະບອກວ່າ ຢ້ານສົງຄາມຈັ່ງຊີ້ຈັ່ງຊັ້ນ ທີ່ວ່າເປັນຕາຢ້ານຢູ່ພຸ້ນ ອາລົມຄົນອີກ ຢ້ານ.

2-/ ນັກຂ່າວຖາມ:  ເຖິງຊິເປັນຕາຢ້ານ ແຕ່ຕອນນັ້ນ ມື້ນັ້ນ ພາກັນຕັດສິນໃຈ ແມ່ນເລີຍບໍວ່າ ຮອດໂອກາດແລ້ວ ຕອນໄປ ແບບນີ້ເບາະ?

2-/ ຜູ້ເຄາະຮ້າຍ ຕອບ: ແມ່ນ ເພາະເລົາປານ (ຫົວໜ້າຄົນຈີນ) ເປັນຄົນທີ່ ມື້ໜຶ່ງມີຫຼາຍອາລົມ ເຂົາປ່ຽນອາລົມ ໄດ້ທຸກໆເມື່ອເລີຍຈັ່ງຊີ້ ເຮົາຕ້ອງໄວ ເອີ່ ແບບມີໂອກາດມາ ລະກະໄປເລີຍ ບໍ່ຕ້ອງຖ້າແຫຼະຢູ່ນີ້ ດຽວຢູ່ນີ້ ມັນຊິ ດຽວເລົາປານເຂົາປ່ຽນໃຈ ລະຊິບໍ່ໄດ້ກັບ ເພາະວ່າ ເລົາປານ ເຂົາກະປ່ຽນມາ 2-3 ເທື່ອແລ້ວ ທີ່ວ່າຊິປ່ອຍກັບ ແຕ່ວ່າບາດ ສຸດທ້າຍກະບໍ່ປ່ອຍ.

3-/ ນັກຂ່າວຖາມ: ເຫດຜົນ ທີ່ນ້ອງຕັດສິນໃຈ ໄປເຮັດວຽກນີ້ ຍ້ອນຫຍັງ ຈຶ່ງຕັດສິນໃຈ ອອກຈາກບ້ານໄປ?

3-/ ຜູ້ເຄາະຮ້າຍ ຕອບ: ຕອນແລກກະຄິດ ເຫັນໝູ່ເຂົາແຕ່ລະຄົນ ໄປເຮັດວຽກ ລະມີເງິນ ມີຂອງຂວັນ ໃຫ້ພໍ່ໃຫ້ແມ່ບໍ ເຮົາກະຢາກໄປເຮັດວຽກ ຈັກ 4-5 ເດືອນ ລະກະມາ ກະຢາກມີເງິນຊື້ຂອງຂວັນໃຫ້ພໍ່ແມ່ ລະກະເລີຍຕັດສິນໃຈ ອອກຈາກບ້ານ ໄປເຮັດວຽກນໍາເຂົາ ເພາະວ່າ ເຂົາກະບອກວ່າ ເງິນມັນຫຼາຍແບບນີ້ ເຮົາກະຕ້ອງການເງິນຢູ່ແລ້ວ ແລ້ວກະໄປ ແລ້ວກະໃຫ້ຄວາມເຊື່ອໃຈ ກັບໝູ່ຄົນນີ້ຫຼາຍເກີນໄປ.

4-/ ນັກຂ່າວຖາມ: ແລ້ວໝູ່ຄົນນີ້ ທີ່ພາໄປນີ້ເດ ຕອນທໍາອິດຫັ້ນ ເຂົາເຈົ້າບອກນ້ອງກ່ອນບໍ່ ວ່າຊິພາ ໄປເຮັດວຽກຢູ່ໃສກ່ອນ ລະຈັ່ງໄປຕົກຢູ່ມຽນມາ ພຸ້ນ?

4-/ ຜູ້ເຄາະຮ້າຍ ຕອບ: ຕອນແລກ ເຂົາກະບອກວ່າ ຢູ່ທາງຫຼັງສາມຫຼ່ຽມກະຄື ກາສິໂນ ສາມຫຼ່ຽມໂຕນີ້ແຫຼະ ເຂົາບອກວ່າ ຢູ່ຝັ່ງໄທ ຂ້າມແມ່ນໍ້າຂອງ ມາກະຮອດແລ້ວ ເຂົາວ່າແບບນີ້ ກະວ່າ ໂອເຄ ເພາະວ່າ ມັນຢູ່ຝ່ັງໄທຊື່ໆ ເບິ່ງມາກະເຫັນສາມຫຼ່ຽມ ເຂົາເວົ້າຈັ່ງຊີ້ ນ້ອງກະວ່າ ມັນບໍ່ໄດ້ໄກບ້ານປານນັ້ນ ລອງໄປເບິ່ງ ລະກະມີໝູ່ອີກຄົນໜຶ່ງ ເຂົາແທັກມາ ເຂົາຊິໄປນໍາເຮົາ ເຮົາກະໂອເຄ ບໍ່ໄດ້ວ່າອີ່ຫຍັງ ກະໄປນໍາກັນເລີຍ ເຂົາບໍ່ໄດ້ບອກເຮົາວ່າ ເຂົາຢູ່ມຽນມາ ຄັນເຂົາບອກວ່າ ເອີ່ ຕອນນີ້ ເອື້ອຍເຮັດວຽກຢູ່ບ່ອນມຽນມາເດີ້ ຊິມາກະມາ ນ້ອງບໍ່ໄປແນ່ນອນ ເພາະວ່າ ນ້ອງກະມີໝູ່ ທີ່ເຂົາເຄີຍໄປມຽນມາ ແລ້ວກໍ່ອອກຂ່າວແບບນີ້  ນ້ອງກະເຄີຍເຫັນຢູ່ ເຂົາໄປມຽນມາ ມັນເປັນຈັ່ງໃດ ແບບໃດ ລະກະເຄີຍເຫັນເຂົາໄປ ມັນເປັນຕາຢ້ານບໍ່ໄປແນ່ນອນ.

5-/ ນັກຂ່າວຖາມ: ບາດນີ້ ມາຢູ່ບ້ານນີ້ ປັດຈຸບັນນີ້ ເຮັດຫຍັງຢູ່ ວາງແຜນແນວໃດ ກັບຊີວິດຂອງໂຕເອງ?

5-/ ຜູ້ເຄາະຮ້າຍ ຕອບ: ກະພັກຟື້ນກ່ອນ ຍັງບໍ່ມີແຜນອີ່ຫຍັງໃຫ້ໂຕເອງ ມີແຕ່ວ່າ ຮັກສາໂຕເອງໃຫ້ມັນໄດ້ກ່ອນ ເພາະວ່າ ຖືກເຂົາຊ໋ອດຫຼາຍ (ໄຟຟ້າຊ໋ອດ) ຕອນຢູ່ພຸ້ນ ຕອນແລກໆ ມັນຊິມີກະດູກ ໂຕທາງເທິງນີ້ແຫຼະ ກະໂດກສັນຫຼັງນີ້ ມັນຊິເຊື່ອມແລ້ວ ເພາະວ່າ ເຮົາກົ້ມບໍ່ຮອດ 5 ນາທີ ມັນກະເຈັບຫຼາຍ ມີແຕ່ວ່າ ໝໍເຂົາບອກໃຫ້ຢູ່ ບໍ່ໃຫ້ເຮັດວຽກໜັກຫຼາຍ ລະກໍ່ໃຫ້ຢູ່ເຮືອນຮັກສາໂຕເອງກ່ອນ ຍັງບໍ່ຄິດວ່າ ຈະໄປເຮັດວຽກເທື່ອ.

III-/ ຊາຍໜຸ່ມຜູ້ທີ 3 ທີ່ໄດ້ກັບມາພ້ອມກັນນີ້ ກໍ່ເວົ້າໃຫ້ຟັງ ໃນການສໍາພາດ ວ່າ

1-/ ນັກຂ່າວຖາມ: ໃນເມື່ອວ່າ ນ້ອງກະໄດ້ກັບມາບ້ານແລ້ວ ວາງແຜນແນວໃດ ຊິໄປຮຽນຕໍ່ບໍ ຫຼືຊິໄປເຮັດວຽກຫຍັງຢູ່ໃສຕໍ່ນິ່?

1-/ ຜູ້ເຄາະຮ້າຍ ຕອບ: ກະເຮັດໄຮ່ເຮັດນາ ຄືເກົ່ານີ້ແຫຼະ ໃຊ້ຊີວິດແບບປົກະຕິຫັ້ນແຫຼະ ບໍ່ເຮັດແລ້ວວຽກອັນນີ້ນ່າ.

2-/ ນັກຂ່າວຖາມ: ວຽກຕອບແຊັດນີ້ ບໍ່ໄດ້ເຮັດແລ້ວບໍ?

2-/ ຜູ້ເຄາະຮ້າຍ ຕອບ: ໂດຍແມ່ນ.

3-/ ນັກຂ່າວຖາມ: ຕອນທີ່ນ້ອງ ອອກຈາກບ້ານໄປເຮັດວຽກ ໃນມື້ນັ້ນ ຜູ້ປົກຄອງກະຮູ້ຢູ່ບໍ່ ທີ່ນ້ອງອອກຈາກບ້ານໄປໃນມື້ນັ້ນ?

3-/ ຜູ້ເຄາະຮ້າຍ ຕອບ: ຮູ້ ເຂົາກະແບບວ່າ ຄິດວ່າ ຊິໄປຫາເງິນຫັ້ນແຫຼະ ກະບໍ່ຄິດວ່າ ຊິເປັນເກີດເລື່ອງແບບນີ້ ບໍ່ຄິດບໍ່ຝັນວ່າ ຊິເປັນແບບນີ້ ເຄີຍເຫັນຢູ່ ໃນຂ່າວເຂົາລົງວ່າ ຖືກຄ້າມະນຸດ ບໍ່ຄິດວ່າ ຊິເປັນແບບນີ້ ບໍ່ຄິດວ່າ ຊິເກີດກັບໂຕເອງນ່າ.

IV-/ ໃນຂະນະທີ່ ຊາຍໜຸ່ມ ຜູ້ທີ່ 4 ກໍ່ເລົ່າໃຫ້ຟັງ ເຖິງວິນາທີ ທີ່ໄດ້ອອກຈາກກາສິໂນ ຂອງຈີນນັ້ນ ນໍາດ້ວຍ:

1-/ ນັກຂ່າວຖາມ: ຢາກຢ້ອນຖາມ ວິນາທີທໍາອິດ ທີ່ວ່າໄດ້ອອກຈາກກາສິໂນໄປຫັ້ນ ພວກນ້ອງຮູ້ສຶກແນວໃດ ທີ່ວ່າ ໄດ້ພົ້ນຈາກປະຕູນັ້ນແລ້ວຫັ້ນ?

1-/ ຜູ້ເຄາະຮ້າຍ ຕອບ: ຄວາມຮູ້ສຶກຕອນນັ້ນກໍ່ ມັນດີໃຈ ແລ້ວກໍ່ ມັນກະຕື ລື້ລົ້ນ ແບບຢາກອອກຈາກຈຸດນີ້ ຈຸດໃນກາສິໂນ ຈາກຈຸດນັ້ນກ່ອນ ເລື່ອງແບບດີໃຈ ວ່າໄດ້ກັບບ້ານ ອັນນັ້ນແມ່ນດີໃຈ ແຕ່ວ່າ ຢາກອອກຈາກຈຸດນັ້ນກ່ອນ ພໍໄປຮອດຝັ່ງໄທ ຄົນລາວທຸກຄົນ ຮູ້ສຶກວ່າ ປອດໄພແລ້ວ.

2-/ ນັກຂ່າວຖາມ: ພວກນ້ອງໄດ້ອອກມາແລ້ວ ແລ້ວເຄື່ອງຂອງ ຂອງພວກນ້ອງເດ ໂທລະສັບຕ່າງໆ ທີ່ເຮົາມີ ຂະເຈົ້າສົ່ງຄືນໃຫ້ເຮົາຢູ່ບໍ ຫຼຶືຈັ່ງໃດ?

2-/ ຜູ້ເຄາະຮ້າຍ ຕອບ: ໂຕນີ້ ຂະເຈົ້າຈະບໍ່ສົ່ງຄືນ ໂທລະສັບແບບນີ້ ທາງບໍລິສັດ ເຂົາເຈົ້າບໍ່ໃຫ້ເອົາກັບ ມີແຕ່ເຄື່ອງໃຊ້ ແບບໂສ້ງເສື້ອບາງຊຸດ ທີ່ເອົາກັບໄດ້ ເພາະວ່າ ເຮົາຕ້ອງເລັ່ງ ລະກະຕ້ອງຟ້າວ ຕອນນັ້ນ ເຂົາເຈົ້າໃຫ້ເວລາ ຖ້າພາຍໃນ 2 ມື້ ຄົນລາວ ຍັງບໍ່ອອກຈາກ ກາສິໂນຈຸດນີ້ ເຂົາເຈົ້າຈະບໍ່ປ່ອຍ ພາຍໃນ 2 ມື້ນີ້ນິ່ ຄົນຈີນ ເຂົາເຈົ້າ ໃຫ້ຍາມ ຫຼືວ່າ ລປພ ມາຍາມ ມາເຝົ້າ ຢູ່ໜ້າຫ້ອງນອນ.

ນອກຈາກນີ້ ຊາຍໜຸ່ມຜູ້ທີ 1 ຜູ້ດຽວກັບຂ້າງເທິງ ກໍຂໍຝາກເຕືອນ ຊາຍໜຸ່ມ ຍິງສາວລາວ ເພື່ອເປັນອຸທາຫອນ ວ່າ: ຖ້າບໍ່ຢາກຕົກເປັນເຫຍື່ອ ພວກກຸ່ມແກ້ງຄ້າມະນຸດເນາະ ເຮົາກະຕ້ອງສຶກສາກ່ອນ ກ່ອນຈະໄປ ຕ້ອງສຶກສາດີໆກ່ອນ ໜຶ່ງຄື ສຶກສາດີໆ ລະກະອັນໃດທີ່ເຂົາບອກວ່າ ບໍ່ແມ່ນຢູ່ໃນລາວ ແຕ່ວ່າ ເງິນເດືອນສູງ ອັນນີ້ ບໍ່ຕ້ອງໄປ ເພາະວ່າ ມັນບໍ່ມີແນ່ນອນ ວຽກທີ່ເງິນເດືອນສູງ ເຂົາຕົວະວ່າ ເອີ່...ໃຫ້ເງິນເດືອນ 25,000 (ບາດ) 30,000 (ບາດ) ມັນບໍ່ມີແນ່ນອນດອກ ບໍ່ໃຫ້ດອກ ເງິນນ່າ ມີແຕ່ເຂົາຕົວະເຮົາ ຕົວະເຮົາໄປຮອດຢູ່ຈຸດນັ້ນ ແລ້ວກະບໍ່ໃຫ້ຕາມທີ່ເຂົາບອກດອກ ມີແຕ່ບອກຈັ່ງຊີ້ແຫຼະ ຄືພວກນ້ອງນີ້ ມັນກະ ເຮັດບໍ່ໄດ້ ກະພໍເອົາໂຕລອດ ຮອດມື້ມາ ເຂົາກະປ່ອຍ ຖ້າຄົນບໍ່ໄດ້ແທ້ໆກະໄປເຈິະຈັ່ງຊີ້ ມັນກໍ່ຈະເປັນບ້າໄດ້ເດີ້).

ໃນຂະນະດຽວກັນ ຊາຍໜຸ່ມຜູ້ທີ 2 ຜູ້ດຽວ ກັບຂ້າງເທິງ ກໍຂໍຝາກເຕືອນເພື່ອເປັນອຸທາຫອນ ດັ່ງນີ້: ບໍ່ມີຫຍັງເຕືອນຫຼາຍ ກະມີແຕ່ວ່າ ບໍ່ຕ້ອງໄປເຊື່ອໃຈ ຄົນທີ່ລອບຂ້າງເຮົາຫຼາຍປານນັ້ນ ເພາະຄົນທີ່ລອບຂ້າງເຮົາ ເຂົາຫວັງແຕ່ເງິນ ເຂົາບໍ່ໄດ້ຄິດວ່າ ຊີວິດເຮົາ ເປັນແນວໃດ ເປັນແບບວ່າ ເຮົາໄປຕໍ່ແນວໃດ ເຂົາບໍ່ຫວັງເລີຍ ເພາະວ່າ ເຂົາສຸມໃສ່ແຕ່ເງິນ ເຂົານາຍໜ້າຄົນຈີນ ເຂົາຈ້າງເຂົາເອົາຄົນລາວ ຫຼືວ່າ ຄົນອີ່ຫຍັງ ອອກຈາກປະເທດລາວ ເຂົາໃຫ້ເງິນເຮົາ ເງິນຈໍາພວກນັ້ນ ຄົນທີ່ພາເຮົາໄປ ໄດ້ຫຼາຍກວ່າເຮົາອີກ ເພາະສະນັ້ນ ບໍ່ຕ້ອງໄປເຊື່ອ ເງິນທີ່ໄດ້ເງິນເດືອນຫຼາຍ ໄປເຮັດວຽກສະບາຍບໍ່ ແບບນີ້ ບໍ່ຕ້ອງໄປເຊື່ອໝູ່ ເຊື່ອຄູ່ອີ່ຫຍັງຫຼາຍປານນັ້ນ ເພາະວ່າ ເຮົາກະເຄີຍໄປເຈິະ ມາແລ້ວໃນໂຕເອງ ກະໄປຕິດຢູ່ມຽນ ປະມານ ປີປາຍ ຊິເຂົ້າ 2 ປີ. ຖ້າໝູ່ຄູ່ຄົນໃດ ທີ່ເຂົ້າມາເຫັນ ຫຼືວ່າ ມາໄດ້ຟັງ ຄລິບໆນີ້ ຫຼືວ່າ ໃນການສົນທະນາ ເທື່ອນີ້ ກໍລະມັດລະວັງກັນແດ່ ໃນການເຮັດວຽກໂຕນີ້ ເພາະວ່າ ມັນບໍ່ໄດ້ດີເລີຍ ໄປເຮັດວຽກຢູ່ພຸ້ນ ຖ້າຖືກຕົວະອີ່ຫຍັງໄປ ກະມີແຕ່ຊ່ວຍໂຕເອງຫັ້ນລະ ລະໃຫ້ລະວັງ ກ່ອນຊິອອກຈາກບ້ານ ໃຫ້ຖາມທີ່ຢູ່ດີໆ ຖາມໝູ່ຄູ່ວ່າເຮັດວຽກຢູ່ໃສກັນແທ້ ຖາມລະອຽດດີໆແລ້ວຄ່ອຍໄປ.

ສ່ວນຊາຍໜຸ່ມຜູ້ທີ 3 ກໍຂໍຝາກເຕືອນ ຊາຍໜຸ່ມ ຍິງສາວລາວ ເພື່ອເປັນອຸທາຫອນ ເຊັ່ນກັນວ່າ: ຝາກເຖິງ ອ້າຍນ້ອງ ເອື້ອຍອ້າຍ ຫຼືວ່າ ໝົດທຸກຄົນແຫຼະ ຝາກເຖິງໃຫ້ຄິດກ່ອນ ຖ້າຊິໄປລະກໍ່ ເຮັດບັດພາດສະປອດ ບັດຜ່ານແດນ ໃຫ້ມັນຄົບກ່ອນຄ່ອຍໄປ ຄືຊິວ່າ ເຂົາຊິວ່າບໍ່ຕ້ອງໃຊ້ ເຮົາກະແບບວ່າ ເຮັດເພື່ອຄວາມປອດໄພ ເພື່ອຄວາມປອດໄພຂອງເຮົາ ບໍ່ຕ້ອງໄປເຊື່ອ ເຊື່ອແບບວ່າເງິນເດືອນຫຼາຍ ຢູ່ສະບາຍ ຄ່າກິນຄ່າຢູ່ຟລີ ບໍ່ຕ້ອງໄປເຊື່ອ ບໍ່ຢາກໃຫ້ເປັນແບບ ຄືພວກນ້ອງນັ້ນ ທໍລະມານ.” 

ກ່ຽວກັບ ການໄດ້ກັບມາບ້ານ ຫາຄອບຄົວ ຂອງຊາວໜຸ່ມລາວ ຜູ້ທີ່ຖືກຕົວະໄປເຮັດວຽກ ໃນໂຮງກາສິໂນຂອງຈີນ ຢູ່ເມືອງເມຍວະດີ ປະເທດມຽນມາ ໃນຄັ້ງນີ້ ພວກຂະເຈົ້າ ກໍ່ຮູ້ສຶກເປັນໜີ້ບຸນຄຸນ ຕໍ່ທຸກພາກສ່ວນ ໃນການຊ່ອຍເຫຼືອໃຫ້ພວກຂະເຈົ້າ ໄດ້ຫຼຸດພົ້ນອອກມາຈາກສະຖານທີ່ແຫ່ງນັ້ນ ດັ່ງຊາຍໜຸ່ມ ຜູ້ທີ 1 ເວົ້າວ່າ: ຂໍຂອບໃຈທຸກພາກສ່ວນ ທີ່ວ່າເຂົ້າມາຊ່ອຍເຫຼືອເດັກນ້ອຍ ຫຼືວ່າ ທາງຈຸນ້ອງ ທີ່ຕິດໃນນັ້ນ ເພາະວ່າ ຈຸນ້ອງຢູ່ໃນນັ້ນກະພະຍາຍາມ ຫາວິທີທາງຕິດຕໍ່ຫາ ທາງເຈົ້າໜ້າທີ່ທາງລາວ, ທາງໄທ ທາງທຸກຢ່າງ ແຕ່ນ້ອງກະຢາກຂໍຂອບອົກຂອບໃຈ ທຸກພາກສ່ວນ ທຸກຂະແໜງການ ທີ່ເຂົ້າມາຊ່ວຍເຫຼືອພວກນ້ອງ ທີ່ໄດ້ອອກມາ ເຈິະພໍ່ເຈິະແມ່ ເຈິະພີ່ນ້ອງ ຫຼາຍໆຄົນ ອັນນີ້ກໍຕ້ອງຂໍຂອບໃຈທຸກພາກສ່ວນ.

ສ່ວນ ຊາຍໜຸ່ມຜູ້ທີ 2 ກໍເວົ້າວ່າ : ກະຢາກຂອບໃຈ ຕໍາຫຼວດໄທເຂົາເນາະ ເຂົາກະເຕັມໃຈຊ່ວຍເຮົາ ຈົນສົ່ງກັບມາຢູ່ບ້ານໄດ້ ເຂົາກະພະຍາຍາມຊ່ວຍເຮົາທຸກຊ່ອງທາງ ເຂົາກະຊ່ອຍເຮົາທຸກເລື້ອງ ຈົນສົ່ງກັບມາຢູ່ບ້ານໄດ້ນ່າ.

ສໍາລັບຊາຍໜຸ່ມ ຜູ້ທີ່ 3 ກໍ່ເວົ້າວ່າ: ຢາກຂອບໃຈ ທາງນັກຂ່າວ ເສຣີ ນີ້ແຫຼະ ພໍ່ ວ່າ ເປັນເອື້ອຍ ທີ່ຕິດຕໍ່ຫາທາງເຈົ້າໜ້າທີ່ ທີ່ີໄດ້ໂທລົມ ແບບລົງຂ່າວ ໃຫ້ເຂົາກົດດັນ ເຂົາກະຕິດຕາມຂ່າວລາວເຮົາຕະຫຼອດ ວ່າເປັນຈັ່ງໃດໆ ເຂົາກະກົດດັນ ລະກະມີປັນຫາ ກັບເລື່ອງທີ່ ເຮົາເອົາລົງນີ້ຄືກັນ ກະຂອບໃຈຫຼາຍໆ ທີ່ຊ່ອຍເຫຼືອ ພວກນ້ອງອອກມາໃນມື້ນີ້.

ທີ່ທ່ານ ໄດ້ຮັບຟັງຜ່ານໄປນັ້ນ ກໍ່ແມ່ນເຫດການຄວາມເປັນຈິງ ທີ່ເກີດຂຶ້ນກັບຊາຍໜຸ່ມຍິງສາວລາວ ໃນທຸກມື້ນີ້ ບໍ່ສະເພາະ ແຕ່ຢູ່ໂຮງກາສິໂນຂອງຈີນ ທີ່ເມືອງເມຍວະດີ ປະເທດ ມຽນມາ ເທົ່ານັ້ນ ຍ້ອນສະພາບຊີວິດ ການເປັນຢູ່ຂອງຄອບຄົວ ທີ່ບີບບັງຄັບ ໃຫ້ຕ້ອງດີ້ນຮົນ ເພື່ອເອົາໂຕລອດ ຈຶ່ງຖືກຕົວະຍົວະ ໃຫ້ຫຼົງທາງໄດ້ ໂດຍງ່າຍ.

ເຊິ່ງຫຼາຍໆຄົນ ກໍ່ໂຊກດີ ໄດ້ກັບມາຫາຄອບຄົວ ຜູ້ໂຊກຮ້າຍ ກໍ່ຍັງຖືກບັງຄັບ ຖືກທໍລະມານ ຫຼາຍໆຄົນກໍ່ຫາຍສາບສູນ ໄຮ້ຮ່ອງຮອຍ ຫຼາຍໆຄອບຄົວ ກໍ່ໄດ້ແຕ່ໂສກເສົ້າເສຍນໍ້າຕາ ກັບເຫດການທີ່ເກີດຂຶ້ນ.

ທ້າຍສຸດນີ້ ຫວັງວ່າ ການບອກເຕືອນ ຂອງຜູ້ທີ່ໄດ້ປະສົບພົບພໍ້ ກັບຄວາມທຸກທໍລະມານຕ່າງໆ ຜ່ານມານັ້ນ ຄົງຈະເປັນອຸທາຫອນ ໃຫ້ແກ່ຊາຍໜຸ່ມຍິງສາວລາວ ກ່ອນທີ່ຈະຕັດສິນໃຈ ໄປເຮັດວຽກຢູ່ປະເທດເພື່ອນບ້ານ ທີ່ອາດຈະໄດ້ ບໍ່ກຸ້ມເສຍ. ສະບາຍດີ